رواية قلب لا يقبل الهزيمه الفصل السابع عشر 17 بقلم دودو محمد

ركضت رضوى من الاعلى واتجهت إلى منال والقت نفسها داخل احضانها وقالت لها انها اشتاقت لها ورحب بيها سليم وفى ذلك الوقت وصلت رانيا وقالت

رانيا :- هاى

منال :- بأستغراب مين دى

رانيا :- انا ابقى مرات سليم نورتوا

منال :- نظرت لها بصدمه وقالت مرات سليم !؟

رانيا :- ايوه مرات سليم

منال :- نظرت إلى سليم وقالت الكلام ده صح يا سليم

سليم :- نظر إلى الارض ولم يجيب عليها

منال :- الكلام ده صح يا رضوى

رضوى :- بحزن ايوه يا ماما

منال :- ايوه يا ماما وازاى قابله على نفسك حاجه زى دى يا رضوى وانت يا اشرف ازاى تسمح بحاجه زى دى

سليم :- أهدى يا مرات عمى هفهمك كل حاجه

منال :- اهدا ايه وزفت ايه ازاى تتجوز على بنتى يا سليم

رضوى :- يا ماما أهدى بس سليم كان متجوزها قبل منى وانا عارفه كل حاجه

منال :- ولما عرفتى أنه متجوز رضيتى تعيش معاه ليه مش ده اللى كنتى مش عايزه تتجوزيه ايه اللى حصل

رضوى :- اصبرى بس هفهمك كل حاجه والله الموضوع مش زى ما انتى مفكره

منال :- جلست على الأريكة بدموع وقالت ليه بس ياربى اللى اتكتب عليا يتكتب على بنتى واشوفه فيها

سليم :- بالله عليكى أهدى يا مرات عمى اطلعى مع رضوى وهى هتقولك كل حاجه خديها يا رضوى

رضوى :- تعالى معايا قومى يلا واخذتها إلى الغرفه الخاصه بيها

خديجه :- لا حولا ولا قوة الا بالله انا هطلع انام تصبحوا على الخير

الجميع :- وانتى من أهله

جاسر :- وانا كمان هطلع انام

اشرف :- تعالى يا بابا ادخلك اوضك

سويلم :- سليم تعالى عايزك

سليم :- حاضر يا جدى شويه وجاى ونظر لرانيا وقال برافو لعبه حلوه منك بس برضه مش هتقدرى ترجعينى معاكى زى زمان

رانيا :- انت بتاعى انا ومحدش هيقدر يخدك منى يا سليم

سليم :- لاء انا بتاع رضوى وبس

رانيا :- بكره تيجى ليا تترجانى علشان اسامحك

سليم :- بتحلمى

رانيا :- لاء مش بحلم لأن اللى قولته ده الحقيقه وهتحصل

سليم :- وانا متأكد من كلامى عمر ده ما هيحصل عارفه ليه علشان أن دلوقتى شوفتك على الحقيقه وقد ايه انتى واحده واطيه ورخيصه

رانيا :- اقتربت منه وقالت على الأقل رخصى انا بالحلال الدور والباقى بقى على اللى مغفله جوزها ودايره من وراه مع حبيب القلب

سليم :- مسكها من شعرها وقال تقصدى ايه بالكلام ده

رانيا :- عايز تعرف تيجى بكره بليل اوضى وانا هعرفك كل حاجه

سليم :- ضحك وقال لعبه رخيصه من واحده زيك وتركها وذهب

رانيا :- بصوت عالى براحتك بس انا عارفه انك هتيجى متتأخرش يا بيبى وصعدت على غرفتها

