رواية أحببت بصيرته الفصل الخامس والثلاثون 35 بقلم مريم نصار

نبيله : شهقت بخوف . وراحت قعدت قدامه ..

شريف : باصص ع الفون بصدمه ودموعه نازله بصمت ..

نبيله : بحيره . وحد الله ياشريف . انا عارفه انها بتبقى صدمه كبيره لما تاخد حد مثل أعلا ليك وتنصدم فيه لانك بتكتشف انه الد أعدائك .

. انا ديما كنت بشوف فيك الطيبه . لكن لما عرفت انك شريك خالك ف المؤامره دى.؟ قولت انى اتغشيت فيك .

.بس بعدها استغربت حنيتك علينا وع ولادى ومهتم بينا ومش حارم عيالى من حاجه .. حتى علاج صلاح انت الل اتكفلت بكل حاجه .

. ده يثبت إنك من جواك طيب . وإن مهما صلاح يزرع فيك الشر استحاله الجدر يقوا .

. الحق نفسك ياشريف . الحق صلح كل حاجه . فريده بتحبك جدا وافتكر انها عمرها ما قصرت معاك ف حاجه .

.طيب دى لو بتكرهك هتعاملك كويس ليه؟ ماهى عندها أملاك وفيلا وكمان ابنها . لو كانت بتكرهك كانت قالتلك اطلع من البيت .

. وكمان سليم بيخاف عليك ومبيستحملش عليك حاجه .. ولو كان سليم بيكرهك كان ابسط حاجه اخد نصيبه وبعد عنك .

. فكر ف إن فريده ديما عايزه تشوفك متجوز ومستقر ف حياتك ونفسها تفرح باولادك .

طيب دى لو بتكرهك هتتمنى ليك الاستقرار؟

.صلاح اخدك حتة عجينه وشكلك ع مزاجه . بس نسي أن ف رب وانه اكيد ف يوم الحقيقه هتبان ..

انا حاولت كتير انى اتكلم لكن كنت مُجبره اسكت . لكن لما انت كملت طريق خالك ..؟ انا مش هقدر استحمل واشيل زنبك لانك متعرفش إن خالك بيدبر لدمارك بعد مايستولى ع كل حاجه .

. وسبحان الله شوف نتيجة شره اهو تم السنه وهو ف غيبوبه . سنه ضاعت من عمرو ومين عارف لو كان لسه موجود كان مصيرك ايه دلوقتي ؟

.يمكن ربنا عمل كدا عشان انت تفوق لنفسك عشان انت من البدايه مالكش زنب لانك كنت طفل صغير .

بس دلوقتي انت راجل كبير وتعرف تفرق بين الصح والغلط . الحلال والحرام .

.حرام عليك نفسك وحرام عليك تدمر ثقة الست الل حبتك زى ابنها .

.وحرام عليك اخوك الصغير الل بيعتبرك ابوه . خالك صلاح دلوقتي بين ايدين ربنا . واكيد بيتمنى فرصه انه يرجع زى الاول عشان يصلح أخطاءه .

. فوق ياشريف . الدنيا دى كلها الل انتو بتقتلو بعض عليها متساويش عند ربنا . جناح بعوضه . فوق والحق نفسك .

----------------------بقلمى مريم نصار

شريف : مغمض عينيه وبيسمعها . وقلبه بيدق بوجع وحسره . لانه فعلا ماشي ع خطى صلاح .. بقى زيه ضحك عليه وخلاه شيطان ع هيئة انسان .

ورفع عينيه ليها وقال بتوهان وضياع يعنى خالى كان بيكدب عليا طيب ليه؟

.ده انا كنت صغير وحسيت أنه الوحيد الل بيحبنى و بيخاف عليا .؟

قالى حجات كتير اوى عن فريده وبابا . وقال إن ابويا كان بيكره امي وخد فلوسها شغلها وكبر بيها .

وقالى حجات كتير جدا عن فريده .. دا انا تعبت فريده اوى وكنت بقولها انتى خدامه انا صدقت خالى ..

صدقته ف كل حاجه .. هو . هو اتحايل عليا نقتل بس انا خُفت .. والله خُفت بس هو قالى ان سليم هياخد منى كل حاجه .. وانا مش هيكون ليا اى حاجه .وهعيش لوحدى .

