رواية مزاوله حب الفصل الثاني والثلاثون 32 بقلم دودو محمد

طلبت يارا الطلاق من انس بعد ما العلاقه ما بينهم زادت فى التوتر وقالت

يارا :- طلقنى يا انس

انس :- بص ليها بصدمه

يارا :- انا خلاص تعبت ومش قادره استحمل تجاهلك ليا ده طلقنى يا انس كفايه لحد كده ارجوك

انس :- سبينى انام يا يارا بقولك عندى شغل الصبح

يارا :- انت ايه البرود اللى عندك ده يا شيخ طلقنى بقولك

انس :- قام قعد وبص ليها وقال اللى انتى عايزاه هعمله ليكى بس الصبح ممكن بقى تسبينى انام

يارا :- لاء مش هسيبك تنام وهطلقنى دلوقتى يا انس

انس :- غمض عينه بعصبيه وقال ادخلى اوضك ولمى الدور يا يارا

يارا :- مش هدخل اوضى يا انس واللى عندك اعمله

انس :- اللهم طولك يا روح

يارا :- طلقنى

انس :- قام وقف ومسكاها من دراعها وقال انتى ليه عناديه ومش بتسمعى الكلام

يارا :- سحبت دراعها من أيده وقالت حرام عليك اللى بتعملوا فيا ده عملت ليك ايه علشان تلعب بمشاعرى وحبى ليك ده ذنبى علشان حبيتك حرام عليك كفايه بقى وقعدت تضرب فى صدره وتعيط

انس :- غمض عينه بألم وشدها فى حضنه وقعد يطبطب عليها

يارا :- مسكت فى هدومه اكتر وقعدت تعيط وقالت انا تعبت والله العظيم تعبت ارحمنى بقى كفايه

انس :- ضمها فى حضنه اكتر وباس راسها

يارا :- زقته وقالت ابعد عنى متلمسنيش انا بكرهك يا انس بكرهك

انس :- بص ليارا بوجع وسابها وفتح الباب ومشى من البيت

يارا :- قعدت فى الارض وقعدت تعيط وحطت ايديها على وشها وقالت ليه كده حرام عليك ليه وقعدت تعيط

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

اشرقت شمس صباح يوم جديد بنورها الساطع فى سماء القاهره لتبدء تمارا بفتح عيونها قامت قعدت على سريرها وافتكرت اللى حصل امبارح رجعت شعرها لوراه ودموعها نزلت منها وقالت

تمارا :- ليه عملتى كده يا تمارا مكنتيش قادره تستحملى شويه وتتجوزى ياسين على الأقل مكانش حصلت الفضيحه اللى حصلت امبارح دى وسكتت شويه وقالت غصب عنى مش هقدر اعيش مع اى راجل تانى غير يوسف كنت هظلم ياسين معايا ومكنتش هقدر أسعده وبعدين قالت يوسف يوسف يوسف كل حاجه حصلت فى حياتى سببها يوسف حبى ليه دمرنى انا لازم أنساه واعيش لنفسى وبس وقامت من على سريرها دخلت الحمام جهزت نفسها وبعد وقت خرجت أدت فرضها وغيرت هدومها ونزلت تحت وقالت صباح الخير

سميه :- قامت وقفت وقالت أنا داخله اوضى يا عماد وسابتهم ودخلت اوضتها

تمارا :- اتنهدت وقالت انا اسفه يا بابا

عماد :- اسفك مبقاش

ينفعنى بحاجه اللى حصل حصل خلاص يا تمارا وسابها ومشى

تمارا :- دموعها نزلت منها واتنهدت وخرجت ركبت عربيتها وراحت على الشركه ودخلت على المكتب الخاص بتاعها وقعدت تشوف شغلها وشويه وسمعت صوت دوشه بره قامت خرجت تشوف فيه ايه لاقت الأمن بيمنع ياسين من الدخول وهو بيحاول يهرب منهم راحت عندهم وقالت سيبوه

الامن :- بس احنا عندنا تعليمات أنه ميدخلش الشركه

تمارا :- بعصبيه مين اللى اداك التعليمات دى

يوسف :- انا يا تمارا

تمارا :- بصت ليه بغيظ وقالت وانت تمنعه ليه من دخول الشركه المكان ده مش ليك لوحدك فاهم

يوسف :- ويدخل هنا تانى ليه مش خلاص كل حاجه انتهت

تمارا :- شئ ميخصكش وبصت لياسين وقالت اسفه يا ياسين على اللى حصل معاك من الأمن اتفضل معايا ودخلوا المكتب بتاع تمارا وقفلت الباب وقالت اتفضل اقعد يا ياسين تشرب ايه