&&&&&&&&&&&&&&&&&&&&&&&&&&&

فى غرفة رحيم

دخلت رضوى ومعها والدتها منال وجلست منال على الأريكة ونظرت بوجع لرضوى وقالت

منال :- ليه يا رضوى

رضوى :- يا ماما الموضوع مش زى ما انتى مفكره سليم كان متجوز البنت دى من وراه الكل ولما جدى قال إن سليم هيتجوزنى وانا رفض دخل عمى اشرف وطلب منى أقف جمبه واوافق على سليم وأبعده عن البنت دى بس عمى مكانش يعرف أن سليم متجوزها مفكره ماشى معاها كده وانتى عارفه انا بحب عمى اشرف قد ايه. مقدرش أرفض ليه طلب وفعلا وافقت وتمت الجوازه وجينا اسكندريه وبعد شهر حسيت بملل طلبت منه انزل الشركه معاه وفعلا نزلت وبعد كده عرفت أن هو متجوز رانيا مش ماشى معاها وهو كان قايل أن احنا ولاد عم مش قايل أننا متجوزين وبعد كده كل حاجه اتعرفت واللى اسمها رانيا دى هددت سليم بالمؤخر اللى كاتبه ليها واللى مش متوفر معاه دلوقتى وجات تعيش هنا فى الفيلا بصفتها مراته بس هو مش بيروح عندها نهائى ومنتظر جدى يجهز ليه الفلوس ويديها ليه و يطلقها

منال :- وانتى ليه قابله انك تعيشى معاه بعد ما عرفتى أنه متجوز حتى لو هيطلقها يا رضوى ده خدعك وخدع الكل وجدك كان هيوقف فى صفك لأن سليم غلطان

رضوى :- ها م.م.ما انا هطلق منه برضه بس لما يطلق التانيه دى مينفعش اسيبه فى وقت زى ده يا ماما

منال :- سبب مش مقنع يا رضوى

رضوى :- قصدك ايه يا ماما

منال :- بقلق انتى بتحبيه يا رضوى

رضوى :- ل.ل لاء طبعآ يا ماما حب ايه بس ما انتى عارفه ان انا مغصوبه عليه

منال :- لو حبيتى سليم هتتعبى زى يا بنتى مش عايزاكى تعيشى اللى انا عيشته ولا تحسى باللى انا حاسه بى ومسكت يدها وقالت انزلى معايا يا رضوى واطلبى الطلاق بلاش تكملى معاه اكتر من كده

رضوى :- ها ا.ا.اطلب الطلاق دلوقتى م.م.مش هينفع يا ماما انا وعد سليم وعمى أن هقف جنبهم وانتى عارفه ان بحب التزم بوعدى ازاى

منال :- وانا مش هسكت يا رضوى ونهضت من مكانها

رضوى :- يا ماما استنى بس

منال :- مش هقعد اشوف بنتى بيحصل فيها نفس اللى حصل ليا واسكت انا سكت زمان ومازالت بسكت لكن لحد عندك ولاء يا رضوى لاء ونزلت وتركتها

رضوى :- تنهدت وزفرت بضيق وقالت هعمل ايه دلوقتى بس انا مستحيل اتخلى عن سليم فى وقت زى ده انا متوقعتش أن ماما ترفض الموضوع ده العمل ايه بس ياربى ربنا يستر بقى وذهبت المرحاض

&&&&&&&&&&&&&&&&&&&&&&&&&&&&

بغرفة الجد

طرق سليم على باب غرفة الجد سويلم وسمع صوته يأذن له فتح الباب ودخل نظر له الجد وقال

سويلم :- اقفل الباب وراك

سليم :- حاضر يا جدى واغلق الباب وذهب وقف أمامه وقال نعم يا جدى كنت عايزنى فى حاجه

سويلم :- اقعد يا سليم

سليم :- جلس ونظر لجده وقال خير يا جدى

سويلم :- هو عمك منصور مجاش لرضوى هنا

سليم :- جه مره قبل ما يدخل المستشفى وطلب من رضوى تسامحه بس هى رفضت وسابته

سويلم :- مش عايز النتيجه فى الاخر تكون كده فى حياتكم يا سليم

سليم :- مش فاهم يا جدى تقصد ايه

سويلم :- مش عايز حياتكم تبقى نسخه تانيه من منصور ومنال كفايه بناته بتكرهوا بسبب أنه فضل واحده من الشارع على امهم وعليهم

