رواية مزاوله حب الفصل الاول 1 بقلم دودو محمد

سميه :- مالك يا حبيبتى

تمارا :- يوسف ورحمه هيمشوا خلاص ويسيبونى يا مامى

سميه :- غصب عنهم يا حبيبتى باباهم جاله عقد عمل بره ولازم ياخد طنط سميحه ويوسف ورحمه ويسافروا معاه

تمارا :- بس انا مليش أصحاب غيرهم يا مامى اعمل ايه انا بقى

سميه :- انتى مش عندك اصحاب فى المدرسه

تمارا :- ايوه بس مش زى يوسف ورحمه

سميه :- معلش يا حبيبتى دى حاجه مش بأيدينا وانا كمان صعب عليا فراق طنطك سميحه بس نعمل ايه ربنا يرجعهم لينا بالسلامه ومسحت دموعها وقالت يلا بينا علشان نروح نقعد معاهم شويه

تمارا :- اوك وقامت وقفت وراحت مع مامتها فى فيلا عند سميحه

سميحه :- تعالى يا سميه لسه كنت هبعت ليكم يوسف

سميه :- كنت بحايل الست تمارا عماله تعيط علشان انتوا ماشين خلاص

سميحه :- شدت تمارا عندها ومسكت وشها بين ايديها وقالت متعيطيش يا حبيبتى احنا هننزل كل سنه اجازه شهر وان شاءالله مامى وبابى يبقوا يجوا لينا هناك كل فتره كده تقضوا الاجازه معانا هناك

تمارا :- بس انا هبقى لوحدى لما تسافروا ومش هلاقى حد يروح المدرسه معايا زى كل يوم ومش هلاقى حد يلعب معايا

سميه :- خلاص بقى يا حبيبتى ما انا فهمتك أن هما غصب عنهم وبعدين قالت تعال يا يوسف

يوسف :- نعم يا طنط

سميه :- خد تمارا وهديها انت الوحيد اللي بتعرف تهديها

يوسف :- حاضر ومسك ايد تمارا وقال تعالى معايا يا تيمو

تمارا :- بدموع حاضر ومشيت معاه على الجنينه

يوسف :- اقعدى

تمارا :- قعدت على الكرسى وقالت بدموع خليك معانا يا يوسف متسافرش معاهم

يوسف :- ياريت كان ينفع انا قولت لبابا كده بس مرضاش

تمارا :- بدموع لاء متمشيش

يوسف :- مسك ايديها وقال خلاص بقى يا تيمو وبعدين انا هكلمك علطول وهننزل اجازات كتير وهنقضيها مع بعض

تمارا :- بدموع لاء انا مش عايزاك تمشى

يوسف :- طيب خدى

تمارا :- اخد ايه

يوسف :- قلع السلسله اللى فى رقابته وقال خدى السلسله دى البسيها ومتقلعهاش من رقابتك مهما حصل

تمارا :- مش السلسله دى اللى باباك جابها ليك هديه فى اول عيد ميلاد ليك

يوسف :- ايوه وغاليه عليا اوى بس متغلاش عليكى فرحانه كده

تمارا :- حضنته وقالت فرحانه اوى

يوسف :- بعدها عنه وقال مش قولنا عيب كده تحضنينى

تمارا :- انت قولت ليا محضنش اى ولد غريب ولا ابوسه لكن انت مش غريب يا يوسف

يوسف :- ضحك وقال لاء برضه عيب احنا مينفعش نحضن بعض لاننا مش اخوات

تمارا :- ماشى لبسنى السلسله بقى ولفت ليه وادته ضهرها ورفعت شعرها

يوسف :- لبسها السلسله وقال اوعى يا تيمو تضيعها ولا تقلعيها من رقابتك

تمارا :- لفت تانى ليه وضحكت ومسكتها بأيديها بفرحه وقالت لاء مش هقعلها مهما حصل

وفى الوقت ده جت رحمه وقالت انتو بتعملوا ايه من غيرى

يوسف :- تمارا كانت بتعيط علشان مسافرين وماشين وسيبنها

رحمه :- وانا والله زعلانه اوى يا تيمو بس برضه فرحانه أن هروح مكان تانى مامى بتقول المكان ده كبير اوى وحلو وفيه اماكن حلوه كتير وقطعت كلامها وقالت ايه ده يا يوسف انت اديت تيمو السلسله بتاعتك

