رواية قلبي ليس بيدي الفصل السابع والعشرون 27 بقلم حسناء مصطفي

جاكي: جاااك...

اول مادخلت لقيت واحد بيحاول يخنق بابا واول مازعقت ضربني ع دماغي وطلع يجري وانا اغمى عليا...

جاك سمع صوتي وجه يجري لقاني مرميه ع الارض..

فوقت لقيته جنبي هو محمد...

جاك: انتي كويسه!

جاكي بخضه: جاك بابا..

جاك: اتطمني.. باباكي كويس.. قولي اي اللي حصل

جاكي بعياط: كان في واحد بيحاول يقتله..

جاك: طب اهدي خلاص.. طب شوفتيه ولا عرفتي هو مين!

جاكي: معرفش معرفش.. انا عايزه اشوف بابا..

سيبته وقمت روحتله وهما جم ورايا...

دخلت لقيته مفاقش..

جاكي: هو مصحيش ليه!!

جاك: اهدي.. الدكتوراوه مهدأ عشان ميتعبش بعد اللي حصل..

جاكي بعياط: طب هيفوق امتى!

جاك: هيفوق والله.. اهدي انتي بس.. حاولي تفتكري مين الشخص دا عشان نبلغ البوليس..

جاكي: معرفش.. واحد طويل كدا واسمر ومعندوش شعر.. بس ملحقتش اشوف حاجه تاني..

جاك: خلاص تمام انا هتصرف.. محمد تعالى معايا...

خرج هو ومحمد وانا قعدت جنب بابا اعيط...

جاك: روح شوف الكاميرات اللي هنا ولو وصلت لحاجه بلغني بسرعه..

محمد: ماشي..

شويه وفيروز وعمي وصلوا..

فيروز: فين جاكي يابني!

جاك: جوه معاه..

عمو احمد: طب هو عامل اي دلوقتي!

جاك: كويس.. تعالوا..

فيروز: اهدي ياحبيبتي ماهو بقاا كويس خلاص...

عمو احمد: يعني الدكتور قالك انه بقاا كويس!

جاك: هو في حد حاول يقتله..

فيروز: يالهوي.. اي اللي بتقوله دا..

عمو احمد: ازاي دا يحصل!.. وانت كنت فين!

جاك: اهدوا بقاا ياجماعه.. الحمد لله لحقناه قبل مايعمل حاجه..

عمو احمد: احنا لازم ناخده عندنا البيت.. مينفعش يفضل هنا..

جاك: ايوا انا شايف كدا بردو.. خليكوا معاها وانا هروح اشوف الدكتور...

___________

جاك: بعد اللي حصل دا يادكتور مينفعش يقعد هنا..

الدكتور: هو حالته مش كويسه لدرجة انه يخرج.. لازم رعايه..

جاك: هنهتم بيه ف البيت كويس.. وكمان نجيب ممرضات معاه.. وممكن حضرتك تيجي تشرف عليه هناك..

الدكتور: اذا كان كدا ماشي.. بس دا محتاج رعايه واهتمام تام..

جاك: تمام يادكتور..

جاك خلص مع الدكتور ومحمد رجع وطلعوا...

عمو احمد: قالكوا اي!

جاك: تمام وافق انه يخرج..

بَص لقاني حاضناه ودموعي نازله وساكته..

جاك: وكمان عشان جاكي ترتاح ف البيت اكتر... جاكي!.. جاكي!.. خلاص مفيش حاجه.. كفايه عياط..

محمد: جاك عايزك...

خرجوا مع بعض..

محمد: انا راجعت الكاميرات..

جاك: وعملت اي!

محمد: وصلت لدا....

________________

سما: يعني احنا هنفضل قاعدين كدا ياهند!

هند: في ايدينا اي نعمله!

سما: ماتيجي نروحلهم..

هند: ايوا عشان جاك يفرج علينا المستشفى كلها..

نور: طب رنوا حتى عشان نتطمن..

نهى: ماتفهموني اي الحكايه!.. ومين الراجل دا!

هند:دا ابو جاكي..

نهى: ومش قولتوا انه مسافر!

هند: لما جاك ييجي ابقي افهمي منه..

نهى: ع اساس انه هيكلمني ولا يقولي حاجه..

