رواية قلبي ليس بيدي الفصل الحادي والثلاثون 31 بقلم حسناء مصطفي

جاكي بخوف: جاك.. جاك فوق..

كان مغمى عليه وانا مش عارفه اعمل اي.. فضلت الف ف المكان دا ولقيت مايه فاخدتها ورشيت ع وشه ولسه مفاقش...

جاكي: جاك.. جاك فوق بالله عليك.. جااك

فضلت ادوس ع قلبه يمكن يفوق وبردو مفيش فايده...

حاولت اطلع من المكان دا بس معرفتش ورجعت تاني...

مكنش قدامي غير اني اعمله تنفس صناعي...

جاكي: لا اكيد مش هعمل كدا... جاك فوق بالله عليك... جاك... طب هعمل اي انا دلوقتي..

حاولت اقرب منه واعمله التنفس بس كنت برجع تاني..

اخدت نفسي واتشجعت وعملت كدا وانا قلبي هيطلع من مكانه...

____________________

محمد ف اوضته عمال يفكر ف حوار الشغل والبنات ف اوضهم وعمو احمد ف اوضته...

نهى كانت معديه من قدام اوضتي راحت خبطت ع الباب.. محدش فتح.. راحت فتحت ودخلت ملقتنيش...

نزلت لفيروز..

نهى: فيروز!

فيروز: نعم!

نهى: امال چاگي فين!

فيروز: بتسألي عليها ليه!

نهى: عادي اصلي دخلت اوضتها ومكانتش هناك..

فيروز: مش هناك ازاي.. يمكن ف الحمام..

نهى: دخلت وملقتش حد..

فيروز: طيب انا هشوفها..

فيروز طلعت ودورت ف الاوضه كلها وملقتش حد..

فيروز: وياترى روحتي فين انتي كمان!

دخلت اوضة بابا عشان تشوفني يمكن قاعده معاه.. ملقتش حد بردو.. راحت للبنات وبردو كانوا لوحدهم..

فيروز: لا كدا في حاجه...

__________________

اول ماصحي بعدت عنه بسرعه.. وهو قام ع طول..

جاك: انتي بتعملي اي!

جاكي: ك.. كنت بفوقك.. عشان اغمى عليك..

مسك دماغه جامد وكان واضح انها وجعاه...

چاگ: هو انا اغمى عليا من بدري!

چاگي: يعني..

قام غسل وشه من الدم ودماغه كانت مفتوحه جامد..

چاگي: مينفعش كدا.. دي لازم تتخيط..

مردش عليا...

جاكي: بقولك لازم تتخيط..

چاگ: مش عايز ياست..

جاكي: مينفعش.. كدا هتفضل تنزف..

جاك: جاكي اطلعي بره..

جاكي: مش هطلع غير لما تيجي معايا عشان اخيطلك دماغك.. بلاش عناد بقاا يلا..

طلع وانا طلعت وراه ولفينا كتير ومكنتش متخيله اني لفيت كل دا لوحدي...

اول مادخلنا من باب البيت فيروز ونهى جم يجروا..

فيروز: جاك!!

راحت حضنته جامد..

فيروز: اي يابني انت مش كنت مسافر!.. وبعدين اي الدم دا!!

نهى: اي الدم دا!

بصلي ومكنتش عارفه المفروض نقول اي..

جاكي: عمل حادثه..

فيروز بخوف: حادثة اي.. تعالى اقعد..

جاك: انا كويس يافيروز.. متقلقيش..

نهى: حادثة اي اللي عملتها.. انت مش المفروض سافرت اصلا..

جاك بصلها ومردش..

فيروز: طب خليك اما الفلك دماغك..

جاكي: لا يافيروز دي لازم تتخيط الاول..

فيروز: طب انا هرن ع الدكتور..

جاكي: لا انا بعرف..

فيروز: والنبي!.. طب يلا يابنتي بسرعه..

طلعت جبت الحاجات ونزلت قعدت جنبه..

جاكي: بس مفيش بنج..

جاك: اشتغلي واخلصي..

بدات اخيط وكنت عارفه انها هتوجعه جامد... بس متأثرش.. ولا كإني بعمله مساج.. ولا رمش حتى..

كنت مستغربه جدا.. هو دا طبيعي!..

قولت اتقل ايدي شويه عشان اعرف هو بني ادم زينا ولا لا..

فحاولت اوجعه بس بردو متهزش.. بس بصلي بصه اللي هو اتلمي بدل ماطلع روحك...

خيطت دماغه وخلصت ولفيتها...

جاكي: خلصت..

نهى: فهمني بقاا يااستاذ..

جاك ببرود: فيروز انا طالع انام..

فيروز: اجيبلك تاكل ياحبيبي!

جاك: لا مش جعان.. راح باس ايدها..

الصراحه عجبني التصرف بس بصيت ع مامته لقيتها اتعصبت واتضايقت...

فيروز: وانتي يابت انتي كنتي فين وقعتي قلبي عليكي..

جاكي: كنت بره ف الجنينه بتمشى..

نهى بخبث: امال عرفتي منين انه عمل حادثه..

جاكي: هاا.. لا مانا سالته لما لقيته داخل كدا وهو قالي..

يلا يافيروز انا طالعه اشوف بابا وانام..

طلعت روحت اوضة بابا وكان نايم.. بوسته وروحت اوضتي..

اي دا احيه... انا قربتله بجد!!!!... نهار طين عليا... طب هو فكر ف اي دلوقتي!!..