يوسف :- ايوه

رحمه :- طيب ما انا قولتلك عايزها مرضتش تدهانى

يوسف :- علشان انتى هتبقى فى وشى علطول إنما هى هنمشى ونسبوها وهنبعد عنها

رحمه :- ماشى يا لهوى انا نسيت مامى بتقولكم يلا علشان الاكل اتحط

يوسف :- ماشى ومسك ايد تمارا وقال يلا يا تيمو وراحوا قعدوا معاهم على السفره وقعدوا ياكلوا وبعد وقت انتهوا وراح كل واحد على اوضه وناموا

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

اشرقت شمس صباح يوم جديد بنورها الساطع فى سماء القاهره لتبدء تمارا بفتح عيونها على صوت عربيات قامت تجرى وبصت من الشباك لاقت عربية أهل يوسف ورحمه دموعها نزلت منها وطلعت تجرى من اوضتها عند يوسف ورحمه وقالت بدموع

تمارا :- لالالا بلاش تمشوا بليز يا عمو خلى يوسف ورحمه بليز يا طنط خليكم

سميحه :- يا حبيبتى أهدى احنا هنرجع تانى

تمارا :- علشان خاطرى يا طنط طيب خلى يوسف ورحمه قاعدين معانا هنا وروحوا انتو

سميحه :- ضحكت وقالت مينفعش يا حبيبتى

تمارا :- رحمه خليكم قاعدين قولى ليهم يخلوكى انتى ويوسف

رحمه :- بدموع بليز يا بابى خلينا قاعدين انا مش عايزه اسيب هنا بليز يا بابى

حسام :- يا حبيبت بابى مينفعش علشان شغلى

تمارا :- يوسف علشان خاطرى متمشيش

يوسف :- مسك ايديها وقال أهدى يا تيمو عياطك مش هينفع دلوقتى احنا كده كده ماشين خلاص بس هكلمك علطول واسمعى كلام باباكى ومامتك واوعى تصاحبى اولاد فاهمه

تمارا :- بدموع هزت راسها بالموافقه وقالت حاضر بس انت اوعى تصاحب حد تانى غيرى

يوسف :- ضحك وقال متخافيش عمرى ما هيكون ليا أصحاب غيرك خلاص بقى بلاش دموع

تمارا :- مسحت دموعها بضهر ايديها وقالت حاضر

يوسف :- يلا روحى سلمى على ماما وبابا

تمارا :- سلمت عليهم كلهم ودخلت تجرى على اوضتها وبصت عليهم من الشباك

يوسف :- بص لفوق وابتسم ليها وشاور بأيده ليها

تمارا :- شاورت ليه ودموعها نزلت منها

يوسف :- بأبتسامه شاور على عيونه وقال دموع لاء

تمارا :- هزت راسها بمعنى حاضر ومسحت دموعها من على خدها

يوسف :- غمض عينه بوجع وركب العربيه من وراه ودموعه نزلت منه وبص من العربيه وهى بتمشى على تمارا وهى واقفه فى الشباك لحد ما خرجوا من الفيلا واختفت تمارا من قصاده وقعد يعيط علشانها

سميحه :- يوسف انت بتعيط

يوسف :- بدموع مكنتش عايز اسافر يا ماما واسيب تمارا

حسام :- غصب عنى يا حبيبى هما عشرت عمرنا وعشنا معاهم اسعد ايامنا وفراقهم صعب علينا بس غصب عننا يا حبيبى

يوسف :- اوعدنى يا بابا أننا هننزل مصر وقت ما حضرتك تكون فاضى

حسام :- اكيد يا حبيبى

ووصلوا المطار وركبوا الطياره وسافروا وسابوا مصر وراحوا على ايطاليا

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

بعد مرور اكثر من ثمانية عشر عامآ

تجرى تمارا وهى كلها حيويه ونشاط وتاخد ساندوتش من على السفره

سميه :- يا بنتى ما تقعدى تاكلى زى الناس

تمارا :- وهى الاكل فى بؤقها مش هينفع انا مستعجله يا مامتى

سميه :- يا بنتى انتى علطول مستعجله كده

تمارا:- امممم المفروض اكون من بدرى فى الشركه بس انتى عارفه بنتك لازم تروح اخر الناس وكفايه كلام بقى وباست خدها وقالت باى بقى يا مزتى وخرجت ركبت عربيتها وطلعت تجرى بيها