سليم :- انا عمرى ما هعمل زى ما عمى عمل مع مرات عمى وبناته لأن فيه فرق كبير بينا وبينهم يمكن الشبه الوحيد ما بينا طريقة الجوازه كانت بالغصب بس الفرق بقى أن انا حبيت رضوى وغيرت من نفسى علشانها رضوى شخصيه جميله اوى يا جدى مكنتش فاهمه فى الاول وده كان مسبب بينا مشاكل بس لما عرفتها على حقيقتها عشقتها رضوى رغم أنها دايمآ بتظهر قويه قصاد الكل ولسانها طويل بس فى الحقيقه عندها قلب طيب اوى وحنينه وجدعه وعندها استعداد تساعد اى حد حتى لو الحد ده عدوها وفعلا لما بتضحك ملامح وشها بتبقى طفوليه جدآ ورقيقه انا مستعد اعمل اى حاجه فى الدنيا بس رضوى متسبنيش انا بقيت خايف اقوم الصبح ملاقهاش معايا وفى اوضى

سويلم :- نظر له نظره مطوله وتنهد وقال ومين قالك أن رضوى هتسيبك

سليم :- ها ل.ل.لاء اقصد يعنى تحصل مشكله ما بينا زى ما بتحصل ما بين اى اتنين متجوزين

سويلم :- انا معنديش حاجه اسمها طلاق شيلوا الكلمه دى من دماغكم نهائى فاهمين

سليم :- بسعاده اكيد طبعآ يا جدى وده اللى بتمناه

سويلم :- تصبح على خير يا سليم

سليم :- نهض وقال وانت من أهله وخرج من الغرفه وجد منال ذاهبه إلى غرفة الجد سويلم نظرة له بغيظ وتركته وذهبت طرقت على باب غرفة سويلم ودخلت زفر بضيق سليم وصعد إلى غرفته

منال :- جلست وقالت ارجوك يا عمى طلق رضوى من سليم

منصور :- منال يا بنتى انا حاسس بيكى وعارف ان الموضوع ده فتح عندك جراح قديمه بس سليم مش منصور يا منال سليم بيحب بنتك وهيحافظ عليها

منال :- ابوس ايدك يا عمى مش عايزه بنتى تتعذب زى ،دول هما اللى طلعت بيهم من الدنيا انا مستعده استحمل اى حاجه تحصلى بس مش هقدر اشوف قلب بنت من بناتى بيتكسر

سويلم :- انتى عارفه ومتأكده أن انا مش هطلق رضوى من سليم يا منال لأن كلمة الطلاق انا برفضها ومحصلتش فى عيلة سويلم قبل كده روحى نامى يا بنتى وسبيها على الله

منال :- ونعم بالله يا عمى بس لو غاليه عندك بلاش بنتى

سويلم :- روحى نامى يا منال وربنا يسهل

منال :- نظرت له بوجع وتنهدت ونهضت واتجهت إلى الباب ونظرت لعمها مره اخرى وقالت عمى اللى قابلت بى زمان ده علشان حبيت منصور وبنتى بدأت تتعلق بسليم وانا مش عايزاها تحبه زى ما انا حبيت ابوها

سويلم :- تصبحى على خير يا منال

منال :- وانت من اهل الخير يا عمى وخرجت وأغلقت الباب خلفها

&&&&&&&&&&&&&&&&&&&&&&&&&&&&&&

فى غرفة جاسر

دخل جاسر الغرفه وجلس على الأريكة بدون أن ينطق بكلمه نظرت له مى بأستغراب وقالت

مى :- يعنى مقولتش حاجه لجدى

جاسر :- مش هقدر اقوله

مى :- ليه يعنى خايف منه

جاسر :- اه خايف بس مش عليا خايف عليكى انتى عارف ان جدى بيتعصب لما بيسمع كلمة الطلاق وممكن يضربك وانا الصراحه مش هقدر استحمل اشوفك بتضربى

مى :- نهضت من فوق السرير واتجهت إلى الأريكة وجلست بجواره وقالت لدرجاتى بتحبنى

جاسر :- نظر لها وقال لسه فاكره تسألى انا مجنون بيكى بعشقك لدرجة الهوس

مى :- نامت على صدره وقالت وانا بحبك اوى والهبل اللى بقوله ده من وراه قلبى انا اصلا مقدرش اعيش من غيرك لو بعد عنك اموت انا ما صدقت أننا اتجوزنا اصلا يبقى هسيبك كده بسهوله