سما: خلاص يامرات عمي نبقى نفهمك بعدين... انا هرن ع جاك اشوف اي اللي حصل...

طلعت الفون ورنت عليه...

سما: مش بيرد...

هند: رني تاني..

سما: الو جاك..

جاك:......

سما: يعني جايين!

جاك:......

سما: حاضر ماشي.. طب..

لسه مكملتش وهو قفل...

سما: اووف.. قفل كالعاده..

هند: قالك اي!

سما: بيقول جهزوا اوضه لعمي بسرعه عشان هما ف الطريق.. وكمان نعمل اكل..

هند: يعني هو جاي معاهم!

سما: تقريبا كدا...

هند: طب يلا قولي لعطيات تعمل الاكل ويلا نطلع نظبط الدنيا..

_______

استنينا لحد الليل يكون فاق ونقلناه ورجعنا... نقلوه فوق وانا فضلت معاه ومسبتوش لحظه....

جاكي: بابا انت كويس!

بابا بتعب: كويس الحمد لله..

جاكي بعياط: اي اللي حصل يابابا.. وعملوا فيك كدا ليه!

بصلي ودموعه نزلت لوحدها.. قومت قعدت قدامه ع السرير ومسحتله دموعه..

بابا: انا اسف يابنتي.. حقك عليا

جاكي: لا متتأسفش يابابا.. انا مش زعلانه منك خالص والله..

بابا: انا عارف اني مهما عملت مش هعرف اخليكي تسامحيني.. ودا حقك..

جاكي: مسامحاك والله ومش زعلانه منك..

جاك: جاكي كفايه كدا وسيبيه يرتاح...

جاكي: لا طبعا مش هسيبه..

جاك: اسمعي الكلام.. هو محتاج يرتاح عشان ميتعبش ياجاكي..

فيروز: هو معاه حق يابنتي.. سيبيه باين عليه تعبان.. تعالي بس معايا عشان متتعبيش..

طلعت معاهم وروحت اوضتي ولقيت في ممرضات وصلوا ودخلوا عنده..

جاكي: جاك اي دا!

جاك: دول هيخلوا بالهم من باباكي عشان يبقاا كإنه ف المستشفى..

جاكي: انت مش قولتلي انه بقاا كويس!

جاك: ااه.. ايوا هو كويس..بس محتاج شوية اهتمام كمان..

فيروز: انا هنزل ياحبيبتي اجيبلك تاكلي..

جاكي: لا مش عايزه..

جاك: روحي هاتي الاكل يافيروز..

فيروز طلعت وهو قعد قدامي ع السرير...

جاك: بصي بقاا.. باباكي محتاج يرتاح شويه.. وحالتك دي هتخليه يتعب اكتر.. لازم تسندي نفسك كدا وتبقي كويسه قدامه عشان ميتعبش.. دا غير ان دا هيحسن من حالته النفسيه اكتر.. فبلاش عياط بقاا.. هو بقاا كويس والدنيا حلوه..

جاكي: ومحمود!

جاك: متقلقيش.. انا بلغت البوليس باللي حصل وبيدوروا عليه.. وقريب هيبقى ف السجن ونرتاح منه.. دا غير اني خليت رجاله تدور عليه فلو انا وصلتله الاول هخلص عليه...

جاكي: هو محمد فين!

جاك: بتسالي عليه ليه!

جاكي: عادي اصله مختفي..

جاك: انا قولتله ع كام حاجه كدا فراح يعملهم..

جاكي: تمام..

قام وقف وقعد يتمشى ف الاوضه...وشويه ولقيته وقف وبص ع حاجه وفضل متنح مده كدا وملامحه اتغيرت....

جاك: بتعرفي ترسمي...

جاكي: ايوا يعني..

مسك الرسمه ف ايده وقرب مني..

جاك: راسمه محمد كإنها صوره مش رسمه.. واضح انك كنتي منسجمه معاها...

جاكي: لا عادي يعني..

فيروز طلعت بالاكل..

فيروز: يلا ياقمر بقاا كُلي.. وانت ياجاك كل معاها انت مكلتش حاجه..

جاك: لا انا مش جعان.. خليها هي تاكل..

جاكي: انا مليش نفس..

فيروز: لا مينفعش.. يلا كلي..

