رواية بيت البنات الفصل الثاني 2 بقلم يارا غزلان

الكل اتصدم

روح بصدمه: اييه...

احلام بصت لروح بقلق

كوثر ذهلت ولسه حاطه ايديها علي بقها ومش بتتكلم

روح عاقده حاجبيها وباصه لجدهاا بصدمه ومش مركزه مع حد

تبارك قامت من مكانها وقربت من هبه وباست ايديهاا

هبه: تتهنو ببعض ياحبيبتي ربنا يفرحكم دايما

تبارك بإبتسامه: شكراا ياعمتي

رماح كان متابع علامات وش روح ومش فاهم حاجه بيبص لتبارك وروح ومضايق

بعد الغدا روح في اوضتهاا

روح: اي يا أمي الي حصل تحت داا

كوثر: اكيد جدك عندو مبرر مقنع ماهو مش معقول يعني يكسر قلبك

روح: معقول جدي شافني مش مناسبه لرماح

ولا شاف ان رماح هو اللي مش مناسب ليا بس دا قالي انو عارف انا بحب مين وكان مبسوط مش مضايق انا مستغربه الي حصل وليه جدي يعمل كداا

في اوضه تبارك

احلام: الحل بسيط هتروحي لجدك وتقوليلو انا مش عاوزه رماح ياجدي

تبارك: واقولو كدا لي

احلام: علشان روح بتحب رماح

تبارك: ورماح مش بيحب روح

احلام: انتي مالك انتي ملكيش دعوه روحي لجدي وقولي الي اتفقنا عليه دلوقتي

تبارك: بس احنا متفقناش علي حاجه

احلام بتتمالك اعصابهاا: لحظه واحده هو انتي موافقه علي الجوازه دي

تبارك بإبتسامه مكر: وارفض ليه

احلام: تبارك انتي اتجننتي مانتي عارفه ان روح مستنيه اللحظه دي من 15 سنه وبتحب رماح حب لو اتوزع علي البلد كلها هيفيض

تبارك ببرود: بس رماح مش بيحبهاا

احلام بجديه: ولا بيحبك

تبارك: مش مهم هخليه يحبني

احلام: وهتخليه يحبك ازاي وانتي اصلا مبتحبوش بلاش تضايقيني يا تبارك روح هي الي بتحبو وهي الوحيده الي تقدر بحبها تخليه يموت فيها كمان

تبارك: اممم بس انا حبيتو

احلام بتشدها من ايديها بعصبيه بطلي قله ادب انتي كدا بتخوني روح وبتخذليها كمان دا انتي عارفه كانت مستنياه اد اي هتبصي في وشها ازاي بعد كداا وانتي واخده منها حبيبها

تبارك بعصبيه: انا مأخدتش حد جدي هو الي اختارني انا شاافني انا مناسبه مش روح وبعدين انتي بتتخانقي معايا لي انا اختك بنت امك وابوكي انا الي من لحمك ودمك مش هي المفروض تقفي معايا انااا

احلام: انا قدامي واحده خاينه للصحوبيه ولصله القرابه انا شامه ريحه امي في الموضوع داا وهعرف كل حاجه متقلقيش اصبري عليا بس

في اوضه رماح

هبه: تبارك كويسه حطها في عينيك

رماح بشرود: هو جدي من ضمن البنات دي كلها شاف ان تبارك هي الي تنفعني

هبه: قصدك اي

رماح: اقصد ان في بنات كتير لي دي بالذات الي تنفعني وبعدين انا اصلا من وقت ماجيت مركزتش مع تبارك خالص ولا لفتت نظري يعني محستش ان هي دي الي انا عاوزها

هبه: انا عارفه مين فيهم الي لفتت نظرك من اول ما جيناا وعارفه مين الي اول ما بتظهر عيونك مبتفارقهاش وانا بردو كنت اتمناهاا لكن جدك قالي انها بتحب واحد تاني وميقدرش يغصبها عليك

رماح بضيق: والله وهو البنات هنا بتحب عادي كداا

هبه: ومن امتا و الحب حرام انا واثقه في تربيه البنات هناا واكيد مش بيغلطو ومش معني انها بتحب تبقا بتخرج معاه وعايشه حياتها بالطول وبالعرض لا اكيد محافظه ع نفسها وحب جوا قلبها مش اكتر