ياسين :- مش عايز اشرب حاجه ليه عملتى كده معايا يا تمارا انا بحبك ليه كسرتى قلبى ووجعتينى انا سألتك تختارينى انا ولا هو وانتى فرحتينى وقولت ليا انك عايزانى انا ليه طلعتينى سابع سما ونزلتينى مره واحده سابع ارض قولتلك من الاول بلاش تجرحى قلبى بلاش تعملى معايا اللى هو عمله معاكى كسرتينى ووجعتى قلبى ليه انتى عارفه امبارح انا حصلى ايه بسببك انا روحت المستشفى علشان كان عندى أنهيار عصبى مش قادر اصدق اللى حصل منك ده يا تمارا

تمارا :- بدموع انا اسفه ليك بجد عارفه أن مهما اتأسف ليك مش هكفر عن ذنبى اللى عملته ده بس مقدرتش انا لسه بحب يوسف ولو كانت الجوازه دى تمت لا انا ولا انت كنا هنكون مبسوطين مع بعض انا حاولت لاخر لحظه احافظ على وعدى ليك قلبى اللى كسب فى الاخر ومقدرش يعيش مع حد تانى غير يوسف

ياسين :- بدموع معنى كلامك ده انكم هتتجوزا

تمارا :- لاء طبعا انا عمرى ما هكون ليه بس مقدرش اكون مع حد غيره من الاخر انا قررت اعيش لوحدى أحبه بس مش مسامحه على اللى عمله معايا

ياسين :- بس انا بحبك ومش هقدر اعيش من غيرك

تمارا :- بصت فى الارض ودعكت ايديها فى بعض وقالت ا.ا.انا اسفه يا ياسين بس انا مقدرتش احبك دور على واحده تحبك بجد هى دى اللى هتقدر تسعدك وانسانى ارجوك

ياسين :- راح مسك ايديها وقال تمارا ارجوكى انا رسمت حياتى الجايه كلها معاكى

تمارا :- سحبت ايديها من أيده وادته ضهرها وقالت ياسين ارجوك متصعبهاش عليا بترجاك

ياسين :- عمومآ يا تمارا انا هفضل جمبك ضهرك وسندك ووقت ما تحتاجينى هتلاقينى جمبك وهفضل احميكى لآخر يوم فى عمرى ودموعه نزلت منه وقعد يبص ليها وخرج يجرى من المكتب ومشى من الشركه

تمارا :- غمضت عينيها بألم وقالت انا اسفه يا ياسين بجد اسفه

يوسف :- كان عايز منك ايه تانى

تمارا :- لفت بضهرها وقالت وانت مالك

يوسف :- تمارا بلاش عند بقى آن الأوان نكون مع بعض

تمارا :- ده بعينك اوعى تكون فاكر أن انا سيبت ياسين علشان خاطر سواد عيونك يبقى بتحلم انا سيبت ياسين علشان حسيت نفسى مش مرتاحه معاه فبلاش تاخد فى نفسك قلم لو سمحت وراحت قعدت على الكرسي بتاعها

يوسف :- ابتسم وقال على فكره انتى مش شاطره خالص فى الكدب

تمارا :- اصل الكدب ليه ناسه بيكونوا محترفين فيه زيك كده بالظبط

يوسف :- بحبك برضه

تمارا :- وانا بكرهك برضه

يوسف :- وحياة امك هتجوزك

تمارا :- وحياة امك انت بتحلم وياريت تتفضل بره خلينى اشوف شغلى

يوسف :- قرب منها وقال عيونك الحلوين دول باين فيهم حبك ليا ابقى داريهم بقى

تمارا :- بصت ليه بغيظ

يوسف :- ابتسم وغمز ليها وسابها وخرج وقفل الباب وراه

تمارا :- بغيظ مستفز وابتسمت وقالت بس دمه خفيف اوى وبموت فيه وبعدين قالت احم ايه يا تمارا نسيتى ولا ايه شكلك ضعيفه وهضيعينا معاكى هوف بقى وبدأت تشوف شغلها

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى شقة انس

دخل انس الشقه بعد ما قضى طول الليل بره دخل بص على يارا ملاقهاش بص فى المطبخ محدش موجود دخل الاوضه محدش موجود نده بصوت عالى وقال

انس :- يارا يا يارا محدش رد عليه خرج وخبط على باب الحمام وقال يارا انتى جوه يارا محدش رد فتح الباب ملاقاش حد اتغاظ ومسك تليفونه اتصل بيها مردتش عليه داس على أسنانه وقال ماشى يا يارا وفتح باب الشقه ونزل وراح عند شقة بدر وطلع فوق ورن الجرس فتحت ليه يارا بص ليها بغيظ