عماد :- ربنا يهديها مجنونه ورايحه منها

سميه :- ضحكت وقالت احلى حاجه فيها جنانها ده

كريم :- نزل من فوق وقال طيب وانا ايه

سميه :- انت رواح قلب مامى من جوه

كريم :- ماما يا حبيبتى فكك من الجو ده انا بقى عندى سبعتاشر سنه يعنى كبرت وبقيت راجل وانتى لسه مصممه تدلعينى على أساس ان انا طفل عنده خمس سنين

سميه :- الحق عليا أن انا بدلعك وبعدين ايه يعنى عندك سبعتاشر سنه انت لو عندك خمسين سنه هفضل اشوفك العيل الصغير ابو شخه اللى كنت بغيروا هدومه من البيبى

كريم :- شكرآ على واصلة الذكريات السوده ام ريحه معفنه اللى قولتيها دى ابوس ايدك اتبرى منى وبلاش ام الذكريات دى تانى

سميه :- بضحك اقعد يا ابن الهبله

كريم :- عيب بابا قاعد يزعل على مراته

عماد :- وقف وقال لله الامر من قبل ومن بعد عيله كلها لسعه من اول الأم لحد اخر العنقود

كريم :- اه والله يا أبا ربنا يقويك عليهم

عماد :- هز راسه يمين وشمال وقال انا ماشى قبل ما اتشل

سميه :- بضحك سلام لباشا وهو ماشى

كريم :- الراجل ده لو اتشل يبقى انتوا السبب

سميه :- بعد الشر

كريم :- يا واد يا رومانسى انت ايوه بقى خايفه عليه حب وكده وغمز ليها

سميه :- قوم يالا

كريم :- وحدى الله يا اما مالك قلبتى فاجئه كده

سميه :- ايه أما دى اتكلم عدل قولى سميه عادى يعنى

كريم :- ايوه بقى إنبى عسل يا سمسمه الام الفرفوشه نعمه يا ناس

سميه :- ضحكت وقالت يلا على مدرستك علشان متتأخرش

كريم :- وقف وباس ايديها وقال احبك يا ابيض سلام

سميه :- ابتسمت بحب وقامت تشوف اللى وراها

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند تمارا

كانت راكبه العربيه وبتجرى بيها ووقفت علشان الدنيا زحمه وفضلت تضرب كلاكسات علشان العربيات تمشي وبعد وقت طويل بدأت العربيات تتحرك وحاولت تمارا تجرى بعربيتها بس ظهرت عربيه فاجئه قصادها وملحقتش تدوس فرامل وخبطتها نزلت تجرى وبصت على عربيتها من قدام واتعصبت وراحت عند العربيه وخبطت على ازاز العربيه وشاورت ليه يفتح الازاز الباب اتفتح ونزل شاب طويل وعريض وفى قمة الوسامه بصت ليه بأعجاب وبلعت ريقها وقالت

تمارا :- انت حقيقى

الشاب :- نعم

تمارا :- فاقت لنفسها وقالت بعصبيه ا.ا.ايه اللى انت عملته ده انت اعمى مش تفتح

الشاب :- ده على اساس ان انا اللى خبط عربيتك

تمارا :- ايوه خبط عربيتى انت ازاى تظهر فاجئه كده مش المفروض تضرب كلاكسات علشان متفاجئش بيك واخبط عربيتى

الشاب :- اولا انا دوست كلاكسات بس الواضح أن حضرتك طرشه مش بتسمعى وثانيآ عربيتى انا اللى اتأذت مش عربية حضرتك وثالثآ وده الاهم بكلامك الكتير ده معطلانى عن شغلى

