رواية كنت لا أبالي الفصل الخامس عشر 15 بقلم رحمه عصام
 |
| رواية كنت لا أبالي الفصل الخامس عشر 15 بقلم رحمه عصام |
رواية كنت لا أبالي الفصل الخامس عشر 15 بقلم رحمه عصام
صحيت تاني يوم وانا فرحانه وحاسه اني مرتاحه ومطمنه جدًا بطريقه متتوصفش، معقول الإنسان الوحيد الـ انا حبيته هو كمان بيحبني؟؟ معقول هيجي يوم وهكون مراته؟؟ مجرد مـ بتخيل بس بفرح وبحس أن الدُنيا كلها في أيدي والله، قومت اتوضيت وصليت وفضلت ادعي ان ربنا يحقق حلمي ويعدي الايام دي على خير، سرحت شعري وغيرت هدومي ونزلت لقيت نهال هانم قاعده والخدم بيحضروا الفطار بس عدي مكنش موجود، نزلت من على السلم وأول مـ شافتني ابتسمتلي وكلمتني بحنيه......"
_نهال بأبتسامه: ازيك يـ بنتي عامله ايه، نمتِ كويس؟؟
=ملك بأبتسامه: انا بخير يـ هانم حضرتك عامله ايه
_بلاش هانم دي تقيله على قلبي، قوليلي يـ ماما انتِ خلاص هتكوني مرات ابني
لما قالتلي"انتِ خلاص هتكوني مرات ابني" قلبي دق جامد وابتسمت بـ بفرحه ومش مصدقه بجد ان هيجي اليوم الـ هكون فيه مراته، يمكن عشان مش متوقعه أن القدر يتغير ونكون من نصيب بعض عشان فرق الطبقات، أو عشان هو كان متجوز أو حاجات كتيره كانت تمنع جوازنا، بس ربنا وقف معايا وعرف حبه في قلبي وهيجعلني من نصيبه بإذن الله"
_ملك بكسوف: احم......ست هانم.......هو عدي فين؟؟
=مش قولتلك بلاش تقولي ست هانم دي
_ملك بحُزن ودموع: مانا مش عارفه اقولها، تخيلي أن من ساعه مـ اتولدت عمري مـ قولتها ولا جربت اقولها؟؟ حاسه انها تقيله على لساني والله
=نهال بحُزن: خلاص يـ حبيبتي اهدي، انا معاكِ متقلقيش
خدتني في حضنها وكانت بتقرأ قرءان في سرها، حسيت براحه اول مره احسها وبعد فتره بسيطه نمت محسيتش بحاجه"
حسيت بأيد بتلمس وشي فتحت عيني ببطئ لقيته عدي باصصلي ومبتسم، ابتسمت تلقائي وبعدين بصيت حواليا لقيتني نايمه عـ الكنبه، بصيتله واتكلمت بأستغراب....."
_انا ايه الـ جابني هنا
=عدي بأبتسامه ومشاكسه: ماما قالتلي انك نمتِ في حضنها، بس ايه......ده كله نوم، اومال لو مكنتيش طالعه من غيبوبه بقا كنتِ هتعملي ايه
_صح احكيلي انا قعدت قد ايه في الغيبوبه وحصل ايه، احكي كله كله
=عدي بضحك: طيب اي رأيك نخرج نتفسح الأول ونبقى نحكي بعدين؟؟
_ملك بفرحه: بجد؟؟ يعني احنا هنخرج سوا ونضحك ونهزر ونتصور ونعمل كل حاجه
=عدي بضحك: ايوه يـ بنتي يلا اطلعي ألبسي وانا كمان وهقولهم يجهزوا العربيه
_ملك بفرحه: طياااره
حسيت بفرحه كبيره واني رجعت طفله لسه مولوده من اول وجديد، دخلت الاوضه وقفت قدام الدولاب تايهه، مش عارفه اعمل ايه ولا عارفه ألبس ايه، هو اه الدولاب في كتير بس انا مبعرفش ألبس، فضلت فتره اطلع هدوم وادخل هدوم وألبس واجرب واغير بس مش عارفه، حسيت اني وحيده وعيني دمعت، لقيت الباب خبط، اكيد عدي انا اتأخرت عليه، فتحت وانا باصه في الأرض وكلمني بأستغراب....."