يارا :- بصت ليه وسابته ودخلت

انس :- دخل وراها وقال ممكن افهم ازاى تنزلى من البيت من غير ما تقولى

يارا :- مزاجى كده

انس :- يارا اتكلمى عدل

يارا :- والله هى دى طريقتى فى الكلام وانا حره ورجوع لبيتك مش راجعه تانى وطلقنى يا انس انا مستحيل اعيش معاك تانى

انس :- داس على أسنانه ومسكها من دراعها وقال ايه اللى انتى بتقوليه ده انا ماسك نفسى عليكى بالعافيه ادخلى غيرى هدومك ويلا معايا

يارا :- سحبت دراعها من أيده وقالت قولتلك مش هروح معاك انا كرهت العيشه معاك انت واحد معقد معندكش لا دم ولا احساس واحد عنده انفصام فى الشخصيه ده انت كرهتنى فى نفسى يا شيخ من يوم ما اتجوزنا وانت بتتعامل معايا بقسوه ،شويه تقرب وشويه تبعد وحتى لما بقيت رومانسي معايا كان علشان مزاجك وبس بتعمل كل ده فيا ليه علشان عارف ان بحبك وضامن وجودى جمبك بس لاء يا انس قسوتك عليا كرهتنى فيك خلتنى بقيت اكره وجودك جمبى فى اى مكان للاسف يا انس انت خسرتنى وصعب تكسبنى تانى طلقنى وخلينى احاول الم قلبى اللى اتكسر بسبب عمايلك فيه

انس :- يارا بلاش تهور ارجعى بيتك

يارا :- مبقاش بيتى خلاص يا انس بقى بيتك انت لوحدك عيش فيه بقى مع نفسك وادخل نام على سريرك بدل نومت الكنبه اللى كسرت ضهرك دى

انس :- يعنى ده اخر كلام عندك

يارا :- لفت وضهرها بقى ليه ودموعها نزلت منها وقالت ايوه طلقنى

انس :- انتى بتاعتى انا ومش هطلقك يا يارا فاهمه وخرج وسابها

يارا :- اول ما سمعت كلمة انتى قلبها وجعها وغمضت عينيها وفرحت لما كمل كلامه وقال ليها انها بتاعته فتحت عينيها وابتسمت والدموع نازله من عينيها وبصت اتجاه الباب واتنهدت بأرتياح أن انس مطلقهاش

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى الشركه

عند ندى

كانت داخله عند مالك وهى مبتسمه ومدت ايديها ولسه هتفتح الباب سمعت صوت مالك وهو بيتكلم فى التليفون وقربت ودنها من الباب وقعدت تسمع كلام مالك بصدمه

مالك :- لاء طبعآ متعرفش ومقولتش ليها اى حاجه وسكت شويه وقال لاء طبعآ هقولها كل حاجه بس بعد الفرح وسكت تانى وقال وانتى والله واحشتينى اوى يا حبيبتى وسكت تانى شويه وقال حبيبت قلبى اكيد بحبكم انتوا الاتنين كل واحده فيكم طريقة حبها مختلفه فى قلبى عن التانيه وسكت تانى وقال ايه ده هنبدء نغير ولا ايه انتى الحب الاول والاخير يا قلبى وضحك بصوت عالى وقال باى يا حبيبتى

ندى :- بعدت عن الباب بصدمه وطلعت تجرى على المكتب بتاعها ودموعها نزلت منها وقعدت تعيط وقالت معقول يا مالك بتخونى مع واحده تانيه انا مش قادره اصدق نفسى معقول اللى سمعته بودنى ده لالالا مستحيل مالك يعمل فيا كده مستحيل وقعدت تعيط وشويه والباب خبط مسحت دموعها وقالت ادخل

مالك :- فتح الباب وقال الجميل تقلان عليا ليه واحشتينى وقعد على حرف المكتب

ندى :- م .م.مفيش بس عندى شغل

مالك :- راح قعد قصادها على المكتب وقال مالك يا ندوش شكلك كنتى بتعيطى

ندى :- ها ل.ل.لاء وانا هعيط ليه وقامت وقفت بعيد عنه

مالك :- قام وراها وقال مالك يا ندى شكلك مش طبيعي فيه ايه

ندى :- مفيش يا مالك بس الشغل كتير وتعبانه شويه

مالك :- من امته بتعملى كده يا ندى مهما كان عندك شغل كتير كنتى بتهزرى وبتضحكى عادى

ندى :- بعصبيه يووووه بقى قولتلك تعبانه شويه ايه مش من حقى اتعب زى الناس

مالك :- بعصبيه حسك عينك صوتك يعلى عليا تانى يا ندى فاهمه

ندى :- بصوت عالى هتعمل ايه يعنى هطلقنى ياريت

مالك :- بصلها بصدمه وقال ايه اللى انتى بتقوليه ده شكلك اتجننتى يا ندى فيه ايه مالك انطقى