تمارا :- بصت على عربيتها وقالت عاااا العربيه اتخربشت اعمل انا ايه دلوقتى

الشاب :- اعملى اللى تعمليه ممكن بقى لو سمحتى تبعدى عربيتك دى علشان امشى

تمارا :- تمشى لاء طبعآ مش هتتحرك من هنا غير لما ترجعلى عربيتى زى الاول مليش دعوه انا عايزه الخربشه دى تتصلح

الشاب :- بعصبيه انتى حوله يا بنتى انتى مش شايفه عملتى ايه فى عربيتى وكمان ليكى عين تتكلمى اوعى كده ولسه هيركب

تمارا :- مسكته من هدومه وقعدت تضرب فى كتفه وقالت على جثتى اسيبك تتحرك من هنا وكان فيه عربية شرطه معديه قصادها صرخت وقالت الحقونى يا حضرت الظابط الحقنى

الظابط :- خير يا انسه

تمارا :- البنى ادم ده كان بيعاكسنى بعربيته وانا راكبه عربيتى وخبط ليا العربيه

الشاب :- بصدمه انا

تمارا :- بصت ليه بتحدى وقالت ايوه انت لو سمحت يا باشا عايزه حقى

الشاب :- داس على أسنانه وقال يعنى عايزه ايه

تمارا :- تصلح ليا عربيتى وترجعها زى الاول

الشاب :- بغيظ ماشى

تمارا :- بشماته ما كان من الاول ناس تخاف وبصت لظابط وقالت خلاص يا باشا حصل خير

الظابط :- تمام لو عملك حاجه تانى يا انسه ابقى هاتيه على القسم

تمارا :- تمام يا باشا

الظابط :- مشى وسابهم

الشاب :- مسكها من هدومها وقال بقى انا كنت بعكسك

تمارا :- ايه ده انت هتمد ايدك عليا وقالت بصوت عالى يا حضرت الظابط الحقنى

الشاب :- ششششش خلاص خلاص امشى معايا

تمارا :- امشى فين انت هتستعبط يا لا

الشاب :- اللهم طولك يا روح هوصلك مكان ما انتى رايحه وهتصل بالمكانيكى يجى ياخد عربيتك يصلحها ليكى

تمارا :- لاء اتصل بالمكانيكى يجى ياخد العربيه دلوقتى وبعد كده هركب تاكسى يوصلنى مش هركب مع واحد زيك

الشاب :- يا بنتى ما نختصر الوقت ونعمل كل ده فى السكه بسببك اتأخرت على شغلى

تمارا :- بنتك طيب انجز واتصل بالمكانيكى يا بابا علشان مش فاضيه ليك وبسببك هترفد من شغلى

الشاب :- يارب تترفدى من شغلك علشان ربنا ينتقم ليا منك

تمارا :- اخلص بقولك

الشاب :- بص ليها بقرف ومسك تليفونه واتصل بالمكانيكى وقعدوا ينتظروا وصوله

تمارا :- بصت فى الساعه بتاعتها وقالت منك لله اخرتنى على الشغل والمدير راجل مفترى

الشاب :- ده انا اللى اخرتك صح

تمارا :- ايوه انت امال انا

الشاب :- لا يسمح الله انتى ده انتى ملاك نازل من السما ومن حظ امى الهباب وقعتى فى سكتى

تمارا :- هوف دمك تقيل اوى على فكره وبصت الاتجاه التانى وقالت بصوت واطى استغفرالله العظيم على الكدب ده الواد عسل مكرر

الشاب :- بتقولى حاجه

تمارا :- ها بدعى ربنا يخلصنى منك

الشاب :- ربنا يستجيب منك يا اختى والاتنين بصوا لبعض بقرف وقعدوا يستنوا وصول المكانيكى وبعد وقت وصل المكانيكى واخد العربيه ومشى بيها

تمارا :- بقرف بعد كده تبقى تفتح عينك وانت ماشى

الشاب :- بقرف بعد ما شوفت وشك هبطل اركب عربيات خالص وركب عربيته ومشى

تمارا :- كتك القرف فى حلاوتك وانت مز فى نفسك كده ووقفت تاكسى وركبته وراحت على الشركه اللى شغاله فيها

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

وصلت تمارا الشركه وطلعت تجري على مكتب المدير السكرتير قال ليها تروح بسرعه علشان فيه اجتماع للموