رواية قلبي ليس بيدي الفصل الرابع والستون 64 بقلم حسناء مصطفي

سمعت صوت حد بيغني... طلعت البلكونة..

لقيت جاك واقف وبيقلد محمد سعد....

جاك: حاسس بروحي خارجة من جسمي...

خارجة بتقطع كل حتة في جسمي

الحياة بالنسبالي بقت حياة محطمة ومسودة...

زغلولة القلب بل وقندورة

قطعني ياعم ...... بل فرتكني

بدأ يغني...

جاك: ياللي نسيت الغراااام... ارجع هنا وقولي..

مين زقك ع الخصام!!.. مين زقك ع الخصام!..

دانت اللي فاضلي....

اول ماعرفت انك، عايزني جيت قوام...

مقدرش استغى عنك، يامعلمني الغرام...

وهقولك بردو عيني... ياواحشني الف عيني..

وهقولك بردو عيني.. ياللي ف بُعدك كاويني..

اؤمرني هتلاقيني، سجاده بين ايديك...

كلو كلو كوم...

وزعلك انت كوم..

انا عندي الدنيا تزعل ولا تزعل مني يوم.. يلا..

وانا لسه ياجاكي بحلم وبعد النجوم..

ياللي ف بُعدك بآسي ولا ارتحش يوم..

وهقولك بردو عيني..

ياللي ف بُعدك كاويني...

اول ماعرفت انك.. عايزني جيت قواام..

مقدرش استغنى عنك يامعلمني الغرام...

جاك: بحبك ياجاكي.. اقتلي امك وانزلي...

كنت واقفه اضحك عليه... كان بيغني ويتمايل كإنه سكران ومشغل المزيكا كمان... كان بيقلد محمد سعد... وقمر قووووي...

جاك: هاا..

الناس كانت طلعت والكل واقف ف البلاكونات..

وقاعدين يتفرجوا ويضحكوا... وفي منهم بيصور...

جاكي: اي الجنان دا!

جاك: والله ياجاكي هانم.. انا ممكن اعمل اي حاجه عشانك والله.. انزلي بقاا..

جاكي بتنهيد: لا

جاك: والله اعيط هنا..

جاكي: عايز اي!

جاك: انزلي..

جاكي: بس انا مسامحتكش..

جاك: ماشي.. بس انزلي..

بصيت لقيت ماما واقفه ورايا ومبتسمه..

جاكي: نعم!

ماما: انزليله..

دخلت لبست اي حاجه قدامي ونزلت جري... معرفش ليه.. بس هو كدا..

جاكي: احم.. اديني نزلت..

جاك: هنتمشى شويه بس..

اتمشيت معاه ع البحر واحنا ساكتين...

بَعد شويه...

جاك بزعل: هو انتي هتفضلي زعلانه مني كدا!

جاكي: جاك.. انت مفكر بشوية الحركات اللي بتعملها دي، هنسى اللي قولته!!... لو فاكر كدا تبقى غلطان.. انت شكلك ناسي انت قولتلي اي... انت طعنتني ف شرفي ياجاك... مش معنى اني نزلت معاك، اني خلاص سامحتك... ادم ممكن يسامحك.. عشان انت مقولتش لادم اللي قولته ليا... اما انا اسامحك ازاي!

جاك: اسف..

دموعي اتجمعت..

جاكي؛ مش قادره اتخطى الكلام اللي قولته..

جاك: والله العظيم اسف.. وكل كلمه قولتها مش صح.. وانا متأكد انها مش صح.. سامحيني بقاا.. ارجوكي..

جاكي: جاك انت عارف انت قولتلي اي!... انت شايفني واحده من الشارع وانك نزلت لمستوايا...

جاك: اعمل اي يخليكي تنسي الكلام دا!

جاكي: مفيش حاجه ممكن تخليني انسى..

جاك: طول مانتي معايا هتنسيه...

جاكي:......

جاك: ياست والله العظيم انتي اشرف واحده قابلتها ف حياتي... وانا بعتذرلك اهو... خلاص بقاا.. اديني فرصه واحده بس وانا هصلح كل حاجه...

كان بيتكلم بكسره قوي..

جاكي: لا.. لسه شويه..

جاك: يعني النيه موجوده!

جاكي بابتسامه: لا ادري..

جاك: اتشقلبلك طيب ولا اعمل اي!..

جاكي: متعملش حاجه.. امشي وانت ساكت..

جاك: اغنيلك طيب!

جاكي: ياسلام!.. دلوقتي حبيت الاغاني!

جاك: انا بحب اي حاجه طلاما هعملها ليكي..

كنت بتفادى نظراته وطريقة كلامه عشان قلبي المهزء دا هيضعف والله...

جاك: هاا.. اغني!

جاكي: الناس..

جاك: وانا مالي بالناس!..

لقيته راح وقف ف وسط الناس وقعد يغني..

" اجمل حكاية غرام.. قلبي عايشها معاك.. وانت حلم الليالي...

ياملاك حبيت العمر معاك... ولقيت الروح بتقول عاشقاك.. والعين على طول تحلم بلُقاك.. وبعيش وياك اجمل ايام.. وبنام وبقوم، على شوق وغرام... وبشوف ف عنيك، كل الاحلااااام....

كان بيغني بصوت عالي ويشاور عليا والناس بتتفرج وتضحك...

جاك: حبك انت، اجمل هديه.. طلعت بيها، من الدنيا ديه.. مليت حياتي، حب عليا.. وياااااه...

ياملاك حبيت العمر معاك.. ولقيت الروح بتقول عاشقاك...

قلبي والله.. حالف عليا يعيش ليالي، عمره اللي جايه.. ف حضنك انت..يانور عينيا.. وياااه..

الناس سقفتله وانا واقفه مكسوفه...

كملنا مشي...

جاكي: مش هتبطل جنان!

جاك: تؤتؤ.. ها.. اعمل اي تاني!

جاكي: انا مطلبتش اولاني عشان تعمل تاني...

جاك: طب اطلبي.. مانا بقالي ساعه بقولك اطلبي.. اطلبي ياست وانا هنفذ والله... طب استني..

مشي شويه ورجع..

جاك: اتفضلي...

جاكي: اي كل دا...

جاك: غزل بنات اهو.. مش انتي بتحبيه!!..وحاجات كتيره اهي.. واندومي كمان.. شوفي انتي عايزه اي تاني وانا هنفذه والله...

مقدرش يسيطر ع دموعه اكتر من كدا ونزلت..

جاكي: طب ليه الدموع دي دلوقتي...

جاك: حقك عليا والله.. انا مش قادر اعيش من وقتها..

فجأه لقيت ست كبيره ماشيه علينا...

ـ هي دي القمر اللي عامله فيك كدا!

جاك: اي دا.. ازيك!

ـ شوفت!.. مش قولتلك اكيد ظالمها!... ادينا اتقابلنا تاني اهو عشان اأكد كلامي...

جاك: عارف والله.. بس هي مش راضيه تسامحني..

ـ ليه يابنتي... دا بيحبك قوي..

جاكي: لا.. مش بيحبني ولا حاجه..

جاك: انا ياجاكي!.. انا مبحبش ف الدنيا قدك..

ـ حرام عليكي والله.. مش شايفاه زعلان ازاي!.. وقبل كدا جه هنا وكان حزين قوي... مفيش راجل بيزعل ع بنت كدا، الا وكان بيحبها قوي.. سامحيه بقاا..

جاك: طب ياست عاقبيني.. اعملي اي حاجه.. انا موافق والله.. يلا بقاا...

جاكي:......

بصيت لقيته قعد ع ركبته ومسك ايدي..

جاك: انا اسف.. والله العظيم ماهتتكرر تاني..

جاكي: جاك انت بتعمل اي.. قوم..

جاك: سامحيني الاول..

جاكي: جاك قوم الناس بتتفرج علينا.. بطل جنان..

جاك: طب اي!!.. مش هتسامحيني!

ـ يابنتي خلاص بقاا.. الواد قطع قلبي..

جاك: قوليلها والنبي... ياست عاقبيني بالطريقه اللي انتي عايزاها كمان... بس متبعديش عني..

جاكي: طب خلاص قوم..

جاك: يعني سامحتيني!

جاكي: ايوا.. قوم بقاا..

راح باس ايدي وقام حضني بسرعه...

جاكي: يخربيتك بتعمل اي اوعى..

جاك بضحك: معلش معلش من الفرحه بس.. يعني خلاص مش زعلانه!

جاكي: مش زعلانه.. هعديها المرادي.. بس المره الجايه لا..

جاك: مفيش مره جايه.. انتي هتبقي ف بيتي..

ـ ربنا يخليكوا لبعض...

جاك: متشكر جدا لحضرتك والله.. وطبعا انتي اول المدعوين للفرح..

ـ وانا هاجي ازاي بقاا!

جاك: اديني رقم وعنوان حضرتك وانا هبعتلك عربيه مخصوص لحد البيت تجيبك وتروحك..

خد منها الرقم والعنوان ومشينا...

جاك: مش متخيله انا مبسوط ازاي...

جاكي: انت مجنون...

روحنا قعدنا قدام البحر..

جاكي: صدقت ازاي اني ممكن اعمل كدا مع ادم!

جاك: فاكره لما سألتيني اي اكتر حاجه مش ممكن تسامح فيها!!.. ووقتها قولتلك الخيانه... عارفه ليه!.. عشان انا طول عمري بشوف امي وهي بتخون ابويا... مكنتش متوقع اني ف يوم هكون زيه...

جاكي: ادم اخويا فعلا... انا مكدبتش عليك..

جاك: عارف.. ومصدق كل حاجه بتقوليها... شوفتي انتي عملتي اي لما دخلتي لقيتي مايا معايا ع السرير!!... مكنتيش راضيه تسمعيني حتى..

جاكي: خلاص.. انسى..

جاك: يعني كدا خلاص!

جاكي: ايون.. بس ازاي محمد جه بنفسه وقالك..

جاك: انا كنت ف الڤيلا وهو جالي هناك معرفش ازاي...

فلاااااااااش بااااااك...

جاك: محمد!.. انت بتعمل اي هنا!... وجيت هنا ازاي!

محمد: جاك.. في حاجه كنت عايز اقولك عليها..

جاك: حاجة اي!...

محمد بتوتر: جاكي..

جاك: لو جاي تدافع عنها يبقاا متكملش..

محمد: جاكي بريئه...

جاك باستغراب: يعني اي بريئه!

محمد: يعني انا ونهى اللي عملنا كدا..

جاك: عملتوا اي..

محمد: احنا اللي حطنالهم منوم واخدناهم الشقه وقلعناهم ونهى بعتتلك المسدج عشان تروح تشوفهم كدا...

جاك مكنش مصدق اللي بيسمعه...

جاك بصدمه: انت بتقول اي!

محمد: دي الحقيقه..

جاك: لو بتقول كدا عشان تطلعها بريئه فاحسنلك بلاش..

محمد: لا... هي ملهاش ذنب فعلا..

جاك: ياوسخ.. بتعمل معايا انا كدا!!.. طب ليه!

محمد بدموع: بحبها.. بحبها ياجاك..

جاك: بتحبها!!

محمد: بحبها من قبل ماتيجي.. وانت جيت اخدتها مني.. كانت هي الامل اللي باقيلي..

جاك: تقوم تخليني اقتلها!!

محمد: مفكرتش ف اللي ممكن يحصل... انا كنت عايز انتقم وخلاص...

جاك مسكه من الهدوم...

جاك: يعني انت فرقت بيني وبينها بس عشان تنتقم... وروحت وقفت مع نهى ضدي..

فضل يضرب فيه جامد لحد ماكسره فعلا...

محمد: حقك.. اعمل اللي انت عايزه.. انا جيت اقولك عشان اريح ضميري..

جاك بغضب: امشي من قدامي... امشي عشان الجاي خراب....

ـــــــــــــــــــــــــــــــــــــــــــــ

بااااااك..

جاك: بس.. وبعد كدا جيتلك الجامعه..

جاكي: عندي شرط.. يخليني اسامحك ع طول..

جاك: شرط اي!

جاكي: تسامح محمد...

جاك: نعم!!!

جاكي: دا شرطي..

جاك: هو السبب ف كل اللي حصل دا..

جاكي: ومتنساش ان انت كنت سبب ف ان امه واخوه يموتوا.. ويفضل موجوع عليهم عمره كله.. ولما يشوفني يرتاحلي ويحبني ويتعلق بيا...

كل دا حصل بسبب النقص اللي حاسس بيه..

عشان كدا لازم تسامحه....

جاك: افرضي غلط تاني..

جاكي: لا.. محمد حد كويس.. هو عمل كدا بس عشان مجروح...

جاك: ماشي.. صحيح.. شوفتي الفيديو اللي نزل!

جاكي: فيديو اي!

جاك: خدي اهو..

خدت منه الفون لقيته الفيديو اللي اتصور واحنا ف شرم لما كنا بنرقص ونغني...

جاكي: احييه.. مش قولتلك هينتشر والناش هتشوفه!

جاك: واي المشكله.. مانا عايزهم يشوفوا...

قعدنا نتفرج عليه واحنا بنضحك والفيديو قمر اصلا...

جاكي: يلا بقاا عشان جامعتي..

جاك: هوصلك انا الصبح..

جاكي: لا..

جاك: انتي مش سامحتيني!

جاكي: ملوش علاقه.. انا بحب اروح لوحدي..

جاك: ماشي.. يلا..

روحت البيت وطلعت وانا حاسه اني مرتاحه شويه...

ماما كانت لسه صاحيه..

جاكي: صاحيه ليه!

ماما: هنام ازاي وانتي بره!... ها.. سامحتيه!

جاكي: يعني..

ماما: اديله فرصه.. يمكن يعرف يصلح اللي كسره

جاكي: طيب.. انا هدخل انام عشان الجامعه..

دخلت غيرت هدومي ولسه هنام بس جتلي مسدج...

جاك: بحبك...

مردتش عليه وقعدت ادور ع الڤيديو لحد مالقيته... قعدت اقرأ الكومنتس وانا مبسوطه.. لقيت واحده كاتبه..

" اي الواد القمر دا... هو دلوقتي في حد قمر كدا!!... لا ورومانسي كمان... ياخي يخربيت حلاوتك... ولا دقنك دي"

انا اسكت!!!... لا طبعا..

جاكي: هو مين اللي قمر ياقليلة الذوق انتي... انتي مالك اصلا قمر ولا مش قمر.. ماتحترمي نفسك.. هو دلوقتي خطيبي ياقمر...

بعت المسدج وانا لسه جوايا كلام عايزه اقوله بس مش هينفع...

كملت تقليب وفجأه لقيت الڤيديو اللي جاك كان بيغني فيه تحت البيت...

احيييه.. هو لحق نزل!!...

عملت منشن للاستاذ جاك عشان ييجي يشوف الفضايح دي...

اتفرجت ع الفيديو وكان تحفه اصلا اصلا...

لقيت الناس كاتبه..

"جماعه.. الاتنين دول قمرااات... وانا نفسي احضر فرحهم قوي يعني"

"هما نفس الاشخاص بتوع الفديوهين اللي فاتوا... هو الواد دا مبيعملش حاجه غير انه يغنيلها!!..

اسكت!!.

جاكي: ملكيش دعوه... هو بيغنيلي انا ياختي...

" ماشاء الله.. شكله بيحبها قووي.."

" كل يوم فيديو احلى من اللي قبله.. ياجماااعه بقااا.. انا عايزه من دا"

"الواد جااااامد ياجدعان... اي الجمااال دا"

جاكي: احترمي نفسك ياوجه الكلب انتي وملكيش دعوه بجوزي قرة عيني... جاتك القرف...

لقيت جاك باعتلي..

جاك: مترديش ع حد ياشرشوحه...

جاكي: ايون.. مانت عاجبك ياقليل الادب انت.. عايز البنات تعاكسك واقعد ساكته..

جاك: مينفعش تشتميهم يخربيت دماغك... عيب

جاكي: عيب!!... هما لو قدامي دلوقتي كنت عملت حاجه تاني اصلا.. وانت لو قدامي كنت وريتك هعمل فيك اي يابتاع النسوان انت..

جاك: ياشيخه نسوان اي بس.. انا بتاع الكلام دا بردو!

مردتش عليه عشان دا حد مهزء اصلا... دخلت ع بروفايله لقيته منزل الفيديوهات دي ونااااس كتييييير قوووووي شافتها ومعلقه عليها...

يافضيحتييييييي....

كان منزل فيديو الرقص وكاتب...

ومنزل فيديو الغنا وكاتب...

"قُل لقلبك انني احبَبتهُ، فَلعل صوت الحُب يَبلُغ مسمَعك"

ومنزل الفيديو اللي كنا بنرقص فيه ف الشارع اللي هو اصلا ع فوني ومعرفش خده ازاي... وكاتب..

"گُلي يُناديك ان تأتي الي هُنا لي...

ومنزل صورنا اللي اتصورناها مع بعض..

قعدت اقلب ف الكومنتس ولقيت مايا كاتبه..

" الله يسعدكوا مع بعض"..

وواحده تانيه كاتبه..

" شو هالجمال.. كتير مهضومين"

وواحد كاتب..

"اي ياجاك بيه... اخيرا حد عرف يوقعك"

وواحده كاتبه..

"لا مينفعش حد ياخد كراشي"

اسكت!!!

جاكي: كراشك مين ياللي يجيلك شلل ف وراكك انتي.. اتلمي اااااابت"

بعتلي مسدج...

جاك: بطلي تقلبي ف اكونتي لو سمحتي..

جاكي: دانت ليلتك طين ع دماغك..

جاك: ليه.. وبعدين بطلي تشتمي ف الناس... يقولوا عليا اي.. بحب شرشوحه!

جاكي: ايوا.. وبعدين بطل تلزيق عشان اقسم بالله ياجاك هتزعل مني...

جاك: طب انا عملت اي!

جاكي: انت عندك البنات دي كلها ليه!!!

جاك: عادي.. صحابي..

جاكي: طب هنشوف الموضوع دا بكرا..

قفلت الفون ونمت...

صحيت تاني يوم.. لبست وروحت الجامعه...

دخلت بس لقيت الكل بيبصلي بطريقه غريبه...

ادم: ياصباح الفل..

جاكي: صباح النور.. الجرح عمل اي دلوقتي!

ادم: لا تمام.. المهم..

جاكي: امم..

ادم بخبث: اي اللي انا شوفته امبارح دا..

جاكي: اي هو...

ادم: جاك كان بيغني تحت بيتك..

جاكي: احييييه.. انت شوفته!

ادم: مصر كلها شافته ياختي..

جاكي: عشان كدا بيبصولي كدا!

ادم: طبعا.. انا كنت مع صحابي دلوقتي وهما بيتفرجوا ع الفيديو... وبعدين الواد اتشحتف ياشيخه..

جاكي: طب يلا يعم عشان المحاضره..

لسه داخلين وسمعت البنات بيتكلموا..

"والله الواد قمر....يابختها بيه والله.. وبعدين حد يرفض جاك بيه!!... دانا سمعت انه رجل اعمال كبير قوي.."

"شكله بيحبها جامد... وبصراحه هي حلوه ولايقين ع بعض..."

دخلت المحاضره

ـــــــــــــــــــــــــــــــــــــــــــــــــــــــــــــــ

فيروز: جاك فين ياعطيات!

عطيات: خرج الصبح..

فيروز: خرج راح فين دا كمان...

عمو احمد: اكيد داير ورا جاكي عشان يصالحها...

فيروز: يارب يعرف بس..

ـــــــــــــــــــــــــــــــــــــــــــــــــــــــــــــــ

سلمى: اي يانور دا..

نور: اي..

سلمى: مش اخوكي دا!

نور: اي دا.. جاك!..

اتفرجت ع الفيديو هي وهند...

نور: جاك راحلها اهو..

هند بضحك: طب والله عسل.. وهي بتضحك اهي.. اظن سامحته...

نور: ياريت والله...

سلمى: اخوكي طلع رومانسي اهو.. اي الجمال دا..

نور: اخويا دا قمر اصلا...

سلمى: الجامعه كلها بتتفرج ع الفيديو وبيتكلموا عليهم..

ـــــــــــــــــــــــــــــــــــــــــــــــــــــــــــــــ

خلصت محاضرات واليوم خلص ولسه طالعه انا وندى..

ندى: يابروو اي الجمدان دا.. بقاا تعملوا كل دا من ورايا!!

جاكي: ياشيخه والله كل حاجه جت لوحدها كدا... وبعدين جاك مجنون وبيعمل حاجات مش متوقعه خالص..

ندى: انا مشوفتش حد بيحب حد كدا... ارزقني يارب..

جاكي: طب يلا ياست عشان الامتحانات دي...

روحنا وعدى كذا يوم وانا مبروحش الجامعه وبذاكر

ف البيت عشان امتحاناتي بعد يومين..

كنت بذاكر بالليل ف اوضتي.. وفجأه فوني رن..

جاكي: يانعم..

جاك: اطلعي البلكونه..

جاكي: ع فكره انا مش فاضيالك..

جاك طب اطلعي شويه بس...

طلعت لقيته قاعد ع العربيه وحاطط جنبه اكل..

جاك: حسيت انك جعانه.. عشان عارفك بتتوحمي بالليل..

جاكي: احترم نفسك.. وبعدين انا مش جعانه..

جاك: والله!.. طب خلاص اكل انا...

قعد ياكل..

جاكي: ولااا.. طب خليلي حته طاااه..

جاك: تؤتؤ.. روحي كملي بقاا..

نزلت بسرعه طبعا.. دا اكل ياجدعان..

ركبت جنبه ع العربيه..

جاك: نزلتي ليه!

جاكي: بس بقاا عشان انا جعانه..

جاك:كنتي بتعملي اي..

جاكي: بذاكر..

جاك: امتحاناتك بعد بكرا..

جاكي: ربك يستر..

جاك: لا سهله.. هتعديها عادي..

جاكي: اشمعنى..

جاك: عشان عارف ان حبيبي شاطر وهيطلع الاول كمان..

جاكي: ياجدع!

جاك: هتشوفي.. ولو في حاجه مش فاهماها قوليلي وانا اجيبلك الدكتور لحد عندك..

جاكي: لا ياسكر.. كله تمام...

جاك: ماشي.. لما نشوف هتعملي اي..

كملنا اكل وبعدين انا طلعت وهو مشي...

ـــــــــــــــــــــــــــــــــــــــــــــــــــــــــــــــ

فيروز: كنت فين ياجاك..

جاك: كنت مع جي..

فيروز: عرفت تصالحها!

جاك: صالحتها.. بس حاسس انها لسه مجروحه مني..

فيروز: اكيد.. مانت اللي قولته مش سهل..

نور: وبعدين اي العظمه اللي بتعملها دي... مانت حلو اهو وبتعرف تغني..

فيروز: في اي..

هند: خدي شوفي ياختي..

خدت الفون وقعدت تتفرج ع الفيديو..

فيروز: اي الحلاوه دي.. مانت بتعرف تصالح اهو..

جاك: طلعت عيني والله..

هند: خليها تتدلع شويه..

جاك: تتدلع ياست.. انا طالع انام..

ـــــــــــــــــــــــــــــــــــــــــــــــــــــــــــــــ

عدى الوقت وجه يوم الامتحان.. صحيت واتوضيت وصليت... كنت متوتره قووي..

جاكي: ماما انا ماشيه..

ماما: خلي بالك من نفسك..

جاكي: ادعيلي والنبي ياماما..

ماما: منمتش طول الليل والله.. وانا قاعده ادعيلك..

روحت الجامعه مع ندي...

جاكي: انا خايفه قوي..

ندى: وانا كمان.. اي دا.. جاك هناك اهوو..

لفيت لقيته راكن ع العربيه وبيتكلم ف الفون.. روحتله..

جاكي: جاك.. بتعمل اي هنا..

جاك: طب هكلمك بعدين... جيت عشان اطمنك عشان عارف انك خايفه..

جاكي: لا مش خايفه.. انا مرعوبه..

جاك: متقلقيش.. انا واثق انك قدها.. وواثق اني هاجي معاكي يوم النتيجه وهتلاقي نفسك طالعه الاولى كمان..

جاكي: والنبي متأڤورش.. انا حاسه اني ناسيه كل حاجه..

جاك: بصي.. طول مانتي متوتره مش هتعرفي تحلي حاجه... اول ماتدخلي اقرأي قران وادعي واتوكلي ع الله وحلي.. ومتقلقيش.. مفيش حاجه مستاهله التوتر داا... وحتى لو معرفتيش تحلي، ف داهيه.. مش حوار يعني.. المهم متشغليش بالك بحاجه..

كلامه وتشجيعه ريحوني شويه...

جاكي: ماشي.. انا هدخل بقاا عشان الامتحان هيبدا.. باي..

