رواية أحببت بصيرته الفصل الثالث عشر 13 بقلم مريم نصار

_______________________________

عند حسن ..

سهير : لما سمعت قرار حسن ابنها . شهقت بصوت عالى وخبطت بايدها ع قلبها .. ينهار اسو....

منصور : وقف بنرفزه . انت بتقول ايه ياحسن انت اكيد اتجننت ولا جرا لعقلك حاجه !

حسن : قام وقف ليه بس يابابا. هو كلامى فيه ايه غلط ؟

منصور : فيه إنك بتتعدى الأصول . وكمان هتعملى مشاكل مع الشيخ محمد . انت مفكر انه هيوافق عليك بعد الل انت عملته مع فتون الل بيعتبرها زى بنته .؟ مش كفايه صغرتنى قدام رجالة الحاره . وكمان الحاجه فاطمه وفتون . ولحد دلوقتي منعرفش سبب أفعالك دى . اعقل ياحسن ومتعملش مشاكل ....

حسن : بغيظ . انا مش عايز فتون ياحج هو بالعافيه !!؟

منصور : ضحك بتريقه . وانت فكرك هتعوضها فتون دى !؟ دا بدال متعقل وترجع لعقلك وتنزل تتكلم مع الحاجه فاطمه .وترجع الميا لمجاريها من تانى !! ولو انى عارف رد فتون هيكون ايه !! يخساره ياحسن يبنى الغربه غيرتك . لأ وكمان راجع عايز تخطب سحر !! واشمعنى بقى سحر الل جت ف عقلك دلوقتي ؟

سهير : ده لا يمكن يحصل ابدااا . وصح ياحسن رد ع سؤال ابوك . اشمعنى سحر وف التوقيت ده واشمعنى سحر بالذات !!؟

حسن : بتوتر . ايه يام حسن بس ف ايه ..؟ وبص لابوه وقال .احم ابدا ياحج . انا بس شوفتها امبارح لما كنت بسلم ع خالتى ام عصام . وكمان لما جت هنا امبارح بصراحه بنت مؤدبه ومحترمه . وانا عايزها تكون مراتى فيها حاجه غلط دى ياحج !!؟

منصور : بنفاذ صبر . لا مفيهاش حاجه غلط. لكن محمد عمرو ما هيوافق ف انت ابعد من دلوقتي وبلاش تحط العقده ف المنشار .!!

حسن : بتصميم . انا هتقدم لسحر . وعايزك انت وام حسن تنزلوا معايا ..

سميره : هزت راسها بعدم تصديق ... وبصت لجوزها .

منصور : قعد مكانه . يفتح الله انا لا رايح ولا متحرك من مكانى . واظاهر الفلوس هتخليك تكسر كلام ابوك . عايز تخطب سحر .اتفضل انت مش صغير . انزل واتقدم بنفسك وخدلك كلمتين ف جنابك من عمك محمد . انما انا وامك تبعدنا عن الموضوع ده ...

سهير : صح لسانك ياحج منصور . ابعدنا يبنى عن الحوار ده . انا مش حمل زعل فاطمه منى اكتر من كده ...

حسن : بغيظ كل ده عشان خاطر فتون !!!؟

منصور : لا .عشان الأصول .. الأصول الل انت نسيتها . انا طول عمرى ماشي رافع راسي . وفتون دى انا الل خطبتهالك . لانها بنت بميت راجل . وغير كدا انت بنفسك قريت معاها الفاتحه في وسط الحاره . ووعدتها انك هترجع ليها . تقوم مره واحده تبعتلها دبلتها . اخص عليك . بقى ده الل انا عملتهولك . وانت اتربيت ع كدا ؛؛! انا عايز اعرف خلفت بوعدك ليه لفتون . سبتها ليه !؟ ليه تصغر بيا قدام أهل الحاره . !!؟

حسن : غمض عينيه بنفاذ صبر . ومش عايز يتكلم ولا يفضحها هي خلاص مبقتش تلزمه .هو محتاج سحر البنت الدلوعه المهتمه بيه .. وقال مفيش نصيب ياحج .وبعدين انا شوفت فتون امبارح اول ما رجعت .وكمل بتريقه . وماشاء الله مش باين عليها انها زعلانه يعنى !! لأ دى وقفت وسلمت عليا عادى وسابتنى وطلعت ..

منصور : وانت عايزها تعيط عليك مثلاا !!؟ دى بنت اصول . دى حتى مرضيتش تاخد الدبله بتاعتك ورجعت دبلتها ودبلتك لامك . واحده غيرها كانت قالت هو الل ساب وانا اولا ف الزمن ده بتمنهم . لكن لأ كانت بنت سندال بصحيح ..

حسن : بتريقه . هه .. وهي يعنى محتاجه فلوس . ماهى لقت طريقها خلاص ..

منصور : بعدم فهم . قصدك ايه ياحسن !!؟

حسن : هز راسه ولا حاجه ياحج . المهم كل واحد راح لحاله . وانا عجبانى سحر . ياريت ياحج تنزل معايا وتلين دماغ ام حسن لانها بردو رافضه سحر...

منصور : برفض قاطع . ده لايمكن يحصل ابدا . انزل انت . ولو .. هاااا .. انا بقول لو حصل موافقه مع أنه مش هيحصل . نبقى ننزل ونتكلم ف التفاصيل .. وقام بديق حقيقي وقال أنا مش عارف انت راجع متصربع كدا ليه .. لله الامر من قبل ومن بعد .

سهير : قامت رايح فين يا حج منصور بس ..

منصور : بديق حقيقي . انا نازل المحل . سلامو عليكو ....

----------------------بقلمى مريم نصار

فيلا بدر الدين

فتون : بصت ل فريده حضرتك هنكمل الجلسه فين !؟

سليم : فتح عينيه بغيظ وقبض على أيديه وقال..ف اوضة نومى !!!

فتون : بغيظ وصوت جهورى .. لا حضرتك اوضة النوم دى اتعملت للنوم !! مش للجلسات تمام . وبصت ل فريده بنرفزه .

فريده : شافت غضب فتون . وشاورت بايدها .. ده المكتب ..

فتون : شالت شنطتها بنرفزه . اتفضل ع المكتب !!!

سليم : نفخ بديق ومردش عليها ........

فتون : شافت جمود سليم . وكمان دموع فريده . واخدت نفس عميق . وقالت بهدوء .. استاذ سليم !! ياريت حضرتك تتفضل ع المكتب . هنتكلم شويه . ولو مش عجبك كلامى . انا همشي ومش هاجى تانى ...

سليم : بصوت جهورى . من دلوقتي تمشي . لانى لا عاجبنى كلامك ولا اسلوبك .

فريده : بتعب .. وبعدين معاك ياسليم يبنى . ارجوك اهدى شويه ..

سليم : بصوت عالى .. اهدا . اهدا . اهدا . انتى شايفانى مجنووووون . انا مش عايز اتعلم حاجه انا حر . انتي ليه مش قادره تفهمى . خلاااص كل حاجه انتهت .

فريده : قربت منه ومسكت ايديه .وكلمته بلوم وعتاب . اسمع ياسليم . انت من امبارح وانت مزعلنى منك . ودلوقتي انت مش عامل ليا اى احترام . الانسه فتون جت هنا بُناءآ ع طلب منى انا .. ممكن تقولى ايه مشكلتك . انت ليه مش راضي تدى لنفسك اى فرصه . ارجوك يبنى وافق الله يهديك ..

سليم : شد ايديه منها بنرفزه . وقال بغضب . انتى عايزه ايه منى يافريده؟ .علام مش هتعلم . واسمعى بقى ومن الاخر كدا عشان متتعبيش نفسك وتتعبينى معاكى ! . كل حاجه اتكلمنا فيها امبارح بخصوص التوكيل . هايتم وف أقرب وقت . علشان اخلص من الهم ده . وياريت متتكلميش ف الموضوع ده تانى لانه انتهي . وعلشان متزعليش منى اكتر من كده.. وسابها وطالع ...