رماح: طيب انا مش قادر اتقبل تبارك دي يعني مش حاسسها مناسبه لياا خلي جدي يشوف غيرهاا

هبه بتحاول تكتم الضحك اي يشوف غيرها دي هو اختارلك دي مفيش غيرها

رماح: طيب ماتصبرو علياا شويه وانا هخلي روح تنسي الي بتحبو دا وتوافق علياا

هبه: انت بتحبها يا رمااح

رماح: ملحقتش احبهاا اكيد يعني بس طالما هتجوز واحده من الي هناا ف انا شايف ان دي الوحيده الي تنفعني

هبه: شوفت فيها اي يخليها تنفعك شوفت طباعها ولا اسلوبها ولا روحها اكيد لا

انت شوفت جمالها وقارنت بينها وبين باقي البنات شوفت ان دي احلا واحده فيهم ف قولت دي الي تنفعني مشكلتك دايما بتحب المظااهر وبس انا هنزل اشوف جدك ومش عاوزه غلطه يا رماح وسيب روح في حالها واحترم تبارك وانها هتبقا مراتك واعرف ان دول ولاد عم متوقعش بينهم علشان خاطري متكونش سبب في الغيره مابينهم وتقطع علاقتهم ببعض...

حماد والد تبارك: انت متأكد يا بابا ان تبارك ورماح مناسبين

همام: محدش هينفع رماح غير تبارك قمر عصبيه وسلوي مجنونه وسعاد مش جاهزه للجواز دلوقتي مانت عارف واميره متكبره اوي ورماح كمان متكبر مش هينفعو لبعض ف تبارك افضلهم

حماد: و روح انت عارف انها مناسبه جداا متعلمه ومثقفه وذكيه وعقلها يوزن بلد لي مختارتهاش

همام بتنهيده: من اول ما رماح اتولد وانا بعزو وبحبو ولما روح اتولدت اخدت كل الحب الي جواياا لسببين

السبب الاول انها اتولدت علي ايدي دي

السبب التاني هو ابوهاا وانها اتحرمت منو

روح مكانتها عندي عاليه وكنت شايفها مناسبه لرماح ولعمتها هبه بس هي في قلبها واحد تاني

حماد: واحد تاااني ازاي يعني

همام: بنت اخوك متربيه احسن تربيه انا عارف انها متغلطش ابداا هي بس هتلاقيها شويه مشاعر جوا قلبها لكن متغلطش ابداا اسمع مني

حماد: الي تشوفو يا حاج انت ادري بالصح برضو عن اذنك هطلع انام علشان الشغل بكره تصبح علي خير وباس راسو

همام: وانت من اهل الخير ياحبيبي

في اوضه روح كانت قاعده في الشباك وضامه رجليها لصدرها قعدتها المفضله

وكالعاده ماسكه الخاتم الصغير في ايديها

روح: خلاص كداا الحب الي كنت معيشه نفسي فيه هيطلع وهم..!

مفيش وعوود هتتوفي

قبل 15 سنه

رماح: رووح غمضي عينك

روح: طيب حطت ايديها علي عيونها

رماح: افتحي

روح: الله

رماح: زي ماقولتلك هجبلك خاتم ب ورده

روح: حلو اووي

رماح: وعد لما نكبر هجبلك واحد تاني غالي اووي وهيكون في ورده بردو علشان انا بحب الورد

روح: وانا هخلي دا معايا هحافظ عليه لحد ماتجبلي الخاتم الكبير

بتظهر ابتسامه علي وش روح وبعدين بتمسح دمعه فرت من عينيها غصب ازااي بس نسيتني يا رماح ازاي

رماح كان قاعد في الجونينه تحت بيفكر في روح وانو مرتاح ليها هو واثق انهم كانو اصحاب وهما صغيرين بس مش فااكر انو كان بيحبها حب طفولي بريئ

