رواية قلبي ليس بيدي الفصل الرابع والخمسون 54 بقلم حسناء مصطفي

احييييييييه..

وقفت مصدومه من المنظر وهو زقها بعيد وقام..

جاك: جاكي.. جاكي هو..

لفيت وشي وكلمته..

جاكي: كانوا عايزينك عشان الاكل.. عن اذنك..

جاك: جا... جاكي استني..

مايا: يابيبي سيبك منها وتعالى..

جاك: اخرسي بقاا..

لبس هدومه وطلع يجري ورايا..

جاك: جاكي استني.. ارجوكي.. انتي فاهمه غلط..

جاكي: اي اللي فاهماه غلط!

جاك: هي كانت سكرانه...

جاكي: ف اوضتك.. وقالعه.. وانت كمان قالع.. و..

جاك: انا كنت نايم..

جاكي: دخلت اوضتك ازاي لما انت كنت نايم... جاك انا دخلت لقيتكوا انتوا الاتنين قالعين وف وضع مُخل...وبعدين اصلا انا مالي.. انت جاي تفهمني ليه!.. انت حر ف حياتك... عن اذنك..

سيبته ورجعت للبنات وهو جه ورايا...

هند: اتأخرتوا ليه..

جاكي: كان نايم..

قعدوا ياكلوا وانا كنت بقلب ف الطبق ومش باكل.. وجاك نفس النظام...

فيروز: مش بتاكلوا ليه!

جاك: مليش نفس..

سابنا وقام والكل مستغرب عشان باين علينا...

فيروز: هو ماله ياجاكي... اي اللي حصل..

جاكي: محصلش حاجه... تلاقيه مصدع... انا رايحه اوضتي..

سيبتهم ورجعت اوضتي... اتوضيت وصليت...

فضلت قاعده لوحدي لحد مالوقت اتأخر والكل طلع.. نزلت قعدت ع البحر وحطيت الهاند فري..

ـ ممكن اعرف بتسمعي اي!

لفيت لقيته جاك..

بصيت قدامي تاني ومردتش عليه...

راح قعد جنبي..

جاكي: لو سمحت قوم..

جاك: ممكن تسمعيني!..

جاكي: مش عايزه اسمعك.. انا عايزه اقعد لوحدي..

جاك: اسمعيني وبعدين همشي...

جاكي انا معملتش حاجه.. ورحمة اسيل انتي فاهمه غلط..

جاكي: ماتبطل كدب بقاا..

جاك: جاكي انا مبكدبش... قولتلك انا كنت نايم وهي كانت سكرانه...

جاكي: والمفروض اني اصدق!

جاك: ومتصدقيش ليه!

جاكي: لان دي مش اول مره ياجاك..

جاك بعصبيه: شوفتيني نايم معاها قبل كدا!!

جاكي: ميخصنيش... اعمل اللي انت عايزه.. انت حر

جاك بتنهيد: انتي شايفه الموضوع ازاي!

جاكي: شايفه انك كنت معاها ف الاوضه لوحدكوا وقالعين ومقضيينها... مفيش اي زاويه تانيه ممكن اشوف منها... دا غير اني قولتلك انت حر.. اعمل اللي انت عايزه.. مش مضطر تبرر اي حاجه... عن اذنك

سيبته ودخلت اوضتي وطلعت قعدت ف البلاكونه لقيته لسه قاعد مكانه...

كان الوقت متأخر والكل نايم ومفيش غيره تحت والجو برد...

دخلت جوا وقعدت كتير لحد مالفجر اذن.. طلعت لقيته لسه بيقوم...

هو مشي وانا دخلت نمت..

ـــــــــــــــــــــــــــــــــــــــــــــــــــــــــــــــ

تاني يوم...

عمو احمد: عامل اي دلوقتي يامصطفي!

بابا: كويس.. جاكي فين!

عمو احمد: جاكي مع الجماعه.. راحوا يغيروا جو..

بابا: هي كويسه!

عمو احمد: الحمد لله.. هي بخير متقلقش..

بابا: خلي بالك منها يامصطفى.. انا حاسس اني مش هقعدلها كتير..

عمو احمد: اي اللي انت بتقوله دا.. بعد الشر ياراجل... ان شاء الله هتعيشلها وتجوزها كمان..

ـــــــــــــــــــــــــــــــــــــــــــــــــــــــــــــــ

صحيت من النوم لقيت الباب بيخبط..

طلعت فتحت وكانت هند...

هند: يلا ياجاكي.. هتفضلي هنا كدا كتير!

جاكي: معلش سيبيني لوحدي..

هند: انا مش فاهمه في اي!.. انتي وجاك متغيرين ليه!.. اي اللي حصل..

جاكي: محصلش حاجه.. انا بس مصدعه شويه..

هند: لا هتنزلي معايا دلوقتي..

جاكي: خلاص روحي وانا جايه وراكي... روحي خلاص جايه..

غيرت هدومي ونزلت..

منه: جاكي تعالي معايا..

جاكي: هنروح فين!

منه: تعالي بس هنتمشى كدا شويه..

جاكي: يلا...

مشيت معاها بعيد..

منه: قوليلي بقاا ياستي..

جاكي: اقولك اي..

منه: زعلانه من جاك ليه!

جاكي: وانا هزعل منه ليه!

منه: انتي فاهمه غلط ع فكره..

جاكي: انتي بتقولي اي..

منه: انا شوفت مايا وهي داخلاله الاوضه.. كانت سكرانه ومش قادره تقف.. وهي اللي فتحت الباب ودخلت..

جاكي: وبتقوليلي كدا ليه!

منه: عشان ملاحظه ان انتوا الاتنين متضايقين..

جاكي: لا متشغليش بالك.. جاك ميخصنيش عشان ازعل منه.. ف الاول وف الاخر براحته..

ـــــــــــــــــــــــــــــــــــــــــــــــــــــــــــــــ

مالك: ايوا ياجاك بس مينفعش..

جاك: سمعت انا قولت اي!.. مايا تمشي حالا..

مالك: ماشي تمشي... بس تفصلها من الشركه ليه!

جاك: هي عارفه هي عملت اي..

مالك: انت عارف مايا بقالها قد اي معانا!

جاك: ميلزمنيش..

مايا: انا اسفه.. انا اصلا مش فاكره انا عملت اي..

جاك: وانا مش عايزك معايا بعد اللي حصل..

مايا: ايوا بس..

جاك: سمعتي!!... اتفضلي..

ــــــــــــــــــــــــــــــــــــــــــــــــــــــ

هند: تعالي ننزل المايه ياجاكي..

جاكي: لا مش عايزه.. روحوا انتوا...

نور: اي اللي مش عايزه!.. تعالي يلا..

جاكي: هنزل ازاي!

هند: هتلبسي مايوه عادي يعني..

جاكي: لا ياست مش هينفع...

هند: يابنتي دا اسلامي.. يعني مفيش حاجه منك هتبان...

فكرت شويه كدا وبعدين قولت.. ليه لا.. اوكي..

جاكي: ماشي.. يلا..

طلعنا لبسنا ونزلنا..

جاكي: بس انا مبعرفش اعوم..

ادم: تعالي بس متقلقيش..

دخلنا انا وادم جوه شويه والبنات بره..

ادم: يعني لبستيه!

جاكي: عادي.. هي جت عليا!.. دا غير ان الكل لابس وهو مش مبين حاجه..

ادم: جاك لو شافك كدا هيزعل..

جاكي: مايزعل.. بقولك اي فكك منه بقاا..

فضلنا جوه المايه كلنا نهزر ونضحك....

جاك جه وقعد معاهم بره..

ياسين: كويس انك جيت..

جاك: خير..

ياسين: كان في موضوع كدا كنت عايز اكلمكوا فيه..

فيروز: خير يابني.. في اي!

ياسين: في كذا عريس متقدم لجاكي..

جاك: نعم!

ياسين: هما قالولي اقولكوا وبعدين نشوف..

فيروز: ايوا يابني.. بس دي لسه صغيره..

جاك: بتقولي اي انتي كمان!.. بقولك اي.. اقفل الحوار دا ومتفتحوش تاني... مفيش جواز..

نهى: وانت مالك... ملكش انك تقرر بدالها..

جاك: ملكيش دعوه انتي... عن اذنكوا...

سابهم وطلع ع البحر لقانا كلنا ف المايه...

وانا اول ماشوفته ناديت ع ادم...

جاكي: ادم.. ماتعلمني اعوم ازاي..

بص ع جاك...

ادم: متأكده!

جاكي: ايوا..

ادم: تمام..

بدأ يعلمني اعمل اي وهو رافعني ع المايه... جاك كان باصصلنا وع اخره..

فضلنا كدا شويه وبعدين طلعت انا وهو واحنا بنضحك..

ادم: قاعد كدا ليه.. ماتقوم تنزل المايه..

سابنا وقام طلع اوضته...

ادم: شكله زعل..

جاكي: ميهمنيش.. انا هطلع اغير بقاا..

ـــــــــــــــــــــــــــــــــــــــــــــــــــــــــــــــ

محمد: انتي تعرفي جاكي من امتى!

ندى: ياااه... دا من ايام ماكنا اطفال..

محمد: صحاب قوي بقاا..