ندى :- بقولك ايه انا ماشيه وراحت اخدت شنتطها ولسه هتخرج من الباب

مالك :- مسك دراعها جامد وقال انتى ليه بتعملى كده انا كل ده مش عايز أفقد اعصابي واتعصب عليكى علشان لو اتعصبت مش هتقدرى على عصبيتى يا ندى

ندى :- بألم سيب دراعى يا مالك

مالك :- مش هسيبك غير لما تنطقى وتقولى فيه ايه

ندى :- سيب دراعى بقولك انت بتوجعنى

مالك :- ساب دراعها وقال سيبتك اهو انطقى

ندى :- سبنى امشى يا مالك انا تعبانه ومش قادره اتكلم

مالك :- اللهم طولك يا روح انطقى بقولك

ندى :- دموعها نزلت منها وقالت عايز تعرف انا بعمل كده ليه علشان مش عايزه اكون عزول بينك وبين اى حد تانى مش عايزه اخدك من حد خلاص ارتحت

مالك :- بأستغراب انا مش فاهم حاجه عزول ايه وتخدينى من حد ازاى ممكن توضحى كلامك

ندى :- بدموع كفايه تمثيل عليا بقى انا عرفت كل حاجه وفتحت الباب وخرجت

مالك :- طلع يجرى وراها وقال تمثيل ايه ده وعرفتى ايه ما تتكلمى شبه الناس وفهمينى تقصدى ايه بالكلام ده

ندى :- بجد رهيب فى التمثيل يا مالك لو سمحت ابعد عن سكتى وخلينى امشى

مالك :- بعصبيه انتى فيه ايه مالك ما تفهمينى ليه عامله كل ده عماله تتكلمى بالالغاز وانا شبه العبيط مش فاهم اي حاجه ردى على اللى خلفونى انتى عايزه تجننينى

الموظفين بصوا ليهم على صوت مالك

ندى :- ممكن توطى صوتك الموظفين بيبصوا علينا

مالك :- بصوت عالى ما اللى يبص يبص ما انتى طلعتى عين اهلى ومش راضيه تتكلمى انا زهقت يا شيخه يخربيت أم دى عيشه حاجه تقرف انا اللى هغور فى ستين داهيه علشان حضرتك ترتاحى وبص ليها بغيظ ومشى

ندى :- بصت عليه وهو ماشى وبصت على المواظفين اللى بيبصوا ليها ودخلت تجرى على المكتب بتاعها وقعدت على الكرسى وحطت راسها على المكتب وقعدت تعيط

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند رحمه

كانت قاعده فى المكتب بتاعها ومسكت تليفونها ولسه هتتصل ببدر لاقيته هو بيتصل بيها ابتسمت بحب وقالت

رحمه :- صباح الخير

بدر :- انتى ليه مقولتيش ليا انك جيتى للراجل اللى كان عايز منى الفلوس

رحمه :- بتوتر ها م.م.مين اللى قالك

بدر :- مترديش على سؤالى بسؤال

رحمه :- م.م.ما انا خوفت ا.ا.اقولك تزعل منى

بدر :- وكنتى بتعملى ايه عنده

رحمه :- ها

بدر :- انطقى كنتى بتعملى ايه عنده

رحمه :- بص ا.ا.انا هقولك على كل حاجه بس اوعدنى انك مش هتزعل منى و لا هتعمل اى حاجه

بدر :- بعصبيه اتكلمى اخلصى

رحمه :- ا ا انا لما عرفت انك محجوز بسبب الشيكات دى من انس روحت عنده علشان ادفعلك الفلوس دى واخليه يخرجك

بدر :- ودفعتى فلوس

رحمه :- ا.ا.ايوه

بدر :- انتى ازاى بالغباء ده الفلوس انس دفعها واخد الشيكات وبعد كده الراجل أتنازل عن المحضر يعنى هو ضحك عليكى

يارا :- م.م.معرفش بقى انا كنت عايزه اخرجك من المكان اللى انت كنت فيه بأى طريقه

بدر :- مش انا الراجل اللى هيقبل أن واحده تصرف عليه مش معنى انك انتى معاكى فلوس وانا لاء تصرفى عليا من جيبك لاء يا رحمه فلوسك اللى انتى دفعتيها هتكون عندك وبعد كده حسك عينك تعملى اى حاجه زى كده فاهمه

