رواية أحببت بصيرته الفصل الأول 1 بقلم مريم نصار

نا هعرفكم بشخصيات الروايه . تعريف صغير وهنعرف من خلال سرد الأحداث مين بطل الروايه .

لكن بطلة روايتى هي فتون

وهنزل بالصور من غير أسماء عليها. وهنعرفهم بعدين .

هنبدء بشخصيات الحي الشعبى

فتون مهران . بطلة روايتى هي بنت بسيطه جدا ومحجبه . بس الصور طبعا مافيهاش حجاب . لكن تخيلوها بالحجاب .. ومستواها المادي نوعا ما ضعيف جدا . عايشه ف حي شعبى . ومخطوبه ل حسن إبن الجيران . خلصت كلية تربيه لغه عربيه . واشتغلت من شهرين ف مدرسه ابتدائيه للمكفوفين . بتعلمهم الكتابه ع طريقة برايل .

عايشه مع والدتها فاطمه . ست كبيره ومريضه . وفتون هي الل شايله المسؤوليه ..

والد فتون . اتوفي وهي ف أولى جامعه . وكملت مسيرتها ف التعليم بصعوبه شديده والحاح من فاطمه .. وهنعرف قصتها من خلال سرد الأحداث

حسن : خطيب فتون خلص كلية تجاره . وحاليا مسافر بلد عربي علشان يحسن من مستواهم ويرجع يتجوز فتون ..

حنين : زميلة فتون ف المدرسه حالها ميسور . حبت فتون ف فتره قصيره . وحنين وفتون بقو أصحاب جداا .

سحر : بنت دلوعة وحقوده . ف أولى كلية آداب ووالدتها سميره مدلعاها جدآ .. وهنعرف قصتها من خلال سرد الأحداث ..

علاء : شاب فاشل اخد الدبلوم بالعافيه . وعايش من فلوس ابوه الجواهرجي .ومدمن ع المخدرات والشرب .

ف شخصيات تانيه كتير هتظهر بعد كده ف الحي الشعبى . منهم زينهم . وجمعه والشيخ محمد . وناس تانيه كتير ..

------#مريم نصار

شخصيات المنطقه الراقيه ..

شريف بدر الدين . شاب ف أواخر ال٣٠ خريج كلية تجاره إدارة أعمال وشغال ف شركة والده. عندو شغف للشغل . بيحب شغله اكتر حاجه ..ورافض انه يتجوز . والده ووالدته متوفيين

سليم بدر الدين : اخو شريف الصغير ولكن من الأب فقط .لانه إبن الزوجه التانيه .. خريج كلية تربيه قسم فرنساوي . وخاطب وبيحب رهف خطيبته جدا .

.والده بدر الدين قبل ما يتوفي شاف إن سليم عندو ميول ل إدارة الأعمال . وقرر أنه يشتغل ف الشركه . وشغلهم بقى ع أوسع نطاق . ومن شركه لمجموعة شركات .

شريف وسليم عايشين ف فيلا بدر الدين . مع فريده والدة سليم . وفريده بتعامل شريف وسليم زي بعض

فريده بدر الدين : الزوجه التانيه ل بدر الدين . اتجوزها بعد وفاة والدة شريف وهو ابن ال١٠سنين . واهتمت بشريف زي ابنها بالظبط . وبدر حبها بعد الجواز لما شاف معاملتها الطيبه ل شريف . وخلفت سليم . حته من قلبها . بتخاف عليه من اي حاجه . ومهتمه بتفاصيل عيليتها . لكن الل تاعبها نفسيا إن شريف رافض الجواز . وكمان مابقولهاش غير حضرتك وبس ..

رهف الجندي : بنت صاحب اكبر قريه سياحيه .. بنت متحرره لاقصي درجه ولبسها كله اميريكآ استايل . متملكله لابعد الحدود .. عندها كبرياء فوق المعتاد .. عايشه طول عمرها بره مصر .مع منى والدتها ونفس التحرر عند منى وكمان الجندى والد رهف .. ورهف رجعت مصر من سنتين وتقابلت مع سليم ف حفله تخص والدها . وأعجبت بيه وحبته ..وتم خطبتهم من ٤ شهور تقريباً ..

خالد العالمي : صاحب سليم من الثانوى . وفتح شركه صغيره بإدارة سليم . شاب طاقق بتاع بنات . عايش حياته ما بين سفر ورحلات . ومعندوش حاجه اسمها حب . عندو مبدء إن البنات كلهم زي بعض .. وبياخد كل حاجه هو عايزها بالفلوس ..

ف أشخاص كتيره هتظهر من خلال سرد الأحداث وهنعرفها مع بعض .

(وعيناكَ التي لم ترانيِ بهما عيناي تراها

وأعشق الحُزن فى عيناكَ فعيناى الحزينة تراها

حبيبي دمت لي بابتسامتك الجميله فإن لم تكن تراها فإنني أراها)

 ف حي شعبى . ف عماره قديمه . ف شقه ف الدور التالت ..

فتون : واقفه ف البلكون لابسه بيجامه ولابسه الخِمار. وبتنفض السجاده بالمنفضه . وسمعت صوت عالى ف الشارع . وبصت وشافت اتنين جيرانها ف العماره بيتخانقو ..

فتون : اوووف استغفر الله العظيم ع الصبح . لما انزل اشوف شوية الحريم الفاضيه دي !!! . وسابت المنفضه . ودخلت لبست الاسدال ونزلت ..

فوزيه : بتزعق . انتى المفروض تضربى بنتك وتعليمها الادب علشان تحرم تعمل كدا تانى .

ناديه : واضرب بنتى ليه . شوية عيال بيلعبو وهي لسه صغيره ومش قصدها انها تبوظ الغسيل ده لو هي فعلا كانت عملت كدا ..

فتون : خرجت من العماره . ايه يا جدعان . الواحد مش هيرتاح يوم الاجازه ولا ايه ؟ . ف ايه ع الصبح صوتكو عالى لييه؟

فوزيه: احضرينا يافتون. يرضيكى . العيال وهي بتلعب ع السطوح . تبهدل الغسيل بتاعى ويحدفو عليه حجات من فوق .وانا طالع عينى فيه وكان أبيض زي الفل .

فتون : رفعت راسها وبتبص ع الغسيل . وهمست ابيض ايه ؟ انتى طول عمرك معفنه .. احم لا لا. مايرضنيش ياست فوزيه .

ناديه : احضرينا يافتون ياحبيبتى . العيال كلها كانت بتلعب ع السطوح . ولما نزلو كلهم قالو ل فوزيه أن بنتى هي الل بهدلت الغسيل . وعلشان بنتى خوافه سكتت ومقالتش حاجه . يرضيكى يافتون ..؟

فتون : ابتسمت . وبتلعب ف شعر البنت لا طبعا مايرضنيش .. وبصت ل فوزيه. استنى ياست فوزيه ..وراحت للبقال ..

فتون : صباح الفل ياعم زينهم ..

زينهم : اهلا اهلا . صباح الورد والفل والياسمين ع عيونك يافتون يابنتى ..

فتون : معلش يا عم زينهم عايزه كيس اريال من ابو ٢ جنيه وع النوته ..

زينهم : ابتسم . ماشي وراح جاب الاريال . خدى يابنتى ولو انى عارف انتى هتعملى ايه .

فتون : سيبها ع الله ياراجل ياطيب ..

زينهم : ونعم بالله يافتون يابنتى . خلصي كلامك مع الحريم وتعالى افطرى معايا ..

فتون : ههههه ومالو . وراحت للستات . خدى ياست فوزيه . كيس اريال اهو اغسلى الغسيل الابيض وهيبقى فله . ولو مش فاضيه . ابعتيلى صالح ابنك بالغسيل وانا هغسلو وانشرو . وكمان هطبقلك الغسيل واجبهولك بنفسي .

ناديه : كلام ايه ده يا فتون .؟.

فوزيه : شدت الكيس من فتون . طول عمرك بتفهمى وبت جدعه يافتون ياحبيبتى.بال اذن انا بقى . ومشيت ..

ناديه : ليه كدا يافتون . انتى عارفه انها غاويه مشاكل ..

فتون : والمشكله حلها ف كيس اريال هههههه المهم شجعى بنتك .وخليها تدافع عن نفسها .

ناديه : شاله يخليكي يا فتون ياحبيبتى ويرجعلك خطيبك بالسلامه. والله ما كنت هخلص منها . ومصممه انى اضرب البت ..

فتون : اوعي تضربي بنتك علشان خاطر حد ياست ناديه .. ربنا يخليهالك ..

زينهم : نده ع فتون . يافتووون يلا يابنتى الطعميه هتبرد ..

فتون :حالا ياعم زينهم ...

فوزيه : تسلمي يا فتون . يلا روحي كلمى عمك زينهم ..بال اذن انا . ومشيت ..

فتون : اتحركت ودخلت البقاله .. ايه يا عم زينهم . انت عازمنى ولا ايه هههههه .

زينهم : تعالى . تعالى شويه فول وطعميه وجرجير . وعيش سخن . يستاهلو بوقك وحط الاكل ع تربيزه صغيره .

فتون : جابت كرسي وقعدت . اممم الله . الله عليك ياعم زينهم .ايه الريحه الجامده دي بسم الله ..

زينهم : اجبلك حتة جبنه بيضا ؟ .

فتون : لا حلو اوى كدا نعمه وفضل. قولى بكام الفطار ده ؟

زينهم : وانتى بتسالى ليه يابنتى بس ؟

فتون : قولى بس ياراجل يابركه .بكام ؟

زينهم : ١٠ جنيه . استريحتى كلى بقى .

فتون : ههههه منا باكل اهو .

زينهم : بياكل .. الحاجه أم فتون عامله ايه ؟

فتون : هزت راسها . الحمدلله تمام . تنام وتقوم . وتقوم وتنام . الل عليها انتى فين يافتون . هاتى الدوا يافتون ..

زينهم : ربنا يشفيها . ويعينك والله يابنتى شيلتى الهم بدرى . ابوكي مات من ٤ سنين . ولاعندو ورث ولا يحزنون .ومش سايبلك غير المعاش . ١٥٠٠ جنيه !! هيعملو ف الزمن ده !؟

فتون : الحمدلله ياعم زينهم احنا احسن من غيرنا . ال ١٥٠٠ ج جمب مرتبي من المدرسه مسلك شويه . وربنا يسهل بفكر ادي دروس . إن شاله ادي دروس ف البيت .

زينهم : بعدم فهم . هو ف مجالك ده ينفع تدى دروس ؟ دى انتى بقالك شهرين متعينه ف المدرسه !؟

فتون : إلا ينفع .طبعا بنعلم المكفوفين طريقة برايل ف البيت . زي اى ماده .. وزي اى مدرسه تانيه .. وزى اى مُدرس وطالب ..

زينهم : والله يابنتى ياريت انتى مش ملاحقه علاج الحاجه ام فتون وايجار البيت . ومصاريف اكل وشرب وكهربا . ولا جهاز العروسه الل انتى بتجهزيه لنفسك الل بيقطم الضهر ..اهي تزودي مصاريفك شويه .

فتون : اتنهدت بحزن . ربك يفرجها إن شاء الله . معلش ياعم زينهم انا عارفه انى مأخره شهر هنا عليا ف طلبات البقاله . استحملنى بس الشهر ده . انا داخله ف جمعيه ب ٢٠٠ جنيه ف الشهر . وهقبضها ٢٠٠٠ج اول الشهر الجديد كلها يومين. هقبضها من هنا واجبلك فلوسك ع طول إن شاء الله.

زينهم : اهو ده الكلام الخايب بقى . يابنتى انا مش بقولك كدا علشان تقولى معلش وتقدميلى اعذار . انا بتكلم معاكي علشان زعلان عليكى . شايفك شايله هم غيرك . بتساعدى من غير تفكير . بتدي اكتر مابتاخدى .

فتون : وربك كريم ولا ايه ؟

زينهم : طبعا . مفيش اكرم ولا احن منه .

دخل عليهم عيل صغير عليهم . فتون فتون انا جعان !!

فتون : ابتسمت . تعالى يامتسول ههههه شميت ريحة الطعميه انت جيت جري مش كدا ؟. وعملت ساندوتش . امسك ياسيدي ساندوتش طعميه ع جرجير بس إنما ايه . يلا اتكل بقى ..

العيل . شكرا يافتون . واخد الساندوتش وجري .

زينهم : ابتسم . وهز راسه . واتمنى ل فتون السعاده و راحة البال ..

فتون : ياااه . الحمدالله شبعت اوى . كدا اطلع اروق الشقه وانا كلى نشاط هههههه انا فطرت وعايزه انام ههههه .

زينهم : بألف هنا يابنتى . اعمل بقى اتنين شاى ف الخمسينه . ونشربهم قدام البقاله وانتى هتصحصحى ..

فتون : لا تشكر ياعم زينهم . انا يدوبك اطلع اكمل ترويق الشقه انت عارف يوم الجمعه الاجازه بقى ترويق وغسيل . فطوم لو صحيت وملقتنيش فوق هتفضل تنادي من البلكونه وتسيح بقى .. وقامت .. فين النوته بتاعتى ياعم زينهم ؟

زينهم : عندك ف الدرج . سيبها انتى واطلعى انا هكتب ٢ج اريال هههههه.

فتون : طلعت النوته . وكتبت ٧ ج ..

زينهم : شافها . ومش فاهم . ٧ج ليه يافتون . انتى اخدتى حاجه امبارح بليل من الحاجه ام محمود؟

فتون : ابتسمت . لا يعم زينهم . ٢ ج اريال . و٥ ج فطار ههههههه . يلا بقى انا هطلع اشوف ورايا ايه .

زينهم : بعتاب . انتى هتدفعى تمن فطارك يافتون ؟

فتون : كدا احسن ياعم زينهم . سبنى ع راحتى . كدا هكون مستريحه.

فاطمه : من البلكونه . يافتووووون . انتى يابت يافتووووون .

فتون : ههههه قابل بقى . وطلعت من البقاله . ورفعت راسها لفوق ايوووه يافطوم. انا طالعه

فاطمه : بتنيلى ايه تحت عندك يافتون !؟

فتون : مفيش حاجه انا طالعه يابطه . عايزه حاجه اجبهالك قبل ما اطلع ..

.. راجل كبير معدي . صباح الخير يا فتون يابنتى .

فتون : صباح الفل ياعم جمعه..

فاطمه : هاتى باكو شاى عشان خلصان من امبارح ..

فتون : ماشي بس خشى انتى جوه عشان متدوخيش . وهجيب الشاى واطلع ..

فاطمه : طيب . متتاخريش يابنتى عشان الدوا .ودخلت ..

فتون : بحرج . عايزه باكو شاى ياراجل يابركه ..

زينهم : ومالو من عينيه .. اتفضلى يابنتى ..

فتون : الله يخليك ..عايز حاجه ياعم زينهم ؟

زينهم : سلامتك يافتون يابنتى وربنا يريح قلبك ويرجعلك الغايب بالسلامه ..

فتون : اتنهدت . اللهم امين . بال اذن انا .. ورايحه العماره ..

----------------------بقلمى مريم نصار

يافتووون يافتوون تعالى اشترى منى فراخ نفعينى ع الصبح ..

فتون :هههههه ما انتى عارفه البير وغطاه يام سيد .

ام سيد : تعالى بس ولا يهمك ياحبيبتى صباحك قشطه انا بتفائل بيكى.

فتون : المره الجايه إن شاء الله .. صوت من وراها

علاء : صباح الفل ع اجمل فتون ف الحاره كلها ..

فتون : نفخت بديق . استغفر الله العظيم . اهلا ...

علاء : ياساتر . ايه بس يافتون . مصدرالى الوش الخشب ليه ؟ دا انا حتى شارى بالحلال.

فتون : زعقت . بقولك ايه ياعلاء. الشويه دووول مش هتعملهم عليا كل شويه . ولا شاري ولا بايع فاااااهم !؟ وانت تحمد ربنا انى بصدرلك الوش الخشب وبس . والااااا !!!

علاء : جرا ايه ياحلوه . هو انا كل اما اكلمك تعملى الشويتين دول . ولا انا علشان رايدك بتسوقى التقل !؟...

فتون : بعلو صوتها . ورحمة أبوياااا ياعلاء . لو محليت عن سماااايا . لاااا فرج عليك أهل الحااااره . والجواز مش بالعافيه . ومش ع آخر الزمن اتجوزك انت .واحد شمام ابوه بيصرف عليه . وكمان انت عارف انى مخطوبه . ولا هي دي بقت الموضه الجديده والأصول .انك عايز تتجوز واحده مخطوبه. واتكل بقى !!!

الحاره اتلمت .

جمعه : ايه يافتون يابنتى . صوتك عالى ليه ؟

فتون : تعالى ياعم جمعه أسأل سي المحروس الل ف الرايحه والجايه يوقفنى ويصبح ويمسي . وميت مره قولتله كدا غلط ومينفعش وعيب عليه. مش علشان انا ماليش ضهر هيفتكر انى لقمه سهله لااااااء . دا انا فتون مهران . فتون الل الحاره كلها بتحلف بشهامتها وجدعنتها.وبميت راجل ... وتربية الحج مهران الله يرحمه الل كان يمشي ف الحاره الكل يعمله الف حساب من احترامه واخلاقه. وكمان مخطوبه .. فاهم ياااا !!! علاء ...

زينهم : جرا ايه ياعلاء يابنى مش هنفضنا سيره من الموضوع ده بقى . والجواز قسمه ونصيب!!؟

علاء : واقف صاكك ع أسنانه ومتغاظ .. ايوه ياعم زينهم . بس انا شاري . وعايز اريحها من المرمطه الل هي فيها !! وخطيبها حسن الل هي بتقول عليه ده انه خطيبها !! ده يدوبك قرا فاتحه .ومن ساعة ماسافر من ٣ سنين لا جه ولا سأل . ولا انا غلطان !!؟

جمعه : علاء يبنى اخزى الشيطان . وملكش صالح ب فتون . وحسن قبل ما يسافر قاري فاتحتها مع الحاجه أم فتون والشيخ محمد وكمان رجالة الحاره حضرت الاتفاق . ومش هنعيد كلامنا تانى .

علاء : بنظرة شر . ومالو يابنت الحج مهران ومالو. بال اذن .. وسابهم ومشي ..

فتون : جواها رجفه وكسره . وبتكابر دموعها . لكن بتظهر العكس . شكرا ياعم زينهم شكرا ياعم جمعه . ودخلت العماره . وطالعه ع السلم زعلانه وبتفكر ف حسن حبيبها الل بقالو شهر بحالو مكلمهاش ولا تعرف عنه حاجه.

باب شقة الدور التانى اتفتح . وفتون لفت وابتسمت . صباح الخير ياشيخ محمد !!

محمد : صباح الخيرات يافتون يابنتى . عامله ايه . والست الوالده اخبارها ايه ؟

فتون : الحمدلله وأمي بخير .

محمد : انا سمعت صوتك وصوت علاء عالى ف الحاره . قولت اكيد وقفك ف الشارع ودايقك. ولبست وكنت نازل اشوف ايه الل حصل؟

فتون : اتنهدت بحزن. ابدا ياشيخ محمد . هو مش راضى يحل عنى . وحتى بعد القاعده الل انتو عملتوها مع ابوه . وبردو مش سايبنى ف حالى. واتنهدت بوجع . بكره حسن يرجع ويجبلى حقى منه ويكون ف ضهرى !!

محمد : بزعل . واحنا قصرنا معاكي ف حاجه يافتون يابنتى ؟. علشان حسن لما يرجع يبقى ف ضهرك ويجبلك حقك . ؟

فتون : راحت لعندو بسرعه .وقالت بنفى . ابدا والله ياعم محمد مش قصدى ابدا . انت عارف مقامك عندى ايه ؟ انت صاحب بابا الله يرحمه . وكمان انا متربيه ف بيتك مع سحر بنتك . وطول عمرك واقف معايا وبتسال عليا انا وامي ف وحدتنا وعم جمعه وعم زينهم وعم قبارى وعم منصور كلكم ع طول ف ضهرى واهلى وعزوتى . وكملت بدموع . بس الدنيا وحشه اوي يعم محمد . احنا بقينا عايشين ف غابه . وانا عايشه فيها لوحدي . والناس مابتصدق. ومسحت دموعها وبصت ل عمها محمد . حسن متربى ف نفس البيت ده . ومن صغري يقولو حسن ل فتون وفتون ل حسن . وكبرنا انا وهو ع الاساس ده . ويوم ما ابويا مات حسن وقف ف ضهري . وبعدها لما علاء طمع فيا حسن ضربه ووقفه عند حدو . وقرا فاتحتى قدام الحاره كلها . ووعدنى انه هيكون نفسه وقالى انا هسافر يافتون وهتعب واشقى . وسنه واحده وأرجعلك . وهشتريلك شقه ونتجوز . سنه جرت وراها سنه . وكل فين وفين لما حسن يكلمنى ..

محمد : مسد ع حجابها . ما ضاقت الل ما فُرجت يافتون يابنتى . واحنا وحسن هنفضل ديما ف ضهرك . وبكره إن شاء الله يرجع بالسلامه . ويشتريلك يستى الشقه ونعملك فرح ماتعملش ف الحاره لحد قبل كده . ها . مبسوطه .

فتون : ابتسمت . طبعا مبسوطه . وربنا يخليكو ليا يارب .

محمد : الله يكرمك يابنتى . طيب ادخل انا بقى أفطر مع خالتك أم عصام . علشان الحق صلاة الجمعه إن شاء الله .

فتون : تصلى ف الحرم ياشيخ محمد يارب .

محمد : رفع ايدو للسما . يارب يارب سويا يافتون يابنتى . الله كريم ومجيب .. تعالى بقى ادخلى افطرى معانا . اصل البت سحر نايمه انتى عارفه بتصحى قبل العصر جيل ما يعلم بيه الا ربنا قلب الايه يسهرو طول الليل وينامو طول النهار ..

فتون : ههههه . معلش ياعم محمد . هي سحر بس عشان اخر العنقود . وأخوها عصام الكبير اتجوز ومفيش غيرها ف البيت . يلا اسيبك انا عشان تفطر و تلحق الصلاه .

محمد : ماشي يابنتى .

فتون اتحركت وطالعه ع شقتهم.

محمد : دخل واتخض من سميره مراته واقفه ورا الباب . بسم الله الرحمن الرحيم . ايه ياسميره واقفه كدا ليه ورا الباب. ؟.

سميره : بغيظ وتريقه . واقفه اسمع كلامك مع ست الحسن والجمال . الى مفيش غيرها ف الحاره .

محمد : راح قعد ع الكنبه . والله عندك حق ياسميره .. مفيش غيرها ف الحاره . بنت ايه ف الجمال الرباني سبحان الله . وايه ف الاخلاق والاحترام ربنا يريح قلبها ويسعدها .

سميره : راحت قعدت بغيظ . انت ياراجل انت عايز تنقطي . انت كمان بتشكر فيها وبتدعيلها قدامي؟

محمد : بنفاذ صبر . لاحول ولاقوة إلا بالله . يافتاح ياعليم يارزاق ياكريم .

. اصطبحنا ع موال كل يوم . نفسي اعرف انتى بتكرهي فتون اوى كدا ليه؟ وهي المسكينه عملتلك ايه ؟ دي البنت ف الطالعه والنازله تسأل عليكى وتطمن عليكى . ولو بتروقي ف الشقه تنزل تساعدك . وسايبه بنتك قاعده ع الموبيل طول الليل ع المحروق الانترنت ده . ولما اكلمها تقولى بنتك صغيره . صغيره ايه دي وهي ف الجامعه . استغفر الله العظيم .

سميره : ايوه انا مش بطيقها هو بالعافيه؟ . مش عارفه احبها اله هو بالغصب يسي محمد.؟

محمد : قام وقفل باب اوضة سحر عليها علشان متسمعش هو هيقول ايه !! وراح قعد قدام سميره .. وقال بصوت واطى .. لا طبعا مش بالغصب . بس ممكن تصفى قلبك من ناحيتها لآن الل جواكي ده غيره .. انتى غيرانه من فتون لانها احسن من بنتك ف كل حاجه ..

بنت عارفه حدودها كويس . بتتعامل بطيبه وعفويه . شاطره مجتهده . مش مخليه امها تحتاج لحاجه . بنت بميت راجل. عندها عزة النفس رقم واحد ف حياتها . لا عمرها كلمت شاب . ولا قللت من رجالة الحاره . واخده رجالة الحاره وأولهم انا أهلها وعزوتها . بتحترم الصغير قبل الكبير . بتساعد بكل مافيها . بالك انتى فتون دي لو ماشيه وف شنطتها اخر ٥ جنيه بس . وحد احتاجها هتديهالو .عمرها ما كانت طماعه ابدا . عمرها ماخبطت ع باب حد فينا وقالت أنا محتاجه .. مع انها ف اشد الاحتياج . عمرها ترفض مساعدة الناس ليها لو هتبات من غير عشا . كل الحاره هنا بتحبها من صغرها .

أما بنتك !!؟ بدلعك ليها انتى هتخليها تمشي ف طريق مسدود . كأن محدش خلف بنات غيرك. مقعداها جمبك ولا بتخليها تعمل معاكي حاجه ولا بتساعدك ف حاجه. الأكل بيدخلها ع السرير من حضرتك . تزوقيها ع العرسان زق .

ولما انا اتكلم . تقولى انى بكرها وبحب فتون . بس انتى غلطانه ياسميره . انا عمرى ما اكره بنتى ابدا . مفيش أب ف الدنيا بكره عياله . انا بشد عليها علشان عايزها الاحسن والافضل . انا بشدها للطريق الصحيح . وانتى بتشديها للخطر .

.سحر طلبت مني موبيل قولتلها ومالو حاضر حقك يكون معاكي موبيل نطمن عليكى . روحت المحل واشترلتلها موبيل . بس لأ معجبهاش علشان مش موبيل حديث . وعيطت ليكى زي العيال . وانتى اتخانقتى معايا علشان اجبلها الل هي عيزاه .. قولتلك بلاش موبيل حديث ياسميره بنتك ف سن خطر . قولتلك شوفى فتون اهي معاها حته موبيل قديم .واشترته استعمال كمان . قولتى

وانت هتساوى بنت فاطمه . ببنت سميره . وصممتى وعملتى ليله كبيره وخناقه . وقولتلك بكره الموبيل ده هيغير بنتك . واهو من ساعه ماجالها الموبيل مش بنشوف وشها يا اما ع الموبيل يا اما نايمه !! ولا حاطه المذاكره ف دماغها وبتنجح يدوبك مقبول. عرفتى بقى انتى الفرق بين فتون وسحر؟ عرفتى بقى انتى بتغيري منها ليه؟

سميره : بنرفزه . اناااا اغير من بنت فاطمه؟ وانا هغير منها ليه ؟ انا مبحبهاش علشان هي بتضحك عليكو . بتضحك ع رجالة الحاره كلها . عامله فيها البت الجدعه الخدومه . ودي بت مش ساهله بت سوسه . وكمان كوشت ع حسن ابن سهير.. وكمان الواد علاء. وعوجت بوقها . هو يعنى علاء هيجرى وراها كدا من غير ما تكون هي وقعته ف شباكها . حاكم انا عارفه النوع ده !! وبتقول ع بنتك بتمسك موبيل وتقعد ع النت !؟ اه ع الاقل بنتى قاعده قدام عينى . مش زيها تخرج وتدخل وتلف الحاره وتقول مدرسه ههيء .. ربنا يسترها علينا وع ولايانا .. انا بنتى احسن بنت ف الحاره كلها فاهم يشيخ محمد !!؟

محمد : قام بغضب وصوت جهورى. انتى اتجننتى ياسميره !!؟ هي وصلت للخوض ف أعراض بنات الناس ؟. وكمان فتون بنت صاحب عمري . والل متربيه ف بيتك وعارفين أخلاقها كويس اتقي الله انتى كدا قذفتى المحصنات انتى فاهمه يعنى ايه!؟. وحسن الل انتى بتقولي عليه هي كوشت عليه ده ؟. ابوه ومهران من صغرهم كانو بيقول حسن ل فتون .. ولما كبرو كلنا عارفين ان حسن وفتون بيحبو بعض . لكن بالاحترام . وكله كان قدام عينيكى . لا خرجو في يوم مع بعض . ولا دخلت شقتهم ف وجود حسن .. وعلاء ده واد صايع . بتاع نواصي يقف يشرب الزفت ع دماغه هو والصيع صحابه ويعاكس ف بنات الناس . وعايش من مال ابوه الجواهرجى !! يعنى من غير ابوه مايساويش !!! وخروج فتون من بيتها ف ده علشان بتشتغل ف المدرسه .مُدرسه وانتى عارفه كويس انى انا الل قدمت معاها الاوراق بتاعتها يبقى مالوش لازمه كلامك عن بنت مسكينه بتحارب ف الدنيا دى لوحدها .

ولف ضهرو ليها وقال بتعجب !! سبحان الله . محدش عاجبه حاله ابدا !! انتى باصه للبنت ف ضحكتها ف فرحتها بس كل ده تمثيل منها أنها فرحانه .

. بصي لحياتها بصي انها يتيمه ملهاش حد ابوها اتوفى من ٤ سنين وامها ست مريضه . معاش ابوها يدوبك يكفى علاج الحاجه فاطمه .. بصي ليها انها ايام كتير باتت من غير عشا .بصي انها اتمرمطت واشتغلت من محل لمحل .. بصي لخطيبها الل سافر من ٣سنين ومتقدمش خطوه ولا رجع ليها زى ما وعدها .بصي لطقم الصينى الل بتحوش تمنه سنين علشان تجيبه ف جهازها .. بصي لوحدتها !! بصي لحجات كتير فتون عايشاها وعايشه ف الم كبير .

.ولف ليها . وشاور بايدو .. انتى عارفه فتون دي ع قد ما هي بتهزر معايا والحج زينهم والحج جمعه وعم قبارى . تعالى بس لو حد كسر بخاطرها . تضحك ف وشك . لكن من جواها بتصرخ . تكتم جواها حزنها . وتدخل اوضتها وتعيط . واظن انتى عارفه كدا كويس لان فتون متربيه ف بيتك .. وبنتك الل انتى فخوره بيها اوى كدا . صحيها خليها تقوم تذاكر . تراجع كلمتين خليها تعمل اى حاجه مفيده .

.وقال بتحذير .اسمعي ياام عصام اول واخر مره اسمعك تتكلمى ع فتون لا بالخير ولا بالشر . انتى فاهمه !!؟

سميره : صكت ع أسنانها بغيظ مكبت . وبصت بشرز . فاهمه . فاهمه يشيخ محمد ..

----------------------بقلمى مريم نصار

ف نفس الوقت . فتون طلعت الشقه . ودخلت وقلعت الاسدال. وكانت فاطمه قاعده ع كنبة الانتريه .

فتون : صباح الفل ع عيونك يافطوم ..

فاطمه : ابتسمت يسعد صباحك يافتون يابنتى . نزلتى ليه حصل حاجه ف الحاره؟

فتون : ابدا حريم فاضيه . المهم خدتى علاج الضغط ؟

فاطمه : لسه مختش اى دوا .

فتون : حطت الشاى . ع التربيزه . ودخلت اوضة النوم . وجابت شنطة العلاج . وطلعت قعدت جنبها .. وطلعت علبة الدوا . امسكى يابطه .

فاطمه : اخدت البرشام . وفتون جابتلها الميا . بالشفا إن شاء الله ..

فاطمه : تسلمي يا قلب امك .

فتون : اخدت الشاى . و دخلت المطبخ جمب الانتريه ع طول . ومطبخ صغير مفتوح ع الصاله..وحطت الشاى . انا هاقولك ايه الل حصل . وانا بعملك الفطار . وفتون حكت الل حصل من ناديه فوزيه . وعم زينهم وفطارها . ومحكتش ع حوار علاء علشان أمها متتعبش اكتر ..

فاطمه : يوه . يخيبهم حريم فاضيه بصحيح . ههههه الله يرحمك ياحج مهران. كان لما يسمع خناقة حريم ف الشارع . يقولى الحريم بتطبل والشيطان بيسقف هههه .

فتون : جهزت الفطار وحطته ف صينيه .. وطالعه من المطبخ هههه. الله يرحمه . اتفضلي ياست الكل . احلا فطار لفاطمة قلبى .

فاطمه : يسلملى نبض قلبك ياقلب امك .

فتون : هاجبلك الأنسولين ثوانى ..وراحت فتحت التلاجه. وجابت الأنسولين . وجهزت الحقنه . وعطتها ل فاطمه . بالشفا ياحبيبتي . يلا بقى افطرى انتى .. وبعد الفطار هعمل كوبايتين شاي بالنعناع. وانا قدامك اهو ف البلكونه . هنفض السجاده عشان اغسل وانا بمسح الشقه ولبست الخِمار .وطلعت البلكونه وبدءت ترويق ..

فاطمه : بتفطر وبصت ع فتون . وعينيها لمعت بدموع . واتنهدت . الهي ربنا يكرمك يافتون يابنتى ويريح بالك ويرزقك الخير . يارب . يارب انت عالم بحالنا . افرجها ع بنتى يارب ولا تحوجها لحد . فتون غلبان وتستاهل كل خير أكرمها بكرمك يارب . ودمعه نزلت منها ومسحتها بسرعه .

وبعدها

فتون : عملت الشاي .اخدتى علاج بعد الفطار !؟

فاطمه : ايوه يابنتى .

فتون . طيب . تعالى يافطوم . اطلعي ف البلكونه ف الشموسه الحلوه دي. انا مسحتها وزى الفل . اقعدى اشربى الشاى بالنعناع . وانا هروق الانتريه ..

فاطمه : ماشي يابنتى ربنا يريح قلبك . ولبست الخِمار . وقامت بتعب ااه يضهرى . وطلعت قعدت ع الكرسي .

فتون : حطت الشاى ع سور البلكونه جمب فاطمه .

وسمعو صوت الخطيب ف خطبة الجمعه . وفتون دخلت جوه ..

فاطمه : الله . ده الشيخ طه الل هيخطب الجمعه . وعلت صوتها .. ناولينى السبحه يافتون . هسبح واسمع خطبة الجمعه . وبعدين اصلى الضهر وأقرأ صورة الكهف .

فتون : من جوه حاضر يابطه .. وجابت السبحه خدى ياطماطم .

فاطمه : ضحكت . ياخد عدوينك . ربنا يعينك ياقلب أمك ..

فتون : ابتسمت . ويخليكى ليا يارب . اشربى بقى الشاى . عشان لو برد مش هعمل تانى ههههه .

فاطمه : ماشي لا هشربه . خساره يبرد .وشربت الله . تسلم ايدك يافتون .

فتون : دخلت . بالهنا ياطماطم .

وشغلت الغساله . وبدءت تغسل .

واتوضت . وصلت الضهر . ورجعت للترويق والغسيل من تانى ..

----------------------بقلمى مريم نصار

بعد صلاة الجمعه ..

محمد داخل البيت . السلام عليكم ..

سميره : بتكشيره وعليكم السلام .

محمد : قعد . سحر صحيت ولا لسه ؟

سميره : بغيظ . متستعجلش كدا كدا هتصحى من صوت الهبد الل فوق . وده صوت غساله ولا صوت مكنه . دى جيره مهببه .

محمد : اتنهد وبيسبح ع السبحه . لا حول ولاقوة الا بالله . لو فيكي الخير تقوليلها يافتون يابنتى الجو برد . هاتى الغسيل احطه ف الغساله الاتوماتيك . ورياحيها .هي اي نعم مش هتوافق بس اسمك عزمتى وعملتى بحق الجيره ولا ايه يا ام عصام؟.

سميره : بغيظ كبير وماولو يشيخ محمد ومالو . وكمان اطلع امسحلهم شقتهم وانشرلهم الغسيل بالمره .

محمد : بصلها ومردش وهز راسه وكمل تسبيح ..

سميره : اتغاظت من تجاهله لكلامها . انا عايزه اعرف هي بتكركب ف ايه ؟ . دى الشقه اوضين وصاله وحتة مطبخ مفتوح ع الصاله . وهو حتة انتريه هلكان . وصاحب العماره واخد نص الشقه وفتحها ع الشقه الل جنبهم لطلعت المحامى .. يبقى ايه لزمة الدوشه دى كلها !؟

محمد : قام وقف . صحى بنتك تصليلها فرض حاضر . وجهزى الغدا علشان عصام جاي يتغدى معانا انهردا ..واتحرك وخارج .

سميره : قامت بسرعه وقبضت على أيديها من الغيظ . وانت خارج رايح فين ياشيخ!!؟

محمد : بصلها . خارج . مدام مش عارف ارتاح ف بيتى يوم الاجازه . انا رايح اقعد مع الحج زينهم وجمعه شويه .ع ما انتى تصحي سحر و تجهزى الغدا وعصام يوصل . سلام عليكم وخرج وقفل الباب بنرفزه ..

سميره : اااه يانارى . والله انت الل ماسك لسانى عليهم ااااه . ودخلت اوضة سحر . وفتحت السِتاره . وابتسمت . سحوره . سحر حبيبة امها .

سحر : نايمه بعمق لانها سهرانه طول الليل.

سميره : قعدت جنبها . سحر حبيبة امها قومي ياحبيبتى . قومي صلى وانا هجبلك الفطار .

سحر : فاقت وبتغطي وشها بالغطا . اووف ايه ياماما بس . اقفلى السِتاره واقفلى النور وسبيني انام ..

سميره : ع حبة عينى يابنتى بس ابوكي نبه عليا اصحكيي . قومي ..

سحر : اووف ياماما بقى اطلعي برا . وايه الدوشه دى ..

سميره : عوجت بوقها . ده غسالة السنيوره فتون . قومي انتى متعرفيش ايه الل حصل؟

سحر : شالت الغطا من ع وشها . ونامت ع ضهرها .وحطت أيديها فوق بعض بنرفزه .. اووف ايه الل حصل ياماما ؟ ايه الل حصل ؟.

سميره : شوفو البت ياولاد . وانا الحق عليا كنت هقولك ايه الل حصل مع البت فتون ..

سحر : اتعدلت بسرعه . ايه الل حصل ليها .؟

سميره : الواد علاء. جه ووقفها ف الحاره قدام البيت . وزعقتله وجرسته ف الحاره كلها . وابوكي قال ايه ؟ كان نازل يقف ف وش علاء ..!.

سحر : بغيظ . علاء !! اه ماهي فتون محظوظه وقعت حسن الل زي القمر . وعلاء الغنى . ومقضياها مع ال اتنين ..

سميره : بت انتى . احنا مش هنضحك ع بعض . انتى عارفه أن فتون مش بتاعة الكلام ده . هي بس عشان ملهاش حد عايزين يلموها وخلاص ..

سحر : بغيظ مكبت . ماشي يا فتون . ماااشي. وسعى ياماما . لما اروح الزفت الحمام .. وقامت وخدت الفون معاها والسماعه...

سميره : بردو واخده الموبيل معاكي الحمام ..

سحر : ما انتى عارفه بحب اسمع اغانى برحتى . وبعدين أنتي مش قولتى هتجهزيلى الفطار . وكملت بمكر. بسرعه وحياتى ياماما انا جعانه اوى ..

سميره : قامت . عينى ياحبيبت امك . ف ثوانى وخرجت ..

سحر : خرجت بسرعه وبصت ف الصاله . هو بابا فين ياماما ..

سميره : من المطبخ . خرج قال ايه مش لاقى راحته ف بيته . خشي خشي الحمام متوجعيش دماغي . كفايه الخلاط الل شغال فوق دماغي فووق الهى ربنا يريحنى منك يافتون انتى وفاطمه قادر ياكريم ..

----------------------بقلمى مريم نصار

ف مكان تانى .

. ف إحدى الشركات . ف قاعة الاجتماعات ..

سليم : تمام كدا ياجماعه !؟ كل واحد فهم هو هيعمل ايه !؟

= تمام يا سليم بيه . لكن عندى استفسار صغير بعد اذن حضرتك !!

سليم : بكل تأكيد . اتفضل ياباشمهندس ..

= الباشمهندش شريف هيسافر انهردا اخر الليل . ومحاسب الشركه زي ما حضرتك عارف مجاش انهردا لأن انهردا اجازه . وكمان المحامي . طيب مين هيسجل الشحنه !؟

سليم : ابتسم . وهو شريف بدر الدين ده مين ياباشمهندس!؟

= بتوتر . احم . الباشمهدس شريف بدر الدين اخو حضرتك . ياسليم بيه !!

سليم : هز راسه تمام . يبقى بما إن سليم بدر الدين . وشريف بدر الدين . عملو اجتماع طارئ انهردا يبقى اكيد كل حاجه مدروسه ولا ايه،؟

= احم طبعا يافندم . وانا بعتذر جدا . انا كنت بستفسر لمصلحة الشركه !!

سليم : اكيد . ولو مكنتش سألت . اكيد كنت هفكر ف اهمالك للشركه . وسؤالك ده مهم جدا . وانا هرد عليك !! المحامي هيكون موجود بكره الصبح ف المينا مع شريف باشا وكمان المحاسب . لكن شريف هيسافر قبله علشان يطمن ع الشحنه بنفسه ومن غير محامى ولا محاسب فهمت ياباشمهندس !؟

= تمام . وإن شاء الله كل حاجه هتكون تمام.

سليم : هز راسه . تمام .كدا الاجتماع خلص تقدرو تتفضلو .. الكل قام واخدو الملفات وخرجو ..

سليم : فاتح اللاب توب ومركز فيه . وقال ها يا شريف هتحتاجنى معاك ف السفريه دي ؟

شريف : قفل الملف . لا ياسليم الموضوع مش مستاهل . انا هسافر بورسعيد انهردا بليل . وع ما اكون وصلت . وتممت وآمنت ع الشحنه يكون المحامي والمحاسب حصلونى . ونسجل كل حاجه ونستلم الشحنه . ونرجع ..

سليم : هز راسه وقفل اللاب توب تمام تمام . ومسح وشه بايديه وفرد ايديه ااااه نفسي انام بجد .. انا مطبق من امبارح ..

شريف : ههههههه وايه الل مسهرك كدا . ايوه ايوه نسيت ومن الحب ما سهر ههههه.

سليم : اعمل ايه بس . رهف حساسه جدا . واى كلمه بتزعلها . وانت عارف شرطها نتجوز ف فيلا جديده . غير فيلتنا .ورافضه الشقه. وقالت.إن شاله تكون فيلا متوسطه بس اسمها فيلا وليها لوحدها ..

شريف : بصراحه حقها . رهف مش قوليله ف البلد . ووضعها الاجتماعي . يعنى هي بنت صاحب اكبر قريه سياحيه . وف الاخر تعيش ف شقه . وحتى لو الشقه دى ف افخم مكان ف القاهره او اى مكان تانى . مش هتكون لايقه .وكمان الفيلا بتاعتنا انا وانت ومامتك ومش هتكون مستريحه .. انت اعملها الل هي عايزاه !!

سليم : ههههه صدق ياض ياشريف ياخويا . رهف لسه قيلالى نفس الكلام ده امبارح ههههه .

شريف : طيب كويس . المهم بقى شوفت الفيلا. ؟

سليم : انا كلمت خالد يشوفلى فيلا. وقالى يومين وهرد عليك .

شريف : ،طيب تمام . كل حاجه محلوله اهي . قوم بقى نرجع ع الفيلا . انت نام شويه . وانا كمان اريح شويه وبعدها اسافر ع بور سعيد ع ١١ بليل ..

سليم : ياريت نفسي انام بجد . لكن انت عارف انهردا الجمعه . ولازم نتغدى انا ورهف . وبعد الغدا نطلع ع السينما . وا إلا بقى فيها زعله كبيره . انت اتغيرت . انت اهملتنى . انت انت . هههههه .

شريف : ههههههه . لأ وع ايه كل ده. انت اشرب فنجال قهوه دبل كدا وهتفوق . وهتنقذ نفسك من إعصار قادم .

سليم : عارف ياشريف!؟ . السؤال الل محيرنى ليك ؟!! انت اكبر منى ورافض الجواز لحد دلوقتي . وبجد نفسي تعملها ونتجوز كلنا ف يوم واحد !!

شريف : ايييه . اتجوز !؟ لأ لأ لأ هو انا مجنون . وبعدين انا ورايا شغل كتير جدا . وورايا ملفات قديمه عايزه مراجعه . وقام . يلا بقى قوم انت الحق خطيبتك قبل ما تعلن عليك الحرب . وانا هروح البيت اغير هدومي واتغدي وانام واسافر .

سليم : قام بكسل . تمام وخلى بالك من نفسك.

شريف : وانت كمان خلي بالك من نفسك يا سليم ..

سليم : ايه ده . انت اول مره يعنى تقول ياسليم . هههههههه ع طول خلى بالك من نفسك وتجري .

شريف : انا غلطان يعم انت واحد مطبق وهتفوق عليا . يلا سلام ... ومشي .

سليم : ههههه . سلام .. وقام واخد جاكيت البدله من ع الكرسي . ولبسه . واخد مفاتيحه والفون وخرج .. ونزل ف الاسانسير . وبص ف الساعه . اووه اتاخرت عليها ١٠ دقايق يارب بس متفتكرش انى بتجوز عليها ف ال١٠دقايق دول هههههه .. وخرج من الاسانسير . وطلع بره الشركه . وركب العربيه . وساق . وفونه رن وكانت رهف . ورد . الو ياحبيبتى .

رهف : بزعل . لأ انا مش حبيبتك .

سليم : ابتسم . مين قال كدا ؟. دا انتى حبيبتى وقلبى وروحي كمان .

رهف : ولما انا كدا عندك . تقدر تقولى اتاخرت كل دا ليه ؟

سليم : ههههه كل دا ؟ ياقلب سليم دول ١٠ دقايق بس .الشحنه وصلت بدرى وانا عملت اجتماع طارئ .

رهف : اممم .وحشتنى ياسولي .

سليم : بجديه .وبعدين يارهف . مش قولت قبل كدا بلاش سولي دى . انا اسمي سليم . سليم وبس تمام ..

رهف : اوبس . سوري بيبى انا نسيت خالص . المهم بقى هتخرجنى فين انهردا ..

سليم : شوفى اى مكان عايزه تروحيه وانا معاكي ..

رهف : بتفكير . اممم . هنروح نتغدى ف المطعم الصيني . وبعدها نطلع ع السينما . وبعدها نروح night club ( نادي ليلي)

سليم : حبيبتي . انا منمتش من امبارح . ممكن نتغدى مع بعض . وبكره هعوضهالك . ونخرج ف اي مكان تحبيه وتشاورى عليه .

رهف : بدلع . طيب لو قولتلك علشان خاطر رهف حبيبتك ..

سليم : اتنهد بحب . انا علشان رهف حبيبتى . اعمل اي حاجه . خلاص ياقلبى البسي وانا ف العربيه . كلها نص ساعه واكون عندك .

رهف : بسعاده . ميرسي اوى اوى يابيبى بحبك اوى اوى اموووا .

سليم : ههههه وانا بموت فيكي . يلا بقى انا هقفل علشان تلبسي اوكي .

رهف : اوكي يابيبى ..

سليم : رهف !!

رهف : نعم ياحبيبى .

سليم : انا بحبك .

رهف : غمضت عينيها بسعاده . وانا بحبك وقفلو .

سليم : سايق بيضحك وقلبه فرحان من حبه ل رهف ...

رهف : قفلت مع سليم . وراحت ع الدولاب . وطلعت ليها فستان أسود قصير ومفتوح من الضهر . ولبسته.

مامتها منى . دخلت وابتسمت. هاي ياروحي .

رهف : ابتسمت هاي مامي . بلتف ها ايه رايك . ف الفستان ؟ وكمان قصة شعرى الجديده ..؟

منى : حياتى انتى قمر ف كل حاجه . وبجد استايل الشعر القصير تحفه جدا عليكى . سليم اول ما يشوفك . هيتجنن من جمالك ..

رهف : ثانكس مامي . وراحت تلبس العقد قدام المرايا .. سليم لازم ينبهر بيا ع طول.

منى : ده لازم ياروحي . هو كان يطول بعمره كله انك ترضي بيه وتوافقى عليه لما اتقدملك؟

رهف : مامي . سليم مش قُليل كمان . وصاحب مجموعة شركات كبيره . وبعدين انا بحبه وهو بيحبنى . واحنا الاتنين وافقنا ع بعض .

منى : قصدك نص مجموعة شركات . انتى ناسيه اخوه الكبير الل اسمه شريف ده . انا بصراحه مستغربه . ومش عارفه ازاى شريف وسليم عايشين مع بعض؟ . مع إن كل واحد فيهم من أم مختلفه. وشريف عايش مع مرات ابوه .!؟

رهف : قعدت ع طرف السرير بتلبس الجزمه . مامي انتى كل فتره تسألى نفس السؤال ده ؟ وانا قولتلك إن سليم قالى إن عمو بدر الدين . اتجوز ومراته خلفت شريف . واتوفت وشريف عندو ١٠ سنين تقريبا . وعلشان عمو بدر لازم يهتم بشركته وقتها . كان لازم يتجوز علشان شريف حد يهتم بيه . واتجوز طنط فريده . وخلفت سليم . وعاشوا مع بعض . وشريف كبر ودخل تجاره إدارة أعمال وشغال ف مجال والده من زمان .

. وسليم .كلية تربيه قسم فرنساوي. يعنى بعيد عن شغل عمو بدر . لكن لما سليم تعمق ف شركة عمو بدر . شاف إن سليم ممكن يثبت نفسه ف الشركه . وفعلا طلب من سليم انه يشتغل فيها . وفعلا واحده واحده . سليم تفوق وبجداره ودلوقتي سليم وشريف روئساء مجلس إدارة شركات بدر الدين . وعايشين مع بعض وبيحترمو بعض حتى بعد وفاة عمو بدر الدين . وطنط فريده أمممم بتهائلى يعنى انها ست كويسه !!!

----------------------بقلمى مريم نصار

عند الشيخ محمد.

سحر : دخلت الحمام بسرعه . وغسلت وشها ومتغاظه . وخرجت من الحمام ..

سميره : من المطبخ اتوضيتى ياسحوره .؟

سحر : كدبت عليها . ايوه ياماما . انا داخله اصلى ف اوضتى ..

سميره : طيب ياحبيبتى اكون أنا جهزت الفطار وجبتهولك ..

سحر : دخلت الأوضه وقفلت الباب بالمفتاح .. ولبست الاسدال كتمويه.وفتحت الفون واتصلت على -----

ف مكان ما ..

: الو ايوه ياباشا انا موجود تحب ننفذ دلوقتي !!؟

@ : لأ ارجع انا غيرت الخطه -----