في اوضه مهد واحلام

مهد: اي مضايقك كداا

احلام: رماح وتبارك هيتجوزو

مهد: ايوا سمعت كلام جدي بس اي مضايقك في كدا

احلام: روح بتحب رماح يا مهد ف ازاي يعني يتجوز تبارك

مهد بإستغراب: بتحبو ازااي دا اول مره يدخل بيتنا من مده

احلام: كانت بتحبو من زمان من قبل ما يسافر

مهد بيرفع حاجب: بتحبو من وهي طفله

احلام: ايوا

مهد: وانتو بقاا متوقعين ان رماح فاكر قصه الحب التحفه دي

احلام بإستغراب: وميفتكرش ليه بقاا اشمعنا هي فاكره

مهد: علي ما اعتقد ان وقتها روح كان عندها يجي 5 سنين

احلام: 9 سنين

مهد: ورماح اكبر منها بسنه واحده يعني 10 سنين

تقدري انتي بقاا تقوليلي وانتي عندك 10 سنين كنتي بتعملي اي

احلام بحيره: مش فاكره بس

مهد: مفيش بس الي انتو بتقولو عليه دا مش حب دا هبل طفولي كبر جوا روح واقنعها انو حب لكن رماح سافر وعاش حياتو ونسي ماهو طبيعي ينسي دا احنا بننسي مواقف عدت عليها سنه واحده

احلام: تقصد اي

مهد: اقصد ان متعاتبوش علي رماح انو نسي مفيش حد بيفتكر قصه حب عاشها وهو عندو 10 سنين يعني حب اي داا وبعدين ازاي روح لسه فاكره مش معقول ذاكرتها قويه اوي كداا

احلام: روح كانت بتكتب في كشكول الحجات دي كلها ف مخلهاش تنسي مش عارفه ازاي مقطعتش الامل بس اهو الي حصل

مهد: فهمي روح ان كل دا مش صح وان دا مسموش حب شافت هي منو اي علشان تحبو رماح اتغير كتير ملامحو وطباعو وتصرفاتو كلو اتغير الحب الي بجد الي بيبقا قدامك علطول شايفو بيتحرك قدامك كل يوم وبتتعامل معاه زي الحب الي بينا كداا شوفت طباعك وحبيتها شوفت عيوبك وتقبلتها ومميزاتك وعجبتني هو دا الحب مش تبعدي عني 15 سنه وترجعي اقولك اني بحبك

احلام اقتنعت جداا بكلام مهد

اليوم التاني

احلام قالت كل الي مهد قالهولها لروح

روح: قصدك ان الي جوايا داا هوس

احلام: ممكن لي لا... هو ممكن يكون اي حاجه غير الحب

روح: حاسه اني مغفله اوي

احلام: المهم تفوقي من الوهم دا

روح: برائيك ع الاقل مستاهلش ادي نفسي فرصه كمان عاوزاني انسي كل الي جوايا بمجرد مابقا قدامي عاوزاني ابطل ابصلو بحب وهو خلاص رجع مش يمكن لو اتجوزنا نكون اسعد اتنين

احلام: بصي ياروح انا مش مرتاحه لتبارك وحاسه ان الي حصل دا من وراها هي وامي لاني روحت اتكلمت معاها وقولتلها قولي لجدي انك مش عاوزه رماح رفضت

روح: انا مش فارق معايا تبارك انا فارق معايا رماح هل هيوافق يتجوز تبارك ولا لا

احلام: ماهو مفيش جواه حب ليكي علشان يرفض

روح بحزن: ولا شويه اعجاب حتي معقول ملفتش نظرو خاالص مفيش اي مشاعر بسيطه اتحركت جواه

احلام: بصي سيبك من كلام مهد خالص انتي بتحبي رماح صح متسيبيش حبك يروح ع الفاضي حاربي لحد ماتوصلي

روح: احاارب علشان مين طيب احارب لوحدي ماهو لو انا متأكده انو معجب بيا حتي كنت حاربت بس هو مش شايفني اصلا دا عامل زي المانيكان الي من غير روح جسم بس

احلام: خلاص انزلي قولي لجدي انك بتحبي رماح وعاوزه تتجوزيه

روح: نعممم وكرامتي

احلام: يعني هتسيبيه يتجوزهاا

روح: لو هو مرفضش الجوازه دي يبقا هو حر وانا مش هتنازل عن كرامتي علشان حب من طرف واحد

احلام: وقلبك

روح: هدووس عليه

احلام: هتنسيه

روح: صعب اوي بس لو هو وافق علي الجوازه دي يبقاا خلاص كل شيئ نصيب وانا هرضي بيه

روح كانت نازله علي السلم سرحانه شافت رماح نازل ع السلم المقابل ليها

وقفت مكانها بتبصلو بحيره وحاسه انها متكتفه

رماح شافهاا بصلها بضيق ونزل

روح بعصبيه: اي النظره دي

الكل متجمع في صاله البيت

همام قاعد علي الكنبه وروح جمبو والكل قاعد حواليهم

همام: انا بقول نعمل كتب كتاب اخر الاسبوع داا والكام يوم دول العرسان يتعرفو علي بعض ويقررو ناويين ع اي

روح كانت بتسمع ووشها خالي من اي تعبير كانت قاعده بغرور وبتبين انو مش فارق معاها لكن بتتوجع من جواها

رماح: بعد اذنك ياجدي ممكن اقعد مع تبارك شويه لوحدنا

روح رفعت راسهاا وبصتلو بضيق وبتكلم نفسها ماهو عندو لسان بيعرف ينطق اهوو

همام: اه طبعا اقعدو في الجونينه قومي يا تبارك

تبارك بكسوف: حاضر يا جدي

في الجونينه

رماح: انتي لسه بتدرسي ولا خلصتي

تبارك: لا انا مدرستش

رماح: خالص

تبارك: انا مبحبش الدراسه

رماح بضيق اممم وبتحبي اي

تبارك: بحب الطبخ

رماح: بس

تبارك: بحب شغل البيت عموماا

رماح: اممممم ونفسك تحققي اي في حياتك بقاا

تبارك بتفكير: مفيش حاجه معينه

رماح: مفيش طموح خالص مفيش احلام

تبارك بإرتباك: انا برضي بأي حاجه مبحبش ابص لحاجه مش لياا

رماح: وليه متحلميش بحاجه معينه وتوصليلها وتخليها بتاعتك الدنيا احلام لازم تتحقق حتي لو متحققتش اهو ليكي شرف المحاوله

تبارك بتحاول تغير الموضوع: انت نفسك في اي

رماح: انا نفسي اسافر المانيا واعمل بيزنيس خاص بيا هناك اكون راجل ناجح في مجالو

تبارك: وانا

رماح: وانتي اي

تبارك: لما انت تروح المانيا انا هروح فين

رماح بضيق: هاخدك معايا اكيد يعني

تبارك: بس انا مبحبش اسافر انا بحب البلد هناا

رماح: وانتي هتفضلي هنا علطول ماهو طبيعي هنرجع مصر

تبارك: لا انا مش عاوزه اسيب البيت انا اتربيت هنا

رماح: عاوزه تعيشي عمرك كلو في البيت داا مش عاوزه تخرجي منو خالص

تبارك: ايواا ولما اموت اتدفن في المقابر بتاعتنا

رماح: دا اي التشاؤم داا

في صاله البيت

هبه: بابا

همام: نعم

هبه بتوتر: متعرفش حاجه عن حمزه

روح كانت بتقرأ جرنال واول ماسمعت الاسم رفعت راسها

كوثر كانت بتسقي الزرع ولما سمعت الاسم قلبها دق بشده

همام: لا معرفش حاجه عنو

هبه: طيب مش المفروض تدور عليه تشوفو كويس عايش ولا

همام بحده: متجبيش سيرتو تاني ياهبه في البيت دا

هبه: يا بابا حمزه غلط انا عارفه بس هنفضل مقاطعينو لحد امتا يعني مش يمكن ندمان

همام: لو كان ندم كان جه هنا وطلب المسامحه لكن هو مرجعش

هبه: يمكن خايف يرجع و

روح وهي بتبص في الجرنال تاني: مفيش واحد من عيله السراچ بيخاف ياعمتي لو كان عاوز يرجع كان رجع

هبه: لو رجع هتسامحيه ياروح

روح ببرود: هو مأذانيش انا علشان اسامحو السؤال دا يتسئل ل أمي هتقدر تسامحو ولا لا

هبه بتبص لكوثر: هتسامحي....

كوثر: عن اذنكم

هبه رجعت تبص لروح لكن روح سابتهم وطلعت ورا امها

همام: متقلبيش عليهم المواجع يابنتي

هبه: انا عاوزاهم يتجمعو مش اكتر..

في اوضه كوثر

روح: الجو تقيل اووي النهارده ماتقومي نخرج شويه بقالنا 5 ايام مخرجناش

كوثر بتداري دموعها: مش قادره اخرج

روح: المشكله اني مش عارفه اداوي جروحك عارفه ومتأكده انك لسه بتحبيه

كوثر بتبصلها ودموعها بتنزل هان عليه يكسرني الكسره دي ياروح

روح: ياريتك قادره تكرهييه يا ماما ع الاقل كنتي ارتاحتي

كوثر: الحمدلله

روح: طيب يالا قومي اجهزي والبسي العبايه دي بحبها

كوثر بحب: حاضر ياحبيبتي

بعد ربع ساعه كوثر وروح نازلين سوا

قمر: علي فين

روح: رايحين ناكل حمص الشاام

قمر: والله لتاخدوني معاكم

روح بضحك: العربيه كبيره وهتساعنا

سلوي: واناا وانااا وانااا

روح: خلفتكو انا ونسيتكم استئذنو من ابوكو الاول

قمر: حاج يا مسكر انت

صفوان: شكلك عاوزه مصلحه

قمر: هروح انا وسلوي مع روح ناكل حمص الشام

صفوان: هتجبولي كوبايه

قمر: انا عنيا ليك

صفوان بإبتسامه: خلاص روحو

ناديه: دلعهم يا صفوان نفسي مره تقولهم علي حاجه لا

صفوان: بناتي وانا حر فيهم بتدخلي ليه انتي

ناديه: وهما بناتك كنت جبتهم لوحدك

الكل بيضحك

صفوان: خلي بالك وانتي سايقه ياروح

روح: حاضر ياعمي بتقرب من جدها وتبوس راسو ويخرجو

برا البيت

رماح شاف روح وقمر وسلوي وكوثر خارجين بيضحكو وبيتجهو ناحيه عربيه سودا شيك مركونه شافهم بيركبو وروح بتسوق ويمشو

رماح: هو روح بتسوق عربيات

تبارك بضيق: اه في حاجه

رماح بفضول واعجاب: والعربيه دي بتاعتهاا

تبارك بزهق: ااه قعدت تزن علي جدي لحد ماجبلها عربيه علشان تسكت

رماح: اممم

فضلو يلفو بالعربيه شويه ويغنو ويهزرو وبعدين رجعو

قدام البيت

تليفون روح بيرن ووقع تحت رجليها وطت تجيبو

كوثر: خلي بااالك يارووح

العربيه خبطت حد بس الخبطه مش جامده اوي

روح بفزع: رمااح

نزلو من العربيه جري رماح كان واقع علي الارض وماسك دراعو

روح بتنزل قدامو انت كويس

رماح بوجع: ايدي بتوجعني شويه

كوثر: طيب قوم نوديك المستشفي الي في البلد نطمن عليك

رماح: لا لا هي اكيد كدمه بس

همام والرجاله خرجو علي صوتهم

صفيه: يالهوي انت كويس يارماح

هبه: في حاجه بتوجعك

رماح: متقلقوش دراعي بس بيوجعني الخبطه مش جامده

صفيه: اتعميتي يابنت كوثر مش شايفه قدامك

روح بتبصلها ببرود

رماح: روح ملهاش ذنب انا خرجت فجأه قدام العربيه

همام: اركب يارماح يالا ياروح ودينا المستشفي نطمن

رماح: دي حاجه بسيطه ياجدي

همام: يالا يابني نطمن مش هنخسر حاجه

روح ركبت العربيه وجدها جمبها ورماح ورا هو وهبه

وحماد وصفوان وراهم بعربيه مهد

روح كانت قلقانه وكل شويه تبص في مرايه العربيه ومتابعاه وهو بيتألم

في المستشفي

دكتور سمير: اهلا يادكتوره روح اتفضلي

رماح بيقرب من هبه: هو قاال دكتوره

هبه بإعجاب شديد: ايواا سمعت

بعد نص ساعه

الدكتور: الف سلامه علي حضرتك ان شاء الله هتخلي الجبس 3 اسابيع وبعدين تيجي نفكو

رماح: بإذن الله

همام: شكراا يادكتور

سمير: دا واجبي ياعمي

روح: شكرا جدا يادكتور

سمير: اتبسطت اني شوفتك الزياره دي ياروح عامله اي في شغلك

روح: الحمدلله تمام انا مش بنسي تعبك معايا خالص طول عمرك كنت في مقام اعمامي

سمير: وانتي زي هاجر بنتي بعزك زيها بالظبط

روح: شكراا يادكتور

رجعو البيت

تبارك: يالهوي ايدك اتكسرت

رماح: اه فيها كسر

روح: انا بعتذر بجد مكنش قصدي

رماح: ولا يهمك انا الي خرجت قدامك فجأه

روح: عن اذنكم هطلع انام

احلام طلعت وراهاا

روح بتقفل الباب لقت احلام بتزق الباب وبتدخل

روح بضحك: كنت واثقه انك هتيجي

احلام: حسيتي ب اي لما خبطتيه

روح: قلبي خرج من مكانو خوفت اووي وكل ماكنت ببصلو والاقيه بيتوجع قلبي بيتوجع معاه

احلام: محستيش انو معجب بيكي ولا حاجه

روح: نظراتو مش مفهومه خالص مش قادره احدد اذا كان جواه مشاعر تجاهي ولا لا

احلام: هتعملي اي لو الجوازه تمت

روح بنظره وجع هرضي علشان انا مش قليله ابداا انا استاهل واحد يحبني ويحارب معايا غير كداا مش عاوزه

تاني يوم في الصاله

رماح: جدي هو اخوالي فين

همام: اخوالك وولاد اخوالك في المزرعه

رماح بضيق: طيب هو مفيش حد هنا شاف تبارك داخله المطبخ نادالهاا

تبارك: ايواا

رماح: كنت عاوزك تساعديني اكتب الايميل داا ضروري

تبارك: ايميل اي

رماح: ايميل علي اللاب توب لازم ابعتو للمكتب الي شغال فيه

تبارك بتوتر: طيب

رماح تعالي نقعد هناا افتحي اللاب وادخلي ع البرنامج داا ايوا دا انا همليكي الكلمات وانتي اكتبي

تبارك: هو بالانجليزي

رماح افتكر انها قالتلو امبارح انها مدرستش ف حس انو احرجها

رماح: طيب خلاص انا هحاول اكتبو اخد منها اللاب وبدأ يحاول يكتب بالشمال بس كان صعب

روح كانت نازله بتتكلم في التليفون

تبارك بضيق: روح تعالي ساعدي رماح لو فاضيه

رماح: رفع راسو بصلها وهي نازله

روح: دقيقتين هخلص المكالمه دي خلصت وقربت من جدهاا باست ايدو وراحت لتبارك

كنتي عاوزه اي

تبارك: رماح عاوز يكتب شغل علي الكمبيوتر

روح: تمام

رماح كان بيمليها الإيميل وهي بتكتب بسرعه وراه

وهمام كان قاعد متابعهم وتبارك مفارقتهمش

روح: خلصنا

رماح: شكراا جدا بجد مكنتش عارف هخلص ازااي

روح: الشكر لله

عدي 4 ايام روح بتساعد رماح في شغلو ودا بيخليهم يتعاملو مع بعض كتير بس رماح محاولش يقرب من روح لسببين

الاول انو فاكر انها بتحب واحد تاني

التاني ان تبارك دايما قاعده معاهم

همام: كتب الكتاب بعد بكره

اول ما الكلمه اتقالت رماح بص لروح تلقائيا

روح اضايقت وبصت لرماح لقتو بيبصلها ف اتعاملت عادي

رماح: مش عاوز اتجوز تبارك

هبه: انت اتجننت

رماح: مش حاببها والله هو الجواز بالعافيه

هبه: وشكلي قدام اخوياا وقدام ابويا هو لعب عيال جاي بعد اسبوع تقولي مش عاوز اتجوزها

رماح: حاولت اتأقلم معاها مش عارف مش شبهي خالص هي مش وحشه بس مش زي منا عاوز

هبه: بس انا شايفه انها بتعمل الي تقدر عليه علشان تفرحك

رماح: بس انا مش شايفها

هبه: هتشوفهاا انت بس خليك اد المسئوليه وانت هتشوفها ومش هقولك تاني بطل تقارن بينها وبين روح لان تبارك حاجه وروح حاجه تانيه خالص وزي ماقولتلك كنت اتمني تتجوز روح لكن هي مش بتحبك..

يوم كتب الكتاب

احلام: يابنتي اسمعي مني اتصرفي هيروح منك

روح: عاوزاني اعمل اي هاا

احلام: طيب اتكلمي معاه وعرفيه انك بتحبيه

روح: علي جثتي انا طول الوقت داا محافظه علي نفسي ومش راضيه اقول الي في قلبي ليه واجي يوم كتب كتابو اقولو اني بحبو

احلام: هيتجوز

روح: الي يتجوز يتجوز انا زهقت خلاص اعتبري مفيش حاجه حصلت هعتبر اني محبتش

احلام: بالساهل كداا

روح: متضغطيش عليا الله يباركلك انا فيا الي مكفيني مش كفايه هو مش شايفني اصلا هجري وراه يعني

صفيه: مش عاوزه غلطه ياتبارك

تبارك: يا ماما انا مبحبوش هو عافيه

صفيه: احترمي نفسك يابت انتي انا عارفه مصلحتك كويس

تبارك: بس انا مش مرتاحه معاه وبعدين دا مغرور اوي وبحسو بيقلل مني

صفيه: هترتاحي معاه انتي مشوفتيش عربيتو يابت وبعدين انا سمعت انو شغال شغل عالي اووي في الرياض يابت داا كنز متحرك علي الارض

تبارك: يارب بقااا انا زهقت

قبل كتب الكتاب بساعه في اوضه تبارك

تبارك بترن علي حد

سعد بضيق: نعم ياتبارك

تبارك: ياسعد انا كتب كتابي النهارده ومش عاوزااه عشان خاطري اتصرف

سعد بملل: انتي مبتفهميش انا مش بحبك اقولها كام مره

تبارك: بس انا بحبك

سعد: هو الحب بالعافيه ياشيخه ارحميني بقاا

تبارك: كلهاا ساعه وهروح منك للأبد وترجع تزعل

سعد: تروحي مني..؟ هو انا عمري كنت حبيتك علشان ازعل عليكي سلام ومتتصليش بيا تاني علشان لو اتصلتي ههزقك وهقول لجدك انك بتجري ورايا وقفل السكه في وشهاا

شاب كان قاعد جمب سعد وسمع المكالمه

سامح: انت عجيب يا اخي عمال تجري ورا روح ومقلل قيمتك ومهزق نفسك رغم انها قالتلك كتير مبحبكش

سعد: روح دي حاجه كدا زي العسل

سامح: مش دا الي مستغربو انا الي مستغربو ان نفس الكلام الي روح بتقولهولك انت بتقولو لتبارك لسه بلسانك قاايل هو الحب بالعافيه شم ع دمك بقاا وبطل تضايق روح

سعد بنرفزه انت ماالك انت متدخلش في الموضوع داا عيل رخم

الكل اتجمع في صاله البيت والمئذون وصل

رماح بيدور عليها بعيونو بس مش لاقيهاا وكأنو كان مستنيها تنزل توقف الجوازه دي

روح في اوضتها واقفه في الشباك وماسكه الخاتم الصغير الي فيه ورده وماده ايديها لبرا الشباك وضاغطه عليه بكف ايديها

احلام فتحت الباب وعلي وشها علامات الزعل

روح بجمود وافق

احلام بصوت مهزوز: وافق

فتحت روح ايديها والخاتم وقع من الشبااك..