رواية ليالي الفهد الفصل الحادي والعشرون 21 بقلم سارة أحمد

انتشرت الاخبار سريعا ليصبح حفل زفاف نجل المنياوى وعائلة العدنان حديث البلد

واصبح هناك الملايين يشاهدون مقاطع الفيديو من مؤيدين ومن المعارضين

هناك من سب ما فعلته عاليه وطالبوا محاكمتها وطالبوا رفع قضيه لانتهاكها حرمة الدين وعنصريتها وهناك من راى ان الامر ليس له صله بانتهاك حرمة الدين وان كل ماهناك هو غيرة بين زوجة فهد العدنان وطليقته .

فى سرايا العدنان

تنزل ملك الدرج سريعا تهتف قائله: ماما ماما

زينب: فى ايه يا ملك !؟

ملك :بابا فين ؟

زينب :فى حاجه ولا ايه !!؟

بصى ياماما الفيديوهات دى اترفعت على اليوتيوب والناس كلها بتتكلم عن اللى حصل

زينب:ازاى مين عمل كدا

ملك: اكيد حد كان موجود فى الفرح وصور اللى حصل كله

زينب: فهد مش هيسكت وهيبهدل الدنيا

ملك:كل الناس قامت على عاليه والكل بيطلب برفع قضيه عليها

زينب: الناس عايزه مشاكل ومصايب ويتفرجوا

ملك : لا ياماما الناس عايزه الحق

اللى عملته عاليه دا انتهاك لحرمة الدين

زينب:عاليه مكانتش بتفكر فى الموضوع من ناحية الدين عاليه كانت عايزه تهين فهد ومراته.

ملك :انا عارفه وكلنا عارفين بس طبعا فى ناس تانيه شايفين الموضوع انه عنصريه او اتضهاد للحجاب واكيد يا ماما مهما كان الكره او الغضب مكانش ينفع انها تقلعها نقابها وحجابها كدا قدام الناس كلها

زينب :طيب ماهو اكيد يابنتى والعمل دلوقتى .

ملك :مش عارفه

دلفت جهاد برفقة والدها يلقون السلام

زينب وملك :وعليكم السلام ورحمة الله وبركاته

زينب: كويس انك جيت ياحج

سالم: فيه حاجه ولا ايه يا ام جهاد

ملك: شوف يابابا

سالم :ايه دا ؟

بعد عدة دقائق لمشاهدة سالم للفيديوهات هتف قائلا : مين اللى عمل كدا !!؟

جهاد :دا اكيد حد عايز الشهره او حد عايز المشكله تكبر

زينب: المهم دلوقتى هنعمل ايه وفهد لو عرف هيتصرف ازاى ؟

سالم : متقلقيش فهد عاقل ومش هيشغل دماغه بكل دا

ملك : ربنا يستر يابابا دا الموضوع بقا تريند عالفيس بوك

سالم : بقا ايه ؟

ملك : اقصد يابابا ان كل الناس مهتمه بالموضوع ومعندهمش حاجه يتكلموا فيها غير اللى حصل دا

سالم : وهى كل الناس سابت اللى وراها واللى قدامها وسايبين حالهم عشان يتكلموا على مشاكل الناس !!!!؟

زينب:المهم يا حاج تكلم فهد وتعرفه وتخليه يهدى وميشغلش باله

سالم : طيب انا هتصل بيه بس الرجاله مستنينى فى المندره هشوفهم واكلمه

فى غرفة فهد بالفندق

فهد : ليااالى

ليالى : ايوه يا فهد

فهد : خلصتى ياحبيبتى

ليالى : ايوه خلاص ياحبيبي جاهزه

قبل فهد جبهتها وامسك النقاب واسدله على وجهها وهتف قائلا: يلا بينا عشان عدى واسماء تحت من بدرى