قالى إن سليم امه بتحبه وعايشه معاه بس انا ماليش حد وهعيش لوحدى . انا كرهتم اوى .

.انتى متعرفيش انا مثلت عليهم قد ايه ؟ انا كنت لما بحاول احن ليهم خالى يرجعنى لعقلى .

يعنى .. يعنى انا كرهت الناس الل حبتنى .. وحبيت الل بيكرهنى .. ههههه خا..خالى ضحك عليا هههه ..خلانى افكر واخطط واقتل وف الآخر عشانه هو ..طيب ليه؟ ا.انا عملت ليه ايه؟ ضحك عليا ليه ؟

نبيله : بتعيط بوجع كبير ع حالة الضياع الل هو فيه .. ودعت ف قلبها وقالت حسبى الله ونعم الوكيل فيك يصلاح . كان عيل صغير مالهوش زنب منك لله .. منك لله ..

شريف : مسح دموعه و قام وقف بجمود وخرج من المكتب ..

نبيله : خافت وقامت بسرعه وخرجت وراه.

شريف : دخل عند صلاح .. وبص ليه بعدم تصديق .ومسك كتافه بقوه واتكلم بغيظ كبير .

.بقى انت يطلع منك كل ده ؟ وزعق عملتتتت فياااا كدا ليييييه؟

.ضحكت عليا وانا عيل صغير وكرهتنى فيهم كدببببت وضحكت عليااااا ليييييه؟

. انا اذيتك ف اييييه؟ مثلت عليا انك خايف عليا وعايز مصلحتى لييييه؟

كل ده عشانك انت ؟ يعنى انت كنت بتلعب بيا عشان مصلحتك انت ؟

.خلتنى اكره فريده وسليم وكمان كرهت نفسي .. وكل دا لييه؟ دا ابن أختك عايز تقتلنى ؟ انت عمللللت منى شيطااااااان ليييييه؟

نبيله : فتحت عينيها على الاخر بصدمه كبيره لأن ممكن صلاح يموت بين ايديه .

. وشدت شريف . سيبه ممكن يموت ف ايدك وتاخد زنبه هو كمان . سيبه لله وانت صلح كل حاجه . الحق نفسك وفوووووق سيبه ياشريف صلاح هيموووووت ف اييييدك ..

شريف : صك ع اسنانه بغيظ وقلبه كله كُره وغل وعينيه بتطلع شرار .

. وزق صلاح وسابه . انت مش لازم تموت دلوقتي . وزعق بصوت عالى جدا انت لازم تعيش وتفوق ..

لازم الشر الل زرعته فيا تحصده بأيديك .. لازم انتقم منك .. مش انت كنت عايزنى شيطان .. انا اهو إبليس واقف قدامك .

. ولازم ادفعك تمن كل كدبه كدبتها عليا وكل ظلم وقسوه .. لازم تدفع تمن كل حاجه عملتها معايا وتشرب من نفس الكاس .. وسابهم وخرج بغضب كبير جداااا ..

نبيله : لطمت ع وشها . وشافت شريف واحد تانى خاااالص . وخافت منه . وسابته يخرج .

وبصت ع صلاح بغيظ كبير وقالت منك لله دمرت بيت بالكامل ودمرت علاقة الاخوه عشان طمعك . اشرب بقى وبتمنى انك متفوقش لانك شيطان ع هيئة انسان ماشي ع الأرض ..

شريف : خرج من الشقه ونزل يجرى ع السلم زى ال هربان من حد .

. وركب العربيه بسرعه ومسك الدريكسيون بايديه وبينهج بسرعه كبيره . ومش قادر يتنفس .. وحس انه مخنوق جدا . وفك الكراڤت بسرعه . وبلع ريقه بصعوبه .. وحط وشه بين ايديه بصدمه.

بيحاول يستوعب .. ف لحظه واحده كل حاجه اتقلبت . كل الحقايق الل كان مقتنع بيها وعايش عليها طلعت كدبه كبيره من اعز انسان عنده .

خاله صلاح الل بيعتبره ابوه التانى . واخده مثل اعلى ليه . ومؤمن جدا إن مفيش حد بيحبه زى صلاح . . ومسح وشه بايديه

بيأس كبير . وبص قدامه وغصب عنه ابتسم بسخريه ودمعه نزلت منه . وغمض عينيه بوجع كبير . وفتح عينيه بجمود . وشغل العربيه وساق بسرعه كبيره جدا ...