بدات اكل وهند ندهت عليها فسابتني ونزلت وجاك كان واقف وساند ع الشباك وباصص منه ومربع ايده...

كنت باكل ومركزه معاه وباين عليه انه حزين.. ملامحه كلها اتغيرت.. بدل الجد اتقلبت حزن.. كملت اكل لحد ماخلصت وهو لسه واقف...

جاكي: جاك!

كان سرحان ومسمعنيش...

جاكي: جاااك!

جاك: هاا نعم!

بصلي وعنيه مليانه دموع وحزن معرفش ليه..

جاكي: مالك!

جاك: مالي!

جاكي: شكلك زعلان..

جاك: لا متشغليش بالك.. كملي اكلك..

جاكي: لا انا خلصت..

جاك: طب تعالي اقعدي ف البلاكونه احسن من هنا...

جاكي: ماشي تمام..

دخل البلاكونه وبصلي باستغراب..

جاكي: اي!

جاك: اي دا!

جاكي: ايوا مانا مبحبش قعدة الكراسي دي فحبيت اعمل حاجه ع الارض احسن.. بس طبعا تقدر تشيلها عادي..

جاك: لا دي جميله جدا... تسمحيلي اقعد..

جاكي: ااه طبعا..

قعد وسند ضهره ع الحيطه وانا قعدت جنبه وبصينا للسما...

___________

عمو احمد: يابنات التزموا الصمت والهدوء لو سمحتوا عشان عمكوا يرتاح..

هند: حاضر يابابا..

فيروز: طب انا هطلعله بالاكل دا وانت تعالى عشان اكيد هيعافر ومش هيرضى ياكل..

عمو احمد: ماشي يلا...

طلعوا وسابوا البنات ف المطبخ...

سما: ياجماعه الحوار بوخ قووي.. افرض جاكي حصلها حاجه..

نور: وانا كمان خايفه عليها من الواد دا..

هند: بس يابنات بقاا.. لما نشوف الدنيا هتمشي ازاي..

_________

كنا قاعدين والصمت سائد...

جاك: ممكن اسالك سؤال!

كان بيكلمني بنفس نظرة الحزن وهو باصص للسما..

جاك: هو انتي ومحمد قربتوا من بعض ليه!

جاكي: يعني اي!

جاك: يعني ارتاحتيله ازاي... اللي عرفته عنك انك انطوائيه وكلامك قليل ومبتعرفيش تتعرفي ع حد... ازاي محمد بقاا اقرب حد هنا ليكي.. حتى اقرب من البنات..

جاكي: مش عارفه.. بس يمكن عشان هو كويس وطيب وفيه صفات حلوه كتير..دا غير ان هو اللي كان دايما بيبدا كلام وبقينا صحاب.. عشان هو يتحب..

بَص ف عيني شويه وبعدين رجع بص للسما تاني..

جاك: اي الصفات الحلوه اللي فيه!

جاكي: طيب وحنين ومتواضع و.. وبسيط.. وصاحب جدع..

جاك بشرود: يابخته.. كان نفسي يبقا عندي نص حظه..

جاكي باستغراب: واي اللي عنده مش عندك!..

جاك: كل حاجه.. ع الاقل قلبه مرتاح..

جاكي: وانت قلبك مش مرتاح ليه!

بصلي وعنيه فيها دموع بيحاول يداريها..

جاك: عارفه احساس الرفض!.. انا مبحسش غيره..

جاكي: رفض ليه!.. بالعكس مفيش الكلام دا.. انت حد ناجح وكويس واهلك معاك وبيحبوك.. مفيش رفض ف الموضوع..

ابتسم بغُلب ورجع بص للسما تاني..

جاكي: احم.. لو حابب تتكلم اتكلم..

حسيته موجوع وبيحاول يسيطر ع نفسه وبيبلع ريقه بوجع..

جاك: كل دا ملوش لازمه... ابويا وامي رفضوني.. رفضوني من وانا صغير..

ومن ساعتها والشعور دا ملازمني..

جاكي: هي ممكن تكون مامتك صعبه شويه.. بس اكيد ف الاول والاخر بتحبك يعني.. دي مامتك..

جاك: عارفه!.. مره وانا صغير كسرت قلم.. فتحت دماغي.. خبطت دماغي ف الحيطه ودماغي اتفتحت..

