رواية قلبي ليس بيدي 3 الفصل السايع عشر 17 بقلم حسناء رمضان

جاكي: متخافيش ياحبيبتي.. يلا..

اسيل: عدي قال هييجي..

جاك: يمكن مفضيش.. يلا ياحبيبتي..

لسه هتدخل لقت عدي جاي بسرعه..

عدي: اسف بس كان في زحمه كتير..

جاك: يلا يااسيل...

..........................

وعد: واهلك قالوا اي..

متيم: اهلي موافقين طبعا..

وعد: يامتيم حتى لو رفضوا هيبقى معاهم حق...

متيم: مش عارف شاغله بالك ليه..

وعد: متيم... جميلك ع راسي... وهفضل شايلاه طول عمري... بس كمان مش هسمح لحد يضايقني بكلمه..

متيم: ومين هيضايقك!

وعد: معرفش... بس وارد حد يقولي اي حاجه..

متيم: وعد... انا معاكي.. واظن دا لوحده كفايه... دا غير اننا مش هنتجوز عند اهلي يعني... اكيد هيبقى ليكي بيت لوحدك... ووقتها محدش هيقدر يهينك ف بيتك يعني...

وعد: طب قولي بصراحه... اهلك معترضوش ف الاول!!

متيم: احم.. بصي.. هما معترضوش.. هما بيسألوا انتي مين وجايه منين وكدا... وبعدين فعلا الحوار غريب شويه يعني.. وانا حكيتلهم و فهموا الوضع ووافقوا ع طول... وبعدين اهلي مفيش احسن منهم... وهتحبيهم قوي..

وعد بتردد: ماشي..

بصت لقته بيطلع سجاير من جيبه..

وعد: اي دا..

متيم: اي..

وعد: من امتى وانت بتشرب سجاير؟!!!

متيم: ااه.. من فتره كدا..

وعد: واهلك عارفين!!

متيم: هو انتي شايفاني صغير!!

وعد: ملوش علاقه بصغير وكبير طلاما الفعل غلط...

متيم: امم.. خايفه عليا!!

وعد: مبهزرش.. ارمي القرف دا..

متيم: لا..

وعد: هو اي اللي لا... ماترمي القرف دا..

متيم: قولت لا ومتعليش صوتك.. وبعدين انا مش فاهم اي اللي مضايقك يعني..

وعد: اول مره اشوفك بتشرب...

متيم: وعد... انا مبحبش اشرب ف البيت عشان ماما بتضايق... غير كدا انا بشرب عادي..

وعد: بس انا عايزاك تبطلها..

متيم: ليه... هي رخامه وخلاص!

وعد: خلاص.. اشرب انا كمان...

متيم بضحك: لو خدتي نفس واحد هتروحي فيها..

وعد: طب وريني..

متيم: اتلمي انا بهزر.. هنتهبل ولا اي...

وعد: هشرب زيك..

متيم: اعقلي ياماما.. اعقلي..

وعد: اخلص..

متيم: ماتتلمي يابت.. سجاير اي اللي تشربيها..

وعد: مانت بتشرب اهو.. فرقت اي يعني..

متيم: ادي ام السيجاره اهي... ارتاحي بقااا..

وعد: هات العلبه..

متيم: بقولك اي.. ماتخفي كدا عشان زودتيها..

وعد: هقول لعمو جاك..

متيم: عمو جاك!!... طب لو عملتيها ياوعد نهايتك هتبقى ع ايدي..

وعد: اوووبااا... يبقى انت مش معرف حد انك بتشرب وبتشرب من وراهم... وحياة امك لافضحك..

قامت عشان تجيب الفون راح شدها..

متيم: خدي هنا.. بقولك اي.. انتي لوحدك هنا... يعني محدش هينجدك مني... فاتلمي احسنلك..

وعد: ماشي... بس والله اول ماهشوف عمو جاك لاقوله.. وهخليه ينفخك كدا..

متيم: متاكده!!

وعد: والله لو قربتلي هصوت والم الخلق كلها عليك..

................

شهد: شايفه حرقة الدم!!

رودي: شايفه ياختي... شايفه..

شهد: ولا شوفتي الواد عامل ازاي!!

رودي: مش عارفه واخدها ع اي.. دا قمرررر...

شهد: اكيد عملوله عمل... اصل اي اللي هيجبر واحد حلو زي دا يتجوز دي..

رودي: انتي شوفتي شكلها من غير شعر عامله ازاي!!

شهد: دي تقرف يابنتي.. ولا شوفي هو عمال يطبلها ازاي.. ولا امها كانت بتلقح ازاي..

رودي: هي عيله مقرفه اصلا.. مفيش فيهم حد حلو غير جاك.. معرفش خدها ع اي من الاول اصلا..

شهد: دا كان هيموت عليا..

رودي: احلفي...

شهد: ايوا ياختي.. وانا اللي مكنتش معبراه.. وفضل يدور ورايا ف كل مكان وانا ولا اتهزيت...

رودي: ليه يعني!!.. دا هو اللي حلو..

شهد: وانا وحشه ولا اي ياختي..

رودي: طب ومكنتيش موافقه ليه!.. ماهو شاب حلو وغني.. ليه ترفضي!

شهد: كنت هوافق ف الاخر... بس جت اللي ماتتسمى اللي اسمها جاكي دي... معرفش طلعتلي منين... وطبعا هو رأف بيها عشان ظروفها وكدا..

رودي: ظروف اي..

شهد: تعالي احكيلك.. دي اصلا واحده من الشارع...

..........................

اسيل خلصت وروحوا..

جاك: عدي... متتأخرش بكرا..

عدي: حاضر... سلام..

جاكي: سلام..

سابنا ومشي عشان يجهز نفسه..

جوري: يعني اسيل هتقدر تسافر بكرا!!

جاك: ايوا.. جهزي نفسك انتي بس..

جاكي: وبالنسبه لشهد!

جاك: مالها..

جاكي: لو جت معانا هبوظ الدنيا ع دماغكوا.. انا بقولك اهو..

جاك: اعمل اي طيب.. مانتي شايفه البرود اللي هي فيه..

جاكي: وانت يعني لازم تقول قدامها!

جاك: معلش استحمليها... وبعدين لما نروح كل واحد هيبقى ف حاله.. وبعدين انا هاخدك ونهرب بعيد عنهم عشان انا جضيت منك انتي وهما..

جاكي: ونسيبهم لوحدهم!!

جاك: بت.. بقولك اي.. مش عايز هبل.. كل واحد هيبقى مشغول اصلا... اسيل مع عدي ومتيم مع وعد وجوري مع مروان.. فكك بقاا..

جاكي: امم.. هنهرب هنهرب يعني!!

جاك: ايون.. انا لو عليا مرجعش اصلا... بس اعمل اي ف وعدي..

جاكي: معلش.. ماهما ولادك بردو..

..................

وعد: لا طبعا مش هروح..

متيم: مش باخد رأيك..

وعد: هو انت ليه بتعاملني ع انك واصي عليا!!... بتقرر بدالي ليه!!

متيم: مانتي هتبقي مراتي..

وعد: ولسه مبقتش زفتتك... يبقى تخليك ف حالك احسن.. ولااا.. انا خلقي ضيق ولساني قد كداهووون... بلاش تخليني اطلعهم عليك.. مش هروح يعني مش هروح..

متيم: خلصتي!.. قومي اعمليلي قهوه بقااا..

وعد: هعععع... بااااارد.. ياخي تبا لك..

متيم: قومي واخلصي..

وعد: طب مش هقوم يامتيم... عشان انا مش خدامتك... وماعنك طفحت قهوه... واقولك حاجه!!... قوم امشي يلاا..

متيم: امم.. طيب.. انا نازل.. كنت بفكر اخرجكك النهارده وافسحك وكدا بس ملكيش نصيب...

