رواية أحببت بصيرته الفصل الحادي عشر 11 بقلم مريم نصار

عند سحر ..

سحر : بتكلم حسن ع الشات كتابه . وقالت بسعاده كبيره . انت بتقول ايه ياحسن !!؟

حسن : بخنقه . زى ما شوفتى الل انا كاتبه . انا انهردا فسخت خطوتبى مع فتون ..

سحر : بمكر . ليه بس كده يا حسن ؟ . دي فتون غلبانه ..

حسن : بنرفزه . اسكتى ياسحر وياريت تغيرى الموضوع ده ..

سحر : ازاى بقى . حسن انت وفتون الكل عارف انكو بتحبو بعض . ومخطوبين من ٣ سنين .ياحبيبتى يافتون . ياتري هي عامله ايه دلوقتى ..؟

حسن : اسكتى ياسحر انتى الل غلبانه وع نياتك . وديما تدافعي عنها . انا مش عارف كنت عايش مغفل كدا ازاى . ؟

سحر : ايه الكلام ده. طيب احكيلى ايه الل حصل ممكن اعرف.

حسن : كان هيحكي . بس سكت ومردش .......

سحر : بمكر . طيب اتصل عليك ماسنجر ونتكلم شويه حساك مخنوق. .

حسن : اتنهد . والله ياسحر انتى الوحيده الل بتحسي بيا ...

سحر : قلبها دق. وقالت بهيام ..حسن انا طول عمرى بحس بيك . انت متعرفش غلاوتك عندى قد ايه ...؟

حسن : سكت ومردش ............

سحر : خافت لاتكون اتسرعت . لكن ضحكت بمكر ..!!

. لما شافت حسن بيتصل عليها صوت . وردت عليه . واتكلمو وقت كبير مع بعض ..

وسحر بدلعها وطريقتها بدءت تنسي حسن مشكلته مع فتون . وكمان بدءت تخترق حصون حسن ...

----------------------بقلمى مريم نصار

عدى يوم كمان .

خالد : نزل من العربيه قدام المدرسه . ولابس بنطلون اسود . وقميص رصاصي غامق . ولابس نضاره . وحاطط برفان. وكان ف منتهى الشياكه والجمال .. وقفل العربيه . وبص ع يافطة المدرسه . واتحرك . المدرسه الابتدائيه للمكفوفين ..

خالد . داخل المدرسه . وسأل البواب . لو سمحت مكتب المدير فين ؟

فتحي : الدور التانى اخر الطرقه يمين .

خالد : طيب اطلع أنهى سلم معلش ...؟

فتحى : السلم التانى الل هناك ده هتدخل الممر ده وهتلطع منه ع حوش المدرسه هتمشي شويه . وهتلاقى السلم ف وشك ..

خالد : بصله ..( ف وشي) . ماشي . شكرا جدا ..

فتحى : العفو سيادتك ..

خالد : دخل الممر وطلع الحوش ومتجه للسلم.

حنين : خلصت الحصه . وطالعه من الفصل وحطت أيدها ع بطنها . ااه انا مفطرتش ووصلت متأخر . وفتحت الشنطه وطلعت عبلة الساندوتشات . وقالت اممم انا هاخد ساندوتش بطاطس وهغرقه كاتشب .تصبيره لحد ميعاد الفسحه . واكل انا وتونه .

. واخدت الساندوتش . وحطت جواه كاتشب كتير . ونازله ه السلم . واخدت قطمه كبيره .امممم ياخرابى عليكى بطاطس . مش عارفه معمولى عمل ع رأي نوجا .. وبتاكل قطمه تانيه ونازله ع درجة سلم . وهوب اتكعبلت وكانت هتقع . لكن خالد لحقها وسندها .

.خالد : انتى كويسه ..؟

حنين : قلبها بيدق لانها كانت هتقع . وبعدت عنه بسرعه . ومتوتره . ورفعت عينيها علشان تشكره لكن اتصدمت وشهقت ..

خالد : واقف وحس أن ف حاجه ساقعه ع قميصه . وبص عليه وشاف كمية كاتشب والقميص اتبهدل . وخالد ع وضعه انه فاتح ايديه ومتغاظ جداااااا ..

حنين : شهقت وحطت ايدها ع بوقها . وبصت ع قميصه . وكمان بصت ع الساندوتش الل ف أيدها وكان اتلخبط كله ف بعضه ..

حنين : بلعت ريقها بتوتر . ا..انا . احم انا . !!!

خالد : رفع عينيه . وشاف حنين لاول مره . وعيونها فيها لامعه جميله مع انعكاس الشمس . لكن كل ده اختفي ف ثانيه . وقال بنرفزه . انتى.!! انتى ايه !؟ وبعدين كل ده كاتشب ف حتة ساندوتش قد ده ؟. مش فاهم انا ..

حنين : بحرج . انا اسفه جدا لحضرتك . والله انا كنت نازله وا ... احم كنت ....!!

خالد : بتريقه .. ايوه طبعا . كنتى نازله وانتى بتاكلي ومخدتيش بالك انك نازله ع سلم .

.(وكمل بجديه )

.يعنى وارد جدا حد يكون طالع ع ام السلم . وبعدين كنتي اصبرى لحد ماتنزلى . مش معقول كدا !! .شوفتى بسببك ايه الل حصل . هعمل ايه انا دلوقت .؟

حنين : حست باحراج شديد . ورمت الساندوتش ف الباسكيت . وضغطت ع شفايفها . وعينها لمعت بدموع . وجريت من قدامه ..

خالد : شاف كل ده . وادايق من نفسه . لكن لما جريت . نده عليها . يا انسه . انسه استنى بس .. ولكن اختفت من قدامه . وقال لنفسه . هو انا زودتها ولا ايه ؟ . وبص ع القميص ونفخ بديق .

. اعمل ايه دلوقتي ؟ . اوووف . كويس انى معايا لبس فالعربيه . ونزل . لكن عينيه تلقائيا بتدور ع مدمنة الكاتشب .وملهاش أثر .

. وخرج ركب العربيه والازاز مقفول ومتفيم . وقلع القميص . ولبس واحد تانى . وطلع ودخل المدرسه من تانى . وفتحي حاسس ببلاها .

..

فتون : قابلت حنين وهي ماشيه بسرعه . وراحت وراها ودخلت المكتبه . اله حنين انتى يابت ماشيه ف وشك كدا ليه ؟

حنين : بصتلها بزعل حقيقي . اسكتى يافتون حصل معايه موقف زباله اووي ...