جاسر :- قبل رأسها وضمها اكثر فى حضنه وقال اومال ليه بتعملى فيا كده يا مى

مى :- ببقى مخنوقه ومعرفش كده بتحصل ليا حاجات غريبه بتخلينى عايزه اضحك واعيط فى نفس الوقت وببقى عايزاك تقولى كلمتين رومانسين علشان اتخانق معاك وببقى عايزه اصرخ وألم الناس علينا ونظرت له وقالت هو انا كده ابقى اتجننت يا جسوره

جاسر :- نظر لها بصدمه وقال لاء خالص انتى ست العاقلين يا حبيبتى

مى :- ايه ده انت بتخدنى على قد عقلى شايفنى قدامك مجنونه ولا مجنونه

جاسر :- نهض سريعآ وخلع التيشيرت من عليه

مى :- نظرت له بأستغراب وقالت انت بتعمل ايه

جاسر :- هعقلك بس بطريقتى

مى :- نهضت سريعآ وابتعدت عنه وقالت انت قصدك ايه

جاسر :- اقترب منها وقال هعملك جلست كهربه ومال بجسده عليها وحملها من فوق الارض وذهب اتجاه السرير

مى :- لالالا نزلنى بقولك نزلنى بدل ما اصرخ وألم عليك الفيلا كلها دلوقتى

جاسر :- يا بنتى انتى عندك خال اهبل انا جوزك ولو الفيلا كلها اتجمعوا على صوتك مش هيقدروا يعملوا حاجه

مى :- طب نزلنى

جاسر :- وضعها على السرير واقترب منها وقال طيب بالنسبه لهرمونات الحمل اللى مطلعه عينى دى هتخلص أمته

مى :- كمان سنتين يا ابنى انت عبيط اسمها هرمونات حمل اكيد بتخلص مع الولاده

جاسر :-اااااه قولتيلى سهله واقترب منها

مى :- ابتعدت للخلف وقالت لااااا فيش

جاسر :- فيش وتشبيه

مى :- هه خفه وابعد بقى علشان عايزه انام

جاسر :- لاء تنامى ايه انتى لازم يتعملك جلسة كهربه

مى :- كهربوك يا بعيد فى عامود نور بقولك تعبانه من الحمل ومخنوقه

جاسر :- فيه واحده تقول لجوزها كده

مى :- مش انا قولت يبقى فيه تصبح على خير ووضعت رأسها على الوساده

جاسر :- يا بت طيب والتيشرت اللى قلعته ده

مى :- البسه تانى سهله واطفى النور بقى علشان عايزه انام

جاسر :- نامى يا اختى الواحد بيفرح بالجواز وميعرفش الخيبه اللى هيشوفها بعد الحمل وقام أغلق الضوء ونام على السرير بجوار مى

مى :- وضعت رأسها فوق صدر جاسر العارى وقبلته وقالت بحبك

جاسر :- تنهد وقبل رأسها وقال وانا بعشقك يا مجنونه وضمها داخل احضانه

&&&&&&&&&&&&&&&&&&&&&&&&&&&&

فى غرفة سليم

دخل سليم الغرفه عنده وجد رضوى نائمه على الأريكة نظر لها وقال

سليم :- رضوى انتى نمتى

رضوى :- اممممم يعنى عينى لسه بتروح فى النوم

سليم :- طيب قومى اتكلم معاكى كلمتين

رضوى :- طيب مينفعش يتأجلوا لبكره

سليم :- لاء

رضوى :- جلست وقالت خير

سليم :- امك شكلها زعلانه منى اوى

رضوى :- طبيعى يعنى واحده اتفاجئت أن جوز بنتها متجوز واحده تانيه غيرها عايزها ايه تخدك بالاحضان

سليم :- يخربيت لسانك ده ايه يا شيخه

رضوى :- الله مش برد على كلامك

سليم :-طيب هى قالت ليكى ايه

رضوى :- مصممه أننا نطلق وقالت انها مش هتسكت

سليم :- بصدمه نطلق

رضوى :- اه نطلق مالك مصدوم اوى كده ما احنا كده كده هنطلق بس لما نخلص من موضوع الزفته اللى اسمها رانيا دى

سليم :- عندما سمع اسم رانيا تذكر حديثها له

رضوى :- سليم انت يا ابنى روحت فين بكلمك

سليم :- ها م.م.مفيش كنتى بتقولى ايه

رضوى :- بقولك جدى مقالش ليك حاجه عن موضوع الفلوس اللى هتدفعها لزفته بتاعة المؤخر

سليم :- لاء مقالش حاجه كل اللى قاله شيلوا موضوع الطلاق ده من دماغكم علشان مش هيحصل

رضوى :- لا والله ، ليه بقى أن شاءالله متشغلش بالك انت وقتها انا هعرف اقنعه ازاى

سليم :- وليييييه تعب القلب ده، ما انا بحبك وعايز اكمل العمر كله معاكى رضوى ارجوكى متسبنيش

رضوى :- يا ابنى فكك من الجو ده علشان انا عمرى ما هحبك ولا هفكر فيك

سليم :- ليييييه ادينى سبب واحد مقنع

رضوى :- علشان انت راجل زى اى راجل اهم حاجه عندك نفسك وبس، ده سبب مقنع ليك ولا لاء وتنهدت وقالت تصبح على خير ونامت على الأريكة

سليم :- رضوى

رضوى :- امممم

سليم :- بحبك مهما قولتى وهثبتلك أن انا مش زى اى حد

رضوى :-لم تجيب عليه وأعطته ظهرها وابتسمت وأغلقت عينها ونامت

سليم :- ظل ينظر لها ويتذكر حديث رانيا له إلى أن غلبه النوم

&&&&&&&&&&&&&&&&&&&&&&&&&&&

اشرقت شمس صباح يوم جديد بنورها الساطع فى سماء القاهره لتبدء اسماء بفتح عيناها على صوت رحيم نظرت له وقالت

اسماء :- ن.ن.نعم يا رحيم

رحيم :- قومى جهزى هدومى على ما اخد شاور

اسماء :- مسحت وجهها بيدها وتنهدت وقالت حاضر ونهضت من على الأريكة واتجهت إلى خزانة الملابس ووقفت تنظر إلى الملابس وعيناها غفوة دون أن تشعر و انتفضت من مكانها على صوت رحيم المرتفع وهو يقول لها

رحيم :- اخلصى انتى هتنامى وانتى وقفه

اسماء :- ها ا.ا اهو حاضر حاضر ونظرت إلى الملابس واختارت له طقم

رحيم :- نظر للملابس بعدم رضا وقال ذوقك زفت شوفى حاجه تانيه واختارى حاجه حلوه ونظر لها بأشمئزاز وتركها وذهب المرحاض

اسماء :- تنهدت بحزن ووضعت الملابس فى الخزانه مره اخرى واختارت له ملابس أخرى ووضعتها على السرير وجلست على الأريكة

رحيم :- بعد وقت خرج من المرحاض وارتدى ملابسه وقام بتأدية فرضه واتجه إلى باب الغرفه

اسماء :- طيب انا هنزل معاك ولا هقعد هنا

رحيم :- اللى يريحك بس ياريت متنزليش مش عايز اشوف وشك وتركها وذهب

اسماء :- تنهدت بحزن وبدلت ملابسها وتوضأت وقامت بتأدية فرضها واتجهت إلى الأسفل وقالت ص.ص.صباح الخير

الجميع :- صباح النور

اسماء :- جلست على المقعد بجوار رحيم ونظرت إلى احمد

نسرين :- نورتى مكانك تانى يا اسماء

اسماء :- ش.ش.شكرآ يا نسرين

رحيم :-نهض و نظر لوالدته وقال أنا ماشى

صباح :- اقعد أفطر يا حبيبى

رحيم :- نظر بقرف لأسماء وقال اتسدت نفسى خلاص

اسماء :- نهضت وقالت بدموع خلاص اقعد انت كمل اكلك انا هطلع اوضى

هشام :- اقعدى يا اسماء افطرى ونظر لرحيم وقال وانت كمان اقعد كمل اكلك بلاش لعب عيال

رحيم :- يا بابا انا شبعت مش عايز

هشام :- اقعد يا رحيم انت ملحقتش تاكل اقعد

رحيم :- زفر بضيق وجلس مره اخرى

صباح :- يا حبيبى مهما كان اللى حصل ما بينكم ميستهلش كل ده اهى رجعت تانى فى بيتك انسوا اللى فات وابدأوا صفحه بيضه من اول وجديد

رحيم :- يا ماما لو سمحتوا مش عايز حد يدخل ما بينا دى مراتى وانا عارف اتعامل معاها ازاى

صباح :- يا ابنى احنا كلنا واحد هنا وانتوا لسه شباب ومتهورين ومش فاهمين حاجه واحنا واجبنا أننا نفهمكم و نوعيكم

رحيم :- يا ماما انا فاهم بعمل ايه كويس اوى وعارف ايه المعامله اللى تنفع معاها علشان كده بترجاكم سبونى امشى حياتى زى ما انا عايزها

هشام :- يا حبيبى مش تدخل مننا والله بس متنساش أن أسماء برضه تبقى بنت اخويا وانا فى مقام ابوها ومش هقبل انك تيجى عليها ولا توجعها

رحيم :- اهى عندك اسألها إذا كنت جيت عليها قبل لا كده ولا وجعتها اسألها كده مين اللى جه على التانى ووجعه يا بابا انت عارفنى مبعرفش اظلم حد ولكل فعل رد فعل ونهض وقال عن اذنكم وذهب وتركهم

اسماء :- نظرت للجميع بدموع ونهضت وقالت عن اذنكم

صباح :- رايحه فين يا بنتى

اسماء :- الحمدالله شبعت وتركتهم وصعدت إلى غرفتها

نسرين :- مالك يا احمد ساكت ليه

احمد :- هقول ايه يعنى

نسرين :- ايه رأيك فى الكلام اللى حصل دلوقتى

احمد :- من رأى سيبوا رحيم فى حاله هو حر يعمل مع مراته اللى هو عايزه رحيم مش صغير وعارف بيعمل ايه كويس وبعدين دى حياته الشخصيه احنا مالنا بيها ما كل واحد يعمل اللى هو عايزه

صباح :- هو ده اللى ربنا قدرك عليه بدل ما تكلم اخوك وتعقله يخف شويه على البت انت مش شايف شكلهم عامل ازاى

احمد :- والله انتوا طلبتوا رأى وانا قولته عملتوا بى عملتوا معملتوش انتوا حرين ونهض وقال يلا انا ماشى سلام وذهب وتركهم

صباح :- انا مش هستنى لما بيت ابنى يتهد انا لازم اشوف صرفه معاه

هشام :- اصبرى بس يومين يهدا شويه لو فضل كده نبقى ندخل

صباح :- ربنا يهديهم ويصلح حالهم يارب

&&&&&&&&&&&&&&&&&&&&&&&&&&&

بالاسكندريه......فيلا اشرف

غرفة سليم

استيقظت رضوى من نومها على صوت رنين الهاتف الخاص بها نظرت عليه رأت المتصل شادى نظرت بأستغراب وقالت

رضوى :- شادى عايز ايه ده وقامت بالإجابة عليه قائله صباح الخير يا شادى

شادى :- صباح النور يا مدام رضوى اسف أن اتصلت بيكى بدرى كده بس انا عايزك ضرورى

رضوى:- لا ولا يهمك بس خير يا شادى عايز تقابلنى ليه

شادى :- فيه موضوع مهم عايزه اقوله ليكى بخصوص مدام رانيا واستاذ سليم ومش هينفع اجى الشركه تانى علشان استاذ سليم مش حابب وجودى فيها

رضوى :- موضوع مهم يعنى

شادى :- مهم جدآ ولازم تعرفيه فى اسرع وقت

رضوى :- تمام اشوفك النهارده فى الكافيه اللى جمب الشركه

شادى :- لاء بلاش جمب الشركه ياريت يكون مكان بعيد شويه وياريت استاذ سليم ميعرفش بالمقابله دى

رضوى :- ليه يعنى

شادى :- هتعرفى لما اقابلك

رضوى :- اوك نتقابل فى كافيه (....) بعد الشغل

شادى :- تمام هكون فى انتظارك سلام

رضوى :- باى وأغلقت السكه بأستغراب ونظرت على سليم رأته مازال نائمآ نهضت وذهبت إليه وقالت سليم يا سليم

سليم :- امممم

رضوى :- اصحى يلا هنتأخر على الشغل

سليم :- شويه شويه

رضوى :- يا سليم اصحى يلا

سليم :- ماشى ماشى

رضوى :- يووووه بقى سليم اصحى

سليم :- خلاص يا رضوى صحيت سبينى بقى

رضوى :- انت حر وتركته وذهبت المرحاض

سليم :- جلس على السرير وهو نعسان ومسح وجه بكف يده وبعد وقت خرجت رضوى ونظرت لها و قهقهت فتح عينه بأستغراب وقال فيه ايه بتضحكى على ايه

رضوى :- شكلك مسخره اوى وانت شعرك منعكش ونايم وانت قاعد

سليم :- انا اصلا نمت بعد الفجر

رضوى :- اشمعنا يعنى

سليم :- مكانش جاى ليا نوم

رضوى :- اللى شاغل بالك

سليم :- انتى طبعآ هو فيه غيرك

رضوى :- انشف كده يا ابنى ده انت حتى صعيدى ايه جو النحنحه اللى انت عايش فيها ده

سليم :- اتلمى يا رضوى ولمى لسانك أنا راجل اوى واعجبك وغمز لها

رضوى :- لاء وانت الصادق انت قليل الادب ومشوفتش بربع جنيه تربيه

سليم :- نهض من على السرير واتجه إليها واقترب منها وقال أنا كل ده بتعامل معاكى بأدب واحترام على فكره

رضوى :- رجعت للخلف وقالت والله كده بأحترام اشك

سليم :- اقترب منها وقال لو عايزه تشوفى قلة الأدب منى انا مستعد والله

رضوى :- رجعت للخلف وقالت وحياة امك اتلم واوعى كده خلينى اجهز نفسى علشان اتأخرنا

سليم :- امسك ذراعها واقترب منها و أحاط خصرها بذراعيه ونظر لها فى عينها وقال وحياتك انتى انا مستنى اللحظه دى بفارغ الصبر

رضوى :- بتوتر ل.ل.لحظة ايه دى

سليم :- لحظة ما اوريكى قلة الأدب

رضوى :- بخجل سبنى يا سليم اوعى بقى

سليم :- مقدرش اسيبك انا خلاص حبك عندى بقى ادمان

رضوى :- ا.ا انت فيه ايه مالك على الصبح كده ابعد عنى

سليم :- بحبك

رضوى :- بتوتر يوووووه بقى سبنى يا سليم وحاولت الإفلات منه لكنها فشلت

سليم :- نظر إلى شفتيها بأشتياق واقترب منهم وحاول أن يقبلها

رضوى :- أدارت وجهها وابتلعت ريقها بتوتر وقالت س.س.سليم ا.ا انت هتعمل ايه

سليم :- وهو ينظر إلى شفتيها قال نفسى ادوق طعمهم

رضوى :- لا والله انت مش طبيعى النهارده فيه ايه

سليم :- فيه نار قايده جوايا

رضوى :- عندك الميه طفيها يا اخويا واوعى كده خلينى اغير هدومى

سليم :- طيب ما تيجى اغيرك

رضوى :-والله ، ولا انا مش مرتحالك على الصبح

سليم :- على فكره انا زى جوزك برضه

رضوى :- وعلى فكره انت لو مبعدش عنى دلوقتى حالا مش هيحصلك كويس

سليم :- طيب ورينى هتعملى ايه

رضوى :- اقتربت من كتفه وقامت بعضه

سليم :- ابتعد عنها بألم وقال اااااه يا بنت العضاضه

رضوى :- تستاهل دى نتيجة اللى بيمد ايده على حاجه مش بتاعته

سليم :- ورحمة امى ما انا سيبك

رضوى :- ركضت بعيد عنه وابتسمت وقالت اهدا كده وروق يا ابن الناس على الصبح

سليم :- ركض خلفها وقال هو انتى خليتى فيها هداوه ده انا هطلع روحك بأيدى

رضوى :- ركضت وقالت يخربيت عرق الهبل اللى بيجرى فى دمك ده يا ابن انت اتأخرنا والله على الشغل

سليم :- ركض خلفها وقال وايه يعنى أنا صاحب الشركه وليا حق أتأخر عن الشغل براحتى انا ومراتى

رضوى :- صعدت فوق السرير وقالت انت ومين يا عنيا

سليم :- ركض فاجئه عليها و اوقعها فوق السرير وهو فوقها ونظر فى عيناها وقال أنا و مراتى يا نور عنيا