وعد: ياااحبيب قلبي عايز القهوه ساده ولا زياده!..

..................

ـ سفر اي يابني..

عدي: متقلقيش ياماما.. دي رحله صغيره كدا كام يوم يعني..

ـ هتسافر مع مين..

عدي: بقولك اي.. اي رأيك ف البنت اللي جتلي هنا قبل كدا..

ـ لما طردتها!!

عدي: ايوا..

ـ حلوه... وباين عليها كويسه... بس ليه..

عدي: هتجوزها...

ـ يالهوي.. انت بتهزر!

عدي: ليه..

ـ لا يابني دي باين عليها من الناس الاغنيه دول.. واحنا مش قدهم..

عدي: لا انتي فاهمه غلط... دول طيبين خالص والله.. ومش طالبين حاجات كتير يعني..

ـ وانت عرفت منين..

عدي: قعدت مع ابوها وفتحت الموضوع... بس في حاجه..

ـ اي هي..

عدي: هي تعبانه شويه..

ـ عندها اي يعني..

عدي: عندها كانسر..

ـ يعني اي..

عدي: ااه.. يعني سرطان..

ـ لا حول ولاقوة الابالله... انت مجنون ياعدي!

عدي: ليه بس ياامي..

ـ هتتجوز واحده مريضه ليه!!... من قلة البنات يعني!!

عدي: بحبها.. وبعدين دي حاجه من بإيدها..

ـ يابني عارفه وربنا يشفيها... بس بردو.. انت مش حمل المسؤوليه دي.. واللي اعرفه ان الناس اللي عندهم المرض دا مش بيعيشوا كتير..

عدي: بعد الشر... اي اللي بتقوليه دا ياماما... انا بحبها وعايزها هي.. وبعدين انا بحبها من قبل مايجيلها المرض دا.. مش رجوله مني اني اسيبها اول ماتتعب يعني..

ـ ايوا يابني بس... ابوك مش هيوافق... وبعدين دي عايزه مصاريف كتير للعلاج... والبتاع دا بياخد وقت وفلوس كتير... واحنا ع قد حالنا يابني.. اهلها يعرفوا يصرفوا عليها... اما انت هتجيبها تتعبها معاك..

عدي: ياامي متسديش الدنيا ف وشي والنبي..

ـ يابني انا بوريك الوضع هيبقى ازاي.. هي دلوقتي اهلها يقدروا يصرفوا عليها ويعالجوها ويريحوها... اما انت مش هتقدر تعمل كل دا... انت لسه طالب ومش بتشتغل... قولي هتصرف عليها منين!

عدي: مش عارف.. بس مانا بشتغل بردو.. وهحاول اشوف شغل تاني..

ـ هتعرف تجيب مصاريف العلاج!... وخلي بالك... لو اتجوزتها هتبقى ملزومه منك انت... يعني مينفعش ابوها يدفع جنيه واحد.. امال انت لازمتك اي.. انت اللي هتتكفل بكل حاجه... واحنا محيلتناش حاجه يابني.. بلاش تتعب ولاد الناس معاك.. مش هتعرف تقدملها حاجه.. بتحبها!!... الحب مش هيشفيها...

عدي: يعني انتي شايفه اي..

ـ انا شايفه انك تسيبها عند اهلها احسن ليكوا انتوا الاتنين... هي هتتعب وانت هتتعب... انا معنديش مشكله معاها.. ولو معانا فلوس تكفي مكنتش رفضت... بس انت عارف اللي فيها... ويادوب ابوك بيصرف ع علاجي..

عدي بتنهيد: حاضر..

................

جه تاني يوم الفجر... الكل جاهز واتجمعوا ف مكان واحد ومشوا...

عدى الوقت ووصلوا... عدي كان واضح عليه انه متضايق.. وصلوا الفندق وخدوا الشنط ودخلوا..

اسيل: مالك ياعدي..