فتون : بعدم فهم . موقف ايه ؟ قولى ايه الل حصل؟

حنين : بصي ................ وحكتلها الل حصل ..

فتون : شقهت . هيييه يخربيتك بهدلتى الراجل .هههههههه . شوفتى اخرت طفاستك .

حنين : بحرج . اله اعمل ايه بس ياتونه؟ . كنت جعانه اوى . بس بصراحه انا مكسوفه جدا .

فتون : بصتلها وكشرت عينيها . بت انتى . من امتى وانتى بتتكسفى ها !؟ وبعدين انتى مردتيش عليه ليه ..؟

حنين : مش عارفه ياتونه . انتى لو شوفتيه .تحسيه ليه رهبه كدا . وساعتها حسيت اني ف نص هدومي . ولما كلمنى بالطريقه دي . حسيت انى مكسوفه اوى وادايقت من نفسي وكمان شكلى كنت واقفه زى الهبله ماسكه الشنطه ف ايد . وايدى التانيه فيها الساندوتش . والكاتشب نازل ع ايدى . شكلى كان زباله بصراحه . لقيت نفسي بجرى من قدامه مره واحده . بس بصراحه قميصه اتبهدل خالص وشكله غالى اوى ..

فتون : طلعت منديل من الشنطه . خدى نضفى ايدك . وفكك خلاص وانسي . تلاقيه ولى أمر طالب هنا . وهيمشي على طول ومش هتقابليه تانى ..!!

حنين : اخدت المنديل . وهمست ولى أمر طالب ...!!

----------------------بقلمى مريم نصار

خالد : قاعد ف مكتب المدير . وشرحله كل حاجه بطريقه مبسطه ..

المدير : تمام حضرتك انا فهمت طلبك . ولحساسية الوضع . وانت عايز المدرس كاتأسيس من البدايه تمام كدا .؟

خالد : بالظبط حضرتك . وياريت يكون متمرسه كويس جدا .. وياريت انهردا . تبعت المدرسه ع العنوان ده . اتفضل . وعطاله الكارت ..

المدير : اخد الكارت . تمام ولكن بعد انتهاء اليوم الدراسي . انا هشوف مدرس لغه عربيه ع كفاءه عاليه ويكون متعين هنا من سنين زى ما حضرتك عايز . واشرحله نبذه مختصره عن الموضوع .

خالد : حضرتك . انا طلبت مُدرسه ايا كانت . لأن الباشمهندس سليم عصبى جدا الفتره دى .واكيد المدرس مش هيتحمل أسلوبه . انا عايز مُدرسه ويكون عندها صبر وقوة تحمل لل قدامها وانا موافق ع المبلغ الل هي تحدده .

المدير : هز راسه تمام . إن شاء الله انهردا الساعه ١٢ ظهرا انا هتصل بحضرتك . وابلغك .

خالد : تمام . وقام وسلم ع المدير انا بشكرك جدا لانك ادتنى من وقتك ..

المدير : تحت امرك ياخالد بيه . وربنا يشفيه إن شاء الله ..

خالد : إن شاء الله . بعد اذنك . وخرج . وكان وقت الفسحه . خالد نازل من ع السلم . لكن انتبه ع الاطفال . ووقف للحظه وتاه ف عيونهم . وقال بدهشه . معقول !!! معقول كل دول مكفوفين . كل دول عايشين ف الضلمه .وسرحان ..

وبعد لحظات .انتبه ع صوت طفل وراه ..

مالك : ف حد واقف قدامي مش كدا !!؟

خالد : بدهشه .رد عليه .. ايوه انت عرفت ازاى ؟

مالك : ابتسم . لانى زكي . وكمان لو عرفت اسمك وحسيت خطوطتك بعد كده هعرف انت مين !! انا اسمى مالك . وانت ..

خالد : بتوهان . خالد . اسمى خالد ..

مالك : هز راسه . طيب ممكن اعدى علشان انزل ..

خالد : احم . ماشي .

مالك : نزل درجه ..

خالد : استنى يامالك . وطلع فلوس من جيبه . امسك يامالك ..وحط الفلوس ف ايده ..

مالك : مسك الفلوس . ولمسها وركز وقال . ١٠٠ج . ليه ؟

خالد : بزهول ايييه !!؟ انت عرفت ازاى ؟. ولاااا !! انت بتشوف ياض وبتضحك عليا صح ؟

مالك : ضحك . لا انا بعرف الحاجه من ملمسها . وكمان الالوان . اتفضل الفلوس ورفع ايدو ..

خالد : بتعجب .. احم لا خليها معاك يامالك ..

مالك : ابله فتون علمتنا اننا مناخدش حاجه من حد واحنا مش محتاجينها . وعاملنى ع انى إنسان عادى . اصل انا مش مختلف عنك ف حاجه . واتفضل علشان الفسحه هتخلص .

خالد : اخد الفلوس بحرج . وحس إن مالك اذكى منه بكتير . وحس بشعور غريب . إن مالك فيه حاجه مميزه لكن هو مش عارف هي ايه !!؟

----------------------بقلمى مريم نصار

سحر ف الجامعه وطالعه من المحاضره . فونها رن . ونفخت بديق حقيقي . اووف ياعلاء . لما اشوف آخرة زنك ده .. الوو ..

علاء : بيكح . الو اومال ايه ياست سحر مش خير ولا ايه ؟

سحر : خير ياعلاء ف ايه ؟

علاء : ف انى مسافر مع صحابي من يومين . ومفيش اخبار عنك . وكما فى إن دي عاشر مره اتصل عليكى وانتى منفضا ل امى ايه الحوار ياحب ..؟

سحر : نفخت . ولا حوار ولا حاجه يا علاء انا كنت في محاضره وانت بتتصل . ومعرفتش ارد عليك ولما طلعت رديت اهو .

علاء : اله طب ومالك متعصب كدا ليه يا حب.

سحر : ولا متعصبه ولا حاجه وبعدين انت مسافر وقولت هترجع بعد شهر .

علاء : طيب المهم ايه الجديد ..

سحر : ابتسمت بخبث . عندى ليك خبر بمليون جنيه ..

علاء : بت ياسحر اوعى يكون حصل ..؟

سحر : ههههههه ايوه حصل ياعلاء . وحسن فسخ خطوبته من فتون . ها ايه رايك في الخبر ده ..؟

علاء : ياااه اخيرا . لا خبر جامد . طيب احكيلى حصل ازاى !!؟

سحر : انا معرفش غير إن حسن بعت الدبله مع صاحبه. ولما كلمت حسن مرضيش يقول حاجه اكتر من أنه مش عايزها وخلاص . وابويا عرف بس محكاش قدامنا حاجه . بس انا قولت لامي امبارح بليل .

علاء : اممم وفتون عملت ايه ؟

سحر : اهو ده الل انا مستغرباه بقى .. موقف فتون . دي امبارح نزلت الحاره عادى واشترت خضار وراجعه ولا كأن فيها حاجه ..

.وكمان راحت مدرستها انهارده . وباين عليها انها عادي خالص . !!

علاء : غريبه . امم ما علينا . كدا بقى الطريق خلي لحبيب القلب . وانا بقى كدا اخد فتون كدا معندهاش اى اعذار ..

----------------------بقلمى مريم نصار

فيلا بدر الدين .

محروس : دخل الفيلا . فريده هانم .

فريده : ايوه يامحروس !؟

محروس : ف واحده واقفه بره . وبتقول انها مدرسة عربى وجايه ع العنوان ده وعايزه تقابل خالد بيه ..!

فريده : بلهفه . ايوه ايوه يامحروس . خليها تدخل بسرعه .

محروس : حاضر ياهانم . وخرج ..

فريده : فونها رن . وردت الوه ايوه ياخالد ..

خالد : ايوه يافيرى . بقولك ايه؟ . المدرسه جايه ف الطريق دلوقتي . مدير المدرسه كلمنى .

فريده : ايوه يا حبيبى هي جت فعلا قدام باب الفيلا . ومحروس هيجبها .

خالد : تمام . بس بقولك ايه ؟ . انا قدامى مشوار مهم جدا في الشغل . ومش هعرف اكون موجود مع سليم . حاولى كدا تمهديله الموضوع وميتعفرتش ع المدرسه .

فريده : اتنهدت . إن شاء الله يبنى هحاول بأمر الله ..

خالد : إن شاء الله . وبلغينى لو حصل جديد. يلا سلام .

فريده : حاضر . مع السلامه ربنا معاك ياحبيبى . وقفلو .

فريده : رفعت ايديها للسما يارب . يارب تهدي سليم ابنى . وميعملش مشاكل ..

محروس : دخل . اتفضلى ياهانم . فريده هانم ف انتظارك ..

فريده : شافت المدرسه . وقامت وراحت سلمت عليها . اهلا وسهلا . اتفضلى ياحبيبتي . معلش اتشرف باسمك ... اسمك ايه ؟

سها : اسمى سها .

فريده : اهلا ياسها يابنتى اتفضلى ياحبيبتي اتفضلى شرفتينى ..

سها : ميرسي ياطنط ..ودخلت وقعدت ف الليفنج ..

فريده : قعدت . تشربى ايه ياحبيبتي.

سها : لا ميرسي جدا لحضرتك .انا هدخل ف الموضوع ع طول .. انا مُدرسة لغه عربيه . احم انا جيت انهردا تبع مدير المدرسه . وشرحلى كل حاجه بخصوص الاستاذ سليم بدر الدين .

فريده : اتنهدت بوجع . ايوه يابنتى سليم ويبقى ابنى الوحيد ..

سها : ربنا يشفيه إن شاء الله . دلوقتي حضرتك . علشان نتفق ع المواعيد . انا هاجى ٣ ايام ف الاسبوع . حضرتك هتحاسبينى بالجلسه ولا شهريا ..

فريده : الل انتى عايزاه يابنتى . شوفى انتى عايزه ايه وانا معاكى فيه ..

سهام : تمام . نخليها بالشهر . ولكن انا باخد مقدم . ولأن مجال تعليم المعاقين متعب شويه . الاجر بيبقى كبير شويه ..

فريده : بديق وقلبها وجعها . معاقين !!!؟ هو انا ابنى معاق !!؟

سهام : اسفه ياطنط مقصدش . أنا عارفه إن ابن حضرتك كفيف . لكن مجالنا بيشمل كل حاجه . ولأن التعليم بيبقى متعب ومرهق .. ف الأجر بيعلا . ها قولتى ايه !؟

فريده : حست بديق من أسلوبها . شوفى يابنتى سيبك من حتة الفلوس دى خالص . احنا إن شاء الله نشوف نتيجه بس . وهنراضيكى ب اكتر من الل انتى عايزاه .

سهام : تمام . لكن انا هبدء من أنهردا . هشوف قدرات ابنك وهتعامل معاه ف اول جلسه . انا هاخد ف الشهر ٦٠٠٠ج شهريا ومقدم .

فريده : بصتلها بتعجب ودهشه ٦٠٠٠ج ف الشهر ؟ ومقدم !!!؟

سهام : احم . ايوه يافندم ..

فريده : ايوه .. ؟ بس انتى بتقولى ٣ جلسات ف الاسبوع يعنى ١٢ جلسه ف الشهر . وب٦٠٠٠ج . يعنى الجلسه الواحده ب ٥٠٠ ج ؟

سها : احم . حضرتك لو عايزانى اجي يوم جمعه كمان هيبقى اوفر تايم . وبعدين ياطنط انا ميهمنيش الفلوس قد انى اعلم ابن حضرتك واخليه ع كفاءه عاليه . ولا ايه !!؟

فريده : اتنهدت وقالت بهمس واضح انك مبيهمكيش الفلوس .. وبصتلها ماشي يابنتى . المهم إن سليم ابنى يخرج من الل هو فيه !!

سها : إن شاء الله . هو سليم ف سنه كام !!

فريده : استغربت . سنه كام ايه يابنتى . اسم الله عليه . ابنى شاب ..

سها : اممم انا فكرته لسه صغير . اوكي . هو فين . وهنبدء الدرس فين ؟

فريده : قامت بديق . يا عزيزه هاتى عصير للاستاذه سها . ثوانى ياحبيبتى . انا هطلع اشوف ابنى واديله خبر تكونى انتى شربتى العصير ..

سها : اوكي . وياريت لو عصير برتقال ..

فريده : اتغاظت . ياعزيزززه . عصير برتقال وطبق كيكه للاستاذه ..

سها : ميرسي ياطنط كلك ذوق ..

فريده : ابتسمت بتكليف . ولفت وشها ومتغاظه . طلعت ل سليم ..

سها : ابتسمت بمكر . كل ده عز ...؟ اه ما انتو عايشين ومش حاسين بينا . ومستخسره ٦٠٠٠ج . انا كنت هطلب اكتر . وكمان ابنك الاعمى كبير مش صغير اممم اما نشوف ..؟

عزيزه : اتفضلى حضرتك . وحطت العصير والكيك .

.

سها : اممم شكرا يا عزيزه . وياريت معلش وانا ف الجلسه . تجبيلى عصير مانجه . وتبقى تيجى تسألى يمكن احتاج حاجه ..

عزيزه : عوجت بوقها . حاضر . ومشيت .

----------------------بقلمى مريم نصار

سليم : قاعد ف الاوضه ع الكرسي الهزاز .

. فريده خبطت ودخلت . سليم ياحبيبى .

سليم : تعالى يافريده .

فريده : بتوتر . احم هوا .. قصدى هيَ...

سليم : ف ايه يا فريده مالك ؟

فريده : راحت قعدت قدامه . بص بصراحه بقى ومن غير زعيق وعصبيه . وكمان متزعلنيش منك . مُدرسة العربى جت وقاعده تحت . ومستنياك .. وبلعت ريقها بتوتر .

سليم : نفخ بديق حقيقي . الله يخربيتك ياخالد . انا مش عارف انتو تاعبين نفسكو ليه ؟ انا لا هخرج . ولا رايح الشركه تانى .

فريده : بدموع . حبيبى ليه اليأس بس . جرب إنت يعنى هتخسر حاجه. اهو كأنك بتسلى نفسك . وبعدين يعنى مش هتروح شركتك ليه ؟ اخوك شريف بيقول إن الشغل متعطل وواقف ع امضتك ..

سليم : فريده انسي انى ارجع الشغل . انا هعمل توكيل عام ل شريف . وهو يتصرف ويدير الشركات ..

فريده : بصدمه كبيره. وقامت من مكانها انت بتقول ايه ياسليم ؟؟ اوعا تعمل حاجه زي كده . ساعتها انت ممكن تخسرني فاهم ..

سليم : بعدم فهم . ليه انتى صوتك اتغير كدا ليه . وفيها ايه لما اعمل توكيل ل شريف ؟

فريده : غمضت عينيها بنفاذ صبر . سليم يبنى الله يخليك متوجعش قلبى . شريف اخوك وكل حاجه . لكن حكاية انك تعمل توكيل عام دي . مخوفانى . شريف كويس جدا وكل حاجه بس انت ليه تلغى نفسك ووجودك . وبعدين يعنى افرض انت احتجت لاى حاجه ف المستقبل. تروح تستأذن منه ف ملكك . ولما تيجى تتجوز تقوله وانبى هات علشان اشتري بيت وعفش . اهدى ياسليم وماتخليش التفكير الكتير يضيعك ..

سليم : ضحك انتى قولتى ايه !!؟ اتجوز هههههههه . اهي دى احلا نكته سمعتها في حياتي . ههههه اتجوز . وهز راسه واتنهد وسكت ...

فريده : مسحت دموعها . وبصتله . انت بتضحك . هتتجوز وهتخلف وهتملا بيتى احفاد . ولا انت عايزنى اموت قبل ما اشوفلك حتة عيل يفرح قلبي . وعيطت ..

سليم : اتنهد بتعب . فريده خلاص . مش كل ماتقعدى معايا تعيطى . ويستى هريحك مؤقتا هي فين المُدرسه دي !؟ ههههههههه حلوه مُدرسه جايه لسليم بدر الدين . ودي بقى اقولها يا ابله ولا ياميس ههههه ..

فريده : مسحت دموعها وابتسمت . متقولهاش حاجه . انت بس ركز معاها وإن شاء الله هشوفك احسن واحد ف الدنيا يابن قلبى يارب.. هااا ؟ هتنزل المكتب !!

سليم : بجمود . لأ . مش هخرج من اوضتى . خليها تطلع هنا ..

----------------------بقلمى مريم نصار

فتون : داخله الحاره . وشافت نظرات الجيران ليها . كلها اسئله وحيره . كأنهم بيقولو ياترا حسن سابك ليه يافتون ..

فتون : حست بخنقه واضايقت . لكن عملت نفسها مش واخده بالها وماشيه ف طريقها .

ام سيد : شافتها . فتووون يافتووون اذيك ياحبيبتى . عامله ايه .؟

فتون : بخنقه متداريه . الحمدلله يام سيد . انتى عامله ايه !!؟

ام سيد : نحمدو ونشكر فضله . إلا قوليلى يافتون صحيح الل انا سمعته ف الحاره وانا رايحه السوق الصبح اجيب بضاعه ...؟

فتون : بصتلها وربعت ايديها . وايه بقى الل سمعتيه إن شاء الله يام سيد !!؟

ام سيد : سمعت حريم الحاره بتتكلم . وبتقول حسن ابن عم منصور المكوجي . ساب فتون وبعتلها الدبله من اخر الدنيا . بس انا مسكتلهمش وقولتلهم ده لاممكن ابداا . ده حسن من حظه انه خاطب فتون . وقولتلهم انتو حريم فاضيه . بس بقى ف ناس بتأكد الكلام ده . وقالت إنها شافت الدبله بعنيها وإن حسن الل ساب فتون بس ياترى سابها ليه !؟..

فتون : بجمود . ووجع ف نفس الوقت . قالت . لا ي ام سيد صدقيهم لانه حصل فعلا . وحسن بعتلى الدبله . وسبنا بعض . وليه !!؟ علشان مفيش نصيب . وقولى لل اكدتت الكلام ده وشافت الدبل بعينيها . ربنا يستر ع ولايانا . وانا هسكت بس عشان خاطر جوزها الراجل المحترم . وخبطت ع كتفها . ياريت توصليلها الكلمتين دول . بدال ما اخبط عليها انا .. وانا طالعه ..ماشي ياحبيبتى .

.وسابتها ومشيت ..

ام سيد : شهقت هيييه يلهوى دى عرفت انها سميره أم عصام . ومعقول حسن ساب واحده زى فالقة القمر زيك . وشهقت معقول يكون شافله بنت من بتوع بلاد بره . اااه حاكم أنا عارفه الرجاله الهى يدب ف عينه رصاصه البعيد . ياعينى عليكى يافتون . دى الحاره من الصبح مالهاش سيره غيرك . هاتلقيها منين ولا منين ياحبيبتي .. بس نقول ايه بقى . الناس مابتصدق . يلا ربنا معاكي يافتون يارب .

فتون : داخله العماره وكلها غيظ . وطالعه ع السلم ..

سميره : كانت واقفه ورا الباب . مستنيه فتون بفارغ الصبر . وفتحت الباب بسرعه . فتون ياحبيبتي ..

فتون : غمضت عينيها ونفخت بديق . ولفت وشها وابتسمت بتمثيل . ايوه ياست أم عصام ؟

سميره : بخبث وشماته . قلبى عندك ياحبيبتي . والله لما عرفت بالل حصل زعلت عليكى اوى ..!

فتون : وتزعلى عليا ليه إن شاء الله ؟. اذا كان انا مش زعلانه . !

سميره : شهقت . ياعينى عليكى يافتون يابنتى تلاقيكى مصدومه ياحبة عينى ومش مصدقه إن حسن سابك .

فتون : بتتنفس غيظ . وليه يعنى هتصدم من ايه !؟ وليه مش مصدقه ولا هي مبتحصلش ؟

سميره : انتى بزعقي يافتون بس انا عذراكي ياحبيبتى . الل حصل مش شويه برضو. بس بقولك ايه . انا ممكن اتوسطلك عند ام حسن ونتكلم مع حسن . ونشوف انتى غلطتى ف ايه علشان يسيبك ونستسمحه ونراضيه .. ونرجعك ليه !!

فتون : وصلت لقمة غضبها . انتى بتقولى ايه ياست أم عصام ؟ . ماتعقلى الكلام كدا قبل ماتقوليه .! وبعدين غلطت ف ايه إن شاء الله . مش فتون مهران الل تغلط ياحبيبتي . وبعدين حياتى كلها ع عينك يا تاجر والكل عارف مين هي فتون مهران . وإن كنتى عايزه كل شويه تأكدي كلمة إن حسن سابنى . ومالو اكديها لنفسك .. وصدقيها كمان . بس ياريت بقى وانتى بتنشري الخبر ف الحاره تبقى تقوليلهم انك كمان اتخطبتى مرتين قبل كده . وسابوكي ومكملوش معاكي . ومتنسيش برضو تقوليلهم إن ابن عمك سابك قبل كتب كتابك بيوم . ماشي يااا ..ست ام عصام . سلاام .وسابتها وطلعت وكارها الدنيا كلها .

سميره : اتصدمت وفتحت عينيها ع الاخر . واتغاظت جدااا . وبدال ما تحرق دم فتون ..فتون خلتها توصل لقمة غضبها و انها عايزه تولع ف الحاره . ودخلت وقفلت الباب جامد وفضلت تشتم ف فتون بغيظ كبير ..

فتون : فتحت الباب ودخلت بخنقه . سلام عليكم . اذيك ياماما .. وقعدت بتعب ع كرسي الانتريه ومسكت جبينها من الصداع ..

فاطمه : وعليكو السلام ياقلب أمك الحمدلله. اله مالك يافتون وشك احمر ليه كدا يابنتى ؟.

فتون : صعبان عليها نفسها . ودموعها مهدده بالنزول . لكن اخدت نفس عميق وخبت دموعها كأنها بتقولها مش دلوقتى . مش قدامها علشان ماتتعبش . وقالت مافيش ياست الكل . اصل الاتوبيس كان زحمه اوى .. وانا كنت واقفه ف الاخر . انا . انا هاقوم ادخل الحمام اتوضى واصلى . وهعمل الاكل بسرعه.

فاطمه : حست بوجع بنتها . وقالت بتوتر اسنتى فتون يابنتى ...

فتون : نعم ياماما . عايزه حاجه اعملهالك ..؟

فاطمه : سلامتك ياقلب أمك . احم وقالت بتوتر .. انا كنت عايزاكى يعنى . تسألى حسن يعنى عن سبب فسخ الخطوبه ..

فتون : بصت ل فاطمه بصدمه كبيره . وعينها بتروح يمين وشمال . انتى بتقولى ايه ياماما!!؟ انتى عايزانى اناااا اروح اقوله انت سبتنى ليه ياحسن !!!؟

فاطمه : شافت رد فعل فتون . وقالت استهدى بالله يانور عيني . وافهمى انا اقصد ايه ..؟

فتون : قامت وقفت بخنقه . ماما لو سمحتى وانا فاهمه قصدك كويس جدا . لكن مش انا الل ازل نفسي . وعيونها لمعت بدموع . هو مش عايز يكمل وانا مش هجبرو . ولا هساله انت عملت كدا ليه!؟ لانه ببساطه ياماما مايفرقش معايا حاجه !! حسن زيه زي اى حد ف الحاره . وانا من ساعة ما شوفت دبلته . رميته ورا ضهرى . وبصت ل فاطمه وابتسمت بتمثيل . كل واحد بيعمل بأصله ياماما . وحسن ده ورقه واتقطعت من دفترى خلاص ومبقاش ليها اى لازمه أو داعي اننا نتكلم ونجيب سيرته ف البيت هنا تانى علشان خاطرى حاولى تنسي انتى كمان ..

فاطمه : بدموع . بس دى عشره يابنتى ..

فتون : وهانت ياماما . هانت عليهم مش علينا . وربنا هو الل ليه حكمه في كدا . مش يمكن كنت اتجوز وأطلق . ربنا ابدا ماخذلنى .ربنا كريم . كريم اوى اوى ياماما . فاكره بابا كان ديما يقولك ايه ؟ لما بنرضي بيدهشنا بعطاءه . وانا راضيه . وواثقه إن ربنا هيدهشنى ف يوم من الايام ..

فاطمه : مسحت دموعها . وقالت بيقين .. والله ل يكرمك ياقلب أمك وان شاء الله يجعل دعواتى من حدك ونصيبك .. روحي ياحبيبتي . اتوضي وصلى . ربنا يتقبل منك إن شاء الله. ويريح قلبك يابنت بطنى قادر ياكريم ..

فتون : اتنهدت بوجع . واتحركت بتعب إن شاء الله . ودخلت اتوضت ولبست الاسدال وصلت الضهر وبتدعي ف سجودها وقلبها حزين جدا وحاسه إن ف جبل ع قلبها . ونفسها تعيط وتصرخ لكن مقيده بوجود امها . وخلصت صلاه . وقامت قلعت الاسدال وخرجت . وجهزت الاكل بصمت علشان خاطر امها بتاخد علاج . وقعدت قدام فاطمه . وبيتغدو .

فتون : بتاكل بتمثيل وتايهه وملهاش نفس للاكل ..

فاطمه : اكلت حاجه بسيطه لانها كمان ملهاش نفس . لأن شكل فتون غنى عن السؤال . واتنهدت بوجع .. بوجع كبير جدا ...

----------------------بقلمى مريم نصار

ف نفس الوقت ..

فريده : نزلت ومحرجه . وقالت ل سها إن الدرس هيكون فوق .

سها : قلقت ف الاول . لكن فريده شرحتلها الوضع وعصبية سليم .

سها : اقتنعت وطالعه ع السلم ورا فريده .. ومبهوره بالفيلا والديكور وطالعه وبتتخيل أن ده بيتها وملكها . بتتمتى تعيش في العز ده .

فريده : وصلتها لا وضة سليم . وسابت الباب مفتوح ونزلت ..

سها : ف الاول كانت خايفه . لكن لما شافت . سليم وأنه جميل جدا . وقالت جواها ياخساره بقى القمر ده اعمي . وقالت . احم مساء الخير.

سليم : بديق حقيقي لانه من بعد رهف . شاف إن كل البنات زي بعضها . وصدق وجهة نظر خالد ف البنات ..وهز راسه وقال بجمود اهلا .

سها : قعد ع الكنبه . وسليم قاعد ع الكرسي .احم انا اسمى سها . وهبدء معاك من انهردا . حضرتك جاهز ..

سليم : هز راسه تمام ..

سها . تمام . ف حاجه اسمها مسطرة برايل . وهنستخدم معاها قلم . وورقه . تحب نبدء بالحروف ولا الارقام ؟

سليم : نفخ بديق اى حاجه مش هتفرق . وياريت تبدئى . لان كدا فات من الوقت ١٠ دقايق . وانتى اخرك ساعه .

سهام : عوجت بوقها . مش شرط ساعه حضرتك . الجلسه ع حسب الاستيعاب . وعموما ماشي . هنبدء بالحروف . هات ايدك !!

سليم : بعدم فهم ليه !؟

سها : لازم امسك ايدك . واعملك ازاى تكتب . وبعدها هعلمك ازاى تقرا الل كتبته .هات .

سليم : مد ايدو . وتخيل انها هتتحرج تمسك ايدو ..

سهام : من جواها محرجه . لكن شافت انها فرصه تقرب من سليم . مش مهم أنه اعمى المهم أنه غنى ومبسوط .. ومسكت ايدو عادى جدا .

سليم : مط شفايفه . وحس انها متوترتش . وحاول يطرد الفكره ويركز معاها .

سها : بدءت تعمله . لكن هي مش عارفه تشرح ببساطه أو مش عارفه توصل المعلومه بشكل جيد .. وعدى الوقت .

سليم : خلاص . ممكن تسيبى ايدى !!!؟

سها : احم . ماشي وسابت ايدو . ها عرفت ازاى تكتب الحروف الابجديه كلها ..

سليم : ضحك بسخريه . عليها . ومردش .لانه مستغربها ازاى اول حصه وهيكتب الحروف الابجديه كلها وكمان مش شايف وع طريقة برايل لاول مره . وكمان صعبه جدا عليه . وكمان بيكتب ع مسطره .

سها : قامت . احم طيب انا هجيلك بعد بكره إن شاء الله انا ليا معاك ١٢ جلسه ف الشهر . بس لو سمحت مين هيحاسبنى حاليا . لانى اتفقت مع والدتك ع المرتب .وهيكون مقدم ..

سليم : بجمود .. وتتفقى مع والدتى ليه !؟ اتفاقك معايا انا !! عايزه كام ..

سهام : بمكر ٦٠٠٠ج .

سليم : حط ايدو ف جيبه . تمام اتفضلى انتى دلوقتي . سيبى رقمك مع فريده هانم وهشوف الوقت الل يناسبنى وهنبلغك ..

سها : من جواها خافت لاتضيع عليها فرصه زى دى .. احم اوكى تمام . وع فكره المبلغ قابل للتفاوض ..

سليم : ابتسم بسخريه . الجلسه خلصت . اتفضلى ..

سها : خرجت . ومن جواها تمنى كبير انها تكون صاحبة العز ده كله وعينيها هتطلع ع كل حاجه موجوده في الفيلا . ونزلت ومالقتش فريده تحت وخرجت ..

فريده : طلعت بسرعه من اوضتها . وراحت ل سليم . ودخلت وقالت .. . ها ياسليم ياحبيبى . طمنى طلعت من الجلسه دى بأى معلومه ..؟

سليم : لأ .والبنت دى ماتجيش هنا تانى !

فريده : ليه بس ياسليم ..؟

سليم : بجمود .. فريده . قولت البنت دى ماتجيش هنا تانى . وانسو الموضوع ده ..!

فريده : بإحباط . ليه بس يانور عيني . ارجوك يا سليم لازم تتعلم علشان شغلك ياحبيبى . !

سليم : غمض عينيه واتنهد بتعب . فريده انا مفهمتش منها اى حاجه . كل الل عملته انها مسكت ايدى ومعرفتش هي بتعمل ايه . وكمان ولا عارفه توصلى اى معلومه . ومبتعرفش تشرح ..

فريده : كل ده عرفته عنها من اول جلسه مش يمكن البنت متوتره ..

سليم : غصب عنه ضحك . متوتره ههههههههه

وايوه يافريده انا عرفت كل ده من اول جلسه . تخيلى ادتلى الحروف الابجديه كلها مره واحده . لأ وكمان عايزه ٦٠٠٠ ج ف الشهر . ههههه هو المجال ده بقى بيزنس ولا ايه !!!؟

فريده : بينى وبينك انا مستريحتلهاش ابدا .. خلاص نشوف غيرها ..

سليم : لا غيرها ولا غيرو . خلاص الموضوع ده يتقفل ..

فريده : وقفت قدام منه . طيب لو قولتلك علشان خاطر فريده أمك واختك وصحبتك .هترفض !؟

سليم : اتنهد . عايزه ايه بالظبط يافريده .

فريده : عايزاك مش تيأس ياضنايا . وعايزاك ترجع سليم ابنى ونور عيني وتتعلم البرايم دى .

سليم : هههههه اسمها برايل يافريده ..

فريده : اخدت سليم ف حضنها . مدام برايم دى بتخلينى اشوف ضحكتك يبقى خلاص . انا هاقولها ع طول . انا مستعده ارمي نفسي ف النار بس اشوفك مبسوط ياسليم يبنى .

سليم : اتنهد بوجع . وزاد من حضنها . متقوليش كدا تانى .. و حاضر ياحبيبتى انا هعمل كل الل انتى عايزاه ..

----------------------بقلمى مريم نصار

عند فتون .

فتون : قاعده ع الكنبه . وسانده راسها ع الشباك وسرحانه ..

فاطمه : بتفكر كتير . وصعبان عليها بنتها وبصت ل فتون بتوتر .احم تونه ياحبيبتي .!!

فتون : انتبهت . ولفت وشها . وشافت حيره واضحه ع وش فاطمه .. هااا عايزه تقولى ايه يا ماما !!

