رواية قلبي ليس بيدي الفصل السابع والخمسون 57 بقلم حسناء مصطفي

نهى: والله ماهتلحقوا تتهنوا.. انا هوريكوا.. بقاا انا اعتذر لدي!!!.. ماشي..

سما: لا وايه!!.. طلب ايدها قدام الكل..

نهى: انتي تخرسي خالص.. ماهو بسببك دا حصل..

سما: اعمل اي يعني.. انتي مش شوفتيه ضربني ازاي!!...دا ايده معلمه ع وشي...

ـــــــــــــــــــــــــــــــــــــــــــــــــــــــــــــــ

جاكي: انتي تعرفي ماما!

ـ اعرفها ياحبيبتي..

جاكي بدموع: احلفي.. طب.. طب عارفه مكانها!

ـ ايوا.. امك صاحبتي.. ياااه.. دروت عليكي كتير.. فضلنا ندور عليكي وملقيناكيش...

جاكي بعياط: هي فين!

ـ موجوده ياحبيبتي...

جاكي: مش بتضحكي عليا.. صح..

جاك: ومقولتيش ليه انك تعرفي مكان مامتها!

ـ مكنتش متاكده ان دي جاكي نفسها..

جاكي: وديني عندها دلوقتي..

ـ هي مش هنا.. دي ف اسكندريه..

جاكي: جاك انا عايزه ارجع.. رجعني دلوقتي..

جاك: اهدي.. هنرجع.. متأكده ان هي مامتها!

ـ ايوا متاكده.. السلسله دي.. مامتك كانت لابسه زيها..

جاكي: ايوا.. فعلا ماما كانت لابسه نفس السلسله.. جاك روحني بالله عليك..

جاك: حاضر.. هنروح كلنا.. اطلعوا لموا حاجتكوا وانا هروح اخلص الشغل ع طول وارجع..

جاكي: انت لسه هتروح الشغل!

جاك: مش هأخر والله... هخلص بسرعه لحد ماتجهزوا نفسكوا... فيروز.. خليكي معاها.. يلا سلام..

فيروز: يلا طيب بسرعه...

طلعنا لمينا حاجتنا وغيرنا وانا دخلت مع فيروز لمينا حاجة جاك...

ندى جت..

ندى: اي دا انتوا بتعملوا اي!

جاكي: ندى الحقي.. ماما..

ندى: مالها..

جاكي: عايشه وهروحلها دلوقتي...

ندى: انتي بتقولي اي.. مامتك متوفيه من زمان..

جاكي: لا.. طلعت عايشه.. انا فرحانه قووي..

فيروز: ربنا يفرح قلبك ع طول يابنتي...

ندى بزعل: يعني انتوا كدا ماشيين!

جاكي: مانا هشوفك تاني..

ندى: طب اديني عنوانك عشان اجيلك اول مانزل..

جاكي: ايوا صح...

عطيتها العنوان وخلصنا كل حاجه والبنات جهزوا وقاعدين مستنيين جاك...

عدى شوية وقت ولسه ماجاش...

فضلت ارن عليه كتير ومبيردش.. رنيت اخر مره راح فتح..

جاكي: اي ياجاك كل دا.. انت قولت مش هتأخر...

جام: خلاص ياحبيبي ف الطريق اهو.. مسافة السكه.. جهزتي نفسك!

جاكي: من بدري.. وعماله ارن عليك مبتردش..

جاك: معلش كنت ف ميتينج.. انا جاي حالا..

قفلت معاه وشويه وجه... نزلنا الشنط وهو ظبط كل حاجه في الاوتيل ...

جاك: هنرجع ع فين!

جاكي: ع امي طبعا..

جاك: خلاص تعالي حضرتك معانا ونروح احنا التلاته..

فيروز: لا انا هاجي معاكوا....

جاك: لا يافيروز.. خليكي مع البنات وانا هفضل معاها.. يلا...

ركبت انا وهو ومامت ادم...

جاكي: سوق بسرعه..

جاك: جاكي الطريق ٨ ساعات... اهدي.. مش هينفع كدا... نامي شويه لحد مانوصل..

مشينا كتير وعدى وقت طويل وانا نعست انا ومامت ادم...

صحيت مخضوضه..

جاك: في اي..

جاكي: لا مفيش... هو احنا لسه قدامنا كتير..

جاك: خلاص اهو نص ساعه كدا..

فضلت قاعده افرك ف ايدي من التوتر وادعي ف سري...

جاك: حبيبي متقلقيش...

جاكي: تفتكر هتعرفني!

جاك: اكيد.. هتحس بيكي..

جاكي: يارب...

عدت النص ساعه بصعوبه ويادوب وصلنا الڤيلا...

هما نزلوا واحنا كملنا ومامت ادم بتوصفله الطريق..

كان الليل حل علينا والوقت متأخر...

جاك: مش كنا جينا الصبح..

جاكي: حقك.. مانت مش حاسس بيا...

ـ بس هو دا البيت..

حسيت للحظات كدا ان روحي بتطلع ومش قادره اتحرك.. معقوله.. هشوف امي بعد السنين دي كلها!.. ولو طلعت مش هي!..

قطع افكاري صوت جاك...

جاك: حبيبي... يلا..

جاكي: ماشي..

نزلت وهو خبط وانا ماسكه فيه ومرعوبه...

مامت ادم فتحت ودخلت...

جاك: يلا ادخلي... متخافيش يلا انا معاكي..

دخلت لقيت واحده قاعده ف الارض وبتسبح ع السجاده...

قلبي دق قوي...

ـ منى.. شوفي مين هنا..

منى: مين معاكي..

خوفت وحسيتها مش هتعرفني...

قامت وقربت مني وقعدت تحقق ف وشي..

ـ معرفتيهاش!...

حطت ايدها ع وشي وعينيها اتملت دموع..

منى: معرفهاش ازاي!!.. دي ضنايا..

بصيت لجاك وابتسمت..

منى: ياااه.. مين كان يقول اني هشوفك بعد كل السنين دي... كبرتي ياجاكي.. كبرتي قوي..

بصيت لقيتها اغمى عليها وانا دوخت...

جاك: جاكي اقعدي..

فضلوا يفوقوها وانا قاعده اعصابي سايبه..

فاقت وحضنتها جامد وفضلنا نعيط بحرقه انا وهي...

ماما: ساامحيني يابنتي... حقك عليا... حقك عليا ياضنايا..

بوست ايدها..

جاكي: انتي اللي تسامحيني عشان مدورتش عليكي كل دا..

ماما: وحشتيني... وحشتيني قوي ياجاكي..

جاكي:وانتي والله وحشتيني قوي..

ماما:. مين دا..

جاكي: دا جاك..

ماما باستغراب: جاك!!

جاكي: ايوا.. انتي تعرفيه!

ماما: ابن نهى!

جاكي: ايوا..

ماما: ياحبيبي يابني...

راحت مشت عليه حضنته وفضلت تبوسه وهو بيبصلي ومستغرب..

ماما: كبرت ياواد..

جاك: هو حضرتك تعرفيني!

ماما: مش ملاحظ حاجه!.. اسمك دا انا اللي مختاراه..

جاك: غريبه... نهى ازاي سابتك انتي تختاريلي الاسم..

ماما: مامتك مكانتش فاضيه تختارلك اسامي يابني.. انا وفيروز اخترنالك الاسم دا مع بعض.. الا صحيح هي فين فيروز..

جاك: ف البيت..

ماما: كبرتوا كدا ليه ياعيال!.. ولا انا اللي عجزت..

بصت لقيتني قاعده وعماله اعيط..

ماما: متعيطيش ياضنايا... حقك عليا... مش بإيدي والله.. ابوكي الله يسامحه..

جاكي: انتي كويسه!.. فيكي حاجه!

ماما: انا دلوقتي بس بقيت كويسه يانور عيني.. ابوكي عمل فيكي اي..

بصيت لجاك..

جاك: طب حضرتك هتيجي معانا دلوقتي وبعدين اتكلموا زي مانتوا عايزين..

ماما: اجي معاكوا فين!

جاكي: هترجعي معايا..

ماما: انا مش هرجع القاهره تاني..

جاكي: مش القاهره.. احنا قاعدين هنا..

ماما: مقدرش اسيب مكاني يابنتي.. انا بقالي سنين قاعده هنا..

جاكي: مش عايزه ترجعي معايا!!

جاك: قومي ارجعي معاها.. انتي مش متخيله هي تعبت قد اي عشان تلاقيكي..

جاكي: يلا ياماما والنبي..

ماما: عرفتي تلاقيها ازاي يا دلال..

دلال: انا مكنتش متأكده انها هي جاكي بنتك...

انا كنت شاكه بس.. محبتش اديكوا امل ويكون مش صح..

جاكي: يلا ياماما والنبي...

دلال: تعالي لمي هدومك معايا...

دخلوا مع بعض جوه وانا واقفه ومش مصدقه..

جاكي: جاك انا مش مصدقه... هو انا بحلم طيب!

جاك: لا.. مش بتحلمي.. قولتلك هنلاقيها..

جاكي: انا مبسوطه قوووي..

حضنته وانا بتنطط..

جاك: اهدي اهدي..

جاكي: بس احنا هنروح فين!

جاك: هنرجع الڤيلا..

جاكي: لا.. نرجع الشقه..

جاك: شقة اي بطلي هبل..انتي هتجيبيها وتيجي تقعدي معانا..

جاكي: لا ياجاك.. مش هينفع..

جاك: اشش اسكتي.. بطلي هبل.. انتي راجعه من سفر ولازم ترتاحي.. وكمان مامتك هتيجي عشان تشوف فيروز وابوكي..

جاكي: جاك مينفعش.. مش هفضل قاعده عندكوا كدا.. لا وكمان اجيب ماما معايا..

جاك: بس يابت.. امال عايزه تروحي فين!

جاكي: اروح شقتي عادي..

جاك: متخيله اني هسيبك تمشي يعني!.. وبعدين كلها شويه وهتقعدي معايا غصب عنك...

ماما طلعت..

جاكي: يلا...

ركبنا العربيه وجاك وصل دلال البيت وبعدين طلعنا ع الڤيلا...

كنت ماسكه ايدها ومبسوطه قووي..

دخلنا لقينا فيروز والبنات قاعدين مستنيينا...

اول مافيروز شافتها طلعت تجري عليها...

حضنوا بعض وقعدوا يعيطوا..

فيروز: وحشاني يامنى... حرام عليكي والله...

فضلوا يسلموا ع بعض وبعدين طلعناها اوضتها..

جاك: سيبيها ترتاح..

جاكي: لا انا هقعد معاها..

جاك: طب بقولك اي..

جاكي: قول..

جاك: انا هروح انام وانتي خليكي معاها... بس افرضي ظهرلك تاني..

جاكي: ييي... بتفكرني ليه..

عطيات دخلت..

عطيات: جاك بيه..

جاك: نعم..

عطيات بتوتر: كنت عايزه حضرتك ف حاجه..

جاك: تعالي قولي.. في اي..

عطيات: طب ممكن تيجي معايا بره..

جاك: في اي ياعطيات ماتتكلمي..

عطيات: نروح اوضة حضرتك بس وانا هقولك كل حاجه...

جاك: خليكي مع مامتك وانا هشوف في اي..

سابني وراح معاها...

جاك: في اي بقاا..

عطيات: نهى هانم..

جاك: مالها..

عطيات: بصراحه.. بصراحه يعني..

جاك: ماتتكلمي..

عطيات: بصراحه سمعت نهى هانم بتتكلم ف الموبيل.. وبتقول لواحد انا بعتلك صورهم هما الاتنين واعمل اكتر من الاول وهبعتلك فلوس..

جاك: يعني اي..

عطيات: يعني بتعملكوا اعمال...

جاك: انتي متاكده!

عطيات: ايوا يابني.. دا غير اني مشيت وراها مره.. لقيتها رايحه مكان غريب كدا عند الناس السحره دول.. وعطت لواحد فلوس كتير قووي.. وشوفتها مطلعه حاجه من هدومك انت وجاكي..

جاك: ومقولتليش كدا ليه!

عطيات: مانتوا سافرتوا يابني.. وانا مكنتش عارفه اعمل اي.. دا غير انها ممكن تإذيني... بس قلبي واجعني عليكوا.. عشان كدا قولتلك..

جاك: متقلقيش.. محدش هيقدر يكلمك.. بس قوليلي... تعرفي المكان اللي روحتي وراها فيه!

عطيات: ايوا عارفاه..

جاك: بكرا الصبح هتروحي معايا وهنشوف الراجل دا..

عطيات: يابني.. انا عندي عيال.. نهى هانم مش هتسيبني..

جاك: متخافيش.. انتي دلوقتي ف حمايتي انا.. دا غير انها مش هتعرف انك انتي اللي قولتيلي..

ـــــــــــــــــــــــــــــــــــــــــــــــــــــــــــــــ

هند: انا مش مصدقه والله.. بقا بعد السنين دي كلها تطلع عايشه..

فيروز: اتغيرت قووي.. دي كانت بدر منور.. منه لله.. عذبها..

نور: النهارده يوم السعد لجاكي والله.. جاك يطلب ايدها وكمان تلاقي امها..

فيروز: يخربيتك... باصه للبت ف فرحتها!!.. يهدك ربنا.. انتي مش شايفه عمال يحصلها اي...

نور: مقصدش.. قصدي انها اكيد مبسوطه يعني..

ـــــــــــــــــــــــــــــــــــــــــــــــــــــــــــــــ

جاكي: وحشتيني قوي ياماما..

ماما: حقك عليا يابنتي... سيبتك معاه..

جاكي: ليه مرجعتيش!

ماما: ابوكي هددني اني لو رجعت هيعمل فيكي حاجه... ورماني بعيد ومكنتش اعرف انا فين اصلا..

جاكي:وعرفتي طنط دلال ازاي!

ماما: دا موضوع طويل ابقى اقولك عليه بعدين.. بس قوليلي... ابوكي عمل فيكي حاجه!

جاكي: حاجات..

ماما: ياحبيبتي يابنتي.. طب انتوا قاعدين هنا ليه!.. وفين ابوكي...

جاكي: هحكيلك كل حاجه بس نامي دلوقتي...

نامت وانا حضنتها و نمت جنبها...

ـــــــــــــــــــــــــــــــــــــــــــــــــــــــــــــــ

تاني يوم...

صحيت لقيت ماما لسه نايمه.. بوستها وطلعت..

نزلت لقيت فيروز تحت..

جاكي: صباح الخير..

فيروز: صباح النور..

جاكي: هو جاك لسه نايم!

فيروز بخبث: وبتسألي ع جاك ليه!

جاكي: لا عادي يعني..

فيروز: لا ياستي جاك خرج..

جاكي: خرج فين بدري كدا..

فيروز: مش عارفه.. المهم تعالي خدي فطار لمامتك..

خدت الاكل وطلعت..

ـــــــــــــــــــــــــــــــــــــــــــــــــــــــــــــــ

جاك: هو دا المكان!

عطيات: ايوا هو..

نزلوا ودخلوا..

عطيات: هو دا الراجل اللي كان معاها..

جاك: لو سمحت..

ـ نعم!.. مين حضراتكوا!

جاك: كنت عايزك ف موضوع كدا..

ـ اتفضلوا..

دخلوا وكان المكان كله دخان وحاجات كدا..

جاك: كان في واحده جتلك هنا من فتره..

ـ انا بيجيلي ناس كتير..

عطيات: لا هي هانم كدا.. وعطتك هدوم الاستاذ..

جاك:. دي صورتها.. جتلك هنا!!

ـ ايوا.. الست نهى..

جاك: هي الست نهى دي... جتلك ليه بقاا..

ـ مقدرش اقولك..

جاك: ليه!

ـ دي اسرار..

جاك: اسرار ااه.. طب اسمع بقاا.. انا دلوقتي هطلب البوليس.. وهييجي يقبض عليك بتهمة الدجل والنصب.. وانت متعرفش انا ممكن اعمل اي.. انا ممكن اخليك تقضي باقي حياتك ف السجن...

ـ اي اللي يثبت كلامك!

جاك: انا مش محتاج اثبت حاجه.. انا باشاره واحده مني اوديك ورا الشمس..

قام مسكه وفضل يضرب فيه...

ـخلاص ياباشاا... ليه العنف بس.. انا بس بقول ان دي اسرار الشغل.. بس انا تحت امرك ياباشاا..

جاك: حلو.. قولي بقاا طلبت منك اي!

ـ قالتلي انها عايزه تعمل عمل ليك ولبنت تانيه... واعملكوا سحر وعمل بوقف الحال والمشاكل والخناق وكدا... وكمان جابتلي حاجه من اطركوا..

جاك: وحاطط فين القرف دا..

ـ مش معايا ياباشا..

عطيات: ع فكره دا باشا كبير قوي.. وممكن يدفنك هنا.. قول وديت العمل فين!... حسبي الله ونعم الوكيل فيكوا..

جاك مسكه من الهدوم...

جاك: هتنطق ولا اطلب البوليس..

ـ مدفون ياباشاا..

جاك: مدفون فين!

ـ ف مقبره..

عطيات: يالهوي.. منك لله.. ربنا ينتقم منكوا..

جاك: هتيجي معايا دلوقتي وتطلعه..

ـ مقدرش..

جاك: مش بمزاجك ياروح امك..

ـ يااستاذ انت مش فاهم حاجه... دي خلتني اسخرلكوا جن ويفضل وراكوا عشان يإذيكوا..

جاك: نعم!!

ـ هي اللي طلبت مني كدا.. وعطتني فلوس كتير قووي..

جاك: انت هتيجي معايا دلوقتي وهتطلع القرف دا.. انت فاهم!

ـ حاضر... حاضر ياباشاا..

طلعوا وركبوا العربيه وراحوا مكان المقبره..

ـــــــــــــــــــــــــــــــــــــــــــــــــــــــــــــــ

جاكي: يلا ياروحي قومي عشان تاكلي..

ماما: وجايبالي الاكل بنفسك كمان!

جاكي: ان مكنتش اجيبلك انتي هجيب لمين يعني.. يلا قومي بقااا..

قعدنا ناكل..

جاكي: قوليلي صح.. انتي تعرفي مامت ادم منين!

ماما: دي صاحبتي من زمان... بس افترقنا... هي جت اسكندريه وانا فضلت ف القاهره... بس انا اعرفها من زمان قوي... دي صاحبة عمري..

جاكي: امال ازاي معرفتنيش!

ماما: يابنتي دي مشت وانتي لسه صغيره قوي.. كانت بتجيلي وتسيب معايا ادم عشان ارضعه وهي ف الشغل..

جاكي: نعم!!

ماما: اي

جاكي: يعني ادم راضع عليا!!

ماما: ايوا.. وهي كمان رضعتك..

جاكي بفرحه: يعني احنا اخوات ف الرضاعه!

ماما: ايوا..

اووباااا دي شكلها هتلعب بقااا.. وحياتك لاوريك ياجاك..

ماما: قوليلي بس.. انتوا سيبتوا القاهره وقاعدين هنا ليه!

جاكي: هحكيلك...

ـــــــــــــــــــــــــــــــــــــــــــــــــــــــــــــــ

دخلوا المكان...

جاك: يلا..

قعد يقول كلام غريب كدا ودخل جوه المقبره وقعد يحفر لحد ماطلعه...

ـ اهم ياباشاا..

جاك: انت عامل كل دا!!

ـ هي اللي طلبت ياباشاا...

جاك: دانت ليلتك سودا... فك القرف دا..

ـ مش هعرف ياباشاا..

جاك: يعني اي مش هتعرف!

ـ يعني دا محتاج شيخ قوي عشان يعرف يفكه.. انا مبعرفش..

جاك: وحياة امك ماهسيبك..

ـ ياباشاا انا عملت اللي انت عايزه اهو..

عطيات: انا اعرف شيخ كويس بيعرف يفك الحاجات دي.. وفك كذا عمل قبل كدا...

جاك: طب هو موجود فين!

عطيات: مش بعيد عن هنا..

جاك: شيل الحاجات دي ويلا..

الراجل لمهم ومشوا..

جاك: عارف لو طلعت عامل حاجه تاني انا هعمل فيك اي!

ـ والله ابدا ياباشاا.. هما دول بس..

ركبوا وراحوا عند الشيخ...

الاعمال دي كان فيها صورنا ومكتوب عليها "دم.. خنقه.. حزن.. مشاكل.. خوف.. قلق.. موت...فراق.." وكلام كتير كدا..

الشيخ قعد يقرأ قران ويحاول يفك السحر دا...

ـــــــــــــــــــــــــــــــــــــــــــــــــــــــــــــــ

ماما: يالهوي يابنتي.. كل دا حصل معاكي!!

جاكي: واكتر والله.. بس جاك كان معايا..

ماما: ربنا يخليه ويحرسه يارب.. وسيبتيه يابنتي يعمل فيكي كدا ليه!..

جاكي: اعمل اي طيب ياماما..

شرقت فنزلت جبتلها مايه.. جبت المايه وكنت طالعه لقيت حد شدني جوه الاوضه بتاعتي..

كان نفس الشخص المرعب وسدلي بوقي...

طلع ف وشي نفس السكين.. بس المرادي كان بيتكلم بصوته... ودا مكنش صوت انسان ابدا..

كنت بعيط ومش عارفه اصوت... وكان بيبرقلي ويبصلي بطريقه مرعبه...

ـــــــــــــــــــــــــــــــــــــــــــــــــــــــــــــــ

جاك: ها ياشيخ..

الشيخ: العمل اتفك.. بس الجن اللي مسخرينه دا قوي جدا..

جاك: لو سمحت.. ارجوك حاول.. انت مش متخيل هو بيعمل اي..

الشيخ: خير ان شاء الله..

الشيخ فضل يحاول ويقول قرأن وادعيه وحاجات... فضل كدا كتير والشخص دا معايا..

حط السكينه ع رقبتي وبصلي بغل... انا غمضت عيني وانا قلبي هيتخلع من مكانه..كان بيطلع اصوات غريبه زي مايكون بيزعق... وفجأه اختفى...

فتحت عيني ملقتش حد.. لقيت هدوم بس ف الارض...

رجلي مكانتش شايلاني... مقدرتش استحمل اكتر واغمي عليا...

ــــــــــــــــــــــــــــــــــــــــــــــــــــــــــــــ

الشيخ: الله اكبر....اتحرق

جاك: الحمد لله... يعني كدا خلاص ياشيخ..

الشيخ: الحمد لله.. باذن ربنا كل حاجه اتفكت...

جاك: اما انت بقاا.. فانت ليلتك سودا..

جاك اخده ع القسم وطبعا اتحبس.. وسابه ورجع ع البيت بسرعه...

جاك: جاكي فين!

فيروز: مع مامتها.. هو في اي..

سابها وطلع بسرعه..

دخل اوضة ماما..

جاك: جاكي فين!

ماما: نزلت تجيبلي مايه ومطلعتش..

جاك: مطلعتش!!.. امال راحت فين...

دخل يجري ع اوضتي وهما جم وراه... فتح الباب لقاني واقعه ع الارض..

جاك: جاكي.. جاكي..

قعد يفوقني والكل واقف مخضوض...

فوقت لقيته قدامي.. حضنته وفضلت اعيط..

جاك: اي اللي حصل..

ماما: مالك يابنتي اي اللي حصل..

جاكي: ظهر.. ظهر تاني ياجاك..

فيروز: اي الهدوم دي..

جاكي بعياط: الهدوم دي كان لابسها... وفجاه اختفى والهدوم دي فضلت مكانها..

جاك: اتحرق.. الحمد لله..

فيروز: هو اي اللي اتحرق انا مش فاهمه حاجه..

جاك: اتحرق ياجي... لقيت الاعمال المعموله وفكيتها.. تعالي معايا..

نزلنا تحت والكل اتجمع...

جاك: انا عايز نهى هانم هنا دلوقتي.. انتي فين...

عمو احمد: مالك بتزعق كدا ليه

جاك: هتعرفوا كل حاجه دلوقتي.. انتي فين يانهى هانم..

نهى: اي.. بتزعق ليه..

جاك: بزعق!.. هو انتي لسه شوفتي حاجه!...

عمو احمد: ماتفهمني في اي!

جاك: نهى هانم.. كانت عاملالي عمل.. انا وجاكي..

فيروز: يالهوي.. انت بتقول اي..

نهى: اي الكلام الفارغ دا..

جاك: اهو.. صورنا دي ولا مش صورنا.. ودي هدومنا ولا لا!!

فيروز: يالهوي وماسكهم ف ايدك!!.. ارميهم..

جاك: لا متقلقيش.. ملهمش لازمه دلوقتي.. الحمد لله العمل اتفك...

عمو احمد: صحيح الكلام دا يانهى!!

نهى: لا.. انا معملتش كدا..

جاك: وهو الراجل هيتبلى عليكي!!... وبعدين مفيش غيرك ممكن يعمل القرف دا..

فيروز مشت عليها وضربتها بالقلم... وانا امي كانت حاضناني وبتعيط...

جاك: طب انتي بتكرهيني انا... جاكي ذنبها اي!!

لمي هدومك واطلعي بره..

نهى: انت بتطردني من بيتي!

جاك: بيتك!!!... لا مش بيتك.. امشي اطلعي بره.. واقسملك لو شوفت وشك ف اي مكان ماهرحمك..