عدي: مليش..

كل واحد طلع اوضته...

متيم: اوضتك اللي قدامي دي.. يعني هبقى شايفك ع طول وهنفخك..

وعد: ولااا.. متاكلش دماغي..

متيم: لمي لسانك عشان منفرجش الناس علينا...

وعد: نينينيي.. يلا اتكل بقاا عشان عايزه انام..

.............

جاك: هيييح... اخيرا..

جاكي: يلا ننام عشان انا اتكسرت طول الطريق...

الكل نام من التعب بتاع الطريق... عدي ف اوضته وعمال يفكر ف كلام مامته... اسيل حاولت ترن عليه بس مردش...

نزل قعد قدام البحر...

اسيل: مالك..

بص وراه لقاها اسيل.. رجع بص قدامه تاني.. وهي قعدت جنبه..

عدي: مالي!

اسيل: شكلك متضايق..

عدي: مفيش..

اسيل: طب انا زعلتك ف حاجه!

عدي: لا.. انا مخنوق شويه..

اسيل: امم.. طب تعالى نتمشى شويه...

قام معاها وقعدوا يتمشوا وهما ساكتين..

اسيل: هتفضل ساكت كدا!

عدي: اسيل.. عايز اقولك حاجه..

اسيل: قول..

عدي: احم.. انا اسف.. بس..

اسيل: اسف ع اي..

عدي: لازم ن...

ـ اسييييل..

لسه مكملش ولقى جوري بتنده..

اسيل: ثواني وهرجعلك..

راحت لجوري وهو فضل مكانه..

.....................

شهد: بقولك اي يابت..

رودي: اي..

شهد: حاولي ع قد ماتقدري تفرقي بينهم..

رودي: ازاي..

شهد: يعني الواد عدي دا ممكن تلعبي بيه شويه..

رودي: ايوا بس هو بيحبها..

شهد: ملكيش دعوه.. اتشطري انتي بس كدا واتصرفي..

رودي: اشطا..

...................

عدى الوقت والكل صحي ونزلوا ياكلوا... اتجمعوا كلهم ف المطعم...

جاك: بقولكوا اي.. هروح انا وجي مشوار كدا..

جوري: رايحين فين..

جاك: مشوار وخلاص.. وهنطول حبتين.. مش عايز مشاكل.. خليكوا مع بعض.. ولو حصل حاجه مترنوش عليا عشان انا زهقت منكوا والله..

اسيل: ايون ايون قول كدا بقااا... مش كبرت ع الشقاوه دي ياجاك بيه..

جاك: اتلمي يابت.. وبعدين مين دا اللي كبر، انتي عندك كام سنه..

فيروز: روح شوف مصلحتك انت ومتقلقش.. انا موجوده..

جاك: مش هوصيكي يافيزو.. لو عرفتي ترميهم كلهم ف البحر اشطا متتردديش خالص..

فيروز: اعتبره حصل...

جاك: يلا ياجي..

خدها ومشي والكل قام ينزل البحر...

جوري: هطلع البس مايوه وانزل..

متيم: دا ف المشمش ان شاء الله..

جوري: وانت مالك..

فيروز: معاه حق.. مينفعش ياجوري..

جوري: هلبس مايوه شرعي.. اكيد من هلبس بكيني ياجماعه.. وانت خليك ف حالك..

متيم: جاتك ف بطنك..

جوري: اهو انت..

وعد: وانا هطلع معاها.. يلا باي..

عدي: وانتي يااسيل.. مش هتشاركيهم العرض دا..

اسيل: لا.. مش عايزه..

متيم: يلا ياشباب ننزل..

الشباب قلعوا واسيل واقفه تتفرج ع عدي..

اسيل: انت بتعمل اي..

عدي: هنزل المايه..

اسيل: تنزل عليك عفاريت الدنيا كلها.. البس هدومك ياض انت..

عدي: غيره بقاا وكدا..