_عدي بأستغراب: مالك في ايه زعلانه كده ليه
=ملك بدموع: مش عارفه ألبس حاجه ولا عارفه اظبّط نفسي
_عدي بأبتسامه: طيب خلاص متزعليش تعالى معايا
شدني ودخل الاوضه وبدأ يعرفني كل حاجه وألبس ايه في كل مناسبه والألوان الـ بتليق على بعضها وكل حاجه، كان بيتكلم بأبتسامه وحنيه تقدر تخلي الحجر يلين والله، قعدنا فتره مش كبيره يعرفني كل حاجه، بعدها خرج وطلب مني أن انا الـ اختار هلبس ايه المرادي، خرج وفضلت واقفه تايهه برضوا بس مش زي الاول واختارت تيشيرت وبنطلون ولبستهم وظبطت نفسي وفردت شعري وكله تمام، نزلت روحتله بصلي واتكلم بفرحه....."
_مانتِ قمر اهو امال زعلانه ليه بقا
=ملك بفرحه: بجد؟؟ يعني شكلي حلو؟؟
_عدي بأبتسامه: ايوه يابنتي، انتِ الـ بتحلي الحاجه اصلًا، قوليلي بقا......تحبي نخرج فين
=مش عارفه بس انا عايزه اتمشي
_عدي بأستغراب: بس كده؟؟
=ايوه في اي
_ولا حاجه يلا
_______________________________
_مازن بسخريه: هربت منك؟؟ امال عاملي فيها راجل وبتقولي هحميها ليه وانت اصلًا مش عارف تحافظ على نفسك، حتت طفله زي دي غفلتك وهربت؟؟ لا ضحكتني بجد
=كاظم ببرود: اول حاجه انا راجل غصب عنك، تاني حاجه انا مش هسمح لحد يقربلها أو يأذيها انت فاهم؟؟ صفي الحوارات الـ بينكوا دي بعيد عنها، وياريت تظهر وشك الحقيقي بقا عشان الوش ده مبقاش لايق عليك
_وليه تقول اني عايز اذيها؟؟ انا عايز اتجوزها
=كاظم بحده: انا وانت عارفين كويس انها بتحب عدي، ابعد عنها بقا
_مازن ببرود: وانا مش هسيبهاله ويـ تكون ليا، يـ مش لحد خالص
=كاظم بأبتسامه بارده: يبقى مبروك عليك الموت يـ صاحبي
_هتبيع صاحبك عشانها؟؟
=صاحبي الـ مش بيتقي الله ولا بيعتق حد؟؟ اه
كاظم.....
سيبته ومشيت وانا تايه ومش عارف اعمل ايه، اروح لـ عدي طيب واتكلم معاه؟؟ هيصدقني؟؟ ولا اخطف ملك واخبيها بعيد عن العالم ده كله؟؟ لو فضلت وسطهم هتموت ومحدش هيقدر يحميها حتى انا
_________________________________
_ملك بأبتسامه: تعرف يـ عدي......انا فرحانه اوووي، مكنتش متخيله أنك تحبني في يوم من الايام
=عدي بسرحان: انا بحبك من زمان يـ ملك
بصيتله بأستغراب واتكلمت بهدوء....."
_طالما بتحبني من زمان لي اتجوزت جني؟؟
=عدي بهدوء: كُنت شايفك لسه صغيره خالص على موضوع الحب والجواز ده وباباكي ممكن ميوافقش وانا امي كبرت وكل شويه تقولي عايزه اشوف ولادك قبل مـ اموت والكلام ده، فـ لقيت جني بنت مناسبه وبنت صاحب ابويا وكنت معتقد انها كويسه والكلام ده، واتجوزنا وحصل الـ حصل واتطلقنا
_ربنا يعوضك
بصلي وابتسم......"
=عوضني بيكِ
_ملك بكسوف: احم طيب يلا نروح عشان الوقت اتأخر اووي
=عدي بضحكه: يلا
كان يوم لطيف بوجوده، خرجنا واتفسحنا وعملت كل حاجه نفسي فيها وهو كان بيعملها معايا ومهموش شكله قدام الناس، شخص لطيف وحنين وطيبه قلب تكفي بلد بس في غضبه وحش اووي، عنده ثبات انفعالي رهيب يقدر يخوف اي حد بس في نفس الوقت بيتوتر جامد، شخصيه غريبه بس تتحب"
وصلنا الفيلا ودخلنا بتهزر وبنضحـ..... أي ده! كاظم؟! وقفت مصدومه ولقيت عدي بيسلم عليه وبيحضنه وانا لسه مش مستوعبه اي الـ بيحصل اصلًا، لقيت عدي بصلي وابتسم وقال......"
تعليقات
إرسال تعليق