عمو احمد: لو الكلام دا صح.. يبقى اطلعي بره..

فيروز: اطلعي يابت ياهند لميلها هدومها خليها تغور من هنا... اطلعي من حياتنا بقاا.. قرفتينا..

هند ونور طلعوا لمولها حاجتها كلها ونزلوا...

جاك: اظن كدا ملكيش حاجه تاني هنا... مشوفش خلقتك تاني.. بره..

نهى: مش هسيبكوا.. والله لاتندموا...

خدت شنطتها ومشت...

فيروز: انتي كويسه يابنتي!

جاكي: ايوا..

عمو احمد: ارمي الحاجات دي بعيد عن هنا ياجاك..

جاك خد الهدوم الاعمال وراح ولع فيهم بعيد... ورجع..

طلعت انا وماما الاوضه وهو طلع ورانا...

جاك: جاكي.. متخافيش.. مفيش حاجه هتحصل تاني..

جاكي: انت عملت كدا ازاي!

جاك: عرفت اوصل للدجال اللي عملت عنده الكلام دا وهو طلع الحاجات دي من مقبره.. وبعدين روحت عند شيخ كويس وهو اللي قدر يفك الاعمال دي..

جاكي: جاك دا اتبخر... والهدوم وقعت كدا ع الارض..

جاك: ماهو ياحبيبتي ياتحرق.. متخافيش من اي حاجه تاني.. خلاص مفيش حاجه هتضرك تاني..

ماما: هي لسه فيها الخصله دي!... دي مش اول مره تعمل الحاجات دي..

جاك: ازاي!

ماما: كانت بتعمل كدا لابوك.. عشان يسمع كلامها ع طول..

جاك: اهي مشت.. ومش هترجع تاني.. دلوقتي مش عايزكوا تقلقوا..

ماما بخوف: يعني دلوقتي مفيش اي حاجه هتضرها!!

جاك: متخافيش.. مش هخلي حاجه تضرها...

ـــــــــــــــــــــــــــــــــــــــــــــــــــــــــــــــ

عمو احمد: ازاي الكلام دا..

فيروز: الهي ينتقم منها ف نور عينيها..

عمو احمد: مكنتش اتوقع انها ممكن توصل معاها للدرجه دي.. اي الوقاحه دي..

فيروز بعصبيه: بت ياسما.. انتي كنتي تعرفي حاجه!!

سما: والله لا..

فيروز: يعني متعرفيش انها عملت كدا!

سما: والله العظيم ماكنت اعرف..

فيروز: انتي حسابك معايا لسه مجاش.. ماشي.. ماشي ياسما..

نزلنا تحت...

فيروز: خلاص ياجماعه.. كل حاجه اتحلت والشر مشي... بلاش جو النكد دا..

هند: صح.. بلاش نفضل قالبين كدا..

فيروز: انا هدخل اعملكوا احلى اكل بمناسبة ان العقربه دي مشت من هنا...

دخلت والبنات دخلوا معاها وعمو احمد مشي...

قعدت انا وجاك..

جاك: عملك حاجه!

جاكي: لا.. كان حاطط السكين ع رقبتي وفجأه اختفى..

جاك: الحمد لله... عدت..

جاكي: مش مصدقه... يعني اللي كان معايا دا جن!

جاك: شوفتي!.. بس انتي قويه جدا ع فكره..

جاكي: يعم قوية اي!!.. دانا كنت مرعوبه..

جاك: ابسط شئ... لو واحده غيرك كان زمانها ماتت.. المهم اقفلي الموضوع دا مش ناقص والله..

فجأه لقيت ماما جايبه بخور وجايه تبخرنا وتستعيذ بالله وتقرأ قران...

جت فوق دماغنا وقعدت تعمل كدا..

جاكي بضحك: بتعملي اي ياماما!

ماما: اسكتي خليني ابخركوا واحرسكوا من القرف دا..

ربنا يحميكوا ويبعد عنكوا العين والحسد والمرض..

جاك كان ماسك ايدي ومبتسم ع الاخر...

ماما: انا هطلع ابخر باقي البيت...

جاك: مامتك عسل والله..

جاكي: جاك انا مش مستوعبه لحد دلوقتي ان امي معايا..

جاك: افرحي.. كفايه اللي حصل.. مامتك رجعتلك اهي..

جاكي: افرح اي.. دانا طايره... صحيح افتكرت..

جاك: اي

جاكي: انت ليه عملت كدا ولبستني خاتم تاني!

جاك: لما موضوع السرقه دا حصل.. عرفت ان نهى عايزه تفرق بينا عشان شكت.. وانا حبيت اعرف الكل انك ليا.. سواء برضاهم او غصب عنهم...

جاكي: تدري اني احبك جدا..

جاك بابتسامة: ادري.. بقولك انا ماشي عشان عندي شغل..

جاكي: هو كل شويه شغل شغل..

جاك: لو عايزاني اقعد هقعد..

جاكي: اقعد لما تاكل الاول وبعدين امشي..

جاك: عينيا.. انت تؤمر بس..

فيروز خلصت الاكل وقعدنا ناكل وجاك قعد قدامي..

عمو احمد: والله مامصدق انك رجعتي يامنى..

ماما: نصيب.. مكتوبلي اشوف بنتي تاني..

بس انا مش فاهمه.. ازاي بعد اللي مصطفى عمله دا تجيبوه هنا تاني..

عمو احمد: هنوديه فين يعني!.. انتي مش شايفه هو تعبان ازاي..

منى: ازاي تسامحوه بس..

كانوا قاعدين يتكلموا وجاك عمال يخبطني ف رجلي..

عماله ابرقله عشان يسكت وهو مش راضي...

روحت ضربته جامد ف رجله..

جاك: اااه..

عمو احمد: في اي..

جاك: ها.. لا دا رجلي شدت عليا بس..

جاكي: لا الف سلامه..

جاك: انا همشي بقاا عشان عندي شغل..

فيروز: يابني كمل اكلك..

جاك: لا خلاص شبعت.. يلا باي..

بصلي وقالي بهمس..

جاك: بحبك..

ابتسمت ببلاهه لحد مامشي.. وبصيت لقيت ماما باصالي ورافعه حاجبها.. احييييه.. اتكسفت وبصيت ف الطبق...

خلصنا اكل وطلعت الجنينه...

قعدت اغني واتمايل زي الهبله ولفيت لقيت ماما ورايا..

جاكي: اعاا.. واقفه كدا ليه

ماما: خدي يابت تعالي هنا..

جاكي: احم.. نعم..

ماما: مالك ومال الواد دا... ومالك فرحانه وعماله تغني كدا ليه..

جاكي: يعني انتي عايزاني الاقيكي بعد كل دا وف الاخر مفرحش..

ماما: لا مش عشان كدا... النظرات دي بتقول ان في حاجه تاني..

جاكي: هيكون في اي يعني..

ماما: الواد دا كان بيقولك اي وهو قايم..

جاكي بضحك: واد مين بس..

ماما: عليا انا الكلام دا!!.. قولي يابت في اي..

جاكي: اقولك بس يبقى سر!

ماما: مش قولتلك في حاجه... قولي ياست..

جاكي بكسوف: بحبه..

ماما: حبك برص ياشيخه..

جاكي: اي دا في اي..

ماما: وهو بيحبك!

جاكي بابتسامة: ايون.. جدا..

ماما: هو اللي قالك!

جاكي: ايون.. وطلب ايدي قدام الناس كلها.. حتى شوفي..

رفعت ايدي ووريتها الخاتم..

ماما: بس دول اتنين..

جاكي: ماهو طلبني مرتين..

ماما: ماشاء الله... يافرحتي ياختي.. يعني انا يوم ماالاقيكي يروح حد ياخدك مني!!

جاكي: ياقلبي انتي.. محدش يقدر ياخدني منك..

ماما: كبرتي ياختي وبقيتي بتحبي..

حضنتني جامد وانا مبسوطه ياجماعه والله...

فضلنا قاعدين مع بعض نتكلم ونهزر لحد الليل...

جاك رجع وجمعنا كلنا...

عمو احمد: في اي تاني..

جاك: لا المرادي غير..

فيروز: في اي..

الكل كان موجود وانا وماما قاعدين..

هو جه قعد وكلم ماما...

جاك: انا بطلب من حضرتك ايد جاكي..

فرحت قووي وكنت واقفه ماسكه ابتسامتي عشان كفايه فضايح لحد كدا..

ماما: انا ملحقتش اتهنى بيها يابني..

جاك: ولا انا والله... قولتي اي

بصتلي وبعدين بصتله..

ماما: انا اسفه..بس انا مش موافقه..