----------------------بقلمى مريم نصار

عند فتون

فتون : لبست الاسدال وخرجت من الاوضه ومالقتش سليم موجود . وقالت كويس انه مشي .

. فاطمه قالت سليم قالى انا نازل شويه وراجع تانى . ادخلى جهزى الاكل بسرعه ..

فتون : استغربت هيروح فين؟ وقالت مش مهم . انا هدخل اعمله الاكل عشان يمشي بقى . ونفخت بغيظ من كل حاجه . ودخلت المطبخ . وحطت المكرونه ع النار . وبتجهز الفراخ . وبتعمل ف الصوص . وسرحانه . وقالت ياترى سليم أتأخر ليه كل ده ؟ اوووف وانا مالى ..

وبعدها وجهزت الفراخ الل هتحطها ع المكرونه .. وظبطت كل حاجه .. وعملت سلطه . وحمرت الفراخ . وجهزت شوية حجات جمب الاكل . وخلصت . واتغاظت أنه لسه مرجعش ومش عارفه ليه هي مضايقه لعدم وجوده قدامها ونفخت بضيق..

فاطمه : ندهت .. فتوون .

فتون : طالعه من المطبخ وماسكه الفوطه . نعم يا ماما ..

فاطمه : تعالى الله يكرمك يابنتى هاتى المسلسل الساعه ٩ . هو سليم أتأخر ليه كل ده؟

فتون : جابت المسلسل وقالت معرفش ..

فاطمه : اله مالك يافتون قالبه وشك ليه كدا ؟

فتون : ضحكت بتمثيل ابدا يابطه . دا انا مبسوطه اوى ..

الباب خبط ..

فاطمه : تلاقيه سليم جه بالسلامه افتحى يابنتى.

فتون : قلبها دق .. ولبست طرحة الاسدال .

فاطمه : باستغراب انتى هتلبسي الطرحه ليه؟ . سليم جوزك يابنتى .

فتون : بتوتر سبيها لوقتها يابطه . وراحت تفتح وجواها حماس كبير انها تشوفه تاني .. وفتحت الباب وقلبها دق بحب كبير..

سليم : رفع عينيه ليها وقلبه دق .. وابتسم بحب . ممكن ادخل ..

فتون : انتبهت ها ؟ احم وكشرت وشها اتفضل .

سليم : كشر عينيه . ودخل وشايل شنط كتير . وهمس ف ودنها والله بحبك .. وسابها وراح عند فاطمه بسرعه .

فتون : غمضت عينيها وقلبها هيطلع من مكانه وحطت أيدها ع قلبها ..

سليم : بطه القمر عامله ايه من غيرى اتاخرت عليكى انا عارف ..وبص ع فتون وشافها واقفه متوتره وضحك بصمت .

فاطمه : انا الحمدلله ياحبيبى . بس انت فعلا اتاخرت كنت فين يبنى كل ده؟ وايه كل الشنط دى ؟

سليم : دى ياست الكل شوية حجات ومستلزمات كدا تخص المطبخ ..

فتون : باندفاع .. انت جايب الحجات دي ليه ؟ انت جاى تدفع تمن اكلك عندنا ؟

سليم : قال بمكر . ومين قالك انى جايبلك الحاجات دى؟ انا.بتغدى كل يوم ف المطعم لحد ما فريده ترجع بالسلامه

ف انا فكرت . وقولت مراتى حبيبتى .. سليم مش هيهون عليها انه يتغدى بره .. مريم نصار ف انا جايب شوية حجات علشان انا هتغدى كل يوم هنا .. ولا ايه رأيك يابطه؟

فتون : قبضت ع ايديها بغيظ ملحوظ ..

فاطمه : بعفويه . طبعا يبنى زين ما عملت . واعمل حسابك كمان هتتغدى وتتعشى معانا كمان .

فتون : تنحت وفتحت عينيها ع الاخر بدهشه..

سليم : ابتسم بخبث . حبيبتى ربنا يخليكي ليا . وانا لايمكن ارفضلك طلب ابدا . خلاص يبقى غدا وعشا .. ولا ايه ياتونا ؟وغمز ..

فتون : بتعد من واحد ل عشره عشان تسيطر ع أعصابها .

.ونفخت بنفاذ صبر . وابتسمت ببرود وقالت والله ده بيتك تيجى وقت ما تحب بعد اذنكم هدخل اجهز الاكل ..ودخلت المطبخ وهي بتبرطم ...

سليم : ههههه . وهز راسه بسعاده .

فاطمه : بس يبنى ماكانش ليه لزوم تجيب اى حاجه انت كدا ع رأي فتون هتدفع تمن مجيك عندنا ..

سليم : الكلام ده تقوليه للغريب وانتى وفتون مسؤولين منى .

و انا لو عليا أخلى فتون تقعد ف البيت ومخليهاش تعمل اى حاجه ابدا ولا تشتغل . لكن انا عارف هي بتحب شغلها قد ايه ؟ وبعدين انتى خدتينى ف الكلام . وفتح الشنط وبيدور ايوه اهي . اتفضلى ياحبيبتي ..

فاطمه : بعدم فهم ايه العلبه دى ياسليم يبنى؟

سليم : دي علبه فيها تشكليه من المسليات يعنى كاجو ع فسدق ع لوز وعين جمل وكمان دى فيها فيشار . انا عارف انك بتحبى اوى الحجات دي وخصوصاً وقت المسلسل ..

فاطمه : ابتسمت بحب .. وفتحت العلبه وقالت ماشاء الله بس ده كتير اوي يبنى دول يكفو عيله بحالها ..

سليم : بألف هنا ياست الكل .

فاطمه : ربنا يباركلك يبنى ويبعد عنك شر ولاد الحرام ..

سليم : اتنهد بزعل آمين ..

فتون : واقفه ف المطبخ ومتابعه كل حاجه وابتسمت بحب من موقف سليم مع بطه .. لكن زعلت لما شافت ملامحه اتغيرت .. وفهمت انه زعلان بسبب شريف.. وشالت الصينيه وخرجت .. وحطتها ع التربيزه وقالت اتفضل .

فاطمه : لأ خدى الاكل وادخلوا جوه انا عايزه اتفرج ع المسلسل برواق ..

فتون : بزهول جوه فين ياماما ؟

فاطمه : يووه جوه ف اوضتك يابت اخلصى الإعلان خلص .. يلا ياسليم يبنى قوم اغسل ايدك وادخل كل ياضنايا . البيت بيتك .وسبونى اتفرج دى الحلقه الاخيره ومش عايزه افوتها.

سليم : ابتسم بفرحه . وقام انتى تؤمرى يابطه . ودخل الحمام ...

فتون : صكت ع أسنانها بغيظ وراحت ل فاطمه أنتى ياماما بتحرجينى ليه ؟ وازاى هنقعد ف اوضتى ها؟

فاطمه : بتاكل كاجو . امم الله صدقى يابت ياتونا الكاجو ده شكله من الاصلى طعمه حلو اىدوى .. مش زى عمك جمعه بيبعه بايظ .

. وبعدين اعتبريه اليخت يختى الل كنتو بتتعشو فيه وده جوزك مش غريب وانا واثقه فيكو .. وقومى خشي الراجل يقول علينا ايه ؟

فتون : قامت بنرفزه لأ دا انتو كلكو متفقين عليا بقى تشلوني ..

. وشالت صنية الاكل بغيظ ودخلت حطته ع تربيزه صغيره . ورجعت اخدت كرسي وحطته .. وسابت الباب مفتوح ع الآخر ..

سليم : غسل وشه وأيديه . وخرج . وبص ع البيت كويس وحس بيه بدفا غريب . وشاف فتون قاعده ع طرف السرير ومتنرفزه .

فاطمه : ادخل يسليم وبالهنا والشفا ياضنايا وخد راحتك وكل ياحبيبى متتكسفش .

سليم : هز راسه متشكر يا بطه . واخد شنطه من وسط الشنط .. ودخل اوضة فتون وقفل الباب حاجه بسيطه . وبص ع اوضتها بحب كبير رغم بساطتها لكن جواه شعور جميل ومكتفى بيها بكل حالاتها ..

فتون : نفخت استغفر الله العظيم يارب . ممكن تتفضل عشان تتغدا ..

سليم : حط الشنطه ع السرير .. وشد الكرسي جنبها وقعد امم هتصدقيني فعلا لو قولتلك انى لسه مفطرتش لحد دلوقتي ؟

فتون : قلبها زعلان عشانه . لكن بتحارب نفسها عشان متضعفش . وقالت طيب اتفضل اتغدى ..

سليم : طيب مش هتأكلينى زى كل مره..

فتون : قلبها دق . وقالت دلوقتي الحمدلله انت تقدر تأكل لوحدك ..

سليم : بزعل حقيقي يعنى انتى كنتى بتأكلينى عشان كنت اعمى مش علشان بتحبينى ؟

فتون : ضغطت ع شفايفها ولعنت نفسها ... احم انا مقصدش كدا . وبعدين . انت بتتكلم بعشم اوى كدا وانت عارف انى مش عارفه اتخطى الل حصل ..

سليم : والل حصل ده كان علشانك انتى مش علشانى .

. انا قولتلك انى عملت كل ده عشان خايف عليكى من شره .

. فتون انا لو رجعت تانى بالزمن هعمل زى ما عملت اول مره .

. انا معنديش استعداد اخسر اكتر من الل خسرته . ولا هسمح لأى حد أنه يبعدك عنى . فتون انا مستعد اموت علشانك . ومسك كف أيدها وباسه . عشان خاطر سليم بجد سامحينى .

فتون : بتسمعه وجواها حزن كبير . وزعلت أنه جاب سيرة الموت .. واتحرجت لما باس ع أيدها .. وسحبت أيدها . وقالت ارجوك لوسمحت . انا محتاجه لشوية وقت افكر ..

سليم : يعنى الحب الل بينا مش كافى يشفعلى عندك ؟

. انا وجعتك عشان ابعدك عن خطر حقيقي . موجعتكيش بقصد منى .

.وكمل بغضب انا كنت بموت ف الثانيه الف مره. وانتى بعيده عنى . انا كنت ف الضلمه لوحدى وخطر شريف محاوطنى .

. أمى كانت ممكن تروح فيها وانتى كنتى هتتسجنى.

وانا لو كنت دافعت عنك كنت هخسركو انتو الاتنين .

. انتى لو عايزه تسميها انانيه منى . سميها . ايوه انا انانى . ومن دلوقتى هكون انانى اكتر من اى وقت فات .

. هحافظ عليكى لآخر يوم ف عمرى . اى حد يقرب منك بس انا ممكن امحيه من ع وش الدنيا لان ده حقى.

. انتى ليا انا وبس ومش هسمح إنك متكونيش بخير ابدا . وقام وقف بغضب...

فتون : من جواها فرحت لحب سليم ليها . وخافت عليه من أسلوبه الحاد وغضبه . وقامت وقفت ..

سليم : انا ماشي ..

فتون : ضغطت ع شفايفها بزعل . لأ متمشيش انت لسه ما اكلتش ..

سليم : مسح وشه بايديه بتعب .. انا مش عايز اكل .

.انا عايزك انتى .

. انا فكرت اول ما تعرفى انى رجعت فتحت تانى كنت متوقع منك.رد فعل تانى .

.. انا مايهمنيش اى حد قالى مبروك قد ما اتمنيت انى اسمعها منك او اشوف الحب منك والفرحه ف عينيكى وانك تتخطى كل حاجه ف سبيل انى رجعت للنور من تانى ..

كان نفسي ف فرحه كامله بس للأسف . واتنهد بوجع ولسه مواجهتى مع شريف .

. صدقينى إن كنتى انتى زعلانه ف انا قلبى مدمر بسبب الل انا فيه .واسف انى اخدت من وقتك . وخدى اكبر وقت كافى .. بعد اذنك ..وجه يتحرك ..

فتون : بسرعه مسكت أيدو . وقالت بدموع رايح فين ...

سليم : باصص بعيد . متشغليش بالك بيا وخدي وقتك متخافيش انا عمرى ما هتخلى عنك . وقت ما تسامحينى انا موجود ف اى وقت ..

فتون : اتخنقت بالعياط .. وهمست بوجع سليم ..

سليم : حس بنبرة صوتها ولف ليها .. وشافها بتعيط بصمت . واتخنق اكتر ..

فتون : منزله وشها ف الارض و بتعيط بوجع لانها كانت نفسها تشاركه فرحته الكبيره..

سليم : متحملش اكتر من كده . وشدها لحضنه وضمها لقلبه .. وغمض عينيه بوجع انا اسف . بجد اسف ..

فتون : بتعيط بصوت مكتوم . ورفعت ايديها ع ضهرو وضمته وكلبشت فيه وبتعيط ..