فريده : اتصدمت . من أسلوب سليم الل كل يوم يتغير للاسؤ ..وداخت وغمضت عينيها ووقعت ع الأرض ...

فتون : شهقت بصوت عالى . وجريت .. وصرخت مداااام فرييييده ...

سليم : سمع صوت حد وقع ع الأرض. ووقف . ولما سمع صرخة فتون باسم فريده . قلبه دق بخوف . ورجع بسرعه ل الليفنج وكان هيقع ..

فتون : نزلت ع ركبها . وشالت راس فريده ع رجليها .وبتفوقها . مدام فريده . مدام فريده

.ارجوكى فوقى ...

سليم : رايح ف اتجاه الصوت . ونزل ع ركبه قدامها ووصل ل ايد فريده . وكانت ساقعه جدااا . وقال بصوت مبحوح وخايف .فه... فريده . فريده ...

فتون : ماسكه ايد فريده التانيه . وبتدلكها .. وبصت ع سليم . وشافت انه ف اللحظه دي طفل صغير ومحتاج للأمان ..

سليم : بخوف وصوت عالى . عزيييييزه . هاتى البرفان بسرررررعه . فريده ردي عليا .

عزيزه : بقلق جريت .. راحت ع الاوضه بسرعه تجيب البرفان.

سليم : قام ع ركبه ونص . وحاول يشيل فريده . وف الوقت ده حس بالعجز فعلا . ولكن حاول .

فتون : اتحركت ورجعت لورا . علشان يشيلها . وقالت هاتها ع الكنبه دى ...

سليم : شال فريده . وراح عند الكنبه . ومش عارف ينزل فريده وخايف لاتقع ع الأرض ..

فتون : حست بيه . وقربت منه . ايوه نزلها هنا بالظبط ..

سليم : مردش عليها . ونزل فريده .. وفتون عدلتها ..

عزيزه : جابت البرفان .وبتنهج اتفضل يا سليم بيه . تلاقي فريده هانم اغمى عليها علشان مكلتش من امبارح ...

سليم : بسرعه رفع ايدو . واخد الازازه . ورش منها ع ايدو . ووصل لوش فريده .وحاول يفوقها ... وبدءت تفوق . وبتآن بتعب ..

فتون : متابعه خوف سليم .

سليم : سمع صوت فريده . ومسك ايدها ونسي وجود فتون تماما . وقال بلهفه . فريده . فريده حبيبتي انا اسف . حبيبتي حقك عليا . انتى كويسه ...؟

فريده : بتعب .حاولت تتعدل . وحاسه بصداع شديد ..

فتون : ابتسمت الف سلامه عليكي حضرتك احسن دلوقتي ..

فريده : هزت راسها ل فتون الحمدلله يابنتى . وبصت ل سليم .الل خايف عليها . ومسكت ايديه . واتكلمت بتعب. سليم اسمعنى يبنى .......

سليم : فريده . صوتك تعبان متتكلميش ولا تتعبى نفسك . ونده عزيزه !!

عزيزه : افندم ياسليم بيه !!

سليم : اعملى عصير ليمون لفريده . وجهزى لفريده اكل وبسرعه ..

عزيزه : حاضر . واتحركت بسرعه ..

فريده : انا مش هاكل حاجه . ولا هشرب غير لما توعدنى بانك تدى لنفسك فرصه . وتتعلم وتاخد الجلسات بشكل متواصل . اسمع يبنى . انا لو عشت ليك انهردا مش هعيش ليك بكره . ولازم ياسليم يبنى تكون واقف على أرض صلبه . ياحبيبى انا لو الل انت هتعمله ده الصح انا كنت وافقتك عليه . ريح قلبى وانسى اتفاقك مع الأستاذ عماد . وفوق لنفسك علشان ترجع شركتك تانى . ولو لسه بتحبنى اسمع كلامى ..

سليم : غمض عينيه وصك ع اسنانه بتعب . واتنهد بوجع كبير . واستسلم . حاضر يافريده . إن كان ده الل هيريحك . أنا موافق .

فريده : اتنهدت بأريحيه . وربتت ع ايديه . إن شاء الله كل حاجه هترجع زي الاول واحسن . وبصت ل فتون . وابتسمت وانا واثقه فيكى ..

سليم : اتغاظ من فريده . وقال جواه . ازاى واثقه فيها اوى كدا ..؟

فتون : ربنا يقدرنى واكون قد ثقتك فيا إن شاء الله .. بس ياريت تهتمى بأكل حضرتك شويه ..

سليم : نفسه يشتمها . لكن سكت علشان خاطر فريده ...

----------------------بقلمى مريم نصار

علاء : شاف سحر فاتحه نت . وادايق . وبعتلها رساله . حمدلله ع سلامة حبيب القلب .يا سحوره ..

سحر : شافت الرساله . ونفخت بديق الله يخربيتك انت مش هتحل عنى بقى .. وردت عليه وقالت . الله يسلمك ياعلاء . ايه رجعت من الرحله ولا لسه !!!

علاء : رجعت ياحلوه . بس انا ف مشوار كدا مع صحابى ف راس البر وكلها اسبوع إن شاء الله . وأرجع للحاره من تانى ..

سحر : اممم . تنور . اومال انت عرفت إن حسن رجع منين ؟

علاء : اله . جرا ايه ياحب . انا ليا عيون ف الحاره وكل مكان.. وقوليلى هيخطبك ولا ناوى ع ايه !

سحر : بثقه . طبعاااا وقريب اووى .. وعقبال إن شاء الله قراية فتحتك انت وفتون . مش ناوى ولا ايه ؟

علاء : ههههه . لا طبعا ناوى . وقريب اوى هكون عندكو ف العماره ..

سحر : بغيره . هتتقدملها !!!؟

علاء : ايوه طبعا ياحب . وهي ملهاش حجه . خلاص. حبيب قلبك وطفشناه . حجتها ايه بقى .. اها . ملهاش حجه ياحب لازم توافق ..

سحر : بمكر . طيب وافرض هي موافقتش !!!؟

علاء : ساعتها بقى . هي الل اختارت .

سحر : اممم شكلك ناوى ع مصيبه ..

علاء : ههههه مصيبه واحده بس قولى مصايب . المهم بقى انتى وحشانى ..

سحر : بتوتر احم .اسمع ياعلاء . انت عارف ان انا بحب حسن . وبصراحه مش عارفه اقولك بحبك والكلام ده ..

علاء : بدهشه . وضحك مره واحده ههههههههه لا وانبى ههههه ومن امتى الكلام ده . دا احنا دافنينه سوا يابت ..

سحر : بلعت ريقها بتوتر . ياعلاء اسمع بس . اعتبر الل فات ده كان فترة مراهقه . وخلينا جيران واخوات احسن ..

علاء : هههههههههههه بقولك ايه ياسحوره . مش علشان انا سايبك برحتك تفكرينى انى مش حاطك ف دماغى لا ياحلوه . انتى هتفضلى معايا . وانا مستنى بس لما تتجوزى الل اسمه حسن ده . وساعتها هتشوفى علاء تانى خالص ..

سحر : بخوف . قصدك ايه يا علاء ..؟

علاء : قصدى انتى فهماه كويس ياسحوره . وكل حاجه انتى حرمانى منها . هاخدها وبعد ماتتجوزى . ااه هاخدها مزاج و بس مش حبا فيكى ولامؤاخذه . لأ لأ . انا عايز فتون . فتون وبس..

سحر : شهقت ولطمت على وشها . وقالت انت اتجننت ياعلاء ايه الل بتقوله ده . انت شكلك شارب ومش ف وعيك . وده مش هيحصل ..