رحمه :- ا.ا.انت ليه بتعمل فرق ما بينا يا بدر مش انا وانت واحد

بدر :- لاء اتنين وبطريقتك دى عمرنا ما هنكون واحد

رحمه :- تقصد ايه

بدر :- سلام وقفل السكه

رحمه :- يووووه بقى هى كانت نقصه ده انا ما صدقت أنه صالحنى هوف بقى ربنا يستر وميعرفش أنه اتهجم عليا كمان وقعدت تفكر بخوف لو بدر عرف بالموضوع ده

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند كريم

كان ماشى هو وريتاج وبيتكلموا على اللى حصل فى الفرح وقال

كريم :- الصراحه انا مكنتش مرتاح لياسين ده وفرحت اوى لما تمارا رفضت تتجوزه

ريتاچ:- ليه بس ده حتى كان شكله طيب والله وزعلت اوى امبارح عليه لما تمارا رفضته قدام الناس كلها كسرت رجولته

كريم :- هى طبعآ تمارا غلطانه لما نزلت وعملت كده قدام الناس مع اننا كلنا قولنا ليها بلاش تكملى فى موضوع الجوازه دى بس هى كانت عناديه جدآ ومشيت اللى فى دماغها وحصل اللى حصل امبارح ده

ريتاج :- انا حسيت من كلامها معايا أنها بتحب حد وقلبها متعلق بيه وتقريبآ كده شكله الحب الاول علشان كانت بتتكلم عليه بوجع

كريم :- لاء عادى هى بس بتحب الناس الأوفياء اللى بيحافظوا على وعدهم وحبهم لبعض وبيتمسكوا بيه

ريتاج :- امممم ممكن

كريم :- سيبك انتى انا لحد دلوقتى مش قادر اصدق نفسى أننا رجعنا لبعض

ريتاج :- ابتسمت وقالت البركه فى تمارا كلامها وصل لقلبى وقدرت تقنعنى وتخلينى اسامحك

كريم :- يا بت تمارا برضه ولا انتى سامحتينى علشان بتحبينى

ريتاج :- احم ب.ب بقولك ايه انا جعانه اوى

كريم :- وانا مالى

ريتاج :- نعم

كريم :- مش انتى بتغيرى الكلام يبقى مليش دعوه

ريتاج :- بطل غلاسه بقى يا كريم انا جعانه بجد

كريم :- لاء انتى كده داخله على طمع وطمعانه فى العشين جنيه اللى معايا امشى يا بت العبى بعيد

ريتاج :- ضحكت وقالت غلس

كريم :- قلب الغلس وعمر الغلس وروح الغلس انتى

ريتاج :- بصت ليه بكسوف ومشيت وسابته

كريم :- الحمدالله نسيت الاكل وطلع يجرى وراها

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند بدر

قفل السكه مع رحمه وبص لصاحبه بغيظ

صاحبه :- شوفت مش قولتلك انا اول ما شوفتها امبارح افتكرت شكلها علطول وهى خارجه من عند الزفت ده بتجرى

بدر :- ده انا هطلع روحوا بأيدى

صاحبه :- سيبه ليا متشغلش بالك انت بحاجه

بدر :- لاء انا اللى هربيه وراح عند المحل بتاعه ودخل على المكتب وقال بعصبيه بقى بتاخد فلوسك مرتين يا واطى ده انا هطلع عين اللى خلفوك وراح مسك فيه

الراجل :- ايه اللى انت بتقوله ده ابعد عنى

بدر :- ازاى تاخد من جوز اختى الفلوس وتاخد من خطيبتى

الراجل :- بتوتر هى دى خطيبتك ا.ا انا معرفش والله

بدر :- وانت كان لازم تعرف انها خطيبتى يعنى ؟!

الراجل :- انا اسف والله

بدر :- هات الفلوس

الراجل :- ها

بدر :- هات الفلوس اللى اخدها منها اخلص

الراجل :- طيب بعدين انا مش معايا فلوس دلوقتى

بدر :- هتجيب الفلوس ولا اموتك وداس على رقابته

الراجل :- بألم خلاص هموت هديك فلوسك

بدر :- بعد عنه وقال هات يا حرامى يا نصاب

الراجل :- طلع الفلوس وحطهم على المكتب ومسك رقابته بألم وقال فلوسك اهى

بدر :- اخدهم وبص ليه بقرف وخرج من عنده وراح عند رحمه وطلب من الأمن أنه يدخل لرحمه بس الأمن رفض لما شاف منظر هدومه مسك تليفونه واتصل على رحمه وانتظر الرد

