رواية قلبي ليس بيدي 3 الفصل الرابع 4 بقلم حسناء رمضان

متيم: اسيل!!

فوقت ع صوته وقومنا بسرعه...

متيم: ياحيوان... بتعتدي ع اختي انا يازباله!!

وراح ضربه بالبوكس..

اسيل: استنى انت فاهم غلط..

عدي: يعم اهدي..

متيم: دانا هطلع روحك ف ايدي..

كان ماسكه من الهدوم وعمال يضرب فيه..

عدي: اسمعني طيب..

اسيل: يامتيم انت فاهم غلط والله..

عدي: اسمعني... هي كانت هتقع من هنا وانا شديتها ووقعت عليا وانت جيت شوفت المنظر...

متيم: صحيح الكلام دا يااسيل!!

اسيل: ايوا.. سيبه بقاا اديك عورته..

متيم: كنتي هتقعي من هنا ازاي!

اسيل: رجلي فلتت من هنا وهو لحقني وشدني وانت وصلت لقيتني كدا... وبعدين هيعتدي عليا ازاي وانا اللي فوقيه...

متيم: وانا اشعرفني.. وبعدين انتوا بتعملوا اي هنا اصلا!

اسيل: ها..

متيم: امشي قدامي..

اسيل: اوعى خليني اشوف الواد اللي اتشحور دا..

متيم: اسيل... امشي..

مشيت بضجر وهو وقف معاه...

متيم: قولي بقاا.. مالك بيها!

عدي: يعني اي مالي بيها!

متيم: يعني بتعمل اي هنا!!... متجمعين مع بعض ليه!

عدي: هي كانت هتقع وانا لحقتها... بس مش اكتر..

متيم: اسمع يلااا.. اختي خط احمر... محدش يقربلها.. لو لمحتك معاها تاني همحيك...

سابه ومشي وعدي قام يمسح وشه...

..............

نور: مش هتقولي مالك!

مراد: مالي يعني!.. مانا تمام اهو..

نور: انت كدا تمام!.. انت شايف نفسك بتكلمني ازاي!!.. ع الاقل اتعلم من اخوك... شوف اخوك الاصغر منك بيتصرف ازاي واعمل زيه...

مراد بعصبيه: بطلي تقارنيني بيه... بطلي تحطيني ف مقارنه مع غيري... انا مش زي حد... ولا عايز ابقى زي حد... انا عاجبني حالي كدا... ولو مش عاجبكوا انا ممكن امشي ومش هتعرفولي طريق بعد كدا...

نور: يعني انت عاجبك حالك كدا!

مراد: ماله حالي!!... مااااله!!.... والنبي طلعيني من دماغك عشان انا معنديش خُلق للهري دا..

نور: انت ناسي اني امك!!

مراد: امي!... بامارة اي!!... دانا مفيش حاجه واحده عملتها ف حياتي الا وقعدتي تنتقديني فيها وتقارنيني باخويا... خلتيني كرهت اخويا... خلتيني كرهتك انتي كمان... كل شويه روح شوف اخوك بيعمل اي وشوف متيم بيعمل اي... انا مال امي بكل دا.. دي شخصيتي وانا حابب كدا... بطلي بقاا القرف اللي بتعمليه دا..

راحت ضربته بالقلم...

بصلها شويه بحزن وبعدين مشي...

................................

اسيل: طبعا روحت كملت عليه..

متيم: بت انتي.. انا مش ناقص وجع دماغ... متقربيش للواد دا نهائي.. مفهوم!

اسيل: لا مش مفهوم.. وانت مالك اصلا...

متيم: متخلنيش امد ايدي عليكي..

اسيل: تمد ايدك عليا!!... بامارة اي ان شاء الله!!.. وحياة ربنا ارن ع بابا دلوقتي وشوف هيهزقك ازاي...

متيم: لا ماهو لما يعرف السبب مش هيهزقني ولا حاجه... وهيخليني ارجع بيكي كمان..

اسيل: انت بتتدخل ف حياتي ليه!!... هو انا اتدخلت ف حياتك قبل كدا!

متيم: وهو المفروض اشوف واحد داير وراكي واقعد اتفرج!

اسيل: مين قالك كدا!

متيم: انا قولتلك وخلاص... ابعدي عن الواد دا..

سابها ومشي وهي قعدت تنفخ..

......................

ـ اي اللي عمل فيك كدا...

عدي: متشغلش بالك.. المهم بتعملوا اي..

ـ هنروح نجيب حطب... يلا ياخويا تعالى معانا..

عدي: ياريتني ماجيت... ماتروحوا انتوا يعم..

ـ وانت هتقعد مع البنات يعني!... يلا ينجم خلينا نخلص..

.....................

اسيل: ها ياماما.. عامله اي..

جاكي: كويسه ياروحي.. انتوا عاملين اي..

اسيل: الحمد لله بخير... بابا فين!

جاكي: باباكي نايم.. فين متيم

اسيل: واقف مع صحابه اهو..

جاكي: طب نادي عليه عشان عايزاه..

اسيل: ماشي ثواني...

شاورتله راح جه...

متيم: اي..

اسيل: تعالى كلم ماما...

متيم: اي ياماما!

جاكي: عامل اي..

متيم: كويس.. هو في حاجه!

جاكي: سيب اسيل وارجع..

متيم: ليه!

جاكي: عشان ابوك تعبان شويه وانت هتروح مكانه الشغل..

متيم: لي اي اللي حصل!

جاكي: متقلقش... ارجع بس وانت هتعرف..

متيم: واسيبها ليه... ماترجع معايا هي كمان..

جاكي: لا مش مستاهله... خليها.. احنا عايزينك انت..

متيم: طيب... بكرا هرجع..

جاكي: ماشي ياحبيبي... خلي بالك من نفسك...

قفلت معاه وروحت اشوف جاك...

اسيل: في اي..

متيم: بتقول عايزاني ارجع عشان بابا تعبان من الشغل وانا هروح مكانه...

اسيل: يعني اي تعبان!!.. حصله اي!

متيم: معرفش.. بتقول تعالى وهتعرف... بس تقريبا ارهاق يعني..

اسيل: طب انا هرجع معاك..

متيم: لا خليكي... بس التزمي الحدود... تفضلي مع صحابك ومتتحركيش كدا ولا كدا... ومعاكي الكابتن اهو لو حصل حاجه..

اسيل: ماشي.. هترجع امتى!

متيم: بكرا..

سابها وراح وقف مع صحابه...

دخلت الخيمه بتاعتها والشباب راحو يجيبوا الحطب وهي قاعده مع نفسها جوه..

.........................................

جاكي: اهلا يامروان.. عامل اي..

مروان: كويس.. عمي موجود!

جاكي: ايوا ياحبيبي اتفضل..

دخل قعد وانا دخلت ناديت جاك..

جاك: ازيك يامروان..

مروان: بخير ياعمي..

جاك: مالك زعلان ليه..

مروان: ممكن اعرف اي سبب رفضك ليا!

جاك: وانا هرفضك ليه..

مروان: رافض جوازي من جوري..

جاك: ااه.. لا الموضوع مش شخصي يعني... انا رافض الجواز عمتا..

مروان: بس انا عايزها..

جاك: يامروان انت اصغر منها بكتير... وبعدين اصلا انا رافض مبدأ الجواز...

مروان: بس انا عايزها..

جاك بضحك: يابني افهم... انا معنديش مشكله معاك انت..

جاكي: هو مش عايز يطلع حد من بناته يامروان.. هو متعلق بيهم قوي..

مروان: طب بصوا.. نتجوز ونسكن جنبكوا هنا... ياجماعه اياك تخلوها تعيش معاكوا... انا موافق والله..

بصينا لبعض انا وجاك وضحكنا..

............................................

اسيل لفت دراعها عشان كانت اتعورت لما وقعت... طلعت بره لقتهم مولعين وقاعدين ياكلوا...

راحت تجيب اكل وعدي راح وقف جنبها...

عدي: انتي كويسه!

اسيل: بص قدامك عشان لو متيم جه هيكمل عليك..

عدي: انا مش عارف اي العنف دا...

اسيل: اخويا.. طبيعي يعني

عدي: طب بقولك اي.. ماتي...

متيم: احم.. بتعملي اي..

اسيل: بجيب اكل..

متيم: طب يلا روحي اقعدي مع صحابك..

اسيل: اوكي...

خدت الاكل وروحت قعدت مع البنات..

فريده: فينك يابنتي كدا..

اسيل: كنت جوه..

فريده: واي اللي ف ايدك دا!

اسيل: اتعورت..

مؤنس: اي ياجماعه القعده ناشفه كدا ليه..

ـ يلا حد يغني..

فريده: اسيل صوتها حلو ع فكره..

راحت ضربتها..

اسيل: اتلمي..

مؤنس: طب غني يااسيل... خلينا نسمع صوتك..

متيم: يلا يااسيل سمعينا حاجه..

اسيل: لا مش حافظه..

مؤنس: طب خلاص تعالوا نلعب ونحكم...

فريده: ايوا حلو دا..

مؤنس: بس اللعبه هنعمل فيها تعديل بسيط.. يعني هيتحكم ع اتنين مع بعض.. ولو قولنا ارقصوا يرقصوا مع بعض وهكذا..

متيم: حلو دا..

مؤنس: اشطا يلا...

بدأوا يلعبوا ومؤنس عمال يبص لاسيل...

لارا: مؤنس هيحكم ع متيم وفريده..

مؤنس: تمام... امم.. اعملوا عشره ضغط..

فريده: دا اللي هو ازاي!

مؤنس: مليش دعوه دا حكم..

فريده: مش هعرف اعمل انا... هو ولد هيعرف..

لارا: ملناش فيه.. حاولي..

قاموا الاتنين ومتيم عملهم بسرعه وقعد وهي لسه بتحاول وهما قاعدين يضحكوا عليها...

متيم: خلاص ياجماعه سماح المرادي... البت هتموت..

فريده: ايوا ياعسل انت.. والنبي انت اللي عندك دم فيهم..

لارا: يلا نكمل طيب...

متيم: اسيل ومؤنس... غنوا يلا..

اسيل بقرف: مش حافظه حاجه..

مؤنس: غني اي حاجه..

اسيل: مبعرفش اغني..

متيم: خلاص.. زغرطوا..

مؤنس: اي يعم انت..

متيم بضحك: دا حكم ياباشاا..

مؤنس: لا طبعا مش هزغرط انا..

اسيل: ولا انا بعرف..

متيم: لا مليش دعوه.. انا حكمت وخلاص..

مؤنس: استنى طب اجرب.. لوللللوي..

طبعا معرفش والكل ضحك عليه..

فريده: يلا يااسيل اخلصي..

حاولت هي كمان ومعرفتش...

متيم: دانتوا فاشلين..

لارا: يلا طيب... اوباا.. عدي.. اخيرا يااستاذ عدي.. عدي واسيل..

اسيل: هو مفيش غيري!

لارا: ملناش دعوه.. غنوا بقا انتوا الاتنين... لان مفيش حكم تاني وانتوا مش بترضوا تعملوا حاجه... يبقااا تغنوا...

عدي: معنديش مشكله..

بدأ يغني...

عدي: جانا الهوى جانا... ورمانا الهوى رمانا... ورمش الاسمراني.. شبكنا بالهوى... اه ما رمانا الهوى ونعسنا.. واللي شبكنا يخلصنا...

اسيل: اه دا حبيبي... شغل بالي... اه يابا يابا... شغل بالي..

الاتنين: ياراميني ب سحر عينيك الاتنين... ماتقولي واخدني ورايح فين.. على جرح جديد ولا لتنهيد ولا ع الفرح موديني... وانا بسأل ليه.. واحتار كدا ليه... بكرا الايام هتوريني... خلينا كدا على طول ماشيين..

عدي: عدينا ياشوق عدينا... على بر الهوى رسينا...

دانا عمري معاه... وهوايا هواه... عدينا ياشوق عدينا..

اسيل: زوق يانسيم خطوينا.. خطوينا... ويانجوم السما ضمينا.. وخدينا بعيد وحدينا... خلينا كدا على طول ماشيين...

الاتنين بيغنوا وباصين لبعض والباقيين بيسقفوا ومؤنس باصص للاتنين بغيظ...

لارا: صوتكوا حلو مع بعض... وبعدين مانتي حافظة اهو ياست اسيل..

عدي كان باصصلها ومبتسم...

اسيل: طيب اقوم انام بقااا...

سابتهم وقامت وهما كملوا لعب...

اليوم عدى والكل دخل نام... الصبح كان بيبدأ يطلع..

اسيل طلعت من الخيمه بتاعتها.. كان الجو جميل والشمس لسه بتشرق... لمحت حد قاعد بعيد لوحده..

مشت عليه بالراحة...

اسيل: اي اللي مصحيك دلوقتي!

عدي: اسيل هانم بنفسها!

اسيل: ايون..

عدي: عادي مجاليش نوم..

اسيل: امم.. ولا انا..

عدي: اخوكي لو صحي ولقاكي معايا هيعمل مني كفته..

اسيل: هو انت ليه سيبته يضربك مع انك اقوى منه وكان ممكن تدافع عن نفسك بسهوله يعني..

عدي: عرفتي منين اني اقوى منه!

اسيل: عضلاتك.. يعني باين عليك..

عدي: مقدرش اضر حد يخصك..

اسيل: امم... طب ممكن اسالك سؤال!

عدي: اسألي..

اسيل: لي ع طول بشوفك قاعد لوحدك وسرحان!

عدي: انتي مركزه معايا بقاا..

اسيل: لا ياعسل مش مركزه... اركز لي يعني..

عدي: بطلي تماطلي...

اسيل: مش بماطل.. بس ليه بجد!

عدي: عادي... كل واحد عنده اللي يخليه يقعد لوحده وسرحان..

اسيل: امم.. طب عندي سؤال تاني..

عدي: لا كدا اسألتك كترت وانا مش فاضيلك..

اسيل: والله!!... طب انا ماشيه..

عدي: لا لا اقعدي.. بهزر ياوليه..

اسيل: وليه!.. دانت ضايع..

عدي: هييح.. ومين فينا مش ضايع.. المهم كنتي هتسألي ع اي..

اسيل: هو انت اللي روحتني من الديسكو!...

عدي: هو انتي مش فاكره!

اسيل: لا.. اخر حاجه فاكراها اني كنت برقص هناك... بعد كدا معرفش اي اللي حصل...

عدي: امم.. ايوا.. انا اللي روحتك..

بصت بعيد بإحراج...

عدي: متقلقيش... انا فاهم كل حاجه..

اسيل: هو فعلا مؤنس خدني معاه الشقه!

عدي: ايوا.. بصي بصراحه انا كنت عايز احذرك من زمان... بس كنتي بتصديني...

اسيل: اي اللي وداك الديسكو!

عدي: كنت رايح وراكي.. انا اصلا مبروحش الاماكن دي..

اسيل: وانت ماشي ورايا ليه!

عدي: امم.. مخك دا ولا بطيخه..

اسيل: اشمعنى!

عدي: يبقى بطيخه...

اسيل: ههيهي.. عسل

عدي: عارف...

فجأه سمعوا صوت متيم من الخيمه..

اسيل: احيه...

عدي: امشي بسرعه..

اسيل: لا لا هيشوفني... استخبى انت هنا...

راح استخبى ورا الصخر ومتيم طلع...

متيم: بتعملي اي عندك..

اسيل: لا.. اه..

متيم: لا اه اي.. بتعملي اي هنا..

اسيل: عادي يعني.. حبيت اتفرج ع المنظر من هنا..

متيم: اممم... طب انا همشي دلوقتي عشان الحق اوصل بدري..

اسيل: ماشي..

دخل لم حاجته وطلع..

متيم: اسيل.. مش عايز مشاكل.. خليكي وسط صحابك.. لو عرفت ان حصل حاجه صدقيني اخر مره هتطلعي رحله...

اسيل: حاضر...

خد حاجته ومشي وعدي لسه هيطلع راح رجع تاني..

متيم: صحيح.. وخليكي بعيده عن الواد اللي اسمه عدي دا..

اسيل: طبعا..

متيم: يلا باي...

اسيل: باي...

............................

جوري: اهلا ياتيته.. عامله اي..

فيروز: دخليني يابت كدا.. هاتي ايدك..

جاك: اخيرا افتكرتينا ياست فيزو!

فيروز: ومين اللي يفتكر مين ياخويا...

جاكي: معلش مانتي عارفه العيال دول مغلبيني ازاي...

فيروز: منى مش بتيجي!

جاكي: لا بتيجي وبتمشي..

جاك: طب حابب اخد رأيك ف حاجه..

فيروز: خير..

جاك: مروان متقدم لجوري.. وانا مش موافق..

فيروز: مش موافق ليه..

جاك: عشان هو اصغر منها بكتير يافيزو.. دا غير اني رافض الفكره اصلا..

فيروز: ورافض ليه.. مروان كويس..

جاك: اكبر منه..

فيروز: واي المشكله.. هي شكليا مش كبيره.. يعني شكلها اصغر من سنها واللي يشوف هيقول انها قده.. وطلاما الاتنين موافقين يبقى خلاص...

جاكي: يعني انتي موافقه!

فيروز: عن نفسي معنديش مشكله.. بس ف الاول والاخر دي بنتكوا وانتوا حرين...

...........................................

عدي: هو راح فين!

اسيل: مشي..

عدي: ليه..

اسيل: عشان بابا عايزه..

عدي: طب كويس والله..

اسيل: هو اي اللي كويس!

عدي: لا مفيش.. المهم ماتيجي معايا..

اسيل: فين..

عدي: هلعب بالاسكيت شويه..

اسيل: للاسف مبعرفش..

عدي: هعلمك..

اسيل: يابا انت رايق.. ساموو عليكوا..

عدي: استني طيب.. دلوقتي هتبقى فرصه حلوه عشان الكل نايمين.. هعرف اعلمك براحتي.. وهتحبي الموضوع قوي والله..

اسيل: اممم... ماشي.. يلا..

عدي: ثواني وجاي..

دخل جاب الاسكيت وجه جري..

اسيل: ماتهدى يعم.. متسربع ع اي..

عدي: تعالي بس هوديكي مكان عظمهه..

اسيل: يلا.. كدا كدا خربانه...

مشوا مع بعض وف الوقت دا مؤنس كان طلع من الخيمه وشافهم... مشي وراهم من غير ماياخدوا بالهم..

......................

عمر: كفايه كدا يابني..

مراد: مالك بقيت خرع كدا ليه.. ماتشرب يعم... اهو الشرب دا الحاجه الوحيده اللي بتطفي ناري..

عمر: وانت نارك قايده لي بقاا..

مراد: قايده من زمان... بقيت بتمنى والله انه ميكونش عندي عيله..

عمر: اي اللي بتقوله دا.. هو حد لاقي!

مراد: دي حاجه تقرف يابا... اشرب اشرب

عمر: احنا شربنا كتير..

مراد: هات بس السرنجه دي..

عمر: يابني بلاش..

مراد: انت عنيك حمرا كدا ليه..

عمر: معرفش.. بقولك اي انا ماشي...

سند نفسه وقام عشان يمشي... مشي خطوتين ووقع ع الارض...

مراد: مالك ياض.. عمر.. عمر..

مكنش بيرد... مراد قام يشوفه ملقاش نبض..

........................................

اسيل: يابني انت جايبني فين..

عدي: انزلي بس بالراحه..

اسيل: لو طلعت خاطفني هشقك..

عدي: طب اعتبريني خاطفك وبطلي كلامك دا... انا ولد ومبقولش كدا..

اسيل: مانت مش راجل..

عدي: لا ياحلوه.. كلمه زياده وهفتح دماغك...

اسيل: ولااا.. بقولك اي.. مش عايزه جنان.. انا اصلا خلقي ضيق..

عدي: ابقي وسعيه..

اسيل: لا هو عاجبني كدا.. ولم يومك بقاا عشان مخربش عليك..

عدي: جايب واحد صاحبي معايا.. جاتك القرف..

اسيل: قرف يقرفك...

عدي: اهو انتي..

اسيل: اهو انت وبطل بدل مامشي..

عدي: لو عرفتي تمشي امشي..

اسيل: مش بقولك خاطفني..

عدي: يلا طيب..

اسيل: يلا اي..

عدي: اركبي..

اسيل: لا ياخويا هقع..

عدي: متخافيش انا همسكك..

اسيل: المفروض اني اثق فيك يعني!

عدي: ايون.. يلا..

طلعت ع الاسكيت وهو ماسك ايدها..

اسيل: لا ياخويا هقع والله..

عدي: محتاج توازن بس..

قعد يعلمها شويه ومؤنس واقف بعيد يتفرج ويصور..

عدي: يلا اعمليها لوحدك بقاا..

اسيل: لا امسكني..

عدي: مينفعش.. يلا عشان تتعلمي..

اسيل: ولما اقع ورقبتي تتكسر!

عدي: هتريحينا والله...

اسيل: نعم!

عدي: قصدي بعد الشر عليكي ياقمر.. يلا خلصيني..

حاولت تمشي بيها بس وقعت..

اسيل: هععع... منك لله..

عدي بضحك: وانا مالي.. قومي يلا..

اسيل: بص يابا... تبا لك وللبتاع دا..

عدي: طب يلا اخر مره.. اطلعي عليه من هناك وتعالي هنا وانا هقف قدامك وهمسكك قبل ماتقعي..

اسيل: يفتح الله..

عدي: ياست يلا ياست... اي الجبن دا.. فكرتك شجاعه..

اسيل: شجاعه غصب عنك..

عدي: واضح...

اسيل: طب هعملها وهتشوف...

راحت بعيد وركبت عليه وجت ناحية عدي..

عدي: اقفي بقاا.. هتدخلي فيا... يخربييييتك..

وقعت عليه وف اللحظه دي مؤنس صورهم...

عدي: اوعي ياست كدا.. جموسه واقعه ف ترعه!

اسيل: مين اللي جموسه يلاااا!!

عدي: انتي.. هيكون مين يعني..

اسيل: وحياة امك لافتح دماغك بالبتاع دا..

طلعت تجري وراه وبيهزروا ويضحكوا ومؤنس صور وبعت الصور لمتيم...

مؤنس بخبث: بالشفا...