علاء : ههههههههه . لا هيحصل ياسحر . وتسجيلات مكالماتك كلها معايه واتفاقنا واحنا بتخطط لفتون كلها معايا . وكل ده ممكن يوصل ف لحظه لحبيب القلب والشيخ محمد ابوكى . فاهمه ياحلوه . اوعى تكونى فاكره اني كنت بشحنلك عشان سواد عيونك . لا ياحب . ليا غرض وهاخدو .. ده انا حتى مش عايز اقرب منك قبل الجواز .عشان خايف ع سمعتك . والله انا قُليل ف الدنيا دى. بزمتك ف حد بيخاف عليكى قدى ..؟

سحر : قلبها بيدق بسرعه كبيره وخافت جدا .

علاء الله يخليك ابعد عنى كفايه عليك فتون . وسبنى ف حالى وحياة ابوك ياعلاء امسح كل حاجه ..

علاء : بتهديد . جرا ايه يابت . هو انتى كنتى بتكلمينى وانا شيخ ع السجاده . ولا ماشي بسبحه. لا ياحب انتى عارفه إن علاء ايه ف الحاره . وانتى الل جيتى وكلمتينى . وعارفه إن ده هيحصل منى . ومحدش ضربك ع ايدك . واسمعى هي كلمه .تتجوزى حسن . وتجيلى برجليكى . وإلا كل حاجه ساعتها . هتوصل لجوزك .. فاهمه ياروح امك ....؟

----------------------بقلمى مريم نصار

بعد شويه .

فيلا بدر الدين ..

خالد : داخل الفيلا . وشاف فريده قاعده لوحدها في الليفنج بتوتر .. اذيك يا فيرى ؟ وقعد جنبها ..

فريده : اهلا ياخالد اذيك يا حبيبي ..عامل ايه؟

خالد : اتنهد الحمد لله تمام . ايه مالك كدا باين عليكى تعبانه ..

فريده : عينيها ع المكتب . وقالت لا انا كويسه الحمدلله ..

خالد : طيب تمام . سليم فوق !!؟ وبصلها .. وقال بصوت عالى شويه .. انتى بتبصى ع المكتب كدا ليه !!؟

فريده : هشش وطي صوتك .سليم جوه في المكتب بياخد جلسه مع مُدرسه جديده ..

خالد : بعدم فهم . جلسه ؟ ومُدرسه ؟ ده الل هو ازاى ؟ انا مش فاهم حاجه !

فريده : انا هفهمك . وهحكيلك الل حصل من امبارح. اسمع يسيدى !! .............

----------------------بقلمى مريم نصار

ف المكتب ..

فتون : قاعده ع الكنبه .

وسليم : واقف قصاد الشباك ومش طايق فتون ..

فتون : احم . استاذ سليم . ممكن نبدء الجلسه . قدامى ساعه وامشي ..

سليم : من غير ما يبصلها . اتفقتى معاها ع كام !؟

فتون : بعدم فهم . اتفقت مع مين وكام ايه ؟

سليم : ماشي هجيبهالك بطريقتك . تاخدى كام وتخرجي من هنا ومتجيش ناحية الفيلا دي تانى ..؟

فتون : ابتسمت . ياريت كانت الفلوس كل حاجه يا استاذ سليم . كنا حلينا بيها كل ازمه تقابلنا ..!

سليم : افتكر رهف .و ابتسم بسخريه . ياريت بلاش تعمليهم عليا . فريده طيبه وتلاقيكى اتمسكنتى عليها وهي صدقتك . وان كنت انا وافقتها عليكى ف ده بس علشانها مش اكتر .

ها بقى تاخدى كام وتمشي الل قبلك كانو طالبين ٦٠٠٠ ج ف الشهر انا مستعد ادفعلك اكتر. وياريت قبل الساعه ماتخلص تمشي من هنا .

فتون : اممم ٦٠٠٠ج ف الشهر وقابل للزياده ههههه عرض مغرى جدا بصراحه ..

سليم : ابتسم . هه طبعا كلكو زى بعض . الفلوس عندكم اهم حاجه .

فتون : اممم طبعا الفلوس مهمه لكن مش اهم حاجه .. بس عندنا مين !؟ انا ؟ ولا انت؟ ولا يمكن حد تعرفه ؟

سليم : ...............

فتون : قامت وقفت . وقربت منه بمسافه بعيده . اسمع يا استاذ سليم . انت محتاج تقعد مع نفسك وتفكر بصوت عالى . هتقول لنفسك انا مين !؟ انت هتجاوب وهتقول انا سليم بدر الدين . رجل اعمال مصري مشهور .. طيب ياسليم !! انت عايز ايه !!!

.

وخلى بالك السؤال ده اهم من إنك تكون سليم بدر الدين نفسه ..

.. الإنسان لو اتولد مجهول الهويه . لما بيكبر بيخلق لنفسه هويه معينه . دى مقدور عليها . سهله . لكن صاحب الهويه ده ايه !؟ وعايز ايه ؟ وبقى ايه ؟ ده الل صعب جدا ان حد يجاوب عليه غير صاحب الهويه نفسه ... وبعد تفكير طوووويل كمان !!

.

الفلوس مش مقياس انك تقيس بيه كل خطوه . الفلوس مش كل حاجه . ف ناس راضيه بااقل حاجه وبتشكر ربنا ع الل هي فيه .

.استاذ سليم . انا عارفه انك بتمر بظروف صعبه . لكن انت قادر تتحدى اى ظروف . قادر تكون اقوى من الاول . صدقنى قوة البصيره عندك اقوى من البصر نفسه .

.وفكرت وقالت لحظه واحده .

سليم : بيسمع فتون . ومش عارف ليه حاسس انها مختلفه عن باقى المدرسين الل جم عندو . وكمان كلامها مقنع ومستمتع من جواه لكن جواه صراع نفسي . وسرح وقال . هي مش هتقولى دى مسطره وده قلم واكتب الحروف الابجديه كلها مره واحده . طيب انا عرضت عليها اكتر من المبلغ المطلوب زى كل مره . وسمع ليها . وسأل نفسه هو انا فعلا ايه وعايز ايه !!؟

فتون : راحت فتحت شنطتها . وطلعت منها فلوس ورقيه .. امسك يا استاذ سليم .

سليم : ....... واتنهد ومردش عليها ..

فتون : ابتسمت لانها حاسه إن سليم هيستجب لتكملة الجلسه . ياريت تمسك الورقه دى وتلمسها كويس ..

سليم : بفضول . فتح ايدو .

فتون ابتسمت . اتفضل .وحطت الفلوس ف ايدو.

سليم : اخد الورقه . ولمسها وقال ايه ده !؟

فتون : معلش انت لابس النضاره وانا مش شايفه . لكن غمض عينيك وانت بتلمسها ..

سليم : ههههه ههههه . اغمض عينيه . ده ع أساس انك واقفه مع واحد بيشوف ..؟

فتون : اتنهدت بوجع كبير عليه. لكن قالت ايوه . انا واقفه مع واحد بيشوف . وبيشوف كويس اوى .

. استاذ سليم البصر مش مُعتمد عليه ف كل حاجه .

.احنا لما بنحب نعيش اجمل لحظات حياتنا بنغمض عينينا .. انا لما بضحك من قلبى بغمض عينيه . ولما بحضن والدتى بغمض عينيه . ولما بتخيل حاجه تفرحنى بغمض عينيه . ولما بحلم حلم جميل بكون مغمضه عينيه .

.حتى ف السجود ولما بدعى بغمض عينيه .

. انت بتفتح عينيك بس علشان تشوف الطريق . وف مليون طريقه انك تشوف الطريق وانت مغمض .

.لكن استحاله تحلم وانت مفتح . واستحاله تحضن والدتك الل انت بتحبها وانت مفتح .اى حاجه انت هتعملها بحب وسعاده لازم تبقى مغمض عينيك علشان تلمسها بقلبك .

.بصيرتك أهم بكتير من بصرك .. وياريت معلش تغمض عينيك . وتلمس الورقه ..

سليم : البركان ال جواه بدء يهدى . ولا ارادى غمض عينيه ولمس الورقه . وقال مش فاهم حاجه . ايه الورقه دي !!

فتون : ثوانى بس وهتعرف . واخدت الورقه من ايدو . وحطت ورقه تانيه . شوف ملمس الورقه دي . زى الورقه الل قبلها ..

سليم : مغمض عينيه وحس ملمس الورقه . وقال ف اختلاف بسيط ف درجة النعومه ..

فتون : ابتسمت . تمام الورقه الل ايدك دى دلوقتى ١٠٠ ج . والورقه الل قبلها ٥٠ج . شوفت سهله جدا !!

سليم : بتعجب . لكن مردش عليها ..

فتون : اخدت منه الورقه ولخبطتهم اتفضل معاك ورقتين بالفلوس . تقدر تطلعلى الخمسين من ال١٠٠ج . وانا واثقه فيك و انك خلاص حفظتها ..

سليم : مسك الورقتين وفعلا لقى نفسه بيغمض عينيه ولمس الورقتين بتركيز . وقالها دى الخمسين . ودى ال١٠٠ ..

فتون : ابتسمت لانه بدء يندمج معاها . اممم تمام برافو جميل جدا . الجلسه الجايه بقى نعرف باقى ملمس العملات الورقيه ..

سليم : ..............

فتون : طيب يا استاذ سليم . دلوقتي هنبدء الجلسه. ومبدئيا كدا هبدا بتعريفك بالادوات الل بنستخدمها بالكتابة اليدوية وهما ال .....

سليم : نفخ بديق حقيقي . ايوه ايوه . مسطره وقلم ومعرفش ايه والحروف الابجديه كلها والحوارات الفاشله دى وف الاخر هتمشي من هنا ...!!

فتون : اتغاظت . لكن قالت بتعجب . لا طبعا احنا انهردا جلسه عاديه جدا . اتكلمنا فيها شويه . وهعرفك الادوات . وبعدين الحروف الابجديه والارقام دي عايزه جلسات كتيره مش جلسه واحده . احنا انهارده . هناخد اول حرفين . بس ياريت تسبنى اكمل ..

سليم : ..........

فتون : الادوات هي . مسطرة برايل وقلم برايل وورق برايل

١- مسطرة برايل : وهي مسطره يا أما مصنوعة من البلاستيك أو الخشب والل بنستخدمها اكتر المسطره البلاستيك وفيها عدد من الخلايا . زى المربع كدا . وكل خلية تحتوي على ٦ نقاط

٢-ورق برايل .. اتفضل امسك الورقه . هتلاقيها سميكه وحجمها بيكون على حجم مسطرة برايل بالظبط .

٣- قلم برايل . حاجه تشبه الدبوس كدا . وقالت بتوتر . ياريت تتفضل تقعد علشان نكتب اول حرفين ..

سليم : حس توترها . وافتكر أن كل ده تمثيل منها . وراح قعد ع الكرسي قدام الترابيزه وسكت ...

فتون : قعدت قدامه . وطلعت كل حاجه . وحطت الورقه ف المسطره . ومن جواها محتاره . اعمل ايه ياربى . همسك ايدو ازاى !!! اوووف وبعدين !!!

سليم : بتريقه ايه خايفه !!؟

فتون : نفخت بديق مكبت . وقالت هخاف من ايه !؟ ولو سمحت ممكن .. احم .. يعنى ايد حضرتك علشان لازم طريقة الكتا.....

سليم : قاطعها . عارف عارف . كل الل قبل منك عملو كدا ؛؛؛ وف الآخر مشيو ..

فتون : بغيظ . قفلت المسطره ومسكت القلم . اتفضل .

سليم : مد ايدو .

فتون : مدت أيدها واتوترت ..

سليم : هاتى ايدك !!

فتون : بتوتر نعمممم .

سليم : ابتسم . انتى بتنسي ولا ايه!؟

فتون : بتلعثم . احم . ايوه لأ لا مش بنسى . واخدت نفس عميق . وفتحت أيدها . ومسكت ايد سليم . وايدها كلها رعشه ..

سليم : بتعجب . وقال جواه غريبه . اول مره احس برعشة ايد بنت وهي بتمسك ايدى !!

فتون : غمضت عينيها . واستغفرت . وفتحت عينيها . احم . ركز معايه لو سمحت ..

سليم : ياريت انتى الل تركزى . وتبطلى تترعشي ..

فتون : سابت ايدو بسرعه . احم اسفه . اصل بصراحه اول مره ...اااء.....

سليم : ايه ده !؟وكمل بتريقه .. اول مره ليه مش بتعلمى ف المدرسه ولا ايه ؟ يا انسه ..!

فتون : اتنفست غيظ . وقالت لا طبعا بعلم ف المدرسه لكن اطفال . مش زى حضرتك . المهم هات ايدك خلينا نخلص ..

سليم : من جواه ابتسم لانه قدر يضايقها اخيرا . ومد ايدو ليها ..

فتون : بنظرة تحدى . مسكت ايد سليم . ولكن الرجفه زادت ..

وده : ضحك سليم جدا من قلبه . ع جرائتها ف الكلام . ورجفتها من لمسة ايد .

فتون : رفعت عينيها . وشافت ضحكة سليم . وفضلت باصه ع ابتسامته . وابتسمت لا اردايا .

فتون : انتبهت . احم . ياريت تبطل ضحك . وتركز بقى ..

سليم : امممم اوكي تمام .

فتون : احم وياريت لو في حاجه صعبه عليك تقولى وانا هعيدها تانى .. هنبدا بحرف الالف . بص يا استاذ سليم . ف الخليه دى . هنعمل عدد النقط الل بيحتوى عليها الحرف . وحرف الالف ده نقطه واحده . يبقى هنعمل بالقلم ده ف قلب الخليه نقطه واحده . تمام ..

سليم : فهم طريقة فتون لانها مبسطه .وحس ان شرحها مختلف عن الل قبلها . وهز راسه امم .

فتون : تمام . حرف الباء . نقطتين بس وهنعمل كدا . ايوه برافو عليك . تمام اوى ..

سليم : بتفهم .تمام ..

فتون : ناخد بقى رقم ١ نقطه واحده ف الخليه دى لكن من فوق من ناحية الشمال . ايوه هنا بالظبط تمام اوى .. ورقم ٢ نقطتين فوق بعض ف الخليه الل بعدها وبردو من فوق ناحية الشمال زى رقم ١ . تمام كدا ؟

سليم : باقتناع هز راسه . لكن قال . يعنى رقم ١ نقطه و٢ نقطين . واكيد ٣ و ٤ و٥ بنفس عدد النقط بتاعة نفس الرقم ..

فتون : ابتسمت لأن سليم اندمج معاها ف الجلسه . وقالت لأ طبعا . رقم ٣ نقطتين بس نقطه ف رقم ١ ونقطه رقم ٤ بص يا استاذ سليم الحروف الابجديه والارقام هتاخد وقت طويل شويه . وإن شاء الله لو استوعبت كل حاجه بسرعه هنخلص بسرعه . وانا متاكده من ده انك هتستوعب كل حاجه وبسرعه كبيره اوى كمان وانا جانبيآ كدا هعلمك كمان الحروف والارقام بالانجليزي .. تمام .

سليم : هز راسه تمام . لكن لاحظ أن أيدها لسه بتترعش .

فتون : سابت ايد سليم . احم . ودلوقتي هنسحب الورقه من المسطره . وهنقلبها . وهنقرا من الشمال لليمين . اتفضل . المس النقط . وهتعرف أن ده الالف وده الباء . وكمان الارقام ..

سليم : عمل كدا ولمس النقط . وفهم .

فتون : تمام . وقامت بتلم كل حاجه .. كدا جلسة انهردا خلصت . وإن شاء الله بكره نكمل ..

سليم : ........

فتون : ع فكره ١٨٠٠ج

سليم : بعدم فهم .. وبعدها بدهشه وضحك ١٨٠٠ ف الجلسه ههههه . انا قولت والله كلكو زى بعض . هههههههه .

فتون : بتحاول تمتص غضبها . علشان خاطر الوعد الل وعدته ل فريده . وقالت . ف الشهر ..

سليم : كشر عينيه . ١٨٠٠ج ف الشهر !!!؟

فتون : انا المفروض كنت هطلب ١٥٠٠ج لو هتاخد ٣ ايام ف الاسبوع ولو عايز جلسات اكتر انا معاك الجلسه هتقف ع ١٥٠ ج . لكن صعب انى اجي بمواصلات ف المكان ده . ف انا هاخد ال٣٠٠ ج الزياده لصاحب التاكسي .

. وفونها رن . وكان حسين وقالت ل سليم ثوانى . وردت . الو . ايوه ياحسين . ايوه لا انا خلصت . قدامى ١٠ دقايق واطلع تمام . خلاص ماشي مع السلامه . وقفلت .. وقالت ل سليم . ميعادنا بكره . بعد اذنك . وخرجت من قبل ما يرد عليها لأنها من جواها مخنوقه.

----------------------بقلمى مريم نصار

فريده : حكت ل خالد كل حاجه من امبارح لحد دلوقتي ..

خالد : اممم بقى كل ده يحصل وانا نايم ف البيت .؟

فريده : والله كنت هتصل عليك امبارح اقولك وافرحك . بس سليم ضايقتى بكلامه وكنت مصدعه جدا . بس الحمدلله عدت ع خير . ربنا يهديه بس ويتعلم حاجه . اصل كدا سليم هيضيع نفسه بتصرفاته دى ..

خالد ؛ احسن حاجه عملتيها إنك رفضتى حكاية التوكيل العام دا . ده سليم كان هيندم لو عمل كدا !!

فريده : انا بردو قولتله كدا بس هو مش فاهم . شايف انى بدءت اتحكم فيه واراجعه ف قراراته .

خالد : اتنهد بتعب ونفخ . انا مش عارف بجد من يوم الحادثه دى وسليم تفكيرو كله سلبى . يعنى يعمل توكيل عام ل شريف . هو شريف اخوه وبيخاف عليه وكل حاجه تمام . بس ليه يحط نفسه ف مشاكل مع اخوه . افرض عايز يسحب مبلغ أو يعمل اى حاجه بعد كده . وشريف ممكن مايشوفهاش مناسبه لسليم . ساعتها بس المشاكل هتبدء . مايسيب كل حاجه زى ما هي . وكمان انا مش عايزو يشترى منى الكام سهم ال فاضلين . انا هتصرف ولازم اصلح كل حاجه لازم اعتمد على نفسي علشان محتاجش لابويا ..

فريده : ربتت على كتفه . إن شاء الله ربنا هيريح قلبك وتحقق احلامك . وبإذن الله مفيش مشاكل ولا حاجه . وسليم هيعقل اكيد . لكن انت شوف سليم عايز يعمل ايه بخصوص شغلك ومش تعارضه هو ادرى بمصلحتك . وبما أنه المسؤول سيبه يتصرف واكيد ف حل . لانه زعلان علشانك اوى .

----------------------بقلمى مريم نصار

فتون : خرجت من المكتب وجت عليهم . احم مساء الخير ..

فريده : بلهفه قامت مساء الخير يابنتى ..

خالد : شاف فتون . قام وقف وقال جواه اللهم صل على النبى . ايه البت القشطه دى ..؟

فريده : ها ياحبيبتى طمنينى . وإن شاء الله سليم ابنى ميكونش ضايقك ..

فتون : ابتسمت بتمثيل . ابدا حضرتك ولا ضايقنى ولا حاجه . احنا اخدنا جلسه خفيفه كدا .. ومن بكره إن شاء الله نبدء شغل بجد . والمواعيد انا مش هحددها . انا هاجى اول اسبوع يوميا . وبعد كده نشوف الوقت الل يحبه الاستاذ سليم انه ياخد فيه جلسه بنفسه . لو عايز يوميا او يوم ويوم . او حتى يومين ف الاسبوع معنديش مانع وانا هكون موجوده . لكن ياريت يكون بالنهار .

فريده : ابتسمت ب أمل . ماشي ياحبيبتى الل تشوفيه . كلك زوق بجد. وانا متفائله بيكى جدا .

فتون : ابتسمت . إن شاء الله اكون عند حسن ظن حضرتك . انا هستاذن ..

فريده : احم قبل ما تمشي احب اعرفك خالد صاحب سليم ابنى او ممكن تقولى توأمه ..

خالد : هز راسه وابتسم اهلا بحضرتك يا انسه .

فتون : هزت راسها اهلا بحضرتك . وبصت ل فريده بعد اذن حضرتك ..

فريده : طيب ممكن خالد يوصلك لو تحبى .

سليم : كان خارج . ووقف قدام باب المكتب. يسمع رد فتون الل اتاكد انها فرصه وهتوافق إن خالد يوصلها ..

فتون : لا متشكره جدا . انا هعرف اروح بنفسي ..

فريده : يابنتى انتى قولتيلى عنوانك وهو بعيد عن هنا . ياريت تقبلى........

فتون : قاطعتها . انا اسفه مش هينفع حد يوصلنى .. وانا هتصرف متقلقيش . وانا اتاخرت ع والدتى لازم امشي . سلام عليكم . واتحركت ..

فريده : بصت ليها بإعجاب كبير وعليكم السلام .

خالد : اممم يخساره ..

فريده : بصتله خسارة ايه ؟

خالد : اتنهد .القمر رفض التوصيله . بس عايزه الحق يافيرى البنت قمرررر ايه الجمال ده كله انا ماشوفتش جمال كدا . لأ وكمان جمال رباني .

فريده : بتحذير شديد خاااالد وبعدين !!

خالد : رفع ايديه خلاص خلاص ماليش دعوه بيها .

فريده : ايوه كدا الله يهديك ..

خالد : بتقولى حجات غريبه انتى يافيرى . انا رايح اشوف كابتن سليم . ع ما تجهزو الغدا . انا واقع من امبارح ..

فريده : ابتسمت بحب من عينيه ١٠ دقايق ويكون الاكل جاهز . وكمان شريف يكون رجع بالسلامه ..

----------------------بقلمى مريم نصار

بعد شويه . ف شقة فتون .

. ام محمود مرات عم زينهم كانت قاعده مع فاطمه بتطمن عليها وقامت خارجه وفتحت باب الشقه .

ام محمود : اقعدى بالعافيه ياحاجه فاطمه .

فاطمه : بتوصلها للباب . يعافيكى يام محمود شرفتينى ياحبيبتى ..

ام محمود : خرجت من باب الشقه . تسلمى يارب والسلام امانه لفتون وقوليلها خالتك أم محمود لما عرفت انك خدتى الاجازه جت تقعد معاكى شويه بس تتعوض مره تانيه بقى إن شاء الله ..

فاطمه : يوصل ياحبيبتى إن شاء الله . واتنهدت بوجع بس نصيبها بقى يقلب امها ربنا يريح قلبها يارب ..

حسن : خارج من الشقه . ونازل من ع السلم . وشاف فاطمه وام محمود . وقال بحرج سلامو عليكو ..

فاطمه : بزعل همست وردت السلام .

ام محمود : ابتسمت وعليكو السلام .حمدالله ع سلامتك ياحسن يبنى..

حسن الله يسلمك . اذيك ياخالتى أم محمود .عامله ايه ؟

ام محمود : الحمدلله ياضنايا . معلش انا هنزل عشان متاخرش ع الحج زينهم . فوتكم بعافيه . سلام ياحاجه فاطمه . ونزلت .

فاطمه : بديق حقيقي .يعافيكى يام محمود مع السلامه ..

حسن : بحرج . اذيك ياخالتى أم فتون ..

فاطمه : من غير ما تبصله نحمد الله . حمد لله على السلامه .

حسن : الله يسلمك . انتى عامله ايه ياخالتى.

فاطمه : الحمد لله ماشي الحال . بعد اذنك انا لازم ادخل واقفل بابى عليا ..

حسن : انتى لسه زعلانه منى ياخالتى .!

فاطمه : اتنهدت . وقالت ياريت بلاش خالتى دى منك ياحسن . وكمان مفيش بينا وبينك اى حاجه تستدعى للزعل ربنا يسهلك .

حسن : ياريت ياخالتى متزعليش منى ولا تيجي عليا ومتظلمنيش ..

فاطمه : بصلته بلوم . تسيب بنتى من غير سبب ومش عايزنى ازعل منك ؟ .. وكمان شايفنى ظلماك طيب ازاى فهمنى !!

حسن : انا ماسبتش فتون من غير سبب ياخالتى . وكل حاجه ف الدنيا دى بتحصل ليها سبب ..

فاطمه : بصتله طيب يبنى ماتقولى ايه السبب الل انت تعبت نفسك ومصبرتش لحد ما تنزل بنفسك وتعرفنا السبب . لأ انت بعت الدبله مع الغريب . كأن بنتى عملت حاجه كبيره ..

حسن : ياخالتى فتون بنتك الل عملته مش شويه ..

فاطمه : بديق حقيقي وعلت صوتها . عملت ايه بنتى ياحسن متقول ساكت ليه؟

حسن : قرر أنه يقولها .. وقال فتون عملت ...... ولسه هيتكلم .

جار ليهم طالع ع السلم . سلامو عليكو ..

حسن : سكت وهو وفاطمه ردو السلام ..

فاطمه : ها ياحسن كنت بتقول بنتى عملت ايه !!!؟

حسن : اخد نفس عميق ولسه هيتكلم شاف فتون طالعه ..وسكت .

فتون : طالعه ع السلم . وشافت حسن وفاطمه . واخدت نفس عميق وطلعت سلام عليكم ..

فاطمه : بحب وعليكم السلام ياقلب أمك حمدالله ع سلامتك ..

حسن : بغيظ مكبت عليكم السلام .

فتون : ابتسمت بتمثيل الله يسلمك ياست الكل . ايه واقفه ليه كدا ؟

فاطمه : عوجت بوقها ابدا . اصل خالتك أم محمود كانت عندى ولسه نازله . وبصت ع حسن . وابن عمك منصور نازل بالصدفه بيسلم عليا كتر خيرو صاحب واجب وبيفهم ف الأصول طول عمرو ..

حسن : اتخنق وسكت .

فتون : هزت راسها . ماشي ياحبيبتى انا هدخل اصلى المغرب . تكونى انتى خلصتى وياريت ماتوقفيش ع الباب كتير . الل عايزك يدخل يسلم عليكي وانتى قاعده مكانك ماتوقفيش لأى حد ماشي يابطه ..

فاطمه : ربتت على كتفها تسلمى يارب .

حسن : صك ع اسنانه بغيظ . وقال أنا عايز اتكلم معاكى كلمتين يافتون ..

فتون : بصتله من فوق لتحت .اسمى استاذه فتون . وبتهايئلى مفيش بينى وبينك اى كلام يا استاذ حسن انه يتقال !!

حسن : بيتنفس غيظ . لأ ف كلمتين ولازم اقولهم ياااا... استاذه فتون ولازم تسمعيهم . وانا هعمل بأصلى برضو علشان خاطر الجيره و خالتى ام فتون وبس .

فاطمه : عوجت بوقها وقالت بهمس .. لا بتفهم في الأصول اوى !

فتون : نفخت بنفاذ صبر . مفيش حد يجبرنى ع اى حاجه ماشي . وعمتا خير يا استاذ حسن ايه الكلمتين الل واقفين ف زورك و لازم يتقالو . ولو انى عارفه انهم ولا ليهم اى لازمه بالنسبالى. اتفضل قول ..

حسن : بصلها طيب ممكن ادخل ونتكلم ..

فتون : ماينفعش . انت مكنتش بتدخل البيت ده ف وجود الحج مهران الله يرحمه . تفتكر بنته هتخليك تدخله وهو مش موجود . وياريت تنجز علشان المغرب .

حسن : ضحك بتريقه . تقبل الله مقدما . وقال علشان يغيظها . انا علشان الجيره وبص ل فاطمه انا بستاذن منك ياخالتى انك متزعليش منى . وبص ل فتون اصل انا نويت أخطب إن شاء الله . وهتقدم لسحر بنت عم الشيخ محمد . علشان متقولوش اتعدا ع الجيره انا قولت أبلغك يافتون علشان متضايقيش .

فاطمه : اتصدمت وشهقت بصوت مهموس والدموع اتجمعت ف عينيها ..

فتون : بلعت ريقها .وبتكابر خنقتها من الخبر. وربعت ايديها بثقه كبيره . وابتسمت كل المقدمه دى علشان الخبر الحلو ده .. عموما الف الف مبروك .

حسن : بدهشه . يعنى انتى مش زعلانه ..؟

فتون : ههههه . انت خيالك واسع اوى يا استاذ حسن . وياريت بقى تقرو الفاتحه بسرعه الواحد عايز هيصه ف الحاره من يوم فرح عيد ابن عمى جمعه مفيش افراح بعدها . ربنا يتمم بخير ..

فاطمه : حاسه بدوخه . وكسره جواها ولسانها اتلجم وساكته ..

حسن : اتغاظ اكتر وفتون نجحت في انها تثبت نفسها قدامه . وأنه ولا حاجه ولا فارق معاها حسن بالمره .. وهز راسه ليها تمام . تمام يافتون .

فتون : ببرود استاذه فتون . ياريت تخلى بالك بعد كده . ومسكت ايد فاطمه . يلا يابطه علشان نلحق المغرب . ودخلت وقفلت الباب وراها من غير ما تبص ع حسن ..

حسن : بيتنفس بصوت عالى جدا . واتحرق دمه حرفيا . واخد قرار انه لازم يقرأ فاتحة سحر ف اقرب وقت . ونزل وراح ع شقة الشيخ محمد ...

فاطمه : قعدت ع الكنبه وعيطت بصوت حزين ..

فتون : قعدت جنبها ومسكت أيدها . ايه ياطماطم بس بتعيطى ليه ؟

فاطمه : بصتلها بزعل حقيقي هيخطب سحر يافتون . سحر بنت سميره . سابك عشانها ..؟

فتون : ههههه والله يا بطه انا مش عارفه انتى مزعله نفسك ليه ؟ ده حتى الاتنين شبه بعض . وبعدين انا مش زعلانه انتى ليه بقى عامله ف نفسك كدا ؟

فاطمه : بدموع . منه لله ربنا يكسر ......

فتون : حطت ايديها على بوقها لا ياماما . لأ متدعيش ع حد . انتى ناسيه ديما انك كنتى بتقولى الل بيدعى ع حد ف ملك بيرد ويقول ولك المثل . يعنى لو دعيتى عليه هتترد في بنتك . سيبيه ياماما سيبيه لله وللايام . وصدقينى والله العظيم انا محاسه بفرق كبير اوى حاسه اني عادى جدا .

فاطمه : مسحت دموعها استغفر الله العظيم يارب . وبصلتها تفتكرى الشيخ محمد هيوافق ؟

----------------------بقلمى مريم نصار

عند الشيخ محمد

محمد : قام وقف بغضب كبير وزعق . انت اتجننت ياحسن ؟ انت جاى بتطلب ايد سحر بنتى انا ؟ ده بدال ما كنت تيجى وتحاول تصلح غلطتك مع فتون !! جاى بتعكها اكتر !؟ ده لا يمكن يحصل ابدااا ..

حسن : قام وقف بترجى ياعمى محمد استهدى بالله . انا وفتون سبنا بعض خلاص . وبعدين كل شئ قسمه ونصيب ف الدنيا دى . وانا وفتون مش عايزين بعض . وانا قبل ما اخد قرار انى اتقدم للانسه سحر فكرت كويس . وبعدين بنتك الانسه سحر ف قمة الادب والاخلاق . وانا طالبها بالحلال . يبقى ليه الرفض ياشيخ محمد بس ؟

محمد : بصله بدهشه !!! انت يبنى واعي لل انت بتعمله ولا الغربه لحست مخك . انت كنت خاطب فتون بنتى برضو . وسبتها بطريقه انا لايمكن انساها . وجاى دلوقتي عايزنى اوافقك ع طلبك . ده بأنهى منطق وعقل. بقولك ايه يا حسن انت تنسي الل انت قولته ده كله لانى عمرى ما هوافق عليه ابدا .. انا معنديش بنات للجواز ..

سحر : واقفه ورا الباب وبتعيط بصوت مسموع . وبصت لامها الل واقفه متغاظه .

سحر : بتعيط .عاجبك ابويا الل بيعمله معايا ده . شايفه رفض حسن علشان بنت الكل.....فتوووون .اسمعى ابويا لو موافقش انا هموت نفسي انتى فاهمه...

سميره : شهقت وحطت ايدها ع قلبها . يلهوى ايه الل انتى بتقوليه ده ياسحر بعد الشر عليكى ياضنايا . اصبرى بس لما حسن يمشي انا ليا كلام مع ابوكي ..

سحر : بغيظ ودموع . والله العظيم لو متجوزت حسن لاسيبلكو البيت واطفش وابقى بقى افرحي انتى وابويا بفتون حبيبة قلبه ..

سميره : بغيظ مكبت . ودينى لو ابوكي موافق انا بقى لافضح فتون دى ف الحاره كلها . اصبري بس وابوكي اكيد هيوافق ..

حسن : ياعمى الله يخليك متستعجلش ف قرارك . انا عارف إن الل حصل مش سهل بس ليا اسبابى ياعم محمد . وغير كدا انا قبل ما انزل ليك . انا استأذنت خالتى فاطمه وكمان فتون . استاذنتها ف انى هطلب الانسه سحر للجواز . وفتون معندهاش مانع وباركتلى من دلوقتي ..

محمد : ضحك بتريقه . كمان !!؟ وانت عايز فتون تقولك ايه . لا ياحسن الله يخليك اوعى تعمل كدا !! اسمع يابنى انا مش عايز مناهده كتير . الل عندى قولته ليك . مفيش جواز من سحر وياريت بقى تتفضل لانى عندى مشوار مهم ..

حسن : صك ع اسنانه بغيظ مكبت . وهز راسه واتنهد ماشي ياشيخ محمد بس انا مش هفقد الأمل وإن شاء الله توافق . سلامو عليكو . وخرج ..

محمد : واقف ومتضايق وبيخبط كف ع كف لاحول ولاقوة إلا بالله . هي الناس جرالها ايه؟

سحر : بتفتح الباب وطالعه بغيظ .

سميره : مسكتها استنى ياسحر متتجننيش ابوكى مش هيسكت .

سحر : زقت أيدها وسعى سبينى وخرجت بسرعه وجريت ووقفت قدام ابوها وبتعيط . انت رفضت حسن ليه يابابا ؟

سميره : بتلطم على وشها بخوف ..

محمد : بصدمه كبيره . وكمان اتصدم اكتر لما شاف بنته بتعيط وواقفه قدامه وبتساله بجرأه . وزعق انتى خارجه علشان تقفى قدامى وتسالينى ياسحر !!؟

سحر : بعياط . ايوه يابابا . انا بسالك انت رفضت حسن ليه !؟ انا موافقه عليه انا عايزه حسن !!

محمد : فتح عينيه بصدمه . ومسك دراعها بقوه .لاااه دا انتى اتعديتى كل الحدود .. اسمعى يابنت سميره . جواز من حسن ده انسيه لانه مش هيحصل . وانا هعرفك ازاى تتجرأي . وتقفى قدامى وتبجحى وكمان تعارضي قرارى ..

سحر : واقفه بتتالم من ايد ابوها ..

سميره : جريت عليه . سيبها ياحج . سيبها عيله صغيره مش فاهمه حاجه . انا هفهمها .

محمد : دى عيله صغيره ياسميره ؟ بنتك جايه تعارضنى وتسالنى ليه رفضت حسن . حسن الل كان خاطب فتون ..وعايزانى اوافق ..

سحر : بغيظ . وزعقت . ايوه يعنى كل ده علشان خاطر فتون توقف جوازة بنتك . وصرخت هو انا بنتك ولا فتوووون . كل حاجه فتووون . وحسن سابها . وجالى انا . انت بتستخسر تشوفنى مبسوطه . انت بتحب فتون اكتر منى انت بتكرهنى .انا بكرهاااا وانا موافقه ع حسن انا عايزاااه .....اااااااه .

محمد : بيسمع وعيونه مفتوحه ع الاخر بصدمه . من بنته الل صوتها عالى عليه . وضربها بالقلم . وصرخت . وقال بتحذير . صوتك ده لو سمعته انا مش هتردد انى اقتلك يابنت سميره فاهمه ولا لأ .

سميره : بتعيط وبتفصل بينهم لكن مش قادره قدام جوزها ..

سحر : بتصرخ انا الل هموت نفسي عشان ترتاااااح . وخللللى فتون تنفعك . انت بتكرهنى . انت حتى مسالتنيش انتى موافقه ولا لااااااااااااااء . انا بكرهكووووو انا هموت نفسي علشان ترتاح يابابا .

محمد : زعق انا بعترف انى فشلت في انى اربيكى . لكن ملحوقه . ومسكها من شعرها . وشدها للاوضه ودخل بيها . ف وسط صريخ سحر وسميره .

محمد : زق سحر ف الاوضه وزق سميره بره. الاوضه . وقفل ع نفسه الباب هو وسحر علشان الصوت . ودخل فضل يضرب ف سحر ..

سحر : بتصرخ . وسميره بتصوت بره باب الاوضه وبتخبط ع الباب .

محمد : بيضربها . انا معرفتش اربيكى علشان خاطر امك الل فرحانه اوي بيكى . مفكره بنتها ملهاش زي . وف الاخر تعلى صوتك ع ابوكى . وبيكمل ضرب فيها .. وقال انتى مفكرانى مش عارف اوقفك عند حدك . وانتى عايزه حسن !!!؟ حسن الى خاطب جارتك .وسابها . سابها وجايلك انتى ليييييه؟ لييييه يابنت الشيخ محمد !!؟ أدى آخرة تربية الحريم ..وكل كلامه ده كان بيضرب فيها وبتصرخ بعلو صوتها ..

محمد : فتح الباب . وكان واضح عليه الغضب . وخرج من غير ما يتكلم وقعد ع الكنبه وبينهج بغضب.

سميره : جريت علشان تدخل ع سحر .

محمد : بصوت عالى وتحذير . رجلك متهوبش ناحيتها فاهمه ياسميره !!!

سميره : رجعت وبصت ل محمد .وقالت بصوت عالى شويه .انت ع آخر الزمن بتضرب بنتى ياحج محمد ؟ وعلشان مين ؟ علشان بنت فاطمه ؟ وايه يعنى أن حسن ساب فتون . ولما شاف بنتى وجه اتقدملها . حسن كفر ولا كفر ؟ ..

محمد : صك ع اسنانه بغيظ . وغمض عينيه واستعاذ بالله من الشيطان . واخد نفس عميق واتنهد بتعب وقال لأ مكفرش ياسميره !! بس ف حاجه اسمها اصول وحق الجيره . ف حاجه اسمها اشمعنى ساب فتون وجاى من غربه وبعد ٣ سنين . جاى تانى يوم السفر ويتقدم لبنتك !! تفتكرى ده كله عدا كدا من غير متسالى ياترى ف ايه ؟ وايه الل حصل؟ ايه سبب انه يسيب البنت الل حبها السنين دى كلها ؟ وجاى يتقدم لجارتها ؟ وقام وزعق انتووو ايييه ؟ مبتفكروش خالص . واحد زى ده باع فتون ف لحظه .. تفتكرى انه هيبقى ع بنتك ويحافظ عليها ؟ طيب ازاااى . ؟

سميره : زعقت . انت الل بتحلل ع مزاجك علشان المخفيه فتون الل طلعالنا ف البخت . وايه يعنى سابها هو أول واحد يسيب خطيبته ايه مش كل شئ قسمه ونصيب بردو . مالهمش نصيب مع بعض . وحسن لما جه امبارح طلعنا سلمنا عليه . وتلاقيه لما شاف بنتك عجبته وشاف انها تكون مراته . والراجل يشكر وكتر خيره وكمان محترم جاى شاري . وداخل البيت من بابه . وكمان جاهز ونازل علشان يتجوز ع طول . ليه تعترض ع أمر ربنا . ليه تكره الخير لبنتك . ولا ع رائيها بتحب فتون اكتر من بنتك . لأ وكمان تمد ايدك عليها علشانها ...

محمد : بغضب كبير . انا ضربت بنتك علشان هي قليلة الادب وناقصه ربايه .. بنتك وقفت قصادي وبتبجح وبتقول موافقه ع حسن بكل جرأة وقلة حيا . بنتك عايزه تتربى من اول وجديد . وزعق . وانا هربيها . الل معرفتش اعمله قبل كده هعمله من دلوقتي . واسمعى . سيرة فتون وحسن متتفتحش ف البيت هنا تانى . سيبو فتون ف حالها وطلعيها انتى وبنتك من دماغكو . وحسن مرفوض تماماً . واول عريس هيتقدملها انا هوافق عليه ومن غير تفكير . قبل ما تجبلى العار .

سميره : بس كدا ........وسكتت .

محمد : بصلها بشرز . وسابها وخرج .

سميره : جريت ع سحر الل قاعده تعيط

----------------------بقلمى مريم نصار

فيلا بدر الدين . بعد الغدا كلهم قاعدين مع بعض ..

شريف : بيشرب سِجاره وقال ل فريده . يعنى انتى واثقه من البنت دى !؟

فريده : منا قولتلك ياشريف يبنى . انا كنت قاعده ف الكرسي الل وراهم بالظبط . وسمعت كل كلام صحبتها . وفتون دى ردت عليها باسلوب جميل اوى . حسيت انها بنت من الجيل بتاعنا زمان . مريم نصار وكمان قالت إنها لازم تأهل الشخص نفسيا الاول . وغير كدا انا عرضت عليها مبلغ ورفضت تاخدو . ومتكلمتش معايا لحد دلوقتي ف فلوس خالص . وبعدين انا بحمد ربنا إن سليم اقتنع شويه اهو خلينا معاها يمكن ربنا يجعلها سبب انه يتعلم بقى .

شريف : هز راسه تمام وده المهم إن سليم يقتنع ويتعلم كل حاجه . بس لازم نسأل عليها زى الل قبلها ..

فريده : ابتسمت . سيب الحكايه دي عليا انا . وبإذن الله البنت دي هتطلع مفيش حد زيها .

سليم : ابتسم بسخريه . وسكت .

فريده : انا هقوم اجيب القهوه .. وقامت ..

سليم : اسمع ياخالد اعمل الل قولتلك عليه ف المكتب ..

خالد : ياعم انا مش هبيع حاجه خلاص . انا هحاول مع نفسي كدا ..

سليم : خالد . متتعبنيش معاك . انا قولت هشترى منك الشركه . وخد فلوسك .

خالد : ايوه وبعد ما أبيعها واخد الفلوس . ايه الل هيحصل بعد كدا ؟ هصرفهم ع السجاير والمقابلات والذى منه ..

سليم : اتنهد بتعب . لا طبعا حاول تبدء من جديد .

خالد : قعد طيب ماتفكك بقى . ونبدا انا وانت من جديد . انا اشرحلك المشروع . وانت تقولى اعمل ايه لحد ما اتعلم ..

سليم : مش هينفع ياخالد . لازم دراسة جدوى وحجات كتير . وانا مبقتش مستعد لأى حاجه من دى . وغير كدا انت شايف حتى مشاريعى واقفه !!

خالد : ياعمنا ما الانسه القمر دي جت تعلمك .اااخ ياض ياسليم البت قمررر . قمررر.

سليم : ابتسم . يبنى انت عمرك ما هتتغير . شركتك بتخسر وانت فاضي تقول قمر ومعرفش ايه ؟

خالد : يصحبى الشركه تتعوض . بس الحلويات دى مش هتتعوض . ويااارب متطفشهاش زى غيرها !!

فريده : حطت القهوه . يارب . يارب ياخالد يبنى اصل بجد هزعل اوى . بس عايز الصراحه انا متاكده انها هتستمر لان سليم وعدنى . مش كدا ياسليم ؟

سليم : غمض عينيه بنفاذ صبر . واتنهد ماشي يافريده الل انتى عايزاه ..

خالد : ايوه بقى . انا عايز اعرف مواعيدها ايه بالظبط ؟ . علشان انا راشق هنا . وكمان لازم اكون مع صحبى سليم حبيبى وهو بيتعلم مش يمكن ينسى حرف هههههههههه .

سليم : ضحك . وشريف ابتسم ..

فريده : بتحذير . وبعدين ياخالد يبنى . انا بحظرك اهو تبعد عن فتون . وغير كدا البنت دى جد جدا . ومحترمه فوق الوصف ..

سليم : ضحك تانى بسخريه ..

خالد : فتون !!!؟ انا بتهايئلى سمعت الاسم ده قبل كدا !! بس فين ؟ فييين ؟ امم مش فاكر .. بس فعلا يافيرى . البنت دى واضح عليها بجد انها محترمه . لبسها واسع ومحترم . وكمان مش حاطه اى ميكب ف وشها . بس ياترى هتحاسب الدروس بكام ؟ انتى اتفقتى معاها ع كام؟

فريده : والله ياخالد يبنى انا سالتها وقالت مش هتفرق . وكمان عرضت عليها ٣٠٠٠ج مقدم بس رفضت تاخدهم ..

سليم : أنتبه وسكت ..

خالد : اممم معقول . رفضت يمكن تطلب مبلغ كبير وعايزاه مقدم كله ع بعض ..!

فريده : مش عارفه بقى بكره هبقى اسالها ..

سليم : هي قالتلى عايزه ١٨٠٠ ج .

فريده وخالد وشريف : بصو لبعض بعدم تصديق ودهشه . وخالد قال .. معقول المبلغ ده كله ف كل جلسه لا واضح عليها القناعه ههههه.

سليم : ف الشهر . مش ف الجلسه .

خالد وفريده وشريف . بصو تانى لبعض ومتنحين اييييه . خالد قال ١٨٠٠ ج ف الشهر معقول؟

فريده : بدهشه . ف الشهرر ..؟

شريف : مط شفايفه . امم مش مقتنع معقول ف الشهر ؟

سليم : ايوه . وقالت هي كانت هتطلب ١٥٠٠ ج بس ! .. لكن علشان بتاخد تاكسي وهتحاسبه بال٣٠٠ج الزياده .قالت لانها ماينفعش تيجى هنا بمواصلات عاديه .. وإن الجلسه لو هتيجى وقت زياده . هتقف ع ١٥٠ ج .

فريده : ابتسمت بإعجاب كبير . وافتكرت الحوار الل دار بين فتون وحنين . واتنهدت بحب وحمدت ربنا انها اتقابلت مع فتون ..

سليم : افتكر فتون وأسلوبها وطريقة كلامها وكمان رعشة أيدها . وقبل ما يبتسم . رفض الفكره بسرعه وقال جواه . لازم تمشي .. لازم افكر ف طريقه اخلص منها ومتجيش هنا تانى -------