رحمه :- ايوه يا بدر

بدر :- انزلى ليا حالا عند الشركه

رحمه :- انت تحت

بدر :- ايوه

رحمه :- طيب اطلع

بدر :-الامن رافض يدخلنى الشركه علشان جاى من الشغل عليكى علطول

رحمه :- اتنهدت بزعل وقالت انا نازله حالا

بدر :- قفل السكه معاها ووقف يستنى نزولها

رحمه :- نزلت تجرى عند بدر ومسكت ايده وقالت تعالى معايا

بدر :- لاء يا رحمه انا جيت اديكى فلوسك ورايح شغلى علطول

رحمه :- انت جيبتها منه

بدر :- ايوه اتفضلى اهم

رحمه :- اخدتهم منه وقالت تعالى بقى

بدر :- قولتلك مينفعش عندى شغل

رحمه :- علشان خاطرى

بدر :- اتنهد وراح معاها

رحمه :- للأمن بعصبيه بعد كده لما يجى استاذ بدر تدخلوه علطول مفهوم

الامن :- بس حضرتك

رحمه :- قطعته وقالت مفهوم

الامن :- مفهوم

رحمه :- دخلت الشركه وهى ماسكه ايد بدر وطلعت على المكتب بتاعها ودخلوا وقالت اقعد يا بدر

بدر :- مش هينفع يا رحمه

رحمه :- بدر اسمع الكلام علشان خاطرى اقعد عايزه اتكلم معاك كلمتين

بدر :- اتنهد وقعد على الكرسى وقال خير

رحمه :- قعدت قصاده على الكرسى التانى وقالت بدر انت عارف انا بحبك قد ايه صح

بدر :- ايوه

رحمه :- وعارف انك هتفضل طول عمرك سيدى وتاج راسى صح

بدر :- بص ليها بعدم فهم

رحمه :- راحت عنده ومسكت أيده وقالت بدر انا محتاجاك جمبى

بدر :- يعنى ايه

رحمه :- يعنى عايزاك تيجى تشتغل هنا فى الشركه وتبقى جمبى علطول علشان تقدر تسد الديون ونتجوز الشركه جديده ومحتاجين موظفين كتير فى جميع المجالات علشان خاطرى وافق هنا احسن ليك فى كل حاجه اول حاجه هتبقى معايا علطول تانى حاجه المرتبات حلوه مش ليك بس للموظفين كلهم وهتقدر تسدد ديونك ونتجوز انا وانت

بدر :- وقف وقال لاء يا رحمه لو مكسوفه منى يبقى خلاص كل واحد مننا يروح من طريق

رحمه :- انت عارف ان انا مش كده وان انا ممكن ابيع الدنيا علشانك بس انا عايزه ليك الراحه يا بدر

بدر :- انا مرتاح فى الشغل اللى انا فيه

رحمه :- لاء مش مرتاح بدليل انك شغال فى اتنين إنما لما تشتغل هنا مش هتحتاج تشتغل فى شغل تانى ومسكت أيده وقالت صدقنى انا مش هساعدك فى اى حاجه هسيبك تقدم هنا زى اى موظف وتتقبل بمجهودك الشخصى وهيبقى مرتبك زى اى مرتب اى موظف شغال هنا مش هيبقى ليك استثنا يبقى ليه ترفض بس مدام حاجه احلى واحسن وهتنفعك وهتخلينا مع بعض فى أقرب وقت ممكن علشان خاطرى يا بدر لو بتحبنى بجد وافق انا نفسى ابقى معاك بقى

بدر :- سكت ومردش عليها

رحمه :- ها وافق بقى

بدر :- هفكر يا رحمه وهرد عليكى

رحمه :- هتفكر فى ايه بس وافق بقى يا بدر علشان خاطرى

بدر :- قولتلك هفكر وارد عليكى يا رحمه انا لازم امشى وسابها ومشى

رحمه :- هوف بقى وراحت قعدت على الكرسى بتاعها وقالت ربنا يهديك وتوافق بقى

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند تمارا

بعد وقت جه وقت البريك وخرجوا البنات التلاته وراحوا المطعم اللى قصاد الشركه وطلبوا اكل وقعدوا التلاته ساكتين

تمارا :- بصت ليهم وقالت مالكم يا بنات

ندى :- بزعل مفيش

رحمه :- بزعل مفيش

تمارا :- والله ده احنا التلاته شكلنا شبه الستات المطلقه يوم الصباحيه بتاعتهم ما تنطقى منك ليها طيب انا ومعروف مالى انتوا بقى فيه ايه

رحمه :- بدر عنده عزة نفس رهيبه ورافض اى حاجه تيجى من نحيتى وكل شويه يحس أن انا احسن منه مع أن والله العظيم انا مش شايفه غير حبه وبس

تمارا :- بدر شاب مكافح وقليل اوى تلاقى زيه اليومين دول وعزة نفسه دى مبقتش موجوده عند ناس كتير اوى