نزل فهد وهو يمسك بيدها حتى اقترب من عدى واسماء

عدى : ياسيدى والله احنا اللى عرسان ومن حقنا نتاخر ومع ذلك نزلنا بدرى عنكوا

فهد : بس ياااض الملكه ليالى تتاخر براحتها وانت تقف تستنى

عدى : سمعا وطاعه ياسيدى

فى ذلك التوقيت كانت ليالى تسلم على اسماء وتهنئها

عدى : اللى يشوفكم كدا ميقولش انكوا كنتوا مع بعض امبارح دا انا وفهد ممكن نتغرب بالشهور فى مهمات واخرنا ناخد بعض بوكسين لما نشوف بعض

اسماء: يابنى احنا كائنات رقيقه ولينا قلب وبنحس

عدى: دا على اساس ان احنا ايه كائنات فضائيه وماشيين ببطاريات مش بقلب

اسماء: لا بس احنا مرهفين الاحساس

عدى:مرهفين !!؟طيب قدامى يا مرهفه

ضحك الجميع وذهبوا الى مطعم فاخر وجلسوا

فهد : هاه يا حبيبتى هتاكلى ايه ؟

ليالى : اللى هتاكل منه ياحبيبي

عدى :احمم ها يا مرهفه هتاكلى ايه ؟

اسماء: هاااا هاكل من اللى هتاكله ياخفيف

عدى : انا هطلب جمبرى

اسماء: لا اسماك تانى لا كفايه امبارح

عدى بغمز لاسماء: ليه ؟

أسماء بخجل : عدى اتلم واطلب اى حاجه تانيه غير الاسماك

فهد : هو احنا جوزناكوا عشان تعقلوا اجننتوا اكتر

عدى: بقولك ايه انا مستلمها مجنونه جاهزه

اسماء: والله ياسي عدى

عدى :دى موكا دى اعقل واحده فى الدنيا ملكش دعوه بيها يافهد

فهد : انا كلمتها هتجيبلى نصيبه

اسماء باستغراب : مالك يا ليالى مش بتتكلمى ليه فيه حاجه ؟

ليالى : لا ابدا انا بس قلقانه شويه على زينه ماتكلمهم يافهد نطمن عليهم وعلى زينه

مد فهد يده يمسك هاتفه من على الطاوله ليتفاجئ برنين الهاتف

فهد :اهو ياستى كانهم سامعينك عمى بيتصل

ضغط على زر الرد وهتف قائلا: السلام عليكم ورحمة الله وبركاته

سالم : وعليكم السلام ورحمة الله وبركاته

فهد : ازيك ياعمى كنت لسه هكلمك حالا

سالم : القلوب عند بعضها ياحبيبي

طمنى عليك وعلى مراتك

فهد : الحمدلله بخير

سالم : شوفت اسماء ولا عدى

فهد : اه قاعدين بنتعشى سوا اهوه

سالم :طيب ياحبيبى بالف هنا وصحه

المهم انكم بخير

فهد:الجماعه عندك بخير

سالم : كلهم بخير الحمدلله

فهد :وزينه

سالم :متقلقش عليها هى دايما قاعده مع جدتك فى اوضتها او مع ملك

فهد :طيب ياعمى ربنا يباركلى فيكم

سالم : ويبارك لنا فيكم ياحبيبي وترجعوا بالسلامه

فهد : الله يسلمك ياعمى

عمى هو فيه حاجه حاسس من صوتك انك عايز تقولى حاجه

سالم : فهد انت فتحت تلفونك النهارده

فهد : لا انا اول مره افتحه دلوقتى عشان ارد عليك هو فى ايه ؟

سالم : افتح البتاع اللى اسمه الفيس دا

فى ناس منزله كل اللى حصل فى الفرح والدنيا مقلوبه

فهد : ازاى ياعمى ناس مين ومنزلين ايه

سالم :انا عايزك تهدى يافهد وتفكر قبل ماتتصرف

فهد :متقلقش ياعمى بس افتح واعرف فى ايه الاول .