رضوى :- اغلقت عيناها وقالت س.س.سليم

سليم :- اقترب من شفتيها وقال بهمس روح سليم قلب سليم من جوه

رضوى :- تنهدت بتوتر وأغلقت عيناها و قبل أن تتلامس شفتيهم سمعوا صوت طرق على الباب

رضوى :- دفعته بقوه بعيد عنها وقامت ركضت على المرحاض

سليم :- نام على ظهره على السرير ووضع يده على وجه وزفر بضيق وقال مين الرذل اللى ساب الأوقات كلها وجاى فى الوقت ده بالذات ونهض من على السرير واتجه إلى باب الغرفه وفتح الباب وقال مرات عمى اتفضلى

منال :- فين بنتى

سليم :- نظر على باب المرحاض وقال بتوتر ف.ف.فى الحمام

منال :- ياريت تبلغها أن انا عايزاها فى اوضى وتركته وذهبت

سليم :- نظر لها وقال بصوت منخفض يعنى مكنتيش عارفه تأجلى الكلمتين دول شويه وزفر بضيق واغلق الباب واتجه إلى باب المرحاض وطرق عليه وقال رضوى امك هى اللى كانت بتخبط على الباب وبتقولك عايزاكى فى اوضتها

رضوى :- خرجت من المرحاض ونظرت له بضيق وقالت بتحذير حسك عينك تكرر اللى حصل من شويه ده تانى لاخر مره بقولك الزم حدودك معايا يا سليم

سليم :- رضوى انا كنت بهزر معاكى ومفيهاش حاجه انا جوزك

رضوى :- بعصبيه لاء مش جوزى انت اخرك كلمه من اربع حروف و جرة قلم و ينتهى كل حاجه ومش هسمح بأى تطور ما بينا يا سليم

سليم :-زفر بضيق وقال انا تعبت من عقابك ليا على شئ انا مليش دعوه بى ولاخر مره بقولها ليكى يا رضوى انا مش عمى منصور ولا عمرى هكون زيه ومش هتنازل عن حبك مهما حصل انا بحبك وهفضل احبك لاخر يوم فى عمرى وتركها وذهب المرحاض

رضوى :- زفرت بضيق وجلست على السرير ووضعت وجهها ما بين كفوف يدها وتنهدت بحزن وقامت بدلت ملابسها وخرجت من الغرفه واتجهت إلى غرفة والدتها

سليم :- خرج من المرحاض نظر فى الغرفه على رضوى لم يجدها بدل ملابسه وقام بتأدية فرضه وخرج من الغرفه

&&&&&&&&&&&&&&&&&&&&&&&&&&&&

فى منزل منصور

استيقظ منصور من نومه نظر فى الساعه وتنهد ونهض من على سريره واتجه إلى المرحاض وبعد وقت خرج استيقظت رحاب ونظرت له بأستغراب وقالت

رحاب :- منصور انت رايح فين كده

منصور :- عند اخويا اشرف

رحاب :- جلست بصدمه وقالت رايح ليها

منصور :- مش رايح علشانها يا رحاب انا رايح اسلم على ابويا

رحاب :- بلاش تروح علشان خاطرى اكيد هى هتبقى قاعده معاكم واكيد ابوك هيفضل يكلمك عليها

منصور :- رحاب متزهقنيش قولتلك رايح اسلم على ابويا وفيها ايه لما تكون قاعده

رحاب :- يوووووه بقى انا بغير عليك منها وبعدين دى ست مش سهله بتحاول تمثل عليكم علطول طول الملاك البرئ وهى سهونه اصلا

منصور :- كلمه واحده زياده وهحلف أن اخلى كل الأوهام اللى فى دماغك دى حقيقه فاهمه

رحاب :- طيب خدنى معاك

منصور :- اخدك معايا فين ده لو ابويا شافك قدامه دلوقتى مش بعيد يديكى رصاصتين فى نفوخك

رحاب :- خلاص يبقى متروحش

منصور :- باين عليكى اتجننت يا رحاب وتركها وذهب

رحاب :- جلست على السرير بغيظ وقالت يوووووه بقى

منصور :- صعد سيارته وادارها وقادها إلى فيلا اشرف وبعد وقت وصل هناك ودخل وقال ..........

&&&&&&&&&&&&&&