بس قلبي كان واجعني قوي عليه.. فتحت موبايلي ودخلت ع بروفايله تاني وكان حاطط لينك صراحه فقولت ادخل اقوله حاجه يمكن تهون...

مكنتش عارفه اكتب اي وقعدت افكر لحد ماكتبت..

بعتها وقومت اتوضيت وصليت ودعيتله كتير وبعدين نمت....

___________

جاك دخل اوضته وغير هدومه ومسك صورتها وقعد يتفرج عليها ودموعه نزلت...

حضنها ونام....

____________

تاني يوم...

صحيت لقيت الساعه ٧... قومت اتوضيت وصليت ونزلت...

جاكي: صباح الخير..

فيروز: صباح النور..

جاكي: امال فين البنات..

فيروز: لا البنات مش هيروحوا النهارده..

جاكي: ليه!

فيروز: عشان جايلنا ضيوف وهيساعدوني ف المطبخ..

جاكي: خلاص مش اروح انا كمان وهقعد اساعدك..

فيروز: لا يابنتي ملوش داعي..

جاكي: لا لا مش لازم اروح.. وكدا كدا ادم بيحضرلي المحاضرات لما بغيب ربنا يخليه ليا يعني..

ـ "بصوت خافت" صباح الخير..

بصيت لقيته جاك...

جاكي: صباح النور..

فيروز: صاحي ليه ياحبيبي بدري كدا!

جاك بتعب: مصدع.. ممكن تعمليلي قهوه..

فيروز: لا انت تفطر الاول وبعدين القهوه..

جاك: لا معلش يافيروز.. اعمليلي قهوه بس..

فيروز: حاضر..

جاكي: عامل اي دلوقتي!

بصلي شويه كدا...

جاك: كويس... كويس قووي..

وسابني وطلع..

انا معرفتش هو في اي.. ولا هو زعلان مني ولا لا..

فيروز: ربنا يعينك يابني..

جاكي: هو ليه لوحده كدا..

فيروز: هو حابب كدا..

جاكي: ازاي..

فيروز: يعني هو بيحب العزله.. مبيحبش يبقى وسط الناس..

بيحب يعيش ف عالمه الحزين دا لوحده..

جاكي: طب ليه مامته سايباه كدا.. المفروض تقرب منه وتخفف عنه شويه..

فيروز: واضح انك عارفه هو مر بإيه..

جاكي: ها.. لا هو حكالي من غير مايقصد كام حاجه كدا..

فيروز: مهما عرفتي.. هتفضلي متعرفيش عنه حاجه...

جاك انا اللي مربياه من وهو صغير.. ومع ذلك بكل المعلومات اللي اعرفها دي، معرفش عنه حاجه.. جاك دا بير اسرار.. عنده حاجات محدش يعلم عنها شئ..

عارفه لما البير يكون مليان لاخره وفي مايه تتكب بره!..

جاكي: اه

فيروز: هو كدا.. لو حكى حاجه، بيكون فايض بيه ومقدرش يكتم اكتر من كدا.. بس هيفضل كل اللي حكاه، هما شوية المايه اللي وقعوا من البير دول.. غير كدا بيفضل كاتم...

جاكي: طب ماهو دا غلط.. دا هيخلي حالته النفسيه مش كويسه وهيكتئب وممكن يتعب كمان..

فيروز: ومين قالك ان كل دا محصلش.. هو عنده حاله نفسيه واكتئاب ووسواس قهري كمان...

بس ياحبة قلبي مستحمل وكاتم جواه.. ولو روحتى تتكلمي معاه مش هتعرفي توصلي لحاجه...

هو بيتكلم لما يكون ليه مزاج بس..

جاكي: ربنا يعينه...

فيروز خلصت القهوه وكانت لسه طالعاله..

جاكي: طب عنك هاتي انا اطلعها..

خدت منها القهوه وطلعت واول ماوصلت عند اوضته لقيته عاطيني ضهره وقالع التيشرت... لفيت وشي بسرعه وطلعت صوت وهو بص وراه..

جاكي: انا اسفه.. ا الباب كان مفتوح..

جاك: لفي..

جاكي: اي!

جاك: اخلصي..

لفيت لقيته واقف ولابس التيشرت..

جاكي: احم.. مش قصدي الباب كان مفتوح ومعرفش انك واقف ه...

جاك: اشش. كلامك كتير ليه!... ادخلي..

دخلت عطيته القهوه وجيت طالعه...

جاك: استني..

جاكي: اي..عايز تسال اي اللي حصل امبارح!

جاك: بصراحه اه.. انا مش فاكر معظم اللي حصل..

جاكي: هو انت بتنسى ليه!..

جاك: معرفش.. قولي اي اللي حصل..

جاكي: اتكلمت..

جاك: اللهم الصبر... مانا عارف اني اتكلمت.. اتكلمت قولت اي يعني..

جاكي: انت بتزعقلي لي ياض انت..

جاك: ياض!!!

جاكي: اي انت مش واد ولا اي!

بصيت لقيته قفل الباب قوي...

جاك: تحبي اوريكي واد ولا مش واد!

جاكي: اقسم بالله العظيم لو قربتلي لافتح دماغك اكتر ماهي مفتوحه.. انت فاهم!

جه وقف قدامي..

جاك: افتحي.. يلا..

جاكي: افتح اي!

جاك بضحك: دماغي.. هتفتحي اي يعني..

جاكي: طب ممكن تبعد..

جاك: تؤتؤ.. مش هبعد..

قرب اكتر..

جاكي: ع فكره انا بعرف اضرب كمان..

جاك: اضربي.. ايدي ورايا اهي.. وريني يلا..

كنت لسه هزوقه بعيد بس معرفتش.. اي دا.. دا ثابت ف الارض.. هو انا اللي ضعيفه ولا هو اللي قوي زياده!

فضلت ازق فيه وبردو متحركش..

جاكي: انت بتاكل اي ياسطا!

جاك: انتي اللي مبتاكليش..

جاكي: طب اوعى بقاا خليني امشي..

جاك: مش هوعى..

جاكي: اي اللي مش هوعى.. ابعد يعم كدا عايزه امشي..

ايوا يعني انت عايز اي دلوقتي..

جاك: مش عايز حاجه.. كنت حابب تفضلي هنا شويه بس...

مشي بعيد ومسك ورق ف ايده وقال...

جاك: تقدري تمشي..

استغربت.. يعني اي عايزني افضل هنا شويه!..

جاكي: وعايزني افضل هنا ليه!

جاك: مش مسموح بالاسئله..

كلمني وهو باصص ف الورق..

جاكي: بس انا هسال.. اي هتمنعني!

جاك: امشي ياجاكي..

جاكي: طب قولي ليه!

جاك: مش هقول..

جاكي: ماعنك ماقولت.. انا غلطانه اني طلعتلك اصلا..

جاك: استني..

جاكي: نعم!

جاك: اتفضلي..

جاكي: اي دا!

جاك: السلسله بتاعتك.. وقعت منك هنا..

جاكي: اي دا احيه... ازاي مخدتش بالي..

جاك: اطلعي بره..

جاكي: هو انت اهبل!

جاك: انا اي!

جاكي: ولا حاجه..

سيبته وطلعت اجري...

نزلت ساعدت فيروز ف المطبخ انا والبنات.. لحد ماالضيوف وصلوا...

فيروز: اهلا اهلا.. اخيرا وصلتوا..

قعدوا يسلموا ع بعض بس محمد وجاك كانوا فوق...

ـ امال مين القمر دي!

فيروز: دي قريبتي جاكي.. تعالي ياجاكي سلمي...

سلمت عليهم ورجعت وقفت مكاني تاني..

فيروز دخلت معاهم وعمي رجع ودخل عندهم...

جاكي: بت يانور..

نور: اي..

جاكي: مين دول..

نور: اللي هناك دي عمتى والتانيه دي خالتي ودا ابن عمتى ودا ابن خالتي ودي بنت عمتي ودي بنت خالتي..

جاكي: انتي هتغني!.. اي دا...

نور: بس اي رايك ف القمامير دول...

جاكي: لا عاديين ع فكره..

نور: ياشيخه صلي ع النبي.. مش شايفه محمود دا حلو ازاي..

جاكي: محمد وجاك احلى منهم بكتير..

نور بخبث: ايون ايون.. اي نظامك انت.

جاكي: اتلمي يابت انتي.. وبعدين صح هما منزلوش ليه..

نور: مش عارفه.. طب بصي روحي اطلعي ناديهم وانا هروح احط الاكل..

جاكي: استني ان...

لسه مكملتش كلامي وسابتني ومشت المهزءه...

طلعت خبطت ع محمد..

محمد: اي دا.. القمر بنفسه هنا..

جاكي: والله يابني مش عارفه هتفضل تتغزل فيا لحد امتى..

محمد: لاخر الدنيا.. وبعدين هو في حد يشوف القمر دا وميتغزلش فيه!..

ـ في..

بصينا لقيناه جاك..

محمد: دا عشان انت مبتحسش.. مفيش حد يقدر يقاوم الجمال دا الا اذا كان معقد زيك.. وبعدين اي دا.. انت مش كنت مسافر!!..

جاك:اولا انت ماڤور قوووي معاها.. ثانيا لا مسافرتش.. ابقا اقولك بعدين..

محمد: ومأڤور ليه بقاا!

جاك: عشان هي عاديه يعني..

محمد: ملكش دعوه انت.. انت مبتشوفش اصلا..

جاكي: ربنا يخليك يابروو وتدافع عني ع طول..

جاك: هه.. ربنا يخليكوا لبعض ياختي.. وبطلوا سهوكه بقاا جاتكوا القرف..

سابنا ونزل..

جاكي: الواد دا اهبل..

محمد: معلوم.. بس انت قمر كدا ليه!

جاكي: يعم خلاص بقاا.. يلا انزل عشان في ضيوف تحت..

محمد: ضيوف مين!

جاكي: قرايبكوا..

محمد: احيييييه...

جاكي: ايه!

محمد: داحنا هنشوف ايام عسل... يلا قدامي..

نزلنا وهما دخلوا يسلموا...

طنط: ازيك يامحمد عامل اي..

محمد: الحمد لله ياعمتي كويس..

طنط: سلمى اهي سلم عليها..

محمد: ازيك ياسلمى..

سلمي بدلع: كويسه.. وانت

محمد بقرف.. تمام..

طنط2: والله وكبرت ياجاك.. اي الحلاوه دي..

جاك: متشكر..

طنط: لا جاك قمر من يومه ياختي..

طنط: انتي هتقوليلي.. مانا عارفه.. يابخت اللي هتاخد القمر بتاعنا..

طنط: لا انا اللي هاخده...

فيروز: لا ياختي انتي ماصدقتي ولا اي... دا حبيبي انا..

جاك: ايوا انا حبيبها هي فعلا..

طنط: لا بجد بقاا.. مش ناوي تتجوز انت والواد دا..

محمد: لا فكك مني.. انا لسه صغير...

جاك بصلي وسكت..

جاك: لا انا مليش ف الحوار دا..

طنط: الله.. امال مين اللي هيفرحنا..

جاك: محمود وحازم اهم..

طنط: لا محمود مغلبني ومش راضي..

محمود بصلي بسرعه واتكلم..

محمود: لا انا بدات افكر..

جاك خد باله..

جاك: لا متفكرش... خليك كدا احسن..

محمود: لا يعم هو الجواز حلو وكل حاجه.. بس مكنتش لاقي واحده حلوه..

بصلي واتكلم... بس دلوقتي اظن هفكر...

طنط: ياريت يابني والله..

عمو احمد: طب يلا ع الاكل الاول وبعدين ابقوا اتكلموا...

راحوا عشان ياكلوا وانا كنت لسه طالعه فوق...

جاك: استني..

جاكي: اي..

جاك: رايحه فين!

جاكي: هطلع فوق..

جاك: مش هتاكلي!

جاكي: لا مش عايزه..

جاك: مكسوفه يعني..

جاكي: لا بس ا...

جاك: تعالي..

مسك ايدي وطلعنا... وقعدني جنبه..

طنط: وانتي تقربي لفيروز اي ياقمر!

بصيت لفيروز بسرعه ومعرفتش ارد..

فيروز: من العيله كدا... قاعده معانا شويه عشان باباها تعبان شويه وبيتعالج هنا..

طنط: الف سلامه ليه ماله..

فيروز: مش وقته بقاا يلا كلي..

بدانا ناكل وانا طبعا باصه ف طبقي طول الوقت.. وعيني لمحت ايد جاك اللي ع رجله.. كانت بتترعش شويه وهو عمال يقفل ويفتح فيها...

كملت اكل ولمحت محمود دا بيبصلي قووي..

رجعت بصيت ف طبقي تاني...

راح جاك ميل عليا..

جاك: انا بقول تطلعي احسن..

جاكي: اشمعنى..

جاك: عشان في حيوانات اليفه هنا...

ضحكت بصوت.. والكل بصلي..

احييييه.. ياخي منك لله..

جاك بصوت عالي: بتضحكي ع اي..

جاكي: لا افتكرت حاجه كدا..

ماشي ياوجه المعزه انت لما نبقاا لوحدنا بس...

ابتسم وكمل اكل...

خلصنا وانا دخلت المطبخ مع البنات..

نور: خدتوا بالكوا يابنات..

هند: من اي..

نور بخبث: محمود..

هند: ااه.. خدت بالي..

جاكي: مش عارفه لي حاسه انكوا عليا..

نور: طب ف ذمتك مشوفتيهوش كان بيبصلك ازاي..

جاكي: وانا مالي.. وبعدين اي الرخامه دي.. دانا مقبلتوش نهائي..

نور: لا والله دا عسول خالص...

جاكي: خديه انتي ياختي..

خلصنا وانا طلعت اوضتي... فضلت فوق وقت طويل.. مش عارفه انزل ولا اعمل حاجه..

___________

الشباب كانوا قاعدين مع بعض...

محمود: الا بالحق.. مين القمر دي ياض يامحمد..

محمد: اتلم ياحلو وخليك ف نفسك..

محمود: يابا البت عسل قووي.. ولا اي العيون دي.. دي سلمت عليا وانا يادوب لمحت عنيها وخطفت قلبي.. اي الجمال دا..

جاك: ماخلاص... بطل محن..

محمود: مش محن ياعم.. انا اصلا بفكر..

جاك: قولتلك متفكرش..

محمود: ليه.. البت حلوه وعجبتني..

جاك بحده: اممم.. اولا مسمهاش بت... هي مش شغاله عند اهلك.. ثانيا سيب دي بالذات ف حالها.. هي مش فاضيه لاي حاجه...

محمود: وانت مالك اتضايقت ليه..

جاك: لا انا بعرفك بس..

محمد:معاه حق.. فكك منها..

محمود: انتوا عايزين تكرهوني ف الجواز يعني!.. ماشي ياعم..

قعدوا يتكلموا ويهزروا وجاك باصصلهم بقرف...

_________

جاكي: لا مبدهاش بقاا انا هنزل..

خدت فوني والهاند فري ونزلت..

لقيت فيروز والستات دول قاعدين مع بعض اكيد بينموا ع حد....

بعدين لقيت الشباب قاعدين مع بعض ف الاوضه..

طلعت اتمشى ف الجنينه...

حطيت الهاند فري كالعاده وحطيت ايدي ف جيبي وسرحت مع نفسي...

فجأه لقيت حد حط ايده ع كتفي.. لفيت بسرعه لقيته محمود...

جاكي: اي دا في اي!

محمود: بقولك اي..

لقيته بيقربلي جامد ونظراته وسخه..

جاكي: ابعد عني يابتاع انت..

محمود: هو انتي حلوه كدا ليه..

جاكي: لو ممشتش هصوت والم عليك الناس...

بصيت لقيته حط ايده ف وسطي.. روحت ضربته بالقلم..

جاكي: ابعد يامتخلف انت..

فجأه لقيت حد جه من وراه وفضل يضربه...

بصيت لقيته جاك...

جاك: اظن انا كنت واضح ف كلامي... وانت مسمعتش الكلام..

كمل ضرب فيه وانا وقفت بعيد اعيط...

محمود: ابعد ياعم.. انا مجتش جنبها.. هي اللي شاورتلي وهي طالعه عشان اطلع وراها...

جاكي: أخرس ياحيوان.. اياك انا زيك..

جاك: انت مش لاقي غير دي وهتتبلى عليها ياروح امك!...

جاك ضربه جامد ووشه اتشحور حقيقي..

جاك بغضب: اسمع يلااا.. انت عارفني كويس.. لو فكرت تقربلها تاني اقسملك هخلي امك اللي قاعده جوه دي تتحسر عليك.. انت فاهم!..

محمود سابه ومشي.. وجاك بص لقاني واقفه بعيط.. فقرب مني...

جاك: عملك حاجه!

جاكي:.....

جاك: جاكي قربلك!!!

جاكي: لا.. حط ايده عليا..

جاك: تمام.. انا كسرتهاله اساسا..

طب ممكن تبطلي عياط..

جاكي: انا همشي..

جاك: استني.. تمشي فين.. خلاص هو مش هيتجرأ يعمل حاجه تاني..

جاكي: وانا مش هستنى لما يحصل حاجه.. الله اعلم لو انت مجتش كان اي اللي هيحصل..

جاك: متقلقيش.. هفضل معاكي.. محدش هيقدر يقربلك تاني.. خلاص بقاا..

مسحت دموعي وبطلت عياط..

جاكي: انا هطلع اوضتي.. سيبته ومشيت وهو جه ورايا..

محمود كان داخل ووشه كله دم...

طنط بخوف: اي يابني اللي عمل فيك كدا..

محمود بص لجاك وسكت..

جاك: عمل حادثه.. وكويس ان روحه مطلعتش..

طنط: حادثة اي انت مش كنت قاعد معاهم!

جاك: كان طالع يشتري حاجه فعمل حادثه بالعربيه.. وكويس انها جت ع قد كدا..

فيروز: طب تعالى يابني اقعد.. وانتي ياجاكي.. تعالي شوفي الجروح دي..

بصيت لجاك بسرعه...

جاك: لا جاكي تعبانه وهتطلع فوق... هشوفهاله انااا..

جاك قعد جنبه وقعد يدوس ع الجروح قصدا عشان يتوجع..

جاك: ايده مكسوره.. لازم يروح المستشفى عشان تتجبس..

طنط: يالهوي يابني.. لي كدا..

جاك: متقلقيش.. هو هيستحمل عادي..

انا هاخده المستشفى وهنرجع ع طول..

محمود بتوتر: لا.. لا مش هروح ف حته

جاك: لا متقلقش.. هنخلص ع طول ونرجع..

محمد: وانا هاجي معاكوا...

جاك: لا خليك معاهم.. هروح انا وهو بس..

مامته سندته وطلعته العربيه.. وانا بصيت لجاك وابتسمتله بامتنان..

طلعت اوضتي وهما مشيوا.. بس مقدرتش اسيطر ع نفسي وعيطت لما افتكرته وهو بيقربلي...

____________

جاك طلع بالعربيه وفضل ماشي لحد ماوصل حته مقطوعه..

مسكه من الهدوم..

جاك: انا عايز افهم بس انت جبت الجرأه دي منين!.. وكمان عارف اني موجود..

محمود: معرفش انها تخصك..

جاك بحده: اسمع ياض انت... انت عارف انا طبعي عامل ازاي... صدقني لو لمحتك بتبصلها بس، هخزقلك عينيك.. وانت عارف اني اقدر اعمل اي حاجه...

محمود بخوف: حااضر..

خده وطلع ع المستشفى وجبسله ايده ورجعوا...

_______

طنط: ها يابني عملت اي..

جاك: متقلقيش ياعمتي.. هيبقى كويس.. ولا اي يادولا

راح ضربه ع ضهره..

محمود: ايوا.. هبقى كويس..

فيروز: طب تعالى ياحبيبي اطلعك الاوضه ترتاح..

فيروز طلعته الاوضه ومامته قعدت معاه وجاك خرج الجنينه وكان الليل جه عليا وانا ف اوضتي ولسه بعيط..

فيروز نزلت وخرجت لجاك بره..

________

محمد: اي ياعم انت مش كنت قاعد معانا!.. مشوار اي اللي روحته..

محمود: روجت اشتري شوية حاجات كدا ودخلت ف عمود..

محمد: الف سلامه ياعم..

___________

فيروز: واد ياجاك..

جاك: نعم ياقمر..

فيروز: قولي الصراحه..

جاك: امم.. صراحة اي..

فيروز: ضربت الواد دا ليه!

جاك: مضربتوش.. هو عمل حادثه..

فيروز: متكدبش... مش عليا انا الكلام دا.. انا فاهماك كويس.. الواد دا عمل حاجه وانت اللي عملت فيه كدا..

جاك: بصراحه اه..

فيروز: عمل اي المنيل دا..

جاك: حاول يعتدي ع جاكي..

فيروز: يالهوي!!.. انت بتقول اي..

جاك: زي مابقولك كدا... هي خرجت الجنينه وهو خرج وراها وحاول يلمسها..

فيروز بخوف: وعملها حاجه!

جاك: انا وصلت لقيتها بتضربه بالقلم.. بس هو ملحقش يعمل حاجه..

فيروز: ياحييوااان... وانا اللي خايفه عليه...

والله لاطلع روحه ف ايدي النهارده..

جاك: لا.. استني.. انا علمته الادب وهو مش هيقدر يبصلها تاني حتى.. بس بلاش تعرفي حد.. عشان عمي مش هيسكت وهيحصل مشاكل بين الكل.. هو غلط واتحاسب.. وانتي بقا علميه الادب بس ف الخباثه كدا.. ومتبينيش انك عارفه حاجه...

دا غير انها هتبقى مُحرجه لو الكل عرف حاجه زي دي..

فيروز: ياحبييتي يابنتي.. مش عارفه بختها مايل كدا ليه..

جاك: نصيب... بقولك اي.. انا كنت رايح اتمشى شويه عشان مخنوق من الناس دي.. فقولت اخد جاكي معايا عشان انا متاكد انها بتعيط ف اوضتها..

فيروز: ماشي اهو عشان متتعبش تاني.. بس متاخروش..

جاك: حاضر..

فيروز دخلتلهم وجاك طلع...

شويه والباب خبط.. مسحت دموعي وقومت فتحت..

جاكي: جاك!

جاك: امم.. هو انا كنت خارج فقولت اخدك معايا..

جاكي: شكرا..

جاك: انا مش باخد رايك.. ادخلي غيري هدومك وتعالي..

جاكي: بس انا مش عايزه اروح ف حته..

جاك: وانا عايز.. يلا بسرعه بقاا..

سيبته ودخلت لبست اي حاجه ع السريع وطلعت..

جاكي: يلا..

نزلنا ومكنش في حد بره فطلعنا ع طول...

مشينا ف طريق فاضي خالص ومفيش فيه غيرنا بس الجو كان تحفه...

قعدنا نتمشى شويه..

جاك: عنيكي حمرا..

جاكي: لا عادي..

جاك: مينفعش تعيطي ع اي حد وخلاص.. لو حد غلط معاكي المفروض تقطعيه، مش تقعدي تعيطي..

جاكي: وانت عايزني اعمل اي مع البغل دا.. انت مش شايفه عامل ازاي..

جاك: امال لسانك بس اللي طويل ليه!..

جاكي: ما تتلم بقاا انت كمان..

جاك: اهو شوفتي.. مش باخد منك غير طولة لسان..

جاكي: ااه صحيح.. شكرا ع اللي عملته..

جاك: لا انا ميلزمنيش الشكر دا..

جاكي: امال عايز اي!

جاك: اطلعي اجري لحد العمود اللي هناك دا زي البطه..

بصتله بقرف وبعدين سيبته ومشيت..

جاك: طب استني خلاص.. يابت..

طلع يجري وجه جنبي..

جاك: خلاص ياعم بهزر معاك..

جاكي: بطل رغي بقاا..

جاك: والله.. تصدقي انا الغلطان..

جاكي: ايون.. اسكت بقاا بالله عليك عشان بسمع اغاني اصلا..

جاك: طب اديني واحده..

جاكي: اديك اي!

جاك: سماعه ياجاكي..

جاكي: لا..

جاك: لو مخدتش سماعه دلوقتي هسيبك وامشي وابقي ارجعي لوحدك..

بصيت حواليا لقيت الشارع ضلمه اصلا وفي كلاب..

جاكي: امسك..

جاك: ماكان من الاول...

جاك: اي دا.. بتسمعي عامر منيب..

جاكي: اهااا..

جاك: بقولك صحيح..

جاكي: ارغي..

جاك: ماتتكلمي كويس يابت انتي..

جاكي: اتفضل يااستاذ جاك اتكلم..

جاك: ايوا كدا.. اللي حصل امبارح.. بغض النظر اي اللي انا عملته بس ياريت محدش يعرف حاجه..

جاكي: اعتبر نفسك مقولتش حاجه..

جاك: هو انتي وصلتي للمكان دا ازاي!

جاكي: انا كنت بتمشى ف الجنينه عادي.. ولمحت طيف قدامي.. مشيت وراه لحد ماوصلت هناك..

جاك: طيف!

جاكي: ايوا.. دا بيظهر قدامي كتير ع فكره..

جاك: طب ممكن متروحيش هناك تاني!.. دا لسلامتك عمتا..

جاكي: طب هو اي الدم اللي كان هناك دا..

جاك: غيري الموضوع..

جاكي: اوكي.. بس صحيح.. كنت فين طلاما مكنتش مسافر..

جاك: كنت ف فندق..

جاكي: فندق!!.. ليه مابيتك اهو..

جاك: لا انا اصلا مبقعدش ف البيت كتير.. دي اكبر فتره قعدت فيها معاكوا.. دايما ف اوتيل او ف شقتي..

جاكي: انت عندك شقه لوحدك!

جاك: ااه.. مانا مبحبش اقعد مع حد..

جاكي: طب ماهو هتاكل ازاي.. كل اكلك من بره!

جاك: ومين قال اني مبعرفش اعمل اكل..

فجأه كلب جه ناحيتنا وانا اتخضيت ومسكت فيه..

جاكي: احيييه.. اي دا..

جاك: متخافيش مش هيعملك حاجه..

جاكي: طب مشيه..

جاك: هششش.. امشي..

جاكي: هششش!!!!... انت بتقول للكلب ههششش!!

جاك: امال اقوله اي.. وبعدين انتي شايفه هو بيبصلي ازاي!..

جاكي: طب مشيه ياعم.. احنا هنفضل واقفين كدا!

جاك: ماهو انا كمان خايف..

جاكي: احيه عليا..

جاك: طب بصي امشي بالراحه عشان هو بيبص بنظرات شر اصلا..

مشينا بالراحه لحد مابعدنا عنه..