سالم : ماشي ياحبيبي المهم عشان خاطرى متشغلش بالك بكره الناس تنسي والموضوع يخلص

فهد :ماشي ياعمى خير

سالم : يلا مع السلامه

فهد :مع السلامه

عدى : فى ايه يافهد ؟

فهد :عمى بيقول ان المشكله اللى حصلت فى حد صورها ونازله عالنت

عدى :ازاى يعنى

فهد :افتح فونك وانت تشوف

بعد عدة دقائق من مشاهدة الاخبار والفيديوهات المسربه وآراء الناس

فهد : يا ولاد ال********

عدى: هنعمل ايه ؟

فهد : معاك رقم هيثم طبعا

عدى :معايا

فهد :خليه يدخل يعرف اصل الحوار دا عند مين ويتابع الصفحات اللى نزل عليها الخبر

عدى :تمام

ابتعد عدى بهاتفه وغاب لبضعة دقائق ثم عاد يهتف قائلا : تمام هيتصرف ويكلمنى

التفت فهد لليالى ليجد الدموع تملأ عينيها فهتف قائلا: مالك ؟

ليالى : خايفه ومكسوفه اوى من اللى حصل

فهد :انتى ملكيش ذنب فى حاجه وكمان مفيش حاجه حصلت تكسفك اللى المفروض تتكسف هى اللى اتصرفت بهمجيه

عدى : خلاص موضوع وهينتهى متنكدوش على نفسكوا وبعدين انا شايف انا اغلبية الناس بيطالبوا بحق ليالى وبحق الدين اللى اهانته عاليه بتصرفها

فهد : عاليه مكانتش تقصد كدا خالص عاليه كانت مغلوله والحقد عمى عينيها وكل اللى تقصده اهانة ليالى واهانتى بس اهو السحر اتقلب على الساحر وهى اللى وقعت فيها

بس انا متاكد ان فى ايد تانيه فى اللى حصل دا عاليه اضعف بكتير من انها تفكر تعمل كدا او انها تيجى الفرح من اصله

اسماء: عندك حق يافهد عاليه طول عمرها تصرفاتها مش من عقلها من عقل ميس وميس دى شيطانه ممكن تعمل اى حاجه .

فى شقة عاليه

عاليه بصراخ : انا مش عارفه اعمل ايه يا ميس انا كل الدنيا بقت عليا الناس كلها بتطالب برفع قضيه عليا عشان مين عشان الحثاله دى

ميس: طبعا مش مرات الرائد فهد العدنان وفهد ايده طايله وبيعمل كل دا عشان حب حياته

عاليه : انا مش هسيبها تتهنى بيه انا هقتلها عارفه يعنى ايه هقتلها

ميس: ايه اللى انتى بتقوليه دا بس

عاليه :اعمل ايه طيب ؟

ميس بخبث: هو اكيد مفيش قدامك حل غير دا بس انا خايفه عليكى

عاليه: قصدك ايه انتى عايزانى فعلا اقتلها

ميس: اللى زى دى مش هنقدر نخلعها من حياة فهد غير بالطريقة دى

عاليه : طيب بس ازاى ؟

ميس: انا هقولك بس اصبرى عليا لما ادخل السرايا وانا مرات عصام العدنان وهتعرفى انا هعمل ايه عشان اختى حبيبتى

عاليه: بجد ياميس هتساعدينى ؟

ميس: طبعا ياحبيبتى امال ايه دا انتى اختى الوحيده اللى بتخاف على مصلحتى

عاليه: طبعا

ميس بشر :انا كمان بخاف عليكى ياحبيبتى وعشان كدا هساعدك .

فى سرايا العدنان

صدح صوت رنين هاتف سالم العدنان فاجاب قائلا:السلام عليكم ورحمة الله

ازيك ياحج محمود

محمود المنياوى: وعليكم السلام ورحمة الله وبركاته ازيك انت يا حج سالم واخبار العائله الكريمه

سالم : الحمد لله بخير

محمود المنياوى : وصلك اللى حصل

سالم : وصلنى بس هنقول ايه ربنا ينتقم من اللى كان السبب

محمود المنياوى :فى ناس رفعت قواضي على عاليه

سالم : احنا مكناش عايزين مشاكل وحق مرات ابننا جوزها عارف كان هيجيبه ازاى

محمود المنياوى: انا مش عايزكم تشغلوا بالكم ابدا

سالم : منهم لله نكدوا علينا وطفوا فرحتنا

محمود المنياوى: لا ولا تشغل بالك وانا عندى ليك حاجه تفرحكم ويارب تكون مقبوله

سالم : حاجة ايه دى يا حج محمود

محمود : احنا كنا عايزين نيجى نشرب معاكم الشاى انا ومرات اخويا الست خديجه وابنها الباش مهندس ادم