سليم : بيمسد ع حجابها .بس ارجوكي يافتون كفايه بقى انا اسف بجد . صدقينى كان غصب عني وجعك.

حبيبتى انا افديكى بروحي انتى متعرفيش انا بحبك قد ايه.

فتون : بتعيط ومبتردش عليه ........

سليم : ربت ع ضهرها بحنان . طيب متتكلميش بس اهدى وبطلى عياط . ومسد ع حجابها . وسابها ف حضنه تعيط لحد ما هديت ...

فتون : خرجت كل وجعها ف حضنه . وهديت وخرجت من حضنه بحرج ومسحت دموعها..

سليم : رفع ايديه ومسح دموعها . وباس جبينها . تعالى اقعدى .

فتون : قعدت ف وسط شهقات بسيطه جدا . ومبتردش ..

سليم : جاب كوباية ميا من ع الكمود . وقعد جنبها ع طرف السرير اتفضلى اشربى واهدى ..

فتون : هزت راسها لأ مش عايزه ..

سليم : اسمعى بس كلامى واشربى وهتكونى احسن . وشربها بايدو ..

فتون : شربت منه . وساكته .

سليم : بيمسد ع حجابها . ها احسن دلوقتي ..

فتون : هزت راسها ايوه ..

سليم : اخد راسها ع كتفه وضمها حقك عليا .

فتون : غمضت عينيها . واخدت نفس عميق ورفعت راسها وبصت ف عينيه بدموع وقالت .

. انا عايزاك تعرف ع قد زعلى منك . إلا انى اكتر واحده فرحانه إنك رجعت بخير وربنا استجاب وردلك بصرك من تانى .

. وخبتطه ف كتفه وقالت بدموع بس انت ضيعت فرحتى . ضيعت كل حاجه .

سليم : ابتسم بحب كبير ..ومثل أنه بيتألم . وقال احنا فيها . ممكن نعوض كل حاجه .. ايه رايك ؟

فتون : مسحت دموعها . وقالت ازاى يعنى كل حاجه ف وقتها بتبقى حلوه .

سليم : رفع دقنها بايدو . وقال انتى . لو قولتى دلوقتي سامحتك وكمان بضحكه منك هتخلى الفرحه والسعاده ف قلبى .

فتون : بحرج احم سامحتك ياسليم .

سليم : ضحك بسعاده كبيره . بجد يعنى مفيش عياط تانى هههههه اجمل كلمه سمعتها ..

فتون : ابتسمت بحب . وبصت ف عينيه وقالت مبروك ياسليم الف مبروك ع رجوع بصرك بجد انا اسعد واحده في الدنيا كلها بالخبر ده..

سليم : اتنهد بسعاده كبيره . ومسك ايديها وباسها . انا بجد الل اسعد واحد ف الدنيا علشان شوفت ضحكتك اخيرا .. فتون انا بحبك . بحبك اوى.

فتون : وشها جاب الوان . احم الاكل هيبرد .

سليم : بمكر . بس هتأكلينى بايدك تمام . انتى عودتينى ع كدا ..

فتون : قلبها بيدق بسرعه وهزت راسها تمام ..

سليم : اتنهد بحب . وعينيه ع فتون بياخد اسكرين لكل ضحكه ليها . وجاب الشنطه وقدمها ليها . اتفضلى ..

فتون : بعدم فهم ايه الشنطه دى ؟

سليم : طلع من الشنطه . بوكيه ورد جميل جدا . وقال اتفضلى ...

فتون : فتحت عينيها بانبهار .. واخدت البوكيه وكان رقيق جدا .. وعليه كارت اعتذار وفتحت الكارت .. ومكتوب عليه

( والتمسي لقلبى من الأعذار الفآ . ولا تتركى يدى يوما .. ف بعدك عنى حتما هلاكي . آسف)

فتون : قلبها بيدق بسرعه كبيره جدا . ومبسوطه ..

سليم : ابتسم بحب لما شاف فتون مبسوطه ..

فتون : ضحكت بسعاده . شكرا ياسليم . الورد جميل جدا ..

سليم : بمكر .. والأكل اجمل . انا اول مره اجوع كدا ..

فتون : هههه . حالا . وبرجفه بدءت تاأكل سليم .. ووشها احمر جدااااا .