رحمه :- عارفه والله ودى اكتر حاجه مخليانى احبه اكتر بس انا زعلانه علشانه ونفسى اعمله اى حاجه علشان أخرجه من اللى هو فيه ده

تمارا :- انتى عرضى عليه الشغل عندنا فى الشركه

رحمه :- اه وكان رافض وبالعافيه قالى أنه هيفكر

تمارا :- يبقى هيوافق بس عزة نفسه منعته أنه يوافق علطول

رحمه :- ياريت

تمارا :- وانتى يا ست الكتكوته

ندى :- بقولكم ايه ابعدوا عنى ومحدش يسألني عن حاجه

تمارا :- وحياة امك واحنا من امته بنسيب بعض فى حاجه زى كده انطقى مالك

ندى :- بدموع مالك

رحمه :- ماله

ندى :- بيعرف واحده غيرى أو بمعنى أصح يعرفنى انا عليها

تمارا :- بصدمه ازاى يعنى مش فاهمه

ندى :- سمعت مالك بيتكلم معاها وبيقولها أن انا معرفش حاجه وهيعرفنى كل حاجه بعد الفرح وقالها واحشتينى وابتدينا الغيره وان انا وهى كل واحده فينا حبها مختلف فى قلبه وبس وهى الأساس

رحمه :- لاء بتهزرى مستحيل مالك يعمل كده انا اعرف مالك من زمان اوى وملوش هو فى السكه دى اسألينى انا والله

ندى :- والله العظيم سمعته بودنى وهو بيتكلم معاها وبيقولها كده

تمارا :- يمكن فيه لبس فى الموضوع يا ندى اصل كلنا عارفين مالك بيحبك قد ايه وهو الصراحه شخصيه محترمه جدآ مستحيل اصدق اللى انتى قولتيه ده

ندى :- لبس فى الموضوع ازاى هو ده اللى سمعتوا وملهوش اى تفسير تانى غير كده

رحمه :- لاء اكيد فيه حاجه غلط يا ندى اسأليه وشوفى هو هيقولك ايه طيب

ندى :- انا اتخانقت معاه ومعرفش راح فين

تمارا :- وحياة امك طفشتى الراجل

ندى :- معرفش بقى انا بحبه وفكرة أنه يخونى دى مش هقبلها نهائى انا عندى الموت اهون مليون مره أن يكون بيحب واحده غيرى

رحمه :- اللى يقدر يساعدك فى الموضوع ده يوسف هو اللى يعرف كل حاجه عن مالك

يوسف :- ايوآ انا جيت اهو

تمارا :- اول ما سمعت صوته اتوترت ورفعت راسها وبصت ليه

رحمه :- ابن حلال بتيجى على السيره

ندى :- جيت فى وقتك يا يوسف

يوسف :- قعد وبص على تماره ورجع بصلهم وقال فيه ايه

ندى :- قالت ليوسف على اللى سمعته

يوسف :- ضحك وقال مالك يعمل كده مستحيل طبعآ ده انا مش متخيل ازاى مالك فتح قلبه وحبك اصلا مالك طول عمره رافض موضوع الحب ده وعمره ما كلم واحده انتى اول واحده فى حياته على فكره

ندى :- ازاى بس ده انا سمعته بودنى وهو بيقول ليها كده وبعدين دى مش اول مره قبل كده فى المصيف سمعته بيتكلم ومع واحده وقال إنها صحبته

يوسف :- اه اكيد لولو دى صحبتنا كلنا حتى رحمه تعرفها

رحمه :- لولو دى عسل ده احنا كلنا بنات ورجاله بنموت فيها وكنا علطول بنروح نقعد معاها وكمان ممكن ننام عندها باليوم والاتنين

يوسف :- اهو شوفتى

ندى :- بس مش دى اللى كان بيكلمها النهارده

يوسف :- ايآ كان مين اللى بيكلمها دى بس مستحيل مالك يحب غيرك مالك بيخاف على قلبه اوى على فكره ومش بالساهل يسلمه لحد

ندى :- طيب ممكن تشوفه هو فين

يوسف :- ماشى وطلع تليفونه واتصل على مالك وقال مقفول

ندى :- هوف بقى يعنى هيكون راح فين

يوسف :- هقولك انا مالك لما بيزعل ولا يكون مخنوق بيحب يقعد لوحده فى بيته ومش بيحب يتكلم مع حد