سالم :تنوروا ياحج محمود دا البيت بيتكم

محمود المنياوى:ربنا يباركلك ياحج سالم و احنا نتمنى ان الشاى يبقى شربات ونتشرف بنسبكم للمره التانيه

سالم :احنا تحت امركم بس فى مين !!؟

محمود : فى الكتكوته الصغيره ملك

سالم : هههههههه ملك بس دى لسه صغيره دى لسه يدوب داخله اولى جامعه

محمود : ما احنا برده عريسنا صغير بس راجل ويعتمد عليه

سالم : عموما انتوا تنورونا وان شاء الله خير

محمود : الجمعه الجايه ان شاء الله

سالم : الوقت اللى يناسبكم يا حج محمود احنا فى انتظاركم

محمود : متشكر جدا ياحج سالم

سلاماتى للحاجه الكبيره والست زينب والبنات .

سالم : يوصل يا حج

محمود : يلا فى رعاية الله

سالم : فى رعاية الله

فى فيلا المنياوى

خديجه : ها ياحج محمود كلمته

محمود المنياوى :كلمته ياستى وكل حاجه تمام بس انت يا ادم هتسافر تانى ؟

ادم : اكيد ياعمى انا كل شغلى بره انت عارف

محمود :طيب والعروسه دى لسه فى اولى جامعه

ادم :ما انا ياعمى هخطبها واسافر وارجع انزل نتجوز واخدها معايا ولو هيبقى فاضلها سنه تنزل تمتحن وترجع

خديجه :انا يا ادم تعبت يا ابنى من السفر بره انا نفسي اقعد بقى فى مصر مع حبايبي وصحابي وجيرانى نفسي لما اموت اندفن فى بلدى

ادم : بعد الشر عنك يا امى متقوليش كدا

خديجه : مش هى دى الحقيقه يا ابنى

ادم :بس انا مش هقدر اسيبك تعيشي فى مصر لوحدك يا امى

محمود المنياوى : واللى يحللكم المشكله دى بس والدتك توافق يا ادم

خديجه : ازاى ؟

محمود المنياوى:اتجوزك

تحدقت عين ادم ووالدته واحمر وجه خديجه بشده فهى امرأه صغيره فى العمر ملامحها جميله من يراها لا يعطيها سنها ابدا فالبرغم من انها بدات عقدها الخامس ولكن من يراها يحسبها اقل من ذلك

محمود : هاا قولتوا ايه ؟

خديجه : انا اخدت عهد على نفسي انى مستحيل اتجوز بعد المرحوم وهعيش حياتى كلها لابنى بس

محمود : واديكى عيشتى حياتك لابنك واديتى رسالتك ودلوقتى ابنك هيعيش حياته ولازم نقضي الباقى من عمرنا لنفسنا شويه احنا خلاص كدا عملنا اللى علينا معاهم ووصلناهم لاول طريقهم

خديجه بتلعثم : بس ا ا

محمود المنياوى: والله دى حاجه مفيهاش كسوف ولو مش موافقه تقدرى تقولى وهتفضلى بالنسبه ليا اختى وطبعا انا مش هسمع ردك دلوقتى اتشاوروا وانا تحت امركم .

فى الفندق

فهد : يلا بينا احنا يا ليالى نطلع عشان لازم اسافر بكره

عدى : جاتلك مكالمه ولا ايه ؟

فهد :الباشا بنفسه كلمنى

عدى : فى جديد ؟

فهد بغمزه فهمها عدى : لا ابدا شوية اوراق هتتظبط فى الشغل

عدى بضيق وقد فهم ان هناك مهمه ذاهب اليها صديقه

عدى : ربنا معاك يا صاحبي

اسماء:ولازم بكره يافهد مينفعش تتاجل شويه

فهد : لا ياموكا مش هينفع والله وبعدين عشان نسيبكم براحتكم شويه

اسماء: بالعكس دا انا مبسوطه لوجودكم معانا

ومبسوطه ان ليالى غيرت جو بعيد عن البيت شويه

فهد : ان شاء الله لما ارجع هحجزلها فى المكان اللى تختاره عشان اعوضها شهر العسل بتاعنا .

عدى بقلق: المهم تاخد بالك من نفسك

فهد : متقلقش ياحبيبي ان شاء الله سهله

يلا نسيبكم احنا بقا عشان الحق انام ساعتين واقوم ارجع ليالى البلد وارجع تانى عالشغل

عدى :ماشي ياصاحبي اشوفك على خير باذن الله

سلمت اسماء على فهد وليالى واحتضن عدى فهد قائلا بهمس:خد بالك من نفسك يافهد وارجع لنا بالسلامه

فهد : متقلقش ياصاحبي سهله باذن الله

عدى : لا اله الا الله

فهد : سيدنا محمد رسول الله

فى غرفة فهد وليالى بالفندق

دلفت ليالى الى الحمام تنعم بحمام هادئ وارتدت منامه سوداء جميله واسدلت خصلاتها فهتف فهد قائلا: لا انتى كدا هتخسرينى شغلى وشكلك نوياها

ليالى : انا ليه بس ؟

فهد : ما هو لما انتى كل شويه تحلوى كدا هتجننينى معاكى

ضحكت ليالى وهتفت قائله : طيب قولى بصراحه انت طالع مهمه

امسك فهد وجهها بيديه وهتف قائلا: ليه بتقولى كدا ؟

ليالى : قلبي مقبوض وحسيت من كلامك ان مش موضوع اوراق وانك طالع مهمه

فهد:ايوه ياليالى عندى مهمه بس بسيطه يعنى مفيش حاجه تقلق

ليالى :هتغيب ؟

فهد : اسبوعين

ليالى : كتير يافهد

فهد : معلش ياقلبي هرجع ان شاء الله حجزلك فى اى مكان تحبيه

ليالى ببكاء طفولى : مش عايزه اروح مكان عيزاك انت جنبي كل دقيقه فى عمرى

فهد وهو يمسح دموعها : طيب وليه الدموع بقا يعنى عيزانى لما اقعد افكر فيكى افتكرك وانتى بتعيطى كدا عشان قلبي يوجعنى

وضعت كف يدها على صدره قائله: سلامة قلبك يا نور عينى

فهد : خلاص يبقى تضحكى وتاخدى بالك من نفسك عشان خاطرى وتاخدى بالك من زوزه

ليالى : فى عينيا يافهد

فهد : تسلميلى ياقلب فهد

عايز اقولك كلمه مهمه بقا تفتكرينى بيها لحد ما ارجع ان شاء الله

ليالى : قول يا حبيبي كلمة ايه ؟

وجدت نفسها فجأه فى الهواء على ذراعيه يحملها متجها بها الى فراشهما فضحكت قائله : انت مجنون يافهد

فهد : مجنون بيكى يا اجمل ليالى الفهد

فى احد الاماكن فى القاهره تجلس اسماء وهى تاكل المثلجات هتف عدى قائلا: ايه يا موكا بقا مش كفايه كدا ياروحى ونروح بقا الجو بدأ يبرد

اسماء: دا الجو حلو اوى ياعدى

عدى: طيب انا كدا هبرد منك يا ماما عيب مينفعش كدا دا انا حتى عريس يا جدعان

تذمرت اسماء بطفوله قائله: طيب خلاص يلا

همت لتذهب ولكن اوقفتهم مجموعه من الفتيات صديقات عدى

احدى الفتيات : عدى ازيك ؟

عدى : اهلا ازيك يا سلمى

سلمى : انا تمام

نظر فهد لباقى الفتيات قائلا: ازيكم

الفتيات : اهلا ازيك ياعدى

سلمى :مبروك عرفت ان فرحك كان امبارح

عدى :اه الله يبارك فيكى عقبالك

احدى الفتيات : واللى فرحه كان امبارح يخرج النهارده ايه لحقت تزهق من العروسه

تقدمت اسماء من عدى تضع يدها فى يده قائله : لا يا حلوه بيفسح العروسه

سلمى : معلش هى متقصدش

نفس الفتاه: ايه دا هى دى العروسه مش قولتلك قبل كدا تعالى اتجوزنى يا واد ياعدى قولتلى ان مش بحب السود اديك وقعت فى اسمر يا سماره

قبل ان ترد اسماء هتف عدى بحس فكاهته قائلا: انا فعلا مش بحب السود وانتى سوده اوى من جوه يا مى اما مراتى فهى من برا شيكولاته سمرا ومن جوه شيكولاته بيضا

سلمى : فعلا ياعدى مراتك اموره ربنا يباركلك فيها متزعليش يا مدام ....

عدى : اسماء

سلمى : عاشت الاسامى متزعليش يا مدام اسماء مى بتحب تهزر بس والله طيبه

مى : متزعليش يامزه حنا بنهزر معاكى طيب ما انا كمان اسمر يا سماره والسمار نص الجمال ولا ايه

ابتسمت اسماء قائله : اكيد

عدى : عملتى الواجب يامى يلا انصرفى

مى : متشكرين ياحضرة الظابط

ضحكت الفتيات وذهبن

واخذ عدى يد اسماء وهتف قائلا: اضايقتى

اسماء:ليه ؟

عدى:كلامهم زعلك ؟

اسماء: لا ابدا هما باين عليهم واخدين عليك وبيتكلموا بعشم

عدى: بتغيرى

اسماء:عليك مش منهم انا شايفه نفسي حلوه

عدى:اعتبر دا غرور

اسماء:لا دى ثقه

كلنا حلوين ياعدى مفيش واحده مش حلوه انا مثلا سمرا وفيه واحده بيضا وفيه واحده شقرا

انا عينيا واسعه وفيه غيرى عينيه دايقه

كل واحده فى الدنيا اتخلقت لها نسبة جمال معينه فيه احلى منها كتير وفيه اقل منها فى الجمال كتير المشكله مش فينا المشكله فى اللى شايفنا وكل راجل بيدور على جمال معين ولو الراجل اللى معايا شايفنى وحشه يبقى انا اللى اختارت غلط اختارت انسان مش شايفنى مشافش الحلو اللى فيا

عدى :انا شايفك اجمل واحده فى الدنيا وانا شايفه نفسي بعينيك عشان كدا بتكلم بثقه

لكن لو اتغيرت نظرتك ليا اكيد هتكسر ثقتى بنفسي .

حملها عدى وظل يلف بها امام الجميع وهو يهتف بصوت عالى قائلا : بحبك يامووووكااا

اسماء:يا مجنوووون

صفق لهم الجميع فانزلها عدى وامسك يدها وجريا سويا من امام الجميع تحت ضحكاتهم وتشجيعاتهم.

فى سرايا العدنان يجتمع الجميع على طاولة الطعام

فهتف سالم قائلا: انا كنت عايز اخد رايكم فى حاجه كدا

زينب:اتفضل ياحج

الفتيات: اتفضل يا بابا

سالم :فى عريس متقدم لملك

تحدقت اعين ملك وضاق صدرها

زينب:ملك لسه صغيره يا حج وبعدين انا مش هجوز بنتى الصغيره قبل الكبيره

سالم :ومن امتى واحنا بنفكر كدا يا زينب واهيه اسماء اتجوزت قبل جهاد

زينب:لا بس قبل كدا كانت متجوزه وكان فرح اسماء متحدد

جهاد:وليه ياماما هتربطى نصيب اختى وحياتها بنصيبي وحياتى انا خلاص جربت حظى مره

زينب :يعنى ايه ؟

جهاد :يعنى يابابا بعد اذنكم انا عايزه اسافر اكمل طريق تعليمى بره

زينب: تسافرى بره يعنى ايه وفى الاخر اخرك الجواز

جهاد :يا ماما نجاح المرأه مش بس فى الجواز ممكن ربنا مأردش انى انجح فى الجواز و يقدرلى انجح فى مشوار تانى