كنت كل مااعمل اي حاجه واقولها شوفي ياماما عملت اي، تزقني بعيد وكإني مش موجود..

ف مره كان في حفله ف المدرسه ومسرحيه وانا كان ليا دور فيها والمفروض ان كل واحد اهله يكونوا معاه او ع الاقل امه.. قولت لبابا، قالي مش فاضي.. قولت خلاص مش مشكله اخد ماما.. قولتلها قالتلي اقعد هي مش ناقصه قرف.. انا مش فاضيالك.. روحت لوحدي.. كان كل ماحد من زمايلي يعمل حاجه، اهله هيسقفوله جامد ويفضلوا يشجعوه.. وانا كنت خايف.. كنت مرعوب.. طلعت ع المسرح ومعرفش قولت اي ولا عملت اي وبصيت ملقتش حد واقف عشاني.. لما الناس لاحظوا ان محدش عملي نفس اللي اتعمل لزمايلي، فضلوا يسقفوا ويصفرولي عشان متحرجش..

من ساعتها وانا حاسس اني لوحدي..

كنت ساكته ومش عارفه ارد اقول اي واتصدمت لما لقيت دموعه بدات تنزل بالراحه..

جاك: حتى بابا.. بيحب ماريا ومارك اكتر مننا.. كان طول الوقت معاهم.. وانا كنت لوحدي..

ف مره فضلت اعيط واقول عايز اروح الملاهي مع صحابي واصريت ع كدا.. فماما قالتلي تعالى وانا هوديك.. فرحت وركبت معاها ولقيتها ماشيه ف طريق غريب ونزلنا ودخلتني جوه وقفلت عليا.. حبستني ف المقابر... هه لمجرد اني كنت عايز افرح... قالتلي لما اقول ع حاجه لا يبقى لا.. ولو اصريت ع حاجه تاني بعد كدا هجيبك هنا ع طول.. وسابتني ومشت.. سابتني يوم كامل..كان عندي حوالي عشر سنين.. كنت بعيط وخايف...

حتى كل اللي هنا بيحبوا محمد اكتر.. يمكن عشان يتيم.. بس مانا كمان يتيم..

كان بيسكت شويه ويتكلم شويه ودموعه نازله ومظنش انه كان واعي اصلا...

جاك: سمعت ابويا وهو بيقول انا مش عايزهم.. وديهم ملجأ ولا ارميهم ف اي حته..

وكان رد ماما عليه انها كمان مش عايزانا واننا مش ولادها لوحدها..

كنت دايما مختلف.. وناقص عن كل اللي حواليا.. كنت دايما قلبي واجعني وعايز اعيط لاي حد... بس مكنتش بحب ابين لصحابي حاجه...

مره المدرسه بتاعتي شتمتني جامد وضربتني كمان وف الاخر اكتشفت ان مش انا الغلطان... ولما قولت لبابا عشان يعمل حاجه، مسمعش مني وضربني بالقلم وقالي انت لو فضلت تعمل مشاكل كدا هرميك ف الشارع للكلاب...

كنت شاطر جدا وبطلع الاول ع طول.. بس مكنش حد بيهتم...

كنت ببقا بردان بالليل ومحدش بييجي ويتطمن عليا ويغطيني.. وكنت بدخل اعمل لنفسي اكل.. لدرجة ان الزيت مره وقع عليا وايدي اتحرقت.. ماما مهتمتش.. زعقتلي بس ع الزيت اللي وقع..

جبت مرهم من الصيدليه وحطيته لوحدي..

والى الان في علامات ف ايدي..

قتلوا مشاعري.. قتلوني..

دموعي كانت نازله ومش عارفه اقول اي مع اني متاكده ان في حاجات تاني محكهاش... غمض عينيه وقال..

جاك: كان كل املي عيله صغيره ف بيت صغير ومش عايز حاجه تاني.. عايز اهلي بس.. عايزهم يحبوني.. بس يمكن انا اللي متحبش...

مسكت ايده وقولتله..

جاكي: لا.. مش انت اللي متتحبش.. هما اللي مش اهل.. هما اللي عاقوك ودمروك.. هما اللي مبيعرفوش يحبوا.. انت ملكش ذنب ف حاجه..

بصلي بابتسامه حزينه...

جاك: عارفه اخر مره ماما حضنتني امتى!

ولا مره...

جاكي: عارف.. ممكن يكون حصلك كل دا عشان تبقى ف اللي انت فيه دا دلوقتي.. شاب كويس ومحترم وناجح..

جاك: مش عايز... مش عايز اي حاجه.. انا عايز ارتاح..

جاكي: يمكن ربنا شايلك العوض اللي ينسيك كل دا..

بصلي شويه وقال..

جاك: فكرته جه.. بس طلع مش ليا.. طلع لحد تاني..

جاكي: هو اي!

بصلي شويه وسكت...

مسح دموعه وكان شكله تعبان...

جاك: ممكن اطلب منك طلب!

جاكي: اكيد..

جاك:.. م.. ممك.. ممكن تحطي ايدك ع قلبي!

جاكي:.....

جاك: معلش شويه بس وهمشي..

مكنتش فاهمه حاجه وقلبي بيدق وخايفه..

غمض عينه وسند راسه ع الحيطه وانا حطيت ايدي ولقيت قلبه بيدق جامد وجسمه ساقع وعمال يعرق..

كنت هشيل ايدي راح حط ايده عليها وداس عليها جامد وهي مكانها وفضل كدا شويه وانا متوتره ومش عارفه هو بيعمل اي!... استنيت شويه يمكن هو يقول خلاص او حاجه.. فضلت كدا شويه كتار فقولت مبدهاش بقاا انا هقوله..

جاكي: جاك.. جاك

مكنش بيرد وانا قلقت..

جاكي: جاك!..

شيلت ايدي بصعوبه لانه كان متبت فيها جامد وحاولت احركه بس مقدرتش ووقع ع الارض بس اتقلب ووقتها عرفت انه نام..

جاكي: جاك انت نمت!.. جاك..

كان باين عليه انه مش واعي ونايم فعلا.. فضلت بصاله شويه واتأمل وشه... بقا القمر دا يحصل فيه كل دا!.. عرفت وقتها اي مصدر طبعه القاسي...

فضلت مركزه معاه شويه ومستنيه يحصل اي حاجه او فيروز تطلع.. بس محصلش حاجه وفجأه بدا يترعش جامد وملامحه خدت شكل الخوف.. كإنه بيحلم بكابوس او خايف من حاجه.. معرفتش اعمل اي وجسمه كان بيترعش جامد.. فكرت في اني احط ايدي تاني يمكن يحصل حاجه..

حطيت ايدي ع قلبه تاني وتلقائيا حط ايده عليها تاني بس هو كان نايم فعلا... فضل كدا شويه وبعدين هدي خالص... مكنتش فاهمه حاجه ولا عارفه هنفضل كدا لإمتى... بعدها محستش بحاجه تاني...

___________

هند: امال جاك فين!

سما: اكيد ف اوضته..

فيروز: ملكوش دعوه بيه يابنات هو مش فاضي دلوقتي..

هند: طب هي جاكي فين

فيروز: تقريبا نامت.. عشان مش سامعه صوتها.. اكيد كلت ونامت.. محدش يدخل عندها.. سيبوها ..

نور: طب احنا هنعمل اي ف الجامعه!

هند: ايوا احنا هنغيب تاني!

فيروز: لا متغيبوش.. اساسا وجودكوا ملوش لازمه.. روحوا شوفوا مذاكرتكوا والصبح تروحوا الجامعه..

سما: طب وجاكي!

فيروز: جاكي اي.. هو دا وقت تروح فيه ف حته!

هند: ايوا صح.. مش هترضى تسيب باباها ابدا..

سما: بس انا مستغربه.. ازاي بعد كل اللي عمله فيها دا ولسه بتحبه كدا وخايفه عليه..

فيروز: دا مهما كان ابوها.. وهي طيبه ومش هتقدر تكرهه ابدا..

محمد رجع..

محمد: السلام عليكم..

فيروز: وعليكم السلام..

محمد: جاك فين!

فيروز: كان مع جاكي... تعالى عشان تاكل..

محمد: لا مش عايز.. انا هطلع اشوفه..

محمد سابهم وطلع وقرب من الباب وبعدين خبط.. خبط شويه ومحدش رد ففتح الباب ودخل....