سليم : بياكل بسعاده كبيره . ومستمتع وقال بجد احلا اكل أكلته ف حياتى . تسلم ايدك يا حبيبتي..

فتون : بحرج بألف هنا وعافيه . احم .

سليم : انتبه . صح ياتونا هو انتى ليه محجبه قدامى ؟ هو انا نص مِحرم ؟ ههههه

فتون : سابت الشوكه بتوتر . ها؟ لا ابدا . احم ياخبر نسيت اجيب سلطة الطحينه .

سليم : هههههههه . لأ اقعدى خلاص متتهربيش و انا شبعت وخليكى بالحجاب انتى قمر ف كل حاجه ..

فتون : بتوتر . متشكرا. وقامت شالت الاكل وجواها سعاده كبيره .. ورجعت بسرعه .. تشرب قهوه ولا شاى؟

سليم : ياريت قهوه ..

فتون : حاضر .. وراحت المطبخ ..

سليم : شاف اللوحه الكبيره الل الاطفال عملوها .

وقام من مكانه ووقف واتفرج عليها . ورفع ايدو يمشيها ع طريقة برايل . وابتسم .. واتفرج ع اوضتها وشاف كتب كتير ع مكتب صغير ..

ومفكره . بعنوان خواطر ل فتون مهران . واخدها وقعد ع طرف السرير . وشال القلم . وفتحها وقراء صفحه من بين الصفحات .

فتون ....

يحتاج المَرء ف النهاية شخصاً يتشارك معه تفاصيلهُ الصغيره ؛ أن يُراقب معه الغروب ، حركة الطيور ، يعدُّ معه النُّجوم ؛ يتأمّل الغُيوم شخصاً يشبهُه ؛ شخصاً يقفُ معه حتى نهاية العُمر بلا مللٍ ؛ بلا خوف ؛ بلا ضياع ..

شخصاً تتيقَّن تماماً من أنه باقٍ بقلبكِ وعقلك للأبدِ .

سليم : ابتسم بحب كبير .ومسك القلم وكتب ليها .

لَم نطلُب مِن الحياةِ سِوَى أَن نَحيا بِسَلام، أَن تُرَافقنا طُمَأنينة القلب وَسَكينة الرُّوح أَينما حَللنا، أَنْ تُغَادر أسرَاب القَلَق وَالحِيرَة سمائنا، أَن نَجِد يدًا تَربُت ع قُلوبنا، تنتشلنا مِن عُمق الحُزن وَالضَّيَاع، يدًا تَكُن بجوارنا قَلبًا وقَالبًا، أَن تَمُر الأَيَّام بِهُدُوء تَامّ وَراحة بَال، دُون فقد أو قلق، دُون خوف أو تعب، دُون شَكٍّ أَو رِيبَة، لَم نَعُد نَتَمنى سِوَى أَن نَعش بِطُمأنينة وَحَسَب. ولَم أَعُد أَتَمَنىَ سِواَكيِ يا فَاتِنةُ قَلبيِ .

وبعدها قفل المفكره وحطها ع الكمود وقام خرج . وقعد مع فاطمه وشرب القهوه .

سليم : قام وقف طيب ياجماعه انا لازم امشي دلوقتي ..

فاطمه : برفض تمشي فين ؟لسه بدرى ياضنايا . اقعد معانا شويه .

فتون : من جواها زعلان انه ماشي ..

سليم : معلش يا بطه . الساعه ١٠ ونص والشقه بعيده يعنى فيها ساعه واكتر .. هعوضهالك بكره إن شاء الله.

فاطمه : ماشي ياضنايا ربنا معاك ويستر طريقك يارب . وأمانه عليك عايزه اكلم فريده ليها وحشه . لو سافرت ليها قولها فاطمه زعلانه منك . نسيتنا خالص ..

سليم : ابتسم متقوليش كدا . دى بتسأل عليكى ع طول . وزي ما فتون قالتلك مفيش شبكه هناك . واوعدك لو هي مجتش هاخدك انا وفتون ونروح ليها زياره مفاجاه ايه رايك؟

فاطمه : والله فكره . بس بردو سلملى عليها كتير لحد ما ربنا يأذن ونشوفها ع خير إن شاء الله..

سليم : باس ع راسها . إن شاء الله ياحبيبتى . تصبحى ع خير ..

فاطمه : وانت من اهل الخير ياحبيبى .وقامت دخلت الحمام تتوضي لقيام الليل.