فاطمه : بتوتر .يابنتى انا شايله همك . وخايفه عليكى من بكره . عايزاكي تسألى ع اعمامك .

فتون : لفت بديق حقيقي وبصوت جهورى. انتى بتقولى ايه ياماما . أسأل ع مين !!!؟ ومين الل يسأل ع التانى.!؟ ماما دول كانو ف عزا بابا كأنهم اغراب . ده عم محمد وزينهم ومنصور وقبارى هما الل خدو عزا بابا مش هُما . وبعدها كل واحد رجع لحضن مراته وعياله ونسيونا . محدش كلف خاطرو وسأل علينا بعدها . حتى شهر رمضان الل كُنا كلنا بنتعزم فيه محدش افتكرنا .

ولا كمان بقى عمى عثمان الل جه بعد وفاة ابويا بسنتين وعايز يجوزنى لابنه احمد . قال ايه !؟ بنلم لحمنا ..! طيب ولحمهم ده كان فين من بعد وفاة بابا ب سنتين ؟ . ولما رفضت وعرفو انى اتخطبت . قالو علينا اننا مبنفهمش ف الأصول . ولما رديت عليه وقولتله طيب فهمنا انت ياعمى ايه الأصول !؟ اصل احنا مش شفناكم من بعد وفاة بابا من سنتين غير دلوقتي ولا دى مش من ضمن الاصول ؟ . قام بعصبيه وشتمنى !! شتم بنت اخوه الل كان عايز يجوزها لابنه . ومن ساعتها اهو . واحنا عايشين لوحدنا ولا افتكرونا لا فرح ولا حزن افتكرونا . وعايزانى أسأل عليهم دلوقتي . دا انا لو هنام ف الشارع . او مش هلاقى اللقمه. او هشحت عمرى ما هسال عليهم . وربنا يسهلهم . وكملت بوجع ..

. وبعدين ياماما انتى محتاجه لحاجه وانا قصرت معاكي !؟ . طلبتى وانا مجبتش ؟ طلبتى وقولتلك ممعييش ياماما ؟ ف يوم قصرت معاكي فيه علشان عايزانى ادور عليهم !!!؟

فاطمه : يابنتى انااا ....

فتون : قامت بخنقه . وحاسه إن الدنيا كلها جايه عليها . و لان دموعها مش هينفع تحبسها اكتر من كدا . دخلت اوضتها وقفلت ع نفسها . وقعدت ع السرير . وضمت ركبها . وبتكابر دموعها . لكن مبقاش ينفع يافتون . انتى مش جبل . انتى بشر . وسابت دموعها تنزل من غير قيود . وكانت بتعيط بشهقات ووجع كبير جدا . وكل الل قالته انا محتاجلك اوى يابابا . محتجالك تقوينى . انا خايفه اقع .خايفه ملاقيش الل يسندنى . سبتنى ليه؟ . انا تعبانه من بعدك . تعباااانه . وعيطت بتعب شديد . وبعد شويه . وبتحاول تهدى نفسها بنفسها ..

شافت المصحف وحست انها محتجاله وأنها اكيد هتلاقى فيه اشاره . ومن غير تردد قامت وراحت جابت المصحف . وغمضت عينيها واخدت نفس عميق وفتحت المصحف . وفتحت عينيها ع أية.

بسم الله الرحمن الرحيم

"وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ * فَسَبِّحْ بِحَمْدِ رَبِّكَ وَكُن مِّنَ السَّاجِدِينَ"

صدق الله العظيم .

فتون : اول ما قرأت الايه عيطت بهستيربا وجواها شعور مختلف . ايوه ربنا عالم بحالى .ايوه يافتون الايه اهي قدام عينيكى . ولقد نعلم إنك يضيق صدرك بما يقولون . ايوه يا فتون ربنا حاسس بيكى وجمبك . هو سندك . لما تقعى هتلاقى ربنا قواكى . ايوه يا فتون انتى معاكى ربنا أعظم من اى حد ..

واخدت نفس عميق وغمضت عينيها. وقلبت عدد من الصفحات . علشان تشوف الاشاره التانيه .

بسم الله الرحمن الرحيم

"فَصَبْرٌ جَمِيلٌ ۖ وَاللَّهُ الْمُسْتَعَانُ عَلَىٰ مَا تَصِفُونَ"

صدق الله العظيم .

فتون : قراتها وحست إن الجبل الل كان ع قلبها بدء يزول ..ودموع نازله باريحيه ويقين أن ربنا معاها..

وغمضت عينيها تانى ..وقلبت ف الصفحات . وعينها جت ع أية

بسم الله الرحمن الرحيم

فَنَادَىٰ فِي الظُّلُمَاتِ أَن لَّا إِلَٰهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ * فَاسْتَجَبْنَا لَهُ وَنَجَّيْنَاهُ مِنَ الْغَمِّ ۚ وَكَذَٰلِكَ نُنجِي الْمُؤْمِنِينَ"

صدق الله العظيم .

وابتسمت بدموع . وقالت . لا اله إلا أنت سبحانك إني كنت من الظالمين .. وكملت قراه من بعد الايه . وبعدها حست برضا غريب جواها ومحبه كبيره .. وقامت وخرجت . وقعدت جنب فاطمه وباست ع ايديها ورأسها واعتذرتلها . وقالت ل فاطمه تعالى نخرج شويه انا وانتى نشم شوية هوا ..

فاطمه : اخدت فتون ف حضنها لفتره طويله . وقالت ليها حقك عليا متزعليش منى يافتون يابنتى ..

فتون : باست ع أيديها الاتنين . حقك ع فتون انا اسفه واوعي ف يوم تقولى حقك عليا دى تانى . انتى تؤمرى وبس .. وحضنو بعض تانى ..

. وبعدها لبسو . وفتون اخدت امها وخرجو ..

ونقول بعد مرور شهرين كمان ..

خالد بعد ما عرف إن سليم رفض سها وكمان طلبت 6000 جنيه رفض طبعا لانه كدا استغلال .. وراح المدرسه تاني واتكلم مع المدير وطلب مُدرسه غيرها . المدير قاله انا ببعتلك المدرسين الل متعينين من سنين عندى ف المدرسه . وهبعتلك انهارده مُدرسه تانيه .. وخالد في المدرسه تلقائيا عينيه بتدور على مدمنة الكاتشب لكن ما شفهاش وبعد كده جاب مُدرسه تانيه. وبعد ٣ جلسات هي ماستحملتش اسلوب سليم لانه جد جدا معاها وكمان طلبت مبلغ عالي ...

وسليم بقى عصبي اكتر من الاول لأنهم ضاغطين عليه من ناحية العاطفه .. ولكن قالهم خلاص انا مش عايز اتعلم ..

.وخالد قاله خلاص احنا هنجيب ُمُدرس راجل وبالفعل جاب مُدرس راجل وطلب مبلغ اعلى من سها والمدرسه التانيه . ومفيش ف أيديهم غير انهم وافقوا عليه وقالو اكيد يبقى دى هي الاسعار المتدواله ف المجال ده .. لكن المدرس ما استحملش اسلوب سليم ومشي بعد اسبوعين واخد فلوسه . وماجاش تاني مريم نصار . وده خلا سليم بقى عصبي اكتر من الاول .. ونبه على فريده وخالد وشريف انهم ينسوا موضوع ان يتعلم بطريقه برايل تاني وهو هيرجع لوحدته واضته من تاني ومش عايز اي حد يتكلم في الموضوع ده ...وعاش طول الشهر ف وحده كامله . وإحباط وفشل ويأس .

.فريده كانت زعلانه جدا علشان خاطر ابنها ..

.وشريف حاول مع سليم انه يجيبله مُدرس تاني لكن سليم رفض رفض قاطع ..

شريف ما بين الشغل وما بين البيت يروح الشركه ويرجع يطمن علي سليم ويديله العلاج بتاعه بصعوبه

. اما خالد ما بين الشركه والجيم وبيروح ل سليم يوميا .. وكمان خالد مش عارف يتعامل مع الشركه الجديده بتاعته ...

سحر وحسن بيتكلمو ديما مع بعض شات . وبطريقة سحر واهتمامها ب حسن اخترقت حصونه واتعلق بيها . وقالها انه راجع قريب جدا واول ما يرجع هيتقدم ليها . وسحر كانت هتموت من الفرحه .

اما علاء .رجع من السفر ..و لاحظ تغيير سحر . وانها مبقتش ترد عليه زى الاول . وكل فتره كبيره ترد عليه وتتحجج باامتحانات اخر السنه . لانها ع الأبواب ولازم تذاكر كويس . وعلاء كل ما يسألها ع فتون . تقوله العادي انها بتروح المدرسه وترجع ع البيت . مفيش اكتر من كده . وعلاء صمم أنه يروح يتقدم ل فتون لانه مش قادر يصبر اكتر من كده .

اما حنين علاقتها ب فتون بتزيد محبه وصداقه قويه . وحنين اول كام يوم كانت بتفكر ف الل لحقها قبل ما تقع وطريقة كلامه معاها .وتدريجيا نسيت تماما ..

فتون : كان ضميرها مأنبها انها كلمت أمها بالطريقه دي . وخرجت هي وفاطمه علشان تصالحها . واشترت ليها شال وحطته ع كتفها وشربتها عصير قصب . وعدت ع الصيدله وقاست ليها الضغط والسكر . ورجعو ع البيت .وسهرو قدام التلفزيون . وبعدها بكام يوم كل الحاره عرفت إن حسن فسخ خطوبته من فتون والكل اتكلم وسأل والشك دخل جواهم ياترى ايه السبب ؟ والفضول أنهم يعرفو خصوصيات غيرهم هيموتهم .

وفتون استحملت ع قد ما تقدر نظراتهم وتلميحاتهم . ومن جواها عندها لوم وعتاب كبير لحسن .حتى لو مش بتحبه لكن ع الاقل كان احترم النهايه بطريقه افضل من كدا . وبعدها بحوالى اسبوعين الناس ف الحاره نسيت والموضوع خلص وفتون بتتعايش مع الايام. وكمان ابو سلامه راح لفتون وجدد عقد الإيجار وزود الايجار .وفتون محتاره ونفسها تدى دروس تحسن من دخلها ...وخلاص الامتحانات بدءت . وفتون بتراقب ف مدرسه ف مكان راقي هي وحنين .وانهردا اخر يوم في المراقبه..

----------------------بقلمى مريم نصار

فريده : دخلت ع سليم واتوجعت لحالته . صباح الخير ياحبيبى.

سليم : بيشرب سِجاره .. هز راسه صباح الخير.

فريده : انا رايحه البنك هتحتاج منى حاجه قبل ما انزل ..

سليم : بجمود لا متشكر ..

فريده : اتنهدت بزعل . ماشي يبنى ..وخرجت ودموعها نزلت لأن سليم مسالهاش هتروحي ليه ولا اهتم بيها !؟ او مين هيكون معاكى ؛؛ ونزلت صباح الخير يا شريف يبنى .

شريف : صباح الخير . وشافها بلبس الخروج حضرتك خارجه ؟

فريده : بإحباط .ايوه رايحه البنك !!

شريف : انتى محتاجه فلوس !؟

فريده : لا ياحبيبى انا معايه . لكن انا رايحه اسحب مبلغ كدا . واوزعه ع المساكين ودار الأيتام .بنية الصدقه إن ربنا يشفى سليم ويريح باله.

شريف : هز راسه . طيب تحبى اجي معاكى؟

فريده : ابتسمت . لا مش عايزه اعطلك انت ع شغلك !! انا هروح مع حامد السواق وهرجع ع طول.

شريف : ماشي زى ما تحبى . انا هطلع اشوف سليم وانزل ع الشركه ..

فريده : ماشي ياحبيبى . وخرجت وركبت العربيه . وقالت اطلع ع البنك ياحامد ...

بعد شويه ..

فتون : خارجه من المدرسه مع حنين ..

حنين : يااااه . اخيراااا . اخر يووووم واخدنا اجازه وانام برحتى .. بقولك ايه انا جعانه اوى .وبما أننا خدنا الاجازه . تعالى نجيب ساندوتشات شاورما من المطعم ده واقولك ع موضوع مهم اوى ونتمشى شويه ..

فتون : ومين سمعك انا جعانه اكتر منك . بس لازم امشي علشان اقبض المعاش . ويدوبك الحق البنك الل جمبنا ..وقولى الموضوع ف التاكسي واحنا مروحين ..

حنين : طيب وليه تروحي اخر الدنيا . تعالى ف بنك هناك اهو . تعالى اقبضى واقولك ع الحوار .. وبعدها نشترى براحتنا تكون الزحمه دى خفت شويه .

فتون : بصت ع البنك . وهزت راسها وقالت. يلا بينا . واتحركو وادخلين ع البنك .

بعد شويه

صوت من وراهم . لو سمحتو .

فتون وحنين . وقفو وبصو وراهم . وشافوو ---

يتبع...