ندى :-يعنى هو دلوقتى فى البيت

يوسف :- اكيد

ندى :- وقفت وقالت أنا رايحه ليه وسابتهم ومشيت

تمارا :- فاعل خير اوى يا اخويه

يوسف :-ابتسم وقال طول عمرى

رحمه :- وقفت وقالت طيب هروح انا اشوف شغلى

تمارا :- استنى انا جايه معاكى

يوسف :- مسك ايديها وقال استنى يا تمارا وبص لرحمه وقال روحى انتى يا رحمه

رحمه :- اوك وسابتهم وراحت على شغلها

تمارا :- شدت ايديها من أيده وقالت نعم افندم

يوسف :- اقعدى

تمارا :- نفخت وقعدت وقالت اهو اتزفت

يوسف :- بحبك

تمارا :- بكرهك

يوسف :- يا بنتى بطلى كدب عيونك فضحاكى

تمارا :- بقولك ايه بلاش الشويتين اللى بتعملهم دول علشان انا مستحيل اسامحك على اللى انت عملته فيا

يوسف :- ولا حتى هتسامحيتى لو اديتك دى ومد أيده بيها

تمارا :- بفرحه السلسله واخدتها منه وقالت لاقيتها فين دى ده انا قلبت عليها الدنيا

يوسف :- ابتسم ليها وقال كنت فى الجنينه وشوفتك وانتى بتحدفيها روحت اخدها وخليتها معايا

تمارا :- ش.ش.شكرآ انك رجعتها ليا تانى

يوسف :- انا يوم ما لبستها ليكى من قبل ما اسافر قولتلك حافظى عليها علشان دى اول هديه ليا من بابا وغاليه عليا اوى

تمارا :- وانا حافظت عليها لحد ما رجعت وعمرى ما شيلتها من رقابتى لحد ما رجعت مصر ولاقيت ان انا مش من حقى احتفظ بحاجه بتاعة واحد مبقاش ليا

يوسف :- عارف ان غلط كتير فى حقك وعارف انك كنتى ارجل منى مليون مره وحافظتى على وعدك ليا اللى انا مقدرتش احافظ عليه بس بتمنى زى ما انتى طلعتى احسن منى فى الاول تطلعى احسن منى دلوقتى وتسامحينى

تمارا :- بصت ليه ومردتش عليه

يوسف :- تمارا انا بحبك ومش قادر استحمل بعدك عنى اكتر من كده كفايه وجع وفراق لحد كده

تمارا :- وقفت وقالت اللى بينا بقى صعب يرجع يا يوسف بلاش تحلم بحاجه زى كده لمجرد أن سيبت ياسين انا لا هكون ليك ولا لغيرك انا هعيش لنفسى وبس ولسه هتمشى

يوسف :- مسك ايديها وقام وقف وقال انا مش هتعب ولا هييأس من طلب السماح منك يا تمارا وعارف ومتأكد إن هيجى يوم وتسامحينى وشاور على قلبها وقال علشان ده مفهوش غيرى انا وهو اللى هينتصر فى الاخر وقرب ايديها من شفايفه وباسها وسابها ومشى

تمارا :- اتنهدت وقعدت على الكرسى تانى وقالت لنفسها ايه يا تمارا هتضعفى ولا ايه لاء ارجوكى أجمدى كده وخليكى قويه ودفعت الحساب وقامت خرجت من المطعم وراحت تشوف شغلها

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى فيلا مالك

راحت ندى عند الفيلا ورنت الجرس ومحدش فتح ليها قعدت ترن الجرس لحد ما زهقت ولسه هتمشى لاقت الباب اتفتح اتنهدت بأرتياح وقالت

ندى :- كل ده علشان تفتح

مالك :- عايزه ايه يا ندى

ندى :- عايزه اعرف الحقيقه

مالك :- حقيقة ايه

ندى :- طيب مش هدخلنى

مالك :- وسع ليها علشان تدخل وقفل الباب

ندى :- قعدت على الكنبه بتوتر وبصت ليه

مالك :- وقف وربع أيده على صدره وقال اتفضلى اتكلمى حقيقة ايه اللى عايزه تعرفيها

ندى :- مين اللى انت كنت بتكلمها النهارده

مالك :- بأستغراب بكلمها فين

ندى :- فى التليفون وانت فى مكتبك انا كنت جايه عندك وسمعتك بتقولها انك مش هتقولى دلوقتى بعد الفرح هتبقى تقولى وان حب كل واحده مننا مختلف عن التانى فى قلبك وأنك بتحبها هى اكتر علشان هى الأساس

مالك :- داس على أسنانه وقال وانتى بقى شايفه أن انا من النوع ده صح

ندى :- انا مقولتش كده انا بسألك وعايزه اعرف الحقيقه

مالك :- مش محتاجه تقولى كده نظرة عيونك كلها شك فيا يا ندى

ندى :- بصت على الأرض ودعكت ايديها فى بعض

مالك :- تمام يا ندى هقولك مين دى ، دى تبقى ...........

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