اسيل: نينيني.. البس يلاااا..

عدي: هنزل المايه بهدومي!!.. هل انتي عبيطه!!

اسيل: وبالنسبه للبنات اللي بتتفرج عليك دي...

عدي: مايتفرجوا... بس سيبيني بقاا عشان انا عايز انزل.. اتفرجي انتي بس..

اسيل: حسابك معايا بعدين...

جوري ووعد والباقيين نزلوا والكل لابس حاجات محتشمه نوعا ما... الشباب طلعوا من المايه ورودي نزلت والكل تنحلها...

................................

جاك: بقولك اي.. هنصيييع..

جاكي: انت صايع من غير حاجه ياچوو..

جاك: اي رأيك منرجعلهمش.. ونفضل هناك كدا ع طول..

جاكي: لا ياخويا اخاف ع العيال.. أفرض الحربايه اللي معانا دي عملتلهم حاجه.. وهما ع نياتهم ومش قدها..

جاك: ع رأيك والله... بس بردو هنهرب.. بدل ماروح اجيب واحده تاني اهرب معاها...

جاكي: والله لو هتلاقي واحده زيي.. هاتها..

جاك: مش لاقي والله..

جاكي: يعني انت بتدور!!

جاك: لا طبعا.. بس مفيش حاجه جت قدامي زيك كدا...

جاكي: ايون.. انا غير...

.....................

متيم: اي اللي لابساه دا.. انتي مجنونه!!

رودي: وانت مالك..

متيم: احترمي نفسك بدل ماامد ايدي عليكي..

شهد نزلت..

شهد: متيم.. الزم حدودم.. ملكش دعوه بيها..

متيم: يعني انتي موافقه انها تنزل بالمنظر دا..

شهد: ايوا.. وبعدين هي مش محجبه يعني.. فيها اي..

فيروز: متيم.. ملناش دعوه.. هي حره هي وبنتها..

شهد: اهي قالتلك اهي.. خليك ف حالك بقاا.. انت مش واصي عليها...

متيم: اولعوا.. دانتوا ناس ولاد..

فيروز: متيم.. خلاص..

سابهم ومشي.. وهي راحت لعدي..

رودي: مش هتنزل البحر ياعدي!

عدي: لا..

رودي: لا اي.. تعالى معايا بس..

اسيل: مش قالك لا!!.. غوري بقاا..

سابتهم ومشت بعد مابصتلها بقرف...

اسيل كانت بصاله ومبتسمه..

عدي: بتضحكي ع اي..

اسيل: عشان بصيت ف الارض ومبصتش عليها..

عدي: ابص عليها ازاي دي مش لابسه حاجه..

اسيل: ع اساس ان مش نفسك تبص يعني!

عدي: لا طبعا.. حرام..

اسيل: جدع.. استنى بقاا اغير وانزل معاك..

عدي: هتلبسي كدا!!

اسيل: لا طبعا..

طلعت غيرت ونزلت..

عدي: سباق!!

اسيل: سباق..

عدي: واللي يفوز!

اسيل: يطلب اللي عايزه من التاني.. والتاني لازم ينفذ..

عدي: اشطا.. يلا..

نزلوا مع بعض وبدأوا يتسابقوا..

عدي: ريحي نفسك انا اللي هكسب..

اسيل: بعينك..

اسيل مكانتش بتعوم زي الاول وحركتها بقت ابطئ.. عدي خد باله وحاول يبطئ نفسه... وصلت قبله وقعدت تتنطط..

اسيل: هاهووووو... الجامد جامد يلاااا..

عدي: ع فكره انا اللي خسرت نفسي... عشان المفروض انتي بنت وكدا.. غير كدا انا جامد وكنت هكسب اكيد يعني مش محتاجه كلام..

اسيل: مالك يابطه.. انت خسرت ياعدي.. اعترف بالهزيمه دلوقتي حالا..

عدي: ابداً..

اسيل: عدييي..