جاك: هاتي ايدك..

جاكي: ليه..

جاك: هاتي ايدك بس..

مسك ايدي وبصيت لقيته بيجري.. فضلنا نجري و الكلب بيجري ورانا ...

جرينا كتير واحنا عمالين نضحك لحد ماوصلنا لمكان فيه ناس...

جاكي بتنهيد: بس كفايه.. مش قادره اجري اكتر..

جاك: ولا انا...

جاكي: اول واخر مره تقولي اخرجي معايا تاني.. انت فاهم!

جاك: وانا مالي ياست.. هو انا اللي قولتله اجري ورانا..

جاكي: ولما انت بتخاف بتجيبني معاك ليه!

جاك: اسكتي بقاا..

كملنا مشي وفضلنا نتكلم ونهزر...

جاكي: الله غزل بنات..

جاك: تعالي نجيب..

راح اشترى وجاب كتير... ورجعنا لنفس الطريق تاني..

جاك: الجو هيقلب.. مدي شويه..

جاكي: لا دا حلو..

جاك: شكلها هتمطر..

جاكي: ياريت..

جاك: ايوا ونتبهدل ومنعرفش نروح..

شويه والمطره بدات تنزل فعلا...

جاكي: ياهوووو... اخيرا وقفت تحت المطره..

جاك: طب اتفضلي البسي دا عشان متبرديش..

جاكي: لا يعم كدا تمام..

جاك: طب هاتي ايدك بقاا وامشي بسرعه..

جاكي: لا والنبي خلينا شويه.. والنبي والنبي..

جاك: هتقعدي تعملي اي.. اخلصي المطره بتزيد.. ولو عربيه عدت دلوقتي هنتشلوح بالمايه اللي ع الارض دي..

جاكي: عامر منيب مع المطره حاجه قمر كداااااا...

جاك: هبله والله...

سيبته ومشيت بعيد وفضلت اتطوح واضحك..

جاك بضحك: طب بما انك ناويه تقعدي انا عندي فكره حلوه..

جاكي: قوول..

جاك: تعالي نلعب..

جاكي: اشطا يابرووو يلا..

جاك: اممم.. تعالي نتسابق لحد العمود اللي هناك دا.. واللي يكسب، يحكم ع التاني بالحكم اللي هو عايزه..

جاكي: اشطا... بس خليك جنتل كدا وراعي اني بنت يعني..

جاك: عايزه تكسبي بالغش يعني.. بعينك

.. يلا..

___________

محمد: فيروز جاك فين!

فيروز: جاك خرج..

محمد: خرج فين دلوقتي.. المطره بتمطر جامد..

فيروز: اكيد زمانه جاي..

طنط: هي جاكي دي مخطوبه ولا لا..

فيروز: وبتسالي ليه!

طنط: اصلها عجبتني والله.. وبفكر اقنع محمود بيها..

فيروز: لا هي مش هتوافق..

طنط: ليه ان شآء الله!

فيروز: عشان دي هتبقى دكتوره قد الدنيا ومش فاضيه للكلام دا..

____________

جاك: واحد.. اتنين... تلاته

طلعنا نجري واحنا بنضحك وهو اللي كسب اكيد يعني..

جاكي: لاااا.. انت غشاش..

جاك: ياهووووو... بس يابت انتي.. انا اللي كسبت.. دلوقتي هحكم عليكي وانتي هتنفذي..

جاكي: اوووف.. اخلص..

جاك: اممم.. هتقعدي ترقصي هنا وتغني..

جاكي: ارقص!!!

جاك: مش قصدي رقص رقص... يعني تتمايلي مع الاغنيه كدا... تندمجي معاها وتغني بصوت عالي وتلحني كمان..

جاكي: متاكد انك عايزني اعمل كدا..

جاك: اهاا

جاكي: اشطا.. امسك كدا...

عطيته الشنطه وروحت وقفت بعيد..

جاكي: احم... احم.. يلا مستعد..

كان واقف حاطط ايده ف وسطه ومبتسم..

جاك: مستعد.. واحد.. اتنين.. تلاته..

جاكي بصوت عالي: من اول يوم ف لقاااااناااا.. خدني هوااااك.. عشت معااااااك... احلى سنين عمري ياغاااالي... بان ع طول اي جواااانا.. لما العين جت ف العين ولا حسيت باللي جرالي...

روحت مسكت ايده وقعدنا نرقص.. وهو قعد يغني معايا..

احنا الاتنين بصوت عالي: بينااا نعيييش.. دا العمر ليله متقوليش.. نستنى ليله دي الايام.. جنبك جميله وعمري ياغالي لقيته معااااااك...

فضلنا نضحك ونغني وكان باين عليه انه مبسوط...

وفجأه عربيه عدت بسرعه وغرقتنا مايه..

جاك بصدمه: الايام جنبك جميله فعلااا....

جاكي بضحك: احيه هنروح كدا ازاي...

جاك: المطره بتزيد يلا بقاا..

جاكي: لا والنبي خلينا نلعب شويه..

جاك: ماشي تعالي نتسابق تاني..

جاكي: تمام..

وقفنا جنب بعض ولسه هنجري روحت زقيته وطلعت اجري وطبعا انا اللي كسبت..

جاك: دا غششش... هنعيد تااااني..

جاكي: هااهووو.. انا اللي كسبت ياقمر.. يلا بقاا نفذ الحكم..

جاك: مع انه بالغش.. بس اوكيه قولي الحكم..

جاكي: اممم..

بص انا كان نفسي ف الحوار دا من زمان..

جاك: اي هتبوسيني..

ضربته ف صدره..

جاكي: ماتتلم بقاا..

جاك: طب اخلصي وقولي..

جاكي: هتشيلني ع ضهرك وتطلع تجري..

جاك: نعم ياختي!!!

جاكي: مليش دعوه دا حكم ولازم يتنفذ..

جاك: مش هقدر طبعا.. انتي اكيد تقيله...

جاكي: تقيله ف عينك.. امال اي لازمة عضلاتك دي.. ولا هي للست مايا بس..

جاك: ااه.. مايا.. لا مايا خفيفه اقدر اشيلها بسهوله..

جاكي: طب مش لاعبه..

جاك: خلاص خلاص تعالي..

وقفت ف حته عاليه وركبت ع ضهره..

جاك: يامسهل يارب..

جاكي: ماتنجز ياعم..

جاك: جاهزه!..

جاكي: ايون..

جاك: هنقع ع فكره..

جاكي: لا انت قوي ومش هتوقعني انا واثق فيك..

جاك: طب جدعه خليكي واثقه بقاا..

طلع يجري بسرعه وانا بصوووت.. وفضل يلف بيا وهو بيضحك...

جاكي: بالراحه هنقعععع... يخربيتك..

لحد ماوقعنا ع الارض فعلا وفضلنا نضحك واحنا نايمين مكانا..

جاكي: احيه هدومي كلها مايه..

جاك: حبيبتي انتي تحت مطره.. طبيعي تبقي كلك مايه..

جاكي: ع فكره انت معرفتش تنفذ الحكم.. هحكم بواحد غيره..

جاك: امال انا عملت اي دلوقتي..

جاكي: لا انت وقعتني مليش دعوه..

جاك: صبرني يارب... قولي واخلصي..

جاكي: روح اقف بعيد واتنطط وعلي صوتك وقول انا مهزء..

جاك: امشي يابت..

جاكي: هتعمل كدا..

جاك: ع جثتي..

_____________

فيروز: اتفضل ياحبيبي اشرب..

محمود: شكرا ياخالتي..

فيروز: الا ايدك عامله اي دلوقتي..

راحت داست ع ايده جامد..

محمود: ااااه..

فيروز: يووه يقطعني.. مخدتش بالي يابني..

محمود: لا ياخالتي ولا يهمك..

فيروز: انت عارف اللي بيغلط عندنا بنعمل فيه اي..

محمود بتوتر: يعني اي..

راحت قامت مسكت سكينه ف ايدهاا وقعدت تتمشى قدامه..

فيروز: اي حد بيعمل اي حاجه غلط هنا بيتعاقب.. يعني مثلا ممكن اقطعهوله..

محمود وهو بيبلع ريقه: هو اي اللي بتقطعيه!

فيروز: لسانه ياحبيبي.. هيكون اي يعني..

قربت منه وهي ماسكه السكين..

فيروز: اصل قبل كدا كان في حد حاول يقرب لنور.. اسكت انا!!..

محمود بخوف: لا طبعا..

فيروز بشر:.. روحت قطعته..

محمود: احم والله.. ط طب كويس..

فيروز: متقلقش ياحبيبي مالك خايف كدا ليه.. انا بعمل كدا مع الناس الوسخه بس..

___________

جاك بصوت عالي : انا مهزء...

جاكي بصوت عالي: اتنطط قولت..

جاك قعد يتنطط تحت المطره ويرقص ويقول انا مهزء.. انا اصلا مهزء اني خرجت معاااااكي.. ياجمااااعه.. انا مهزززززء..

جاكي: تمام كدا.. قرب بقاا وانت بتمثل مشهد رومانسي وقول.. اوه حبيبتي انا مقدرش ابعد عنك ابدا..انا هثبتلك حبي دلوقتي حالا... واعمل انك قطعت شاريينك وانا اجري عليك واقول.. سلاااااااامه...

قعد يضحك جامد..

جاك: سلامه مين!

جاكي: مش عارفه هو الاسم جه كدا..

جاك: لا طبعا مش هعمل الهبل دا..

جاكي: قولت يلا..

جاك: احم.. تمام..

وقف مكانه وبدا يرتجل ويدخل ف الدور...

جاك: اووووه حبيبي.. انا مقدرش ابعد عنك ابدا.. ولو عايزاني اثبتلك حبي.. اهوووو

وقفت متنحه وبضحك من منظره.. دا تقمص الشخصيه فعلا... ووقع ع الارض..

جاكي: سلاااااامه... لا متموتش لاااااا... ولا اقولك موت عادي وسيبته ومشيت..

جاك: والله.. بقا كدا.. انا غلطان اني بهزء نفسي معاكي اصلا.....

كان واقف بعيد...

جاك: بس صحيح..

جاكي: شوو

جاك: مكنش في داعي للمسدج اللي بعدتيها..

جاكي: مسدج اي!

جاك: صراحه..

جاكي: ااه.. لا مش انا..

جاك: ياراجل.. ع العموم شكرا يعني..

جاكي: عد الجمايل بقااا...

كان واقف بعيد عني وفي مسافه كبيره بينا وبنتكلم بصوت عالي..وفي عربيه جايه من وراه ف الضلمه..

جاكي: طب حاسب في عربيه وراك..

مسمعنيش...

جاكي: جاااك.. في عربيه ورااااك تعالى كدا..

كان واقف بيظبط هدومه ومش واخد باله..

وفجأه..

جاكي: جااااااااك...