زينب: يعنى ايه بقا ان شاء الله

جهاد :يعنى مع احترامى لبابا حياة الست مش راجل بس فى حاجات تانيه ممكن انجح فيها

سالم : انا رأيي من راى جهاد

زينب: يعنى ايه بقا ياحج انت معاها فى موضوع سفرها دا

طيب هتأمن على بنتك تسافر بره لوحدها

جهاد: متقلقيش ياماما انتى عارفه مين اصلا هو اللى فتح الموضوع معايا وهيقف جنبي فيه مؤمن ابن خالى عبد القادر

هو موجود هناك وهياخد باله منى دا غير انى هبقا عايشه مع فاطمه اخته .

سالم : اللى فيه الخير يقدمه ربنا بس هنستنى برده لما ييجى فهد وناخد رأيه هو اخوكى الكبير وعارف مصلحتك وادرى بالامور دى منى .

جهاد : امرك يا بابا

سالم :وانتى ياعروستنا

تحشرج الطعام فى حلقها فهتف ابيها قائلا: ايه بالراحه بالراحه

ملك : احممم نعم يا بابا

سالم : انتى ايه رايك فى موضوع العريس دا؟

ملك بتوتر : انا تحت امرك يا بابا فى اللى تقول عليه

سالم : كدا افرضي وافقت

ملك : حضرتك ادرى واحد بمصلحتى يا بابا

سالم : تسلميلى يا زينب وتسلم تربيتك لبناتى .

زينب:طول تربيتك ياحاج

سالم : ولو برده هو انا كنت قاعد لهم ما انتى اللى ربتيهم وخدتى بالك منهم

المهم ها مش عايزين تعرفوا هو مين العريس

زينب : مين يا حاج

انتظرت ملك سماع الاسم وفى عيونها الخوف والقلق حتى استمعت الى صوت ابيها يهتف قائلا: ادم ابن عم عدى

انفرجت اساريرها فهى لاتعلم لماذا ولكن كل ما تعلمه الان انها على الاقل تعرف شخصيته ويعجبها كثيرا افضل من ان يكون شخص لا تعرفه .

زينب: لا هو ادم شاب كويس ومحترم وله مستقبل ووالدته ست محترمه وكويسه

سالم :ها يا ملك

ملك : زى ما قولتلك قبل كدا يابابا الراى رايك وراى فهد اخويا

سالم : عموما انا اديتهم معاد يوم الجمعه الجايه ييجوا وتتكلموا وساعتها اسمع رايك النهائي.

ملك : اللى تشوفه يا بابا

فى منزل سميره

سميره : انتى متاكده يا بت يا منى ان الواد دا اتعلق بيكى ؟

منى : ايوه ياستى قولت اه الف مره

سميره : وهو يعنى عشان جه خدك من وسط الشباب اللى ملمومين عليكى وقالك اتفضلى اقعدى خلاص

منى :ماهو انا لو مشغلوش مكنش عبرنى

سميره :ياريت يابت يا منى دا تبقى طاقة القدر اتفتحلنا

منى : متقلقيش هييجى

سميره بضحكه خبيثه :بس شوفتى اللى عملته مرات فهد الاولانيه فى ليالى

شعرت منى بضيق وهتفت قائله : بس والله يا اما صعبت عليا

سميره :صعبت عليكى ليه يا اختى

منى :مش بنت عمى دا انا كنت عايزه اروح امسك اللى اسمها عاليه دى واجيبها من شعرها مع انى طول عمرى مبقبلش ليالى دى ومعرفش ليه بس فى امبارح صعبت عليا اوى حسيت انها اتعرت قدام الكل وانا واقفه اتفرج عليها .

سميره :انتى هتحنى ولا ايه ؟

ايه يابنت سميره ؟

منى :يا اختى ولا هحن ولا هتنيل هى حره فى عيشتها المهم انا ربنا ينتعنى من ام البلد دى بقا

سميره : قريب يا بت بس يحصل اللى انا عيزاه .