عدي: اووف.. ماشي.. خسرت.. اطلبي..

اسيل: اممم.. مثلا مثلا.. شايف الست اللي هناك دي!

عدي: انهي واحده!

اسيل: الاجنبيه الكبيره دي.. اللي واقفه مع جوزها..

عدي: ايوا شوفتها.. مالها بقاا..

اسيل: روح قولها انا حبيتك من اول نظره وعايز اتجوزك..

عدي: دا عند امه ياادهم..

اسيل: مليش دعوه انت قولت هنفذ..

عدي: مش شايفه جوزها عامل ازاي!!

اسيل: مليش فيه..

عدي: هتضرب..

اسيل: متخافش.. يلا اجمد كدا وخليك راجل وروح..

عدي: معايا يارب..

بدأ يقرب من الست وهي وقفت قريب منه وفتحت الكاميرا..

كان ماشي عليهم بالراحه و الراجل بص عليه راح عدي لف وشه ورجع.. اسيل وقفت تضحك..

اسيل: ياجبان..

عدي: احيه.. شوفتيه بصلي ازاي..

اسيل: مش مكسوف وانت جبان كدا!!.. روح يلاا..

عدي: انتي ناويه ع موتي ع فكره..

اسيل: متقلقش.. يلا بس..

مشي وهو متردد...

عدي: لو سمحتي..

ـ.....

عدي: بصراحه كدا... I love you..و I want to marry you...

جوزها بصله بغل كدا وقرب منه..

ـ?! What did you say

اهدى ياباشاا انا مش قصدي حاجه.. انا هتجوزها ليله واحده وهرجعالك سليمه..

ـ?! are you crazy

عدي: ايوا.. ماهو انا هقول لحضرتك ع حاجه..

لسه مكملش ولقى البوكس لبس ف وشه..

عدى: عينيييي... اي يابن المجانين انت.. انت محدش قادرك ولا اي..

لقاه بيقرب منه تاني..

عدي: لا خلاص خلاص.. بس ع فكره.. مش حلوه..

وسابه وطلع يجري..

عدي: اضحكي ياختي..

اسيل: مسخره.. بتخليه يضربك ليه..

عدي: بقوله عايز اتجوز مراتك.. عايزاه يعمل اي.. لو انا كنت دفنته اصلا..

اسيل: عورك جامد.. تستاهل..

عدي: مانتي السبب.. جاتك ف وراكك..

سابها ومشي وهي مشت وراه..

اسيل: تعالى احطلك عليها تلج يابو الرجال انت..

عدي: انتي بتتريقي!!

اسيل: لا طبعا..

عدي: ع فكره انا كنت اقدر اغلبه.. بس عشان انا اللي غلطان من الاول..

اسيل: ايون عارفه..

راحوا قعدوا قدام البحر وهي راحت جابت تلج وحطته ع وشه..

عدي: بالراحه ياختي..

قعدت تمشي التلج ع وشه وهي كاتمه الضحك..

عدي: مش ناويه تتلمي يعني!!

اسيل: خلاص والله..

سكتوا الاتنين وهو قعد يتفرج عليها وهي بتمشي التلج ع وشه...

اسيل: احم.. عاجباك!..

عدي: هممم!!

اسيل: متنحلي ليه.. ماتبص قدامك..

عدي: اسيب القمر وابص ع مين..

اسيل: ريلي!!

عدي: امم..

اسيل: ع اساس انك مش هتخوني يعني.. مانت زيك زي باقي الرجاله.. خاين..

عدي: يا حول الله يارب... انا عملت حاجه يابنتي!!..

اسيل: هتعمل..

عدي: طب والنبي هو في ف حلاوتك!

اسيل: يانووحي.. بطل محن يلااا...

عدي: هادمة اللذات.. دانا صاحبي فيه انوثه عنك..

اسيل: اتجوزه ياروحي..

عدي: ومين يتجوز القمر دا..

اسيل: امم.. يعني مش هتبص لواحده كدا ولا كدا..

عدي: استحاله... مفيش زيك ياقمر انت..

اسيل: صحيح كنت هتقولي اي..

عدي: ف اي..

اسيل: كنت بتقول اسف وكدا..

عدي: ااه.. في حاجه لازم اقولك عليها..

اسيل: ماتقول..

عدي: بصراحه هو يعني ا...

مكملش وسمع صوت صويت جاي من البحر...

الاتنين قاموا بسرعه وبصوا لقوها رودي وكانت بتغرق او بتموت ايهما اقرب يعني..

عدي طلع يجري عليها ونزل جابها... الكل كان واقف يتفرج.. طلع وهو شايلها... نزلها ع الارض وقعد يدوس ع قلبها لحد مافاقت..

اول مافاقت عملت نفسها خايفه وحضنته..

عدي: خلاص مفيش حاجه..

رودي: في حاجه كانت بتشدني ف المايه..

عدي: خلاص متخافيش..

فيروز: قومي غيري هدومك يلا..

خدوها وطلعت وهو قام ولقى اسيل واقفه مربعه ايديها وبتتفرج عليه..

عدي: ااه.. هنبتدي بقاا..

سابته ومشت وهو جري وراها..

عدي: استني طيب..

اسيل: متتكلمش معايا ياعدي..

عدي: طب انا عملت اي..

اسيل: معملتش..

عدي: اسيبها تغرق يعني!!.. مش فاهم انتي زعلانه من اي..

اسيل: مش زعلانه وفكك مني..

عدي: امم.. طب اعملك اي دلوقتي..

اسيل: متعملش... روح اتطمن عليها احسن يكون جرالها حاجه..

عدي: ع فكره هي متفرقش معايا..

اسيل: ولا تفرق.. مش مهم.

عدي: ايوا الحلو الغيران دا.. شكلك حلو وانتي مولعه كدا...

راحت مسكت شعره...

اسيل: اسمع يلااا.. مش عايزه قلة ادب.. وانا مش غيرانه.. غور شوف هتعمل اي وملكش دعوه دعوه بيا..

عدي: سيبي شعري يابنت المجانين انتي..

اسيل: انا همشي ومتجيش ورايا..

عدي: طب استني بس.. اسمعيني.. المفروض كنت اعمل اي..

اسيل: اشمعنى انت اللي تنزل!!

عدي: ماهو انا اللي كنت قريب منها وسمعتها الاول.. طبيعي يعني اني انزل..

اسيل: وكمان حطيت ايدك عليها.. وشيلتها... احيييه ياعدي..

عدي: طب اهدي بس.. انتي عارفه اني مقصدش حاجه... وبعدين مش دي اللي هبصلها يعني..

اسيل: معرفش... متكلمنيش بردو..

عدي: الصبر يارب.. طب خلاص متزعليش..

اسيل: لا بردو...

عدي: طب انا كنت رايح اشتري ايس كريم... هتيجي!

اسيل: لا...

عدي: انتي الخسرانه..

سابها ومشي وهي وقفت متردده شويه وبعدين جرت وراه..

مشت جنبه وهي ساكته..

عدي: يعني جيتي.

اسيل: امشي وانت ساكت..

عدي: شكلك حلو وانتي بالبوز دا.. بس شكل ضحكتك اجمل يعني..

اسيل: ههه.. مش هنسى بردو اللي عملته... ياخاين..

عدي: لا دي مش خيانه لو سمحتي.. الخيانه حاجه تاني هتحصل بعدين يعنى..

اسيل: نعم ياروح امك!!!!

عدي: نعم!!

اسيل: بقولك اي.. انا لساني طول كدا.. والمصحف ابهدلك هنا والم الناس واقول انك داير ورايا وبتعاكسني وتتحرش بيا واوديك ف داهيه...

بصلها بصدمه كدا وسابها ومشي.. وصلوا عند الراجل..

عدي: عايز واحد لو سمحت..

اسيل: هناكل احنا الاتنين واحد يعنى ولا اي!!

عدي: هاتي لنفسك..

اسيل: اجيب لنفسي!!.. هاتلي معاك وبطل رخامه..

عدي: مش انا بتحرش بيكي!!

راح الراجل بصله..

عدي: ركز ف شغلك ياعم انت... وانتي.. روحي بقاا هاتي لنفسك..

اسيل: ياعدي ماهو انا مجبتش فلوس معايا..

عدي: احسن.. خليكي كدا بقاا..

اسيل: والنبي والنبي..

عدي: لا.

اسيل: يانتن يابخيييل... وحياة امك ماهتجوزك..

عدي: ولا انا عايز اتجوزك اصلا... طب ف ذمتك ياعمي.. دا منظر واحده اتجوزها!!

ـ ايوا.. ماهي قمر اهي..

اسيل: شوفت!!.. طب ف ذمتك ياعمو.. دا منظر واحد اتجوزه!!

ـ بصراحه!!... لا..

اسيل: هيهيهي.. والنبي انت سكر ياعمو.. ماتتجوزني انت..

ـ هو انا اطول.. بس الوليه هتسوحنا يعني..

اسيل: لا متقلقش... مش هنعرفها... نروح نتجوز بعيد عن الكل ومش لازم فرح يعني..

ـ اذا كان كدا انا موافق..

عدي: حيلك حيلك انت وهي.. انتوا بتقولوا اي... طب والله ماهجيبلك يااسيل... واهي قلبت جد بقاا..

ـ انا هديكي احسن ايس كريم ع حسابي ياقمر انت.. وسيبك منه.. النوع دا مش بتاع جواز... من رأيي تسيبيه... اتفضلي احسن من بتاعته اهي..

اسيل: شكرا والله.. والله انت عسل عسل عسل.. اموووواه.. يلا باي.. هجيلك تاني..

ـ ماشي..

مشت وعدي متنحلها..

اسيل: خير!

عدي: انتي بوستيه!!!... دا بجد!!

اسيل: دا راجل قد ابويا.. دا غير انها بوسه بريئه ف الهوا يعني..

عدي: دانا هخليهم يترحموا عليكي يابنت ال..

اسيل: اععع... طب اسمع طاااه... وبعدين مانت مرضتش تديني وهو عطاني ببلاش..

عدي: عشان شايف واحده متسوله قدامه..

اسيل: ماتتلم يلاااا... وانت شبه الخرتيت كدا..

عدي: بقولك اي.. انتي طالق... يلا متكلمنيش تاني بقااا..

اسيل: احييييه... انت بتطلقني ياعدي!!!...

عدي: ايوا عادي..

اسيل: طب شوف مين هيتجوزك بقاا.. سابته ورجعت وهو رجع وراها..

متيم: كنتي فين..

اسيل: كنت بشتري ايس كريم..

متيم: ااه.. طب متلفيش كتير ياختي... روحي اقعدي معاهم..

راحوا قعدوا فضلوا يهزروا ويضحكوا وشويه وعدي راح بعيد... فضل قاعد لوحده كتير.. اسيل راحت وراه..

اسيل: بتخوني مع مين!

بصلها وبعدين بص قدامه ومتكلمش بس باين عليه الزعل..

اسيل: اي دا.. دانت زعلان بجد.. في اي..

عدي: مفيش..

اسيل: مالك ياعدي.. من الصبح وانت متضايق كدا..

عدي: اسيل.. انتي عارفه انا بحبك قد اي.. صح!

اسيل: ايوا..

عدي: صدقيني عمري ماحبيت حد قدك.. ولا هحب غيرك ف حياتي.. بس..

اسيل: بس اي..

عدي: بس.. انا مضطر.. حقك عليا.. بس..

اسيل: قلقتني ياعدي.. في اي...

اتكلم وعينيه مدمعه..

عدي: لازم نسيب بعض...