ندى: جداا... دي اقرب واحده ليا.. اصلا جاكي مفيش منها اتنين.. حاجه كدا قمر قوي..

محمد: عارف..اصلا هي اقرب حد ليا هنا..

ندى: بس انا مش فاهمه.. موت اي ومش موت اي!.. هو اي اللي حصل!

محمد: دا موضوع كبير...

ـــــــــــــــــــــــــــــــــــــــــــــــــــــــــــــــ

طلعت فوق ودخلت اوضتي وفجأه الباب اتقفل مره واحده وانا زعقت وحد حط ايده ع بوقي..

دخلني جوه وكان معاه مطواه حاططها ع رقبتي..

ـ لو طلعتي نفس مش هتلحقي تخلصيه.. انتي فاهمه!

هزيت دماغي..

ـ جدعه.. دلوقتي ب...

لسه مكملش والباب خبط.. محدش رد... خبط تاني..

ـ اسمعي.. هتفتحي الباب وانا هقف هنا.. لو قولتي كلمه واحده صدقيني هبوظ وشك دا..

جاكي: حاضر..

هو وقف ورا الباب وانا فتحت حته صغيره منه..

جاك: جاكي انتي كويسه!

جاكي: احم.. ايوا كويسه.. في حاجه!

جاك: انا سمعتك بتزعقي.. وبعدين انتي بتعيطي ليه!

بصيت عليه لقيته رافع المطواه ف وشي..

جاكي: لا لا.. مفيش حاجه... امشي..

جاكي: طب انتي قافله الباب كدا ليه!.. افتحيه كويس..

جاكي: لو سمحت.. انا تعبانه وعايزه انام.. عن اذنك

قفلت الباب والشخص دا رجع مسكني تاني...

ـ دلوقتي بقاا امشي قدامي وها....

مكملش وفجأه الباب اتفتح وانا زعقت... طلع جاك.. فضلوا يضربوا ف بعض وانا واقفه بعيد بعيط..

الشخص دا كان حاطط حاجه ع وشه...

جاك فضل يضربه راح الشخص دا عوره ف دراعه.. جاك اخد منه المطواه وضربه لحد ماوقع ع الارض... طلب الامن وطلعوا خدوه وطلبوله الشرطه...

جاكي: جاك انت كويس!

جاك: انا كويس متخافيش..

دورت ف الاوضه ع علبة الاسعافات ولقيتها وروحت لفيتله دراعه وانا بعيط..

جاك: خلاص بقاا بطلي عياط..

جاكي: هو مين دا..

جاك: دلوقتي هيعرفوا وهيقولولي.. انتي كويسه!

هزيت راسي وسكت..

كان سايبني وماشي..

جاكي: رايح فين!

جاك: داخل اوضتي..

جاكي: وهتسيبني لوحدي!

جاك: تعالي اقعدي معايا لحد مايطلعوا... لو حابه يعني..

مشي وانا مشيت وراه...

دخل الاوضه وقعد يتكلم ف الفون وانا دخلت قعدت ع السرير...

خلص وجه..

جاك: دا حرامي... كان جاي ف سرقه.. متقلقيش.. دلوقتي مقبوض عليه...

جاكي: تمام..

بص ع لبسي شويه وبعدين راح قعد قدامي وبدأ يشتغل...

فضلت كدا كتير والباقيين لسه تحت..

ضميت رجلي ودموعي نزلت..

جاك كان مركز ف شغله وبعدين بصلي..

جاك: اي دا في اي... بتعيطي ليه!

جه قعد قدامي..

جاك: مالك!

جاكي: مفيش..

جاك: امال بتعيطي ليه!

جاكي: لا مفيش..

جاك: هو قربلك!

جاكي: لا لا.. انا بس.. مفتقده امي..

جاك: امم..

جاكي: يمكن لو كانت معايا مكنش حصلي كل دا...

جاك: هنلاقيها ان شاء الله...

جاكي انا عايز اقولك حاجه.... بس ف الاول انا عايز افهمك اني معملتش حاجه مع مايا..

جاكي: جاك.. انا مليش دعوه.. انت حر..

جاك: اي اللي لابساه دا!... هو مش عِند ياجاكي.. انتي شايفه شكلك عامل ازاي!!.. مشوفتيش الشباب كانت بتبصلك ازاي تحت!

جاكي: كنت عايزه انزل المايه..

جاك: لو كنتي قولتيلي كنت وديتك مكان بعيد انتي والبنات واعملوا فيه اللي انتوا عايزينه..

جاكي: معلش.. مكنتش فاضي..

جاك بعصبيه: قولتلك معملتش حاجه.. انتي ليه مش عايزه تفهمي.. هي اللي جتلي وكانت سكرانه.. وانتي دخلتي شوفتينا كدا...

سابني ونزل وانا فضلت اعيط... معرفش بعيط ع اي بالظبط.. بس انا عايزه اعيط...

ـــــــــــــــــــــــــــــــــــــــــــــــــــــــــــ

نور: هي جاكي فين!

سما: تقريبا طلعت اوضتها..

فيروز: سيبوها براحتها..

جاك نزل قعد معاهم..

فيروز: كنت فين..

جاك: كنت فوق..

فيروز: اقعد معانا شويه بقاا.. انت كل حاجه شغل كدا!

سما: طب ياجماعه انا عايزه اروح اشتري شوية حاجات من هنا..

محمد: تعالوا اوديكوا..

هند: والله انك عيل جنتل يااخي..

محمد: ايون ايون عارف.. يلا.. مش هتنادوا جاكي!

فيروز: لا سيب جاكي..

مشوا مع بعض كلهم...

فيروز: تعالى ياجاك عايزاك..

خدته وراحوا بعيد..

فيروز: قولي بقاا.. اي اللي حصل مزعلكوا انتوا الاتنين كدا!

جاك: محصلش حاجه..

فيروز: بص يابني... انا هقولك كلمتين عشان ابقى عملت اللي عليا.. لو انت بتحب جاكي.. خد خطوه.. متستناش.. لو الاوان فات هتندم قوي... هيبقى اكبر من ندمك وزعلك ع اسيل... عشان ربنا بعتلك حد يطبطب عليك وانت ضيعته... وانا عن نفسي اتمنى ان حاجه زي كدا تحصل.. اتمنى ان جاكي تكون هي نصيبك يابني... صدقني محدش هيصونك قدها..

جاك: وعرفتي منين انها بتحبني..

فيروز: انت اللي تعرف مش انا... لو انت بتحبها بجد قولها.. قولها يابني..

جاك: فلنفترض اني فعلا بحبها... افرضي طلعت هي مبتحبنيش... هو انا حمل وجع جديد!..

فيروز: هيبقى احسن من انك متقولهاش وتضيع من ايدك.. واديك شايف... بيتقدملها كتير.. ومش دول بس.. دا في كتير اتقدم وقال لعمك.. بس الوقت مكنش مناسب عشان نتكلم ف حاجه زي دي... انت حر.. انا عملت اللي عليا...

سابته ومشت وهو فضل قاعد لوحده... شويه وبعدين طلع اوضته..

دخل لقاني نايمه...

جاك: جاكي.. جاكي..

قومت مخضوضه..

جاك: اهدي اهدي دا انا..

حضنته جامد وفضلت اعيط..

جاك: في اي..

جاكي: كانت بتخنقني..

جاك: هي مين..وانتي عرقانه كدا ليه!..

فضلت اعيط وانا حضناه...

جاك: طب بس خلاص.. اهدي..

شويه وبعدت عنه..

جاك: اهدي.. اكيد كان كابوس... قومي غيري هدومك عشان متبرديش...

بصيت عليه بخوف..

جاك: متخافيش... مفيش حاجه..

جاكي: بس انا خايفه اروح هناك..

جاك: طب اروح معاكي!

جاكي: لا.. ااه... بص تعالى بس اقف بره..

ضحك وبصلي..

جاك: حاضر.. يلا..

دخلت غيرت وهو واقف بره... خلصت وطلعت..

جاك: تحبي تنزلي شويه!

جاكي: ماشي..

نزلت انا وهو...

جاكي: امال البنات فين!

فيروز: راحوا يلفوا شويه..

جاكي: ماشي..

فيروز: قولها ياجاك..

جاكي: يقولي اي!

فيروز: في كذا عريس متقدملك..

جاكي: نعم!!

فيروز بخبث: هو جاك رفض.. بس احنا منقدرش نقول حاجه غير لما نرجعلك... وبعدين يابنتي اي المشكله... شوفيهم يمكن يعجبك حد منهم..

جاك: لا ياشيخه!!

جاكي: انتي بتقولي اي!!... لا انا مش مستعده لأي حاجه دلوقتي..

فيروز: خلاص.. اقعدي معاهم وشوفي... ولو عجبك حد نقدر نأجل..

جاك: فيروز... ماتهدي في اي..

فيروز: وانت مالك انت..

جاكي: يافيروز.. انا مش موافقه.. انا مش هقعد مع حد ولا هشوف حد... مش ناقصه هي..

جاك بص لفيروز بانتصار وابتسم...

فيروز: طب خدها ياجاك وروحوا لفوا شويه..

جاك: يلا!

جاكي: يلا..

مشينا انا وهو مع بعض..

مامت ادم: اي يافيزو!!.. واضح عليهم قوي..

فيروز: شوفتي!.. انا قولت كدا... بس الاتنين بيعاندوا نفسهم...

ـــــــــــــــــــــــــــــــــــــــــــــــــــــــــــــــ

هند: مش كانت جاكي جت معانا!

محمد: مافيروز اللي قالت سيبوها..

نور: عشان متقعدش لوحدها بس..

ادم: ياجمااااعه... تعالوا نتصور..

نور: ياشيخ خضيتني..

ادم بضحك: طب يلا..

ـــــــــــــــــــــــــــــــــــــــــــــــــــــــــــــــ

جاك: اممم.. هتفضلي ساكته كدا!

جاكي: اقول اي..

جاك: اي حاجه..

جاكي: معنديش..

جاك: اممم... طب ممكن تقعدي هنا ثواني!

جاكي: هتروح فين!

جاك: دقيقه بالظبط..

جاكي: ماشي..

سابني ومشي ورجع بسرعه..

جاك: يلا..

كملنا مشي...

جاك: لسه زعلانه!

جاكي: وازعل ليه!

جاك: يعني انتي مصدقاني!

جاكي: مش هتفرق..

جاك: هتفرق معايا... اتفضلي..

لقيته مطلع ايده من ورا ضهره وماسك ورده..

جاكي بابتسامه: اي دا!

جاك: حسيتك بتحبي الورد..

جاكي: اكتر من اي حاجه.. بس ليه!

جاك: اممم... اعتبريها اعتذار بسيط عن اللي حصل النهارده..

جاكي: مش مضطر..

جاك: لا مضطر.. والمهم دلوقتي انك تسامحيني..

جاكي: انا مش فاهمه انت بتتكلم كدا ليه!.. انا مليش اني ازعل ولا انت مضطر تعتذر..

جاك: انا فصلت مايا..

جاكي بفرحه: بجد!!... قصدي يعني ليه!

جاك: بعد اللي حصل دا مظنش انها ينفع تفضل معايا..

جاكي: بس مينفعش تقطع عيش حد... رجعها.. ملوش داعي..

جاك: انا طردتها عشان اثبتلك انها متفرقش معايا..

جاكي: رجعها.. مش لازم تثبتلي..

جاك: هرجعها لما تسامحيني..

جاكي: خلاص مش زعلانه..

جاك: وانا اتأكد ازاي!

جاكي: عايزني اعمل اي..

جاك: اممم...مثلا اطلبي اي حاجه..

فجأه جتلي مسدج... فتحت لقيت ادم باعتلي صوره مع البنات... وكاتبلي "خليكي انتي مع الكئيب بتاعك"

جاكي: تمام.. نتصور..

جاك: نتصور!

جاكي: ااه.. دا طلبي..

جاك: اشطا يلا..

جاكي: ياسطا انت طويل كدا ليه... خد صور انت..

خد الفون ولسه هيصور روحت انا مسكت الورده وقربتله وهو بصلي وابتسم وخد الصوره..

جاك: اقفي حلو بقاا..

جاكي: لا استنى دي عظمه...

جبت الصوره وكانت عظمه فعلا...

جاكي: دي حلوه قووي.. بس صور تاني..

جاك: ماشي.. بصي طلعي لسانك... بوز بطه بقااا..

روحت ضحكت بصوت وهو خد الصوره... الصور بتيجي صدفه كدا بس حقيقي بتطلع عظمه..

جاك: استني..

خد مني الورده وحطها ف الطرحه جنب ودني..

جاك: كدا قمرين..

خدنا الصور وبعدين بعتهم لادم..

"خليك انت مع البنات وخليني انا مع القمر ابو دقن داا"

جاك: تحبي تاكلي حاجه!... اجيبلك شيكولاته!

جاكي: تؤتؤ.. مبحبهاش..

جاك: مين ياختي!

جاكي بضحك: مبحبهاش والله..

جاك: اما انتي غريبه بشكل... في بنت مبتحبش الشيكولاتة!

جاكي: ايون.. انا..

جاك: انتي كدا هتوفري كتير..

جاكي: يعني اي!

جاك: لا ولا حاجه.. طب اجيبلك اي..

جاكي: هات غزل بنات ياسطا.. بس هات كتير مش ناقصه بخل هي..

جاك: ماشي ياختي..

راح اشترى وجه..

جاك: حلو كدا!

جاكي: تمام... خد بقاا الله لا يسيئك صورنا صورتين كمان..

جاك: تاني!!.. انتي هبله!

جاكي: اول مره تعرف!.. اخلص يلا..

مسك الفون وقعد يصورنا بغزل البنات..

جاك: ع فكره انتي قصيره قووي..

جاكي: عادي..اني جميله بردو..

جاك: استني نصور ڤيديو..

فتح الڤيديو ومشينا... عدينا جنب واحد مشغل اغنية "انا بعترفلك"...

وطبعا طبعا احنا تافهين ومش محترمين ودي حاجه معروفه يعني.. فقعدنا نرقص..

جاك: معلش ياطنط ممكن تصورينا واحنا بنرقص..

ـ ياختي قمر.. هات ياعسل..

جاكي بضحك: انت بتعمل اي يخربيتك!

جاك: يلا بس..

مسك ايدي وقعدنا نرقص..

"انا بعترفلك عجباني.. بعد الكلام دا هقول تاني.. جابني الجمال دا ووداني.. والضحكه دي مفيش بعديها.. وكلام مابينك ومابيني.. عماله تحلوي ف عيني.. بعنيكي دول علقتيني.. والنظره ديه بموت فيها... قوليلي يلاا.. اي الجمال دا كله.. قوليلي يلا اي الدلال دا كله... دا اللي زيك، في الزمان دا قلوا...

جاك بضحك: يلا لفي برويته...

استني خليكي معايا.. دانا سيبت كل اللي وراياا.. مانا ف الجمال شايفك آيه.. ومفيش كدا ف الدنيا دي.. وعليكي والله طريقه.. علقتي قلبي انا ف دقيقه.. انا مش بجاملك دي حقيقه... حتى القمر جنبك عادي... "

كنا بنرقص ونغني مع الاغنيه والناس بتبصلنا وتضحك..

جاك: هاتي ياقمر شكرا..

ـ هي خطيبتك دي!

بصلي وابتسم..

جاك: قولي يارب..

ـ يارب يابني..

خد منها الفون ومشينا واحنا بنضحك..

جاكي: اديني ابعتلهم الفيديو..

جاك: اشمعنى!

جاكي: ماهما بيغيظوني عشان خرجوا من غيري وبيبعتولي صورهم..

بعتلهم الڤيديو وبصيت لقيت ادم رد..

جاكي: اي رايك..

جاكي: امشي بقاا مش فاضيالك..

بعتله المسدج وقفلت..

جاكي: الله.. جاك جاك..

جاك: اي عايزه اي..

جاكي: جاك بص..

جاك: بتزعقي لي وطي صوتك.. في اي..

جاكي ببراءه: عايزه عروسه..

جاك: نعم!

جاكي: خلاص مش عايزه..

جاك: خلاص تعالي يابااااي عليكي.. . عايزه انهي واحده..

جاك: اللي هناك دي..

جاك: ايوا دي حلوه.. استني..

راح عند الراجل وانا استنيته بعيد..

بصيت لقيته جاي ومعاه عروسه ودبدوبين...

جاكي: اي كل دا...

جاك: ماهو الدبدوب دا عجبني الصراحه... خدي انتي دبدوب والعروسه وانا اخد الدبدوب التاني.. هما زي بعض عمتا..

جاكي: وانت تاخد ليه!.. هي غيره وخلاص!..

جاك: اما انتي مهزءه بصحيح.. والله ارميهم ف البحر..

جاكي: لا خلاص خلاص هات...

جاكي: صورني بقاا..

جاك: صبرني يارب..

جاكي: معلش ياقمر..

جاك: لا..

جاكي: معلش اخر حاجه..

جاك: لا..

جاكي: ياطنط.. مش راضي يصورني يرضيكي كدا..

ـ ماتصورها يابني.. هو انت عشان حليوه يعني هتتنك عليها.. ماهي حلوه هي كمان.. صورها ياعسل عشان تحبك...

سابته ومشت وهو واقف متنح وانا ميته ضحك..

جاك: اي اللي حصل دا!

جاكي: اسمع كلامها بقاا عشان احبك.. امسك..

خد الفون وانا مسكت الدبدوب والعروسه وهو صورني..

جاك: ماتقفي كويس..

جاكي: صور وانت ساكت..

جاك: امسكي بقاا.. متقوليش صور تاني..

جتلي مسدج فتحت لقيته ادم... كان باعت ڤويس..

شغلته وسمعته انا وجاك..

ادم: ايوا ايوا الناس الرايقه دي.. ياريتني معاكوا والله.. عمو جاك لو سمحت انا عايز زيها والنبي..

نور: ايون وانا كمان ياجاك.. اشمعنى جاكي يعني..

هند: لا انت هاتلنا كلنا بقاا..

خد مني الفون وسجل..

جاك: مبجبش لأي حد.. هي ناس معينه بس..

عطاني الفون وسبقني وانا واقفه استوعب.. هو قال ايييي... طب دا معناه اي.. طب دا معناه ان انا الناس دي!..

جاك: جاكي..

جاكي: جايه اهوو..

طلعت اجري مشيت جنبه..

جاكي: المايه قمر قووووي...

جاك: روحي البسي مايوه وانزلي..

جاكي: خلاص يبرو قلبك ابيض...

جاك: والله حرقتي دمي..

جاكي: اسم الله عليك ياقمر.. دانا مطلعاك من حضنها بلبوص..

جاك: انا!!

جاكي: لا امي.. ولااا انا مكدبتش لما قولت انك بتاع نسوان اصلا..

جاك: انا بتاع نسوان!

جاكي: ايوا..

كان في واحد معدي..

جاكي: عمو... الواد دا بتاع نسوان..

ـ ماكلنا بتوع نسوان..

الراجل ضحك ومشي وجاك فضل يضحك..

جاك: عشان تعرفي انك ظلماني..

جاكي: بتاع نسوان بردو...

جاك: طب يلا نرجع بقاا..

جاكي: هيا بنا..

لفينا تاني ورجعنا.. قربنا من الاوتيل..

جاك: رفضتي ليه العرسان!

جاكي: اممم... مش مستعده لدا..

جاك: كان ممكن توافقي وتأجلي..

جاكي: تؤتؤ.. مش عايزه حد منهم..

جاك: وانتي تعرفيهم!

جاكي: لا..

جاك: امال اي.. مش يمكن حد يعجبك..

جاكي: هو واحد بس... مفيش غيره..

جاك: مين دا..

جاكي: تؤتؤ.. ملكش دعوه..

جاك: لا بجد مين!!

جاكي: مش هقولك والله..

جاك: طب اوصفيه..

جاكي: اممم... قصير واسمراني وعنيه خضراا واملس وشعره قصير..

جاك: مفيش حد ف حياتنا بالمواصفات دي..

جاكي: اقولك حاجه!

جاك: قولي..

رفعت نفسي عشان اوصل لودنه..

جاكي: اعكس الصفات دي..

سيبته ودخلت بسرعه وهو واقف يلعب ف شعره..

جاك: ايوا يعني مين بردو!.. خدي ابت..

دخل ورايا...

جاكي: هاي شباااااب..

هند: ايوا الناس اللي اتفسحت دي..

جاكي: مانتوا اتفسحتوا من غيري.. تستاهلوا..

فيروز: مين جابلك الحاجات دي!

جاكي بابتسامه: جاك

مامت ادم بخبث: ومال الضحكه من الودن للودن ليه!

جاكي: اي دا.. لا عادي يعني..

ادم: خدي شوفي يافيزوو عاملين اي..

شغلهم الفيديو وقعدوا يتفرجوا ويضحكوا ويبصولنا..

فيروز: ومين بيصوركوا!

جاكي: واحده ست كانت قاعده..

نور: الله ينور ياجاك... امال عايش دور رجل الاعمال معانا ليه!!.. مانت حلو وبتعرف ترقص اهو..

فيروز: جاك مطلع لسانه!!!... بوز بطه كمان!!!..

انتي عملتي اي ف الواد يخربيتك!!...

الكل كانوا قاعدين يضحكوا وانا بضحك ومكسوفه ياجدعان...

جاك كان قاعد قدامي وباصصلي ومبتسم..

كنت مركزه معاهم وعيني جت ف عينه صدفه كدا.. لقيته بيهمس بحاجه...

جاك: ب*****ك

مكنتش فاهمه هو بيقول اي.. او مكنتش مستوعبه.. او مكنتش عايزه اصدق ان هي دي الكلمه اللي بيقولها... بس قلبي كان بيدق جامد وكنت دايخه....

رجعت بصيتلهم تاني وانا بحاول اسيطر ع ابتسامتي اللي واكله نص وشي دي...

فيروز: كانت عماله تبصلي وتضحك..

جاكي بضحك: عايزه اي ياست..

فيروز: تعالي هاتي بوسه..

قومت حضنتها وبوستها..

راحت همستلي ف ودني..

فيروز: بلاش تعاندي.. ابتسامتك فاضحاكي..

سيبتها وروحت قعدت مكاني...

جاكي: احم... طب انا هطلع اوضتي بقاا عشان تعبت..

سيبتهم وطلعت... كنت طالعه اغني واترقص...

ماشيه ف الطرقه اغني..

في نصيب وبيتشال لينا.. مش حب كلام ف اغاني.. فبنقفل بابنا علينا.. نستنى النص التاني... يااااه.. بقيت ويااه ويااه دي احلى...

جاكي: اعاااا...

لفيت لقيته واقف ورايا وعمال يضحك..

جاك بضحك: فصلتيني والله

جاكي: اخص عليك والله.. قلبي وقف..

قرب مني وانا نبضات قلبي بترقصصصص..

جاك: طب.. كنت عايز اقولك حاجه..

جاكي: احم.. قول..

بصلي شويه وسكت وانا مش عارفه هو عايز اي.. بصيت لقيته مسك ايدي وباسها... احيييييه... انت بتعمل اييييي...

سابني ودخل اوضته وانا واقفه ببلع ريقي بصعوبه من الصدمه.. اتحركت بالعافيه ودخلت اوضتي وقفلت الباب.. ومن هنا ابتدت فقرة الهبل...

قلعت هدومي وشيلت الطرحه وشغلت اغاني عاليه وقعدت اتنطط وارقص انا والدبدوب...

جاك كان سامع الاغاني من اوضته ومبتسم...

فضلت كدا طول الليل... ارقص واغني واتفرج ع الصور... معرفش اي الهبل دا.. بس.. انا مبسوطه ياجدعان... اتبسطواا معايا بقااا... ولوولللللوووووي...

فجأه جتلي مسدج.. فتحت

المسدج من رقم غريب.. رديت قولت مين بس دا تقريبا عملي بلوك المهزء... بس انا قلبي دق جامد.. يلا خلينا نعيش يوم عدل شويه..

قفلت وحضنت الدبدوب ونمت...

ـــــــــــــــــــــــــــــــــــــــــــــــــــــــــــــــ

نهى: قولتي اي!

سما: يعني انتي عايزاني اخلي جاك يكره جاكي..

نهى: بالظبط..

سما: وانا هستفاد اي!

نهى: انتي بتحبي جاك.. انا عارفه دا كويس.. مش محتاجه تكدبي عليا.. اضمنلك ان جاك هيبقى ليكي بس لو دا حصل..

سما: بس هو مش بيحبني..

نهى: حب اي وكلام فارغ اي.. المهم يتجوزك الاول وبعدين ييجي الحب دا..

سما: ماشي.. موافقه..

نهى: اسمعي اللي هقولك عليه دا وتنفذيه بالحرف الواحد...

ـــــــــــــــــــــــــــــــــــــــــــــــــــــــــــــــ

صحيت تاني يوم والضحكه لسه ع وشي..

بصيت لنفسي ببلاهه ف المرايه..

انا بضحك ع اي!.. اي الهبل دا.!..

كانت الساعه حوالي ٣...

دخلت اخدت شاور واتوضيت وصليت وغيرت.. فتحت الباب ولسه هنزل بس لمحت ورقه محطوطه ع الباب..

خدتها وقريتها..

"تعالي الساعه ٤ ع المكان دا******... البسي الفستان دا ومتقوليش لحد..."

بصيت ف الارض لقيت شنطه وبوكيه ورد..

معرفش مين دا... دخلت لبست الفستان وحطيت ميكب كمان.. لا ادري لماذا بس انا ماشيه ورا احساسي...

خلصت واستنيت لحد اربعه الا ربع.. نزلت وروحت المكان دا..

لقيت مكان غريب كدا بس شكله قمر.. كان في ورقه تاني مكتوب عليها...

" كويس انك وصلتي.. خبطي خبطتين ع الباب وبعدين ادخلي"

كنت خايفه نوعا ما.. بس عملت كدا ودخلت..

دخلت بالراحة وكانت الدنيا ضلمه.. فجأه النور فتح.. بس مكنش نور قوي.. كانت اضاءه خفيفه بس بينت المكان..

دخلت وبصيت لقيت المكان كله بلالين وزينه وحاجه قمر كدا..

دخلت لقيت ورقه تاني مكتوب عليها..

"قولي وحشتني"..

مكنتش عارفه اي اللي بيحصل... وانا ف مكان زي الجنينه كدا بس متغطي.. يعني مفيش شمس.. هي الاضاءه دي بس..

جاكي: وحشتني..

فجأه ورد نزل عليا من فوق.. بصيت لقيت ورد كتير نازل وانا واقفه مصدومه... احييييه... انا بحلم طيب!..

لمحت ورقه تانيه..

" افتحي الباب"..

فتحت الباب لقيت طريق مرسوم بالورد.. دخلت وكان المكان كله متزين...

دخلت وفضلت اتفرج ع المكان وانا مش مستوعبه..

لقيت باب ووراه نور.. فتحته..لقيت بسين ووراه البحر والمنظر ياخد القلب والله...والبسين كان كله ورد... كمية ورد وزينه مش طبيعيين والله.. انا لو بحلم الحلم مش هيبقى بالجمال دا..

وف وسط افكاري وتوتري حد حضني من ورا..

ـ وحشتيني..