فتون : واقفه عند الباب وواضح عليها الزعل .

سليم : وقف قدامها . وهمس مالك زعلانه ليه؟

فتون : مسكت ايدو بخوف . سليم انا مش زعلانه .انا خايفه عليك من شريف..

سليم : ابتسم . خايفه عليا ؟ اطمنى شريف لحد دلوقتى مايعرفش حاجه ..

فتون : طيب انت ناوى ع ايه ؟ بجد يا سليم انا خايفه عليك انه يأذيك ؟

سليم : هشش اهدى .. وقولتلك اطمنى . وطول ما شريف عارف انى بعدت عنك . وكمان انى لسه اعمى . وفريده مابتتكلمش مفيش خطر .. وانا مش عارف لسه ناوى ع ايه؟ واتنهد بتعب . خوفى كله من المواجهه وصعب جدا انى اقف قدام اخويا الكبير لانى ساعتها انا متأكد انى مش هقدر اسيطر ع اعصابي .

فتون : بدموع سليم انا بجد خايفه يحصل حاجه . انا مرعوبه من فكرة ان ممكن شريف يعملك حاجه . اديله الل هو عايزه . سيبله الشركه . سيبله الفلوس والمشاريع . بس ارجوك خليك انت معايا ..

سليم : بحده اسيب ايه يافتون ؟ انتى عارفه انا تعبت قد ايه ف الشركه دى ؟ انا سهرت سنين من التفكير عشان اوصل لل انا فيه . والمشاريع دى تعبى وشقايا تعب تفكيرى .. انتى عايزانى اسيبله حقى وع الجاهز ..؟ انتى الل بتقولى كدا؟

وكمان خطط أنه يقتلنى ويقتل فريده . ويسجنك . وياخد كمان الأملاك .. انا لايمكن اسيب قرش واحد ل شريف ..

عارفه . شريف ده لو كان قالى سليم انا عايز اى مشروع من مشاريع . كنت هقوله اتفضل اختار الل انت عايزو . لانه اخويا الل بيحبنى ومفيش فرق بينا . بس دلوقتي الوضع مختلف تماما .. وهو الل اختار نهايته بايدو . مش انا .

فتون : بخوف حقيقي . مسكت ايدو جامد . وقالت بدموع . سليم اوعدنى انك تكون بخير علشانى .

سليم : اتنهد بخنقه كبيره . وضمها لقلبه . وغمض عينيه وزعلان جدا . انه هيحارب اخوه ف وقت ما قلبه استريح وعايز يعيش مرتاح .

فتون : ضمته بخوف كبير . ودموعها نازله بصمت وخووف ..

سليم : باس جبينها بحب . متقلقيش عليا . انتى بس صلى وادعيلى . وانا واثق إن الخير ديما ينتصر ع الشر ..

فتون : هصلى وادعيلك من قلبى .. وربنا معاك ويحفظك ف كل خطوه .

سليم : ضحك بصمت. تعرفى إن دى دعوة فريده ليا ع طول .. انا دلوقتي اتأكدت انى هكون بخير .

فتون : ربنا معاك ياسليم ..

سليم : مسد ع حجابها . ومعاكى ياقلب.سليم . خلى بالك من نفسك ..

فتون : بحزن انت الل خلى بالك من نفسك عشان خاطرى وطمنى عليك .

سليم : ابتسم حاضر ياحبيبتى .. هكلمك اول ما اوصل البيت . لا اله إلا الله ..

فتون : بتنهيده . محمد رسول الله ...

----------------------بقلمى مريم نصار

ف البلد .... الساعه ١١ بليل ..

فريده : قاعده ع السرير . بتقرا الورد اليومي ..

نجوى بتصلى ركعتين لله قبل ما تنام ..

الباب خبط بصوت عالى جدا ..

جوز نجوى والكل قام بقلق من شدة الخبط . وفريده قفلت المصحف وخافت .. ونجوى واقفه ورا جوزها بخوف ..وفتح الباب بسرعه ..

نجوى : شهقت وحطت ايدها ع قلبها . وقالت شريف ؟ مالك يبنى وشكلك عامل كدا ليه ؟

شريف : بعيون حمرا زى الدم .. دخل تايه ومش سامع صوت حد .. وفتح الباب ع فريده وقرب منها ونزل ع ركبه وقال --------

يتبع...