سيبته ودخلت انا وندى وهاجر..

ـــــــــــــــــــــــــــــــــــــــــــــــــــــــــــــــ

عمو احمد: البنات ف الامتحان!

فيروز: ايوا... ربنا معاهم ويوفقهم يارب...

عمو احمد: ان شاء الله خير...

فيروز: انا خايفه ع محمد بس... يارب يعرف يحل..

عمو احمد: اتطمني.. خير..

ـــــــــــــــــــــــــــــــــــــــــــــــــــــــــــــــ

الامتحان خلص وطلعت لقيت جاك لسه واقف وعمال يبص ف ساعته...

ضحكت وروحتله..

جاك: ها طمنيني.. عملتي اي..

جاكي بزعل: معملتش..

جاك: امم.. طب مش مشكله عادي..

جاكي بضحك: يبروو بهزر.. الامتحان كان عسل..

جاك: ياشيخه خضتيني.. حليتي كويس يعني!

جاكي: مسبتش سؤال واحد..

جاك: انا قولتلك حبيبي شاطر والله..

جاكي: طب انت بتعمل اي هنا.. جيت تاني ليه..

جاك: انا ممشتش... انا روحت شوفت نور وجيت تاني...

جاكي: ف الشمس دي!

جاك: كله يهون عشان القمر..

جاكي: طب يلا ياخويا روح..

جاك: تعالي هوصلك..

جاكي: لا هروح مع ندي..

جاك: هاتيها معانا..

شاورتلها وجت وركبنا...

جاكي: حليتي كويس ياندى!

ندى: ااه الحمد لله.. كله تمام..

جاكي: يارب الباقي بقاا ييجي كدا..

جاك: طب خدوا اكل اهو...

جاكي: انت كمان جايب اكل!

جاك: مانا عارف انكوا هتطلعوا جعانين.. وبالذات انتي يعني..

جاكي: قصدك اي... قصدك اني باكل كتير يعني!

جاك: لا مش قصدي..

ندى: انتي هتفتري ع الواد!.. ايوا بتاكلي كتير..

جاك: ندى.. انت صاحبي من النهارده..

ندى: اشطا..

جاكي: لا ياشيخ!..

ندى: اطفحي واخلصي عشان نمشي...

ـــــــــــــــــــــــــــــــــــــــــــــــــــــــــــــــ

فيروز؛ عملتوا اي..

هند: الحمد لله كان كويس..

فيروز: وانتي يانور!

نور: كان كويس.. ربنا يستر ف الباقي..

فيروز: طب محمد فين..

نور: مش عارفه.. مشوفتوش..

فيروز: انا قلقانه عليه..

هند: اهو جه..

فيروز: طمني يابني عملت اي..

محمد: تمام..

سابها وطلع اوضته..

ـــــــــــــــــــــــــــــــــــــــــــــــــــــــــــــــ

ايام الامتحانات خلصت وكنا ف اخر يوم... وجاك كان بيجيلي كل يوم يطمني ويفضل مستنيني...

اخر يوم...

روحت بس ملقتش جاك هناك زي كل يوم.. اتضايقت شويه وبعدين دخلت...

الامتحان خلص وطلعت...

جاكي بفرحه: واخيرا خلصت.. اخيرا الواحد هيعرف ياخد نفسه شويه..

ندى: دا كابوس ياشيخه..

جاكي: وانت ياادم عملت اي..

ادم: البركه فيكي.. لولا اني كنت بكتبلك المحاضرات مكنتش هذاكر ولا هعرف احل كدا..

جاكي: الحمد لله عدت...

كنا ماشيين وفجأه لقيت جاك واقف...

بصيت لقيت البنات كلها بتبصله بإعجاب وبتعاكسه ومركزين معاه... هو كان متشيك ع الاخر.. فرح امه هووو..

كان لابس اسود ف اسود.. عشان هو يوم اسود ع دماغه.. وفاتح القميص وعضلاته باينه ولابس نضاره وشعره بيطير ع عينيه... هو الواد مز الصراحه يعني..

ندى: والله انك محظوظه يابنتي...

مشيت عليه خطوتين وبعدين لقيته قعد ع ركبته وطلع خاتم...

جاك: جاكي... تتجوزيني!

جاكي: تاني ياجاك!