رواية أحببت بصيرته الفصل الثالث 3 بقلم مريم نصار

ف نص الليل ..

سحر : قاعده ع السرير بعد ما اتأكدت إن ابوها وامها نامو . وحاطه السماعه ف ودنها وبتسمع اغانى .. وفاتحه نت من ع الفون . وبتتصفح ع فيس بوك .وجايبه صفحة حسن بتتفرج ع صوره . وبتفكر ازاى توقع بين حسن وفتون . وفجاءه جالها اتصال فيديو واتصدمت بدهشه !! علاء !!؟ ايه ده ؟ ودا بيتصل عليا فيديو ليه !؟ وكنسلت عليه . وكتبتله ع الشات ايه يامجنون بتتصل فيديو ليه؟

علاء : نايم ع السرير وبيشرب سِجاره . وقالها عايز اشوفك !!

سحر : بقلق اي... ايه !؟ تشوفنى !؟ لا طبعا ماينفعش .!!

علاء : ليه بس ياموزه . هو انا معرفكيش يعنى ولا عمرى ما شوفتك ف الحاره .دا احنا حتى جيران ..ولا ايه؟

سحر : بتوتر . ايوه يا علاء احنا جيران وبتشوفنى ف الشارع عادي . بس انك تشوفنى فيديو دى مش هقدر ..

علاء : ليه حد صاحي عندك ؟

سحر : بتفكير .وكدبت . قالت ايوه اخويا عصام عندنا .علشان مراته راحت زياره عند أهلها . وهو قاعد في الصاله بيتفرج ع التلفزيون خليها مره تانيه !!

علاء : امم طيب ياقمر . ابعتيلى صوره ليكى تصبيره .!

سحر : بلعت ريقها بتوتر .صوره ؟

علاء : ايوه صوره . ويسلام ياقلبى لو تتصورى دلوقتي وتبعتيلى صورك . ياااه .!!!

سحر : فهمت من كلامه أنه مش ف وعيه . وسألته انت شارب ياعلاء !؟

علاء : شارب ايه بس ياقمر . خلصي بقى ابعتى صورتك .!!

سحر : بتفكير . اعمل ايه ياربي !!؟ وجاتلها فكره . حاضر ياحبيبى . ثوانى بس اقلع الاسدال . اصل لابساه من بدرى لما كنت عند فتون !!

علاء : انتبه ايه ؟ فتوون! انتى طلعتليها ؟

سحر : بمكر .طبعا . وقعدت معاها شويه ونزلت من عندهم متأخر.

علاء : ليييه حسن اتصل عليكى !؟..

سحر : بنفي . ابدا متصلش ولا عبرها .عارف اخر مره كلمها من اكتر من شهر تقريبا . يكش يكون زهق منها يارب ..

علاء : ههههه . ممكن ليه لأ ويكون شاف واحده اجنبيه كدا حلوه وموزه ..

سحر : بغيره وهو انا وحشه علشان يشوف واحده حلوه .. وكمان فتون مش حلوه اوى يعنى. بت حظها ضارب . منك ومن حسن . مش عارفه بتحبوها ع ايه؟

علاء : هههههههههه . فتون وحشه !!!؟ ههههههه . يابت دى فتون دي بت كدا من الآخر . لا بتحط ابيض ولا اسود وبالحلاوه دي .اومال بقى لما تحط . وبتنور ف الضلمه. وكمان بسلام لو تلبس حتة فستان كدا اوووف دي هتبقى صاروخ الحاره . بس مسيرها تقع تحت ايدى !!!

سحر : مش عاجبها كلام علاء . وقالت بتريقه !! صاروخ الحاره .. جاك صاروخ يشيل الحاره بفتون وامها والل فيها . اقفل بقى انا هتخمد احسن .

علاء : ايه بس ياموزه . بتقفشي بسرعه ليه كدا !؟ . وبعدين هو انا شاحنلك علشان تقولى هنام . دا انا لسه صاحي . وهنسهر انا وانتى للصبح ...

#بقلمى .. مريم نصار

عدي يوم كمان .

. عند فتون الساعه ٦ الصبح منبه الفون رن .

.. وفتون فتحت عينيها . وفصلت المنبه . وبتتاوب . ونفسها تنام تانى . لكن عندها مدرسه .. وقامت بكسل .. ودخلت الحمام . وغسلت وشها . وفرشت أسنانها . واتوضت . وطلعت ولبست الاسدال وصلت الصبح . ودخلت ع امها وكانت نايمه ..

واخدت البطاقه ونزلت علشان تجيب العيش . وفطار ل فاطمه قبل ما تمشي .. وطلعت الحاره..

زينهم : بيفتح المحل . يافتاح ياعليم يارزاق ياكريم يارب . رزقنا عليك يارب ..

فتون : صباحك فل ياعم زينهم .

زينهم : لف وشاف فتون .وابتسم. اهلا اهلا . صباحك نادي يابنتى . عامله ايه ؟

فتون : الحمدلله ماشي الحال . انا رايحه الفرن اجيب العيش وفطار . اجبلك معايا ..؟

زينهم : لا استنى .. وبص قدام . وشاف ابنه . ونده عليه محمووود انت ياض ياحوده ..

محمود : جه ايوه يابابا . اذيك ياابله فتون .

فتون : صباحك فل ياحوده . عامل ايه ف المدرسه .؟.

محمود : الحمدلله كويس .

زينهم : هاتى يافتون يابنتى البطاقه دى كدا ..!

. واخدها. امسك ياحوده يبنى . هات عيش لفتون وفطار فول وطعميه. وخد البطاقه بتاعتنا كمان هاتلنا بالمره وهات فول وطعميه. بس بسرعه .

فتون : بحرج .. لأ لأ ياعم زينهم . خلى محمود يروح ع المدرسه وانا هجيب العيش والفطار..

زينهم : مدرسة ايه دلوقتي يافتون لسه بدرى . بسلامته بيروح يلعب كوره مع زمايله .قبل المدرسه . اقعدى انتى بس .. يلا ياحوده بس متعوقش . قول لعمك قبارى ابويا بيقولك ادينى العيش بسرعه .

محمود : حاضر يابابا .

فتون : امسك ياحوده هات بالفلوس دى فول وطعميه . واخد البطاقتين ومشي ..

فتون : بحرج . شكرا ياعم زينهم . ربنا يخليك تعباك معايا ..

زينهم : وده كلام بردو . يعنى لما منه بنتى ولدت . وانتى كنتى معانا ليل نهار وبتساعديها ده مكنش تعب ..؟

فتون : منه بنتك دى زى اختى بالظبط . وربنا يخليلها ابنها .احم عايزه كيس حلويات ع بسكوتات وشوية شبسيات كدا ل اطفال الفصل زى كل مره ياراجل ياطيب .

زينهم : ضحك . مجهزهولك من امبارح بليل . خدى يابنتى امسكي . وربنا يفرح قلبك زي ما بتفرحيهم ..

فتون : بتاخد الكيس . الله يخليك ياعم زينهم .. وبصت قدام . وشاورت صباح الفل يام سيد !!

ام سيد : يسعد صباحك يافتون ياحبيبتى . صباحك هادى ونادي إن شاء الله ..

فتون : تعيشي الله يخليكى .

ابو سلامه : جه من وراهم . سلامو عليكو.

زينهم وفتون . وعليكم السلام.

ابو سلامه : اذيك ياحج زينهم ..

زينهم : نحمدو ونشكر فضله يابو سلامه اتفضل ..

ابو سلامه : بص ل فتون . الله يخليك ياحج زينهم . ايه يافتون !؟ بقى ابعتلك سلامه ابنى اول امبارح . وتخليه يرجع بقرشين ودا اسمه كلام ؟

فتون : بحرج . معلش ياعم أبو سلامه . انا قولت لسلامه يومين بالكتير وهعدي ع ام سلامه واديها الباقي ..

ابو سلامه : هز راسه . ياريت بعد كده يابنتى تعملى حسابك وتشيلى حق الايجار ع جمب .. اه معلش يعنى انتى عارفه الظروف بقى . وانا استحملتك الشهر الل فات كله ..

فتون : بغصه في قلبها . ماشي . ماشي ياعم أبو سلامه . ربك يسهل ..وانهردا إن شاء الله هجبلك باقى الإيجار

زينهم : واقف وزعلان ع فتون . ومدايق من صاحب البيت لانه عارفه بيحب الفلوس هو ومراته اكتر من اى حد ..وكمان زينهم ممعهوش سيوله يدفع لفتون.

ابو سلامه : واعملى حسابك يابنتى . كمان شهرين والايجاز هيزيد . اول السنه الجديده بقى يلا كل سنه وانتو طيبين ..

فتون : اتنهدت بوجع . وانت طيب .. وانت طيب ياعم أبو سلامه ..

شيخ محمد : من وراهم سلام عليكم . فتون عليها كام ياحج ابو سلامه !!؟

فتون لفت . وحست باحراج شديد .وهمست عليكم السلام .

ابو سلامه : وعليكم السلام ياشيخ محمد .كان عليها شهرين متأخرين. ودفعت نص شهر . ولسه شهر ونص .!!

محمد : وماله . يعنى الدنيا متهدتش علشان تكلم فتون ع الايجار ف وسط الحاره وع الصبح .. ولا هي دي الأصول ياحج !؟

ابو سلامه : متواخذنيش ياشيخ محمد . بس انت عارف حالة فتون . من سنه مقدرتش تدفع تمن ايجار شقه كامله . وربنا كرمها بالاستاذ طلعت المحامى الل كان عايز شقه أوسع وخدنا نص الشقه الل ساكنه فيها فتون . وبصراحه الشهاده لله من يومها فتون بتدفع وقبل ميعادها كمان . بس دلوقتي بقالها شهرين مدفعتش . وخايف لا الايجار يكسر عليها ..

محمد : بصله بنفور . وطلع من جيبه فلوس الايجار . امسك ياحج . ده الايجار بتاعي . ودول ايجار الشهر ونص بتاع فتون . ولما تحب تتكلم ف ايجار بعد كده . ف باب تخبط عليه . مش تقول لل مايشترى يتفرج ..

فتون : بتكابر دموعها . ونفسها تهرب ف مكان لوحدها وتعيط . ومتكلمتش ....

ابو سلامه: اخد الفلوس . وضحك . طول عمرك ظالمني ياشيخ محمد . هو احنا عندنا غير فتون واحده ف الحاره . وبص ل فتون خلاص يافتون يابنتى فُرجت اهي . يلا بال إذن انا سلامو عليكو ..

كلهم : بديق .. وعليكم السلام .

زينهم : شاف عيون فتون . ومحبش يحرجها . واتنهد ودخل البقاله يطلع البضاعه قدام المحل ..

محمد : بص ل فتون . ايه يافتون يابنتى .

فتون : بصتله بدموع . كتر خيرك ياعم محمد . وانهردا إن شاء الله . الفلوس هتكون عندك ..

محمد : ابتسم . كتر خيري !؟ ههههه . انتى لو قعدتي معايا . وجبنا ورقه وقلم . ونحسب زمان وافضال الحاج مهران عليا . هطلع مديونلك انتى وابوكي لسنين قدام .. وهز راسه وبيسبح . سبيها على الله يابنتى .. انا عارف إن كرامتك وعزة نفسك اهم حاجه عندك . وكرامتك محفوظه . والل حصل من شويه ده . بيحصل مع ناس كتير. وانا عارف انك مضايقه انى اتصرفت كدا . بس يكون ف علمك انتى بنتى التانيه . ولولا انك عامله حاجز بينا . كان زمانى مجهزك مع سحر . بس نعمل ايه!؟ . نفس دماغ مهران الله يرحمه ..

فتون : ابتسمت بوجع . الله يرحمه . ومفيش حاجز ولا حاجه ياعم محمد . وربنا يخليك لينا . وإن شاء الله مش هتأخر عليك ف الفلوس ..

محمد : ابتسم . بردو مصممه . ماشي يستى الل يريحك اعمليه . بس نسمع منك الصلاه ع النبى كدا. ونشوف ضحكتك الحلوه ..

فتون : ابتسمت . عليه الصلاة والسلام ..

زينهم : لا بقى مدام ضحكتى . يبقى افطرى معايا انتى والشيخ محمد . وهنجيب احلا فطار . ولا ايه ياشيخنا ..

محمد : ضحك . ياما نفسي نرجع الايام الحلوه زي زمان يازينهم ياخويا . بس اعذرني انا يدوبك اجيب فطار الجماعه . واتكل ع الله الحق الصناعيه . يلا انا بقى .السلام عليكم ..

فتون . وزينهم : وعليكم السلام ..

محمود : جه . وشايل العيش . العيش اهو يابابا . ده العيش بتاعنا والفطار . وده عيش ابله فتون والفطار بتاعها. اتفضلى البطاقه اهي .

فتون : ضحكت بتكليف . تسلم ياحوده . منحرمش منك ..

زينهم : هات ياحوده البطاقه . واتكل ع الله ع المدرسه . واخد البطاقه ومحمود مشي ..

فتون : متشكره ياعم زينهم .

زينهم : العفو يابنتى ع ايه .. تعالى بقى . نفطر مع بعض ..

فتون : لا مش هينفع انا يدوب اطلع احضر الفطار ل ماما . وانزل بسرعه علشان متاخرش ع المدرسه . يدوبك الحق الاتوبيس .

زينهم : ماشي يابنتى ربنا معاكي ..

فتون : يارب . واخدت العيش والفطار . وطلعت بسرعه علشان متتاخرش .

#بقلمى : مريم نصار

فتون : دخلت الشقه .وراحت ع المطبخ . وجهزت الفطار بسرعه وحطته ف صينيه . وطلعتله ف الصاله ع تربيزه صغيره وغطت الصنيه . وجابت ازازة ميا وكوبايه فاضيه . وشنطة العلاج . وحطتها جمب الفطار . ل فاطمه لما تصحى ...

وعملت كوباية نسكافيه ليها . وبتشربها وبصت ف الساعه . وشهقت . يلهوى الطابور . يدوبك . وعملت ساندوتش ليها بسرعه وحطته ف علبه وحطته ف شنطتها . وجريت ع الاوضه. ولبست بسرعه . بنطلون . وبلوزه طويله وطرحه . ولبست كوتش . واخدت فونها وشنطها بسرعه . وخرجت من باب الشقه . وطلعت ع السلم بسرعه الدور الل فوقيها . وخبطت ع شقت ام حسن.

سهير : فتحت وبتتاوب .

فتون : صباح الخير . ياخالتى .

سهير : ابتسمت . يسعد صباحك يافتون . تعالى خشي ياحبيبتى.

فتون : لا الله يخليكى . انا يدوب الحق المدرسه . بس الله يخليكى متنسيش تبعتى بنتك نوسه ل لامى تديها حقنة الأنسولين الساعه ١٠ زي كل مره . والمفتاح معاكي ماشي.

سهير : من عينيه ياحبيبتي . روحي انتى ومتقلقيش ربنا معاكي .

فتون : تسلمى ياخالتى وسلميلى ع عم منصور . يلا سلام . وجريت ع تحت .

سهير : مع السلامه . وقفلت الباب ..

فتون : خرجت من العماره بسرعه واخدت الكيس من عمها زينهم . وماشيه بخطوات سريعه . وفونها رن . وكانت حنين وردت . الو .

حنين : صباح الخير يا فتون . ايه يابت انتى بتنهجى كدا ليه ؟

فتون : صباح الخير يا حنين . ابدا انا ماشيه ف الشارع بسرعه . علشان متأخرش . انتى ف المدرسه .؟

حنين : لا لسه . انا ف التاكسي اهو . قربت اوصل .

فتون : طيب ياحنين . انا لو اتاخرت . فهمى الاستاذ عبد القادر . انى ف الطريق علشان امضة الحضور ..

حنين : لا هتلحقى لسه ساعه يابنتى . ولو كدا انا همضيلك حضور يلا متتاخريش سلام

فتون : سلام . ووصلت ع اول الشارع . ويدوبك لحقت الاتوبيس قبل ما يمشي . واتنهدت باريحيه . الحمدلله . وركبت الاتوبيس . وواقفه ف الطرقه . وقطعت التذكره . وفضلت واقفه لحد المحطه بتاعتها . ونزلت . ومشيت بسرعه وبتنهج . ولسه بوابة المدرسه هتقفل . وندهت . استنى ياعم فتحي . ياعم فتحى ..

فتحي : فتح البوابه . مين . ابله فتون .

فتون : بتنهج . الطابور خلص ؟

فتحي : ع مهلك . لا لسه بيبدء اهو .

فتون : الحمدلله . ودخلت المدرسه . وراحت عند طابور اطفال الحصه الاولى .. وشاورت ل حنين ..

الطابور خلص .

. فتون قالت . سنه رابعه يلا ع الفصل . وانا همضي حضور وهحصلكو ..

الاطفال . بفرحه ابله فتووون اول حصه .وابتسمو بفرحه ..

الاطفال . المكفوفين . ربنا مميزهم بميزة العقل . وعارفين طرقات المدرسه كويس . والسلم وكمان الفصول .. واتحركو ع الفصل .

فتون : جريت . صباح الخير يا استاذ عبدالقادر ..

عبد القادر : صباح النور . اتفضلى امضي .

فتون : اخدت القلم . ومضت حضور . اتفضل .

فتون : طالعه ع السلم .

حنين : طالعه وراها . انتى يابت !!

فتون : ابتسمت ولفت . صباح الفل .

حنين : صباح الورد . هاتى بوسه تعالى .

فتون : ضحكت . وسلمت عليها . وطالعين ع السلم ..

حنين : عامله ايه ؟

فتون : الحمد لله تمام انتى عامله ايه؟

حنين : تمام . صاحيه بدرى وهموت وانام ..

فتون : انتى مابتشبعيش نوم ؟

حنين : ولا أكل ههههههه . خدى امسكى .وطلعت من شنطتها ساندوتشات .

فتون : ايه ده ؟

حنين : ساندوتشات شاورما . ماما عملاهالى ..

واقولها ياماما ف حد يفطر شاورما ؟ قالتلى وانتى بيحوق فيكى حاجه معده من فولاذ ههههه .

فتون : هههههه . ربنا يخليهالك . بس لا انا مش هقدر . انا فطرت في البيت . وشربت نسكافيه . ونزلت ع طول ..

حنين : ماليش دعوه . امسكي بقى متبقيش رخمه .

فتون : والله ما هقدر . واتكلى بقى علشان الفصل اهو . والحصه بدأت ..

حنين : اوكي . هقابلك ف الفسحه .

فتون : ماشي . ودخلت الفصل . وحطت الشنطه ع التربيزه . صباح الخير ياحلوين ..

كلهم : بنشاط صباح الخير يا ابله فتووون .

فتون : ضحكت . عاملين ايه انهردا ؟

كلهم : بفرحه . الحمدلله يا ابله !!

فتون : ابتسمت . يلا كله يقعد . ويطلع كتاب العربي . الدرس الرابع و مسطرة برايل وقلم برايل .

. الاطفال كلهم طلعوا الكتاب والمسطره والقلم بنشاط . لانهم بيحبو فتون ..

فتون : فتحت الكتاب . وبتقرا منه للاطفال . وشرحت الدرس بكل تركيز .

وخلصت شرح . وشافت ولد قاعد ومنزل راسه وباصص للأرض وشكله زعلان .. فتون راحت قعدت جمبه . ايه يا مالك فهمت الدرس ؟

مالك : هز راسه بلاء .

فتون : لعبت في شعرو وابتسمت . طيب قولى انت مش فاهم ايه وانا اشرحهولك .

مالك : مردش . وساكت .

فتون : امم طيب حد دايقك ف المدرسه ؟

مالك : هز راسه بلاء .

فتون : طيب قولى مالك . مش انا ابله فتون صحبتكم . لو مقولتليش انا هزعل منك وكمان مش هجيب الحاجه الحلوه معايا تانى . ها قولى بقى مالك !؟ . وبصت للأطفال .وقالت بصوت مسموع .. الصووت . كلنا نكتب الدرس المستفاد يلا . علشان هراجع مع كل ولد وبنت . وهشوف مين اشطر واحد . وهياخد الشبسى .

الكل اتحمس . وبدءو يراجعو الدرس .

فتون : ها يا مالك هتقولى ايه الل مزعلك اوى كدا؟

مالك : بزعل حقيقي . ماما وبابا زعقولى الصبح ..

فتون : ربتت ع ضهرو . ليه ياحبيبى ايه الل حصل علشان يزعقولك ؟

مالك : بزعل . لانى وقعت العصير ع لبس بابا الصبح .وعيونه لمعت بدموع. بس غصب عني . وبابا وماما زعقولى . وبابا قالى هتفضل فاشل حتى اسمك مش عارف تكتبو . وماما سمعتها بتقول لبابا انا زهقت وتعبت معاه . هما زهقو منى علشان انا مش بشوف زى اخويا الكبير ..

فتون : مالك صعب عليها جدا . وعيونها لمعت بدموع. وضمته لقلبها بحنان كبير وباست ع راسه . ومسحت دموعه وباسته من خدو . ايه الل انت بتقوله ده يامالك ؟ لا طبعا باباك ومامتك بيحبوك جدا وعمرهم ما يزهقو منك ابدا . وقالت بصوت واطى ..طيب تعرف . إن لبس المدرسه بتاعك احسن لبس ف الفصل كله !؟

مالك : بفرحه بجد يا ابله ؟

فتون : بتأكيد . طبعا بجد . وكمان شنتطك احسن شنطه ف المدرسه كلها .

مالك : بدء يتحمس بجد .. بجد يا ابله ؟

فتون : بجد ياروح الأبله . وعيزاك تعرف إن ده دليل أن باباك ومامتك بيحبوك جدا وبيهتمو بيك . لو مش بيحبوك كانو جابو ليك اى لبس وخلاص . وكمان ايه دا !!؟ ريحة البرفان بتاعتك حلووه اوووى . مين الل جايبلك البرفان ده ؟

مالك : ضحك . بابا جابهولى ف عيد ميلادى اول امبارح.

فتون : امم عيد ميلادك .. كان اول امبارح وانا معرفش . كل سنه وانت قمر كدا يامالك .

مالك : ضحك واتكسف ومردش ..

فتون : لعبت في شعرو . مالك ياحبيبى . عايزاك تتأكد أن اهلك بيحبوك . وكمان يامالك اي حد سواء بيشوف او لا . ممكن الكوبايه تقع من ايدو . طيب تعرف انى كسرت طقم كوبيات بحاله ههههه ..

مالك : بدهشه . بجد ياابله ؟

فتون : ايوه بجد .

مالك : طيب وباباكى ومامتك زعقولك ؟

فتون : ابتسمت بحب . وافتكرت حنية ابوها عليها . واضطرت تكذب علشان مالك . وقالت ايوه زعقولى كتير .وبصت ل مالك انت لما بتقصر ف الواجب بتاعك مش الميس بتزعقلك وكمان لما بتعمل حاجه غلط ف المدرسه مش المدرس بيزعقلك؟

مالك : هز راسه ايوه .

فتون : طيب . يعنى مش لازم نزعقلك علشان مش بنحبك . لا احنا بنشد عليك علشان عايزين مالك يبقى احسن واحد ف الدنيا . وكمان انا هخليك تثبت لباباك ومامتك انك مش فاشل . وهقدملك هدية عيد ميلادك انهردا . وهي اني هعلمك انهردا انك تكتب اسمك ولو كتبت اسمك ليك هديه منى وهي كيس شيبسى وبسكويت . هااا مبسوط ؟

مالك : نشاطه اتجدد . مبسوط اوى انا بحبك اوى يا ابله فتون !!

فتون : ههههه وانا كمان بحبك ياملوكه . نخلص الحصه .. وبعد كدا أعلمك اسمك ف الفسحه . اتفقنا .

مالك : هز راسه بفرحه اتفقنا ..

#بقلمى .. مريم نصار

فيلا بدر الدين .

فريده : قاعده ع السفره .

سليم : نزل صباح الخير يا فريده !!

فريده : بحب . صباح النور ياحبيبى . تعالى اقعد ثوانى وعزيزه هتجيب قهوتك ..

سليم : قعد . اومال شريف راح الشركه؟

فريده : لا شريف لسه منزلش انا بعت عزيزه تصحيه !!

سليم : هز راسه . ونفخ بديق ..

فريده : مالك ياسليم . شكلك مدايق كدا ليه ؟ انت مش عاجبني من اول امبارح ..

سليم : اتنهد . وابتسم بتمثيل . ابدا ياحبيبتى . عندى ميتنج مهم انهارده .

عزيزه : جابت القهوه . اتفضل يا سليم بيه وحطتها قدامه ..

سليم : اخد الفنجال . وبيشرب القهوه . وسرحان ف رهف . لانه متصلتش عليها من اخر مره وصلها للبيت . وهي كمان متصلتش عليه. وفاق ع صوت شريف ..

شريف : نزل ومعاه ملف .. صباح الخير .

فريده وسليم . صباح الخير ..

شريف : قعد . وبيشرب القهوه . اتفضلى حضرتك ده ملف فيه شوية إجراءات للمشروع الجديد وواقف ع الامضا بتاعتك راجعى عليه برحتك بس احنا محتاجينه بكره لان هنتقابل ف ميتنج مهم انا وسليم والعملا.

فريده : اخدت الملف . وهزت راسها حاضر يبنى . انا هقراه ولما ترجع إن شاء الله هيكون جاهز ..

شريف : تمام . وبص ع سليم شافه مش ع طبيعته ...

سليم : سرح من تانى وحاسس أنه مبقاش فاهم حاجه . وانتبه ع صوت القطه . وابتسم لانها بتلف حوالين رجلين سليم لانه مهتم بيها. كأنها بتقوله صباح الخير .. سليم شالها .

والفطار جهز . والكل فطر ف صمت ..

سليم : قام . طيب ياشريف انا هسبقك . هتروح ع الشركه ولا المصنع؟

شريف : لا انا هطلع ع البنك الاول . وبعدها الشركه ..

سليم : هز راسه تمام . وباس ع أيد فريده . وخرج ..

فريده : احم شريف ياحبيبى !!

شريف : بصلها . نعم .

فريده : انا كنت عايزه اتكلم معاك في موضوع كدا !!

شريف : فهم . وهز راسه . اممم موضوع الجواز مش كدا ؟

فريده : ابتسمت . ايوه يا يبنى . انت هتفضل لحد امتى كدا .العمر بيجرى . وانا شايفه أن مفيش سبب انك متتجوزش !! الحمدلله مال وجمال ناقصك ايه علشان ترفض . ولو ف واحده ف دماغك قولى بس شاور عليها وانا اطلبهالك على طول . نفسي افرح بيك !!

شريف : بصلها كتير جدا . وساكت . وبعدها اتنهد . وقال صدقينى انا مستريح كدا . ياريت الموضوع ده يتأجل . انا لما احب اتجوز هاجي لحد عندك واقولك انا قررت اتجوز . لكن حاليا انا مركز ف شغلى وبس . وخلاص كلها ٥ شهور وتفرحي ب سليم ..

فريده : عيونها لمعت بدموع . افرح !!!؟ افرح ايه يبنى وهي دي جوازه .. هي رهف دي عارفه تشيل مسؤلية نفسها لما هتشيل مسؤلية بيت انا بدعي ليل نهار . إن سليم يفوق . ويعرف انها مش من توبه !!

شريف : سيبيه برحته سليم مش صغير وقادر يتحمل نتيجة قراره . وسليم طول عمرو زكي . انا افتكر يوم ما انا وبابا كنا قاعدين ف اجتماع . وسليم راجع من الكليه . وحضر معانا الاجتماع من باب التسليه . وابتسم . وكمل كان بابا بيشرح المشروع الجديد . وسليم بدون وعي وقدام الوفد ف الاجتماع قال الابعاد الل ممكن تحصل للمشروع ده لو تم ف المنطقه المحدده ليه . وخلانا كلنا نشوف المشروع من اتجاه تانى خالص . ومن ساعتها بابا قرر إن سليم يتعين ف الشركه . وكان قدها . لاننا اكتشفنا حب سليم للتجاره وبيحب يفكر بعمق كبير ويرجع للاجتماع بطريقه تبهر كل الموجودين .. ف مش معقول واحد بالكفاءه دي هيختار غلط شريكة حياته !!

فريده : اتنهدت بتعب . وهزت راسها . ربنا يقدم الل فيه الخير ..

شريف : قام . انا لازم اروح ع البنك دلوقتي بعد اذنك .. وخرج ..

#بقلمى .. مريم نصار

ف المدرسه .. وقت الفسحه .

.فتون دخلت الفصل . وشافت مالك قاعد مكانه مستنيها . وابتسمت .

مالك : حس بخطواتها ابله فتون !!

فتون : ايوه يامالك . وقعدت جمبه . يلا بقى طلع المسطره والقلم علشان أعلمك تكتب اسمك ..

مالك : بحماس . يعنى هتعلم اكتب اسمي كامل .

فتون : ايوه طبعا . بس يلا قبل الفسحه ما تخلص ..

مالك : طلع المسطره والقلم ..انا جاهز .

فتون : ابتسمت .. هات ايدك ..ومسكت ايد مالك . وقالت يلا نبدء .

وقالت .. اسم مالك بيدء بحرف الميم .

يلا ف المربع او الخليه هنا هنعمل بالقلم.

حرف الميم أدى نقطه ١ نقطه ٣ نقطه ٤

حرف . الالف نقطه ١

حرف اللام . نقطه ١ نقطه ٢ نقطه ٣

حرف الكاف . نقطه ١ نقطه ٣

مالك : فتون ماسكه ايدو . وبيكتب معاها . ومركز المرادى جدا . علشان يفاجئ ابوه وامه ..

فتون : كررت اسم مالك اكتر من مره . ومالك كتبه لوحده . وبعدها فتون مسكت ايدو وعلمته اسمه بالكامل .. ومالك اتعلم وكان مبسوط جدا ..

فتون : بسعاده . برافو عليك يامالك بجد انت اشطر واحد ف الفصل ..

مالك : بفرحه . انا مبسوط اوى يا ابله . انا اول ما اروح هقدم لماما وبابا الورقه دي . وكمان هكتبه قدامهم كتير ..

فتون : حست بفرحته . وطلعت كيس شيبسى اتفضل بقى كيس شيبسى وكمان بسكويت اهو زي ما وعدتك .

مالك : اخدهم شكرا يا ابله ..

فتون : العفو ياحبيبى ..

بعد فتره .

. فتون خلصت وخارجه المدرسه..

حنين : توونه انتى يابت . قفشتك ماشيه يعنى من غير ماتسلمي عليا .؟

فتون : انا دورت عليكى . ورحت المكتبه وملقتكيش هناك قولت يمكن اخوكي جه اخدك بالعربيه ومشيتى !!

حنين : اووف اسكتى متفكرنيش . هي دي عربيه !! دي بتقف اكتر ما بتمشي هههههههه

فتون : اي حاجه ياحنين المهم انها تأدي الغرض ..

حنين : بقولك ايه . ماتيجي نتمشي شويه !!

فتون : لا معلش يا حنين . انتى طبعا عارفه أن ماما تعبانه . ومينفعش اتاخر عليها .

حنين : بتفهم . امم تمام . خلاص بس اعملى حسابك نخرج ف يوم مع بعض . فتون انتى مبتخرجيش خالص !! . وانا جيت عندك البيت . وانتى مش راضيه تجي عندى خالص .

فتون : ابتسمت . إن شاء الله . هجيلك انتى متزعليش بس . هتلاقينى ف يوم بقولك يلا بينا ع بيتكو .

حنين : ماشي ياست يافتون لما نشوف .

فتون : شافت الاتوبيس . طيب ياحنين الاتوبيس جاي همشى انا علشان لو ملحقتوش فيها ساعه كمان لما يجي غيرو يلا سلام .. ومشيت

حنين : سلام ياحبيبتي وبصوت مسموع ..وخلي بالك من نفسك يا فتوون .

فتون : ماشيه بسرعه . وشاورت أيدها ليها ماشي ياحبيبتى وانتى كمان .

فتون . ركبت الاتوبيس بصعوبه من الزحمه . ووقفت ف الطرقه ..

حنين : شاورت ل تاكسي وركبت ومشيت وصعبان عليها حال فتون ..

#بقلمى .. مريم نصار

ف شركة بدر الدين ..

سليم : ف المكتب . وبيدرس الملفات والمشروع الجديد بكل تركيز .. الباب اتفتح . صحبى يصحبى ..

سليم : رفع عينيه وضحك . تعالى يافاشل .

خالد : قلب الفاشل . وحشنى اجدع . وقعد قدامه ع كرسي المكتب وفرد رجله ع التربيزه.

سليم : وانت اكتر . فينك كدا مش باين ؟

خالد : حط ايدو ع قلبه . مش مانعنى عنك غير الشديد القوى ..

سليم : ههههههههه يبقى كنت مشغول مع حب جديد يمعلم ..

خالد : حب ايه الل انت جي تقول عليه . انا مش بتاع حب يسطا . البنات كلهم شبه بعض . تبصلها تغمزلها خلاص بقت ف جيبك وكله بالفلوس والحب ..

سليم : هز راسه بنفاذ صبر . عمرك ما هتتغير. وهفضل اقولك إن البنات كلهم مش زي بعض .. بس انا واثق إن اكيد هتيجي ف يوم واحده وتفوقك من الل انت فيه .. وساعتها تبقى سلملى ع الفلوس .

خالد : بتأكيد . مش هيحصل . لان مفيش حاجه اسمها حب اشطا ؟

سليم : لا طبعا فيه . عندك انا ورهف ..!!!

خالد : بصله ف نظره معينه وسليم فهمها . وانت بقى بتحب رهف ياسليم ؟؟؟

سليم : بص ل خالد وحس أن لسانه اتلجم ومعرفش يرد !!!

خالد : ايه ؟ سكت ليه !؟ عموما سكوتك ده اكبر دليل ع انك محبتهاش !!

سليم : مط شفايفه . امم اومال ايه ياسابق عصرك .؟

خالد : انا مش عايز اتكلم معاك جد علشان متزعلش منى زي ماحصل قبل كدا. بس هرجع اقولك الل انا قولتهولك يوم ماقولتليى انك هتتقدملها .. انت واحد متعلم ومثقف وشخصيتك كانت . ها . انا بقول كانت غير كدا خالص .. انت واحد كنت ف حفله شوفت بنت جايه من امريكا . جميله مميزه تعليمها كله بره مصر. وكان الضوء متسلط عليها يوم الحفله . نص كلامها انجليش . وامها وأبوها متحضرين أو متحررين .. شخصيتها مستقله والكل كان هيموت عليها ف وسط الحفله وهي منفضالهم . وسابت كل ده وركزت معاك انت وجت لحد عندك واتعرفت عليك . وطلبتك انت بالتحديد ترقص معاها . وده كان حلم بالنسبه لرجال أعمال كتير موجودين في الحفله . والضوء بقى متسلط عليك وعليها . ساعتها انت محبتهاش زى ما قولتلى لالا . ساعتها بس انت حسيت بالانبهار . مرحله جديده ف حياتك . وأنت مدتتش لنفسك فرصه تفكر . لا !! . بعدها ب اسبوع واحد روحت اتقدمت من قبل ما تعرف طبعها ولا أسلوبها . واهي تعباك نفسيا ف حكاية لبسها ورحلاتها وسهرتها .. ياسليم انت مبتحبش رهف اوكي انت بس مبهور بيها وبكره هفكرك اشطا !!وخالد منتظر هجوم سليم زي ما حصل قبل كده !

سليم : بيسمع خالد ومركز جدا . كأنه اول مره يسمع الكلام ده . وافتكر كلام فريده . وبص ل خالد وهز راسه واتنهد وسكت ..

خالد : استغرب رد فعله . لكن معلقش و طلع فلاشه من جيبه .. بقولك ايه . نركن الفلسفه بتاعتنا دي ع جمب . وأمسك ..

سليم : بعدم فهم . فيها اي الفلاشه دي ؟

خالد : انت مش كنت عايز فيلا ف مكان حلو . اهو عندك ع الفلاشه دى اكتر من فيلا . ومتصوره من جوه وبره . واماكن مختلفه وكل فيلا مكتوب عليها السعر بتاعها. عيش بقى مع الصور . واطلبلى قهوه ..

سليم : اخد الفلاشه . وحطها ع المكتب . وطلب ٢ قهوه .

السكرتيره . دخلت بالقهوه . وحطت القهوه . وخالد عينيه عليها ..

سليم : متابعه .. وسكت .

السكرتيره . خرجت ..

سليم : بتحذير . اول واخر مره . هاقولك تلم عينك لما تبقى ف شركتى ومكتبى فاهم يالا .

خالد : ياساتر عليك . ماتسينى اعيش يا اخى .

سليم : تعيش !!؟ انت بتسمي القرف ده عيشه . بقولك ايه انا مش هعيد كلامى تانى .

خالد : طلع سِجاره امسك ومتوجعش دماغي . ويلا شوف الڤِلل .

سليم : اخد السِجار وحاسس أنه مخنوق. وشغل الفلاشه ع اللاب توب . وبدء يتفرج هو وخالد ..

.وسليم جواه مش فارق معاه لأن رهف هي الل هتختار ..

#بقلمى .. مريم نصار

فتون : نزلت من الاتوبيس بصعوبه .ونفخت بديق ..استغفر الله العظيم يارب . الشنطه كانت هتتقطع .. وعدت ع البنك قبل ما يقفل وقبضت المعاش .. وخرجت .

ودخلت الشارع وماشيه فيه . ودخلت عماره وطلعت الدور الرابع . وخبطت .. والبنت فتحت . اهلا ابله فتون ..

فتون : اذيك ياعبير . ماما موجوده ؟

عبير : ايوه عايزاها ؟

فتون : ايوه ياحبيبتي قوليلها تكلمنى !!

عبير : هزت راسها وجريت .تبلغ امها ..

فتون : واقفه قدام الباب ..

ام عبير : تعالى يافتون خشي ياحبيبتى .

فتون : الله يخليكى يا ام عبير . انا جايه علشان انهردا ١٠ ف الشهر وده دوري ف الجمعيه ..

أم عبير : ايوه ياحبيبتي . بس ف ٢ لسه مدفعوش . تاخدى الل موجود . وع بليل ابعتلك الباقي مع البت عبير ..؟

فتون : ماشي مايجراش حاجه ..

ام عبير : طيب تعالى متقفيش ع الباب كدا .

فتون : معلش اصلى مستعجله امى لوحدها .

ام عبير : طيب ثوانى هجبلك الفلوس.ودخلت

وجابت الفلوس . اتفضلى ياحبيبتي ١٦٠٠ جنيه اهُم وبليل هبعتلك ٢٠٠ جنيه وانتى بتدفعى ٢٠٠ جنيه يبقى كدا ال ٢٠٠٠ جنيه وكل شهر وانتى طيبه ..

فتون : ابتسمت . وانتى طيبه يام عبير . واعملى حسابى ف الجمعيه الل بعدها . وتانى اسم المرادى زى ما وعدتينى ..

أم عبير : طبعا يافتون عينى ليكى ياحبيبتي . وانا هكتب اسمك من دلوقتي ..

فتون : تمام . يلا بال اذن انا سلامو عليكو ونزلت ع السلم .

أم عبير : وعليكو السلام ياحبيبتي . وقفلت الباب .

.

فتون : نازله مبسوطه . وعدت ع بتاع الفراخ . اذيك ياعم نبيل !؟

نبيل : اهلا اهلا يافتون يابنتى . عاش من شافك ..

فتون : تحت النظر ياراجل طيب . بقولك ايه ؟

نبيل : اؤمرى يابنتى ..

فتون : الأمر لله ياعم نبيل . انا عايزه منك تشويلى فرخه بس دلوقتي . وانا هروح مشوار صغير وانا راجعه هاخدها منك .

نبيل : من عينيه . ١٠ دقايق وعدى عليا ..

فتون : تمام حلو اوى . حسابك كام ؟

نبيل : بس لما ترجعى .

فتون : لا قبل ما تعملها خد حسابك امسك وشوف حسابك كام .. واعمل حسابك في السلطه والطحينه ..

نبيل : من غير ما تقولى يابنتى انا هظبطهالك . امسكي الباقى اهو ..

فتون : اخدت الباقى . ماشي تسلم ايدك قبل ما تعملها .. ومشيت . وراحت اخر الشارع ودخلت محل ادوات منزليه . سلام عليكم .

الست : وعليكم السلام ..

فتون : انا واخده حجات قسط من هنا . عايزه اشوف عليا كام . بإسم فتون مهران ..

الست : ثوانى . وفتحت الدفتر . وقالت عليكى ٤٨٥ جنيه ..

فتون : طلعت الفلوس . طيب اتفضلى ده كل الل عليا ..عايزه الوصل ..

الست : شطبت ع اسمها وطلعت الوصل اتفضلى ياحبيبتي ..

فتون : ماشي شكرا .. وخرجت . ودخلت حاره صغيره . وطلعت منها عند ورشه كبيره . سلام عليكو ياشيخ محمد ..

محمد : بتعجب . فتون !!؟ وقام بسرعه بقلق خير يابنتى ؟ ف حاجه حصلت !؟

فتون : لا لا ياعم محمد محصلش حاجه .. انا كنت جايه ارجع دول . وطلعت فلوس الايجار . اتفضل ..

محمد : اتنهد بأريحيه . ياشيخه حرام عليكى . والله خضتينى . وايه الل انتى بتعمليه ده . انا مش واخد حاجه !!

فتون : معلش ياعم محمد مش هينفع اتفضل .

محمد : بصلها بعتاب . خدتى سلفه من المدرسه !!؟ ولا استلفتى من الغريب علشان تسدى القريب يابنت مهران !!؟

فتون : بنفي . ابدا والله ياعم محمد . انت عارف انى ماينفعش اخد سلفه من المدرسه ده لسه تانى شهر ليا فيها ومش هيوافقو . وكمان والله العظيم انا ما استلفت من حد . انا قبضت الجمعيه من خالتى ام عبير . وكمان جبت المعاش . وانا بصراحه ماستنتش لما تروح البيت . قولت بلاش ارجعلك فلوسك قدام خالتى ام عصام ههههه اصل انا عارفاها بتحبنى اوى ..

محمد : اتنهد بحيره . طيب يافتون خلى الفلوس معاكي دلوقتي . وسديديها ع أقل من مهلك . انا مش محتاجها دلوقتي ..

فتون : مش هينفع . معلش ريحنى ياعم محمد وخد فلوسك . الله يخليك ..

محمد : بنفاذ صبر . خلاص بقى يافتون عيب عمايلك دي ..

فتون : معلش اصل مش هتحرك من هنا غير وانت واخدهم . ف خدهم من دلوقتي عايزه الحق فاطمه زمانها زهقت لوحدها ..

محمد : لا حول ولاقوة إلا بالله . ومد ايدو ماشى يافتون يابنتى . ربنا يسدد ما عليكى ..واخد الفلوس بحرج ..

فتون : ابتسمت بأريحيه . اللهم آمين . انا هروح بقى عايز منى حاجه ..

محمد : سلامتك يابنتى . وسلميلى ع الحاجه ام فتون ولما اروح بمشيئة الله اطلع أسأل عليها ..

فتون : الله يسلمك يا عم محمد .ماشي سلام عليكم ومشيت ..

محمد : بص عليها كتير . وعليكم السلام ورحمة الله وبركاته . واتنهد ربنا يهديكى ياسحر يابنتى . واشوفك زي فتون ..

فتون : دخلت صيدليه . وجابت علاج الشهر كله بتاع والدتها . وخرجت ..و راحت ل نبيل واخدت الفرخه . واشترت فاكهه .. وراجعه ع البيت . وعدت ع البقاله . سلام عليكم ياعم زينهم ..

زينهم : وعليكم السلام. حمدالله ع السلامه .. تعالى يافتون ادخلى .

فتون : دخلت الله يسلمك ياراجل يابركه . فين النوته .؟

زينهم : يادي النوته الل تعباكي عايزاها ليه .؟

فتون : انا قبضت الجمعيه . وقولتلك يوم ما اقبض هعدي عليك ..

زينهم : ربنا يسد ما عليكى يابنتى .. وجاب النوته . خدى يافتون . انا نسيت النضاره ف البيت ..

فتون : اخدت النوته . وحسبت الل عليها . اتفضل ياعم زينهم . ده حساب الشهر كله ..

زينهم : يابنتى لو مش معاكي خلي دلوقتي .

فتون : ربنا يخليك ياعم زينهم . مستوره الحمدلله .. يلا انا هطلع بقى ..

زينهم : ماشي يابنتى سلميلى ع الحاجه ..

فتون : الله يسلمك .. ودخلت وطالعه ع السلم . وشافت سميره بتحط الزباله قدام الشقه . سلام عليكم ياست أم عصام ..

سميره : بتمثيل . وعليكم السلام يافتون ياحبيبتي . ايه جايه منين كدا ؟

فتون : باستغراب . ما انتى عارفه انى شغاله ف المدرسه !!

سميره : عوجت بوقها . وبصت ع الشنط الل ف ايديها . مدرسه !!! اه وماله هي المدرسه بتفضل فاتحه لبعد الساعه ٢ امم يمكن ..

فتون : رفعت حاجبها وفهمت . لا يا ام عصام . انا طلعت من بدرى بس كنت ف البنك بقبض المعاش . واشتريت علاج امي . علاج الغضروف والسكر والضغط والقولون بعيد عنك ..

سميره : شهقت انتى بتفولى ف وشي يافتون ؟

فتون : انا . ابدا بس بعرفك انا كنت فين علشان متفكريش كتير انا كنت فين وجايه منين . بقولك علشان ترتاحي من التفكير . اصل بعيد عنك التفكير الكتير بجيب ضغط . سلميلى ع سحر لما تصحى من النوم . سلام .

وسابتها وطلعت ..

سميره : صكت ع أسنانها بغيظ . ودخلت الشقه بنرفزه . ورزعت الباب جامد .

فتون : طالعه . وبتضحك .. واتخضت مساء الخير يا انسه فتون ..

فتون : غمضت عينيها من الخضه . وكمان اتخنقت . مساء النور يا استاذ طلعت .. Princess Mariem

طلعت : انا طلعت من الشقه ع صوت باب اترزع جامد . ولكن حظي الحلو انى فتحت وشوفتك ياقمر ..

فتون : بصوت عالى نعم ياخويا !!!؟ سمعنى تانى كدا قووولت اييييه !؟

طلعت : بتوتر . لا لا انتى فهمتى غلط . وبعدين يا انسه فتون مش كل ما اتكلم مع حضرتك تتعصبى كدا !!

فتون : اديك قولتها . بتعصب كل ما اتكلمنى . لانه ماينفعش انك تكلمنى من الأساس . انت لا من الحاره ولا اعرفك ولا قريبي علشان تكلمنى انت محامي مآجر الشقه دى عشان تحل قضايا يلا ياخويا . خش وشوف شغلك . دى خيبة ايه دي !؟ . وسابته وفتحت باب شقتها وقفلت ف وشه ..

طلعت : اتخض . متهوره بس قمر ..وبص حواليه ودخل المكتب بسرعه .

فتون : دخلت . وقفلت الباب .وسندت بضهرها ع الباب بتعب ..

فاطمه : من جوه انتى جيتى يافتون !؟

فتون : ابتسمت ايوه يافطوم .وحطت الحاجه ع التربيزه . ودخلت قعدت جنبها ع السرير .

فاطمه : اتاخرتى كدا ليه ياضنايا قلقتينى عليكى!؟

فتون : باست ع أيدها . معلش ياست الكل . عديت ع البنك .وقبضت المعاش وكمان الجمعيه وجبتلك العلاج . وافرحي بقى مبقاش علينا اقساط . وكمان دفعت الايجار . وكلها كام يوم وهقبض مرتبى احلا شهر ده ولا ايه ؟؟ ههههه. وقومي بقى كدا علشان انا جيبالك غدوه بتحبيها اوى اوى.

فاطمه : الحمدلله يارب . ربنا يسدد ماعليكى ياقلب أمك . ولا يحوجك لحد ابدا ..

فتون : يارب . يارب ياطماطم .

فاطمه : ضحكت . يابت ارسيلك ع اسم دلع ليا حيرتينى معاكى ..

فتون : اله اعملك ايه يعنى ما انتى الل اسمك حلو .. طماطم وفطوم .وفاطمة قلبى .وبطه . وطمطم هههههه حلو طمطم دي ؟

فاطمه : بحب . ربتت ع ايديها اى حاجه منك حلوه ياضنايا ..

فتون : ربنا يخليكي ليا يارب يابطه . يلا قومي بقى . وانا هغير هدومي واصلى الضهر. ونغدى احلا غدوه .انا وانتى ..

فتون : قامت وغيرت هدومها . واتوضت وصلت الضهر . وجابت الاكل وقعدت قدام فاطمه .. يلا يابطه . بسم الله ..

فاطمه : ماشاء الله . فرخه بحالها يافتون . كتير يابنتى !!

فتون : كتير ايه بس يابطه . بصي انا عايزاكي تكلى لما تشبعي . والباقى هشيله ف التلاجه لبكره مش هيخسر يعنى .. يلا بقى اتغدى ..علشان انا جعانه اوى بصراحه ..

بقلمي .. مريم نصار .

شركة بدر الدين ..

ف مكتب سليم . قاعد مع خالد وبيضحكو مع بعض . وفجاءه باب المكتب اتفتح بقوه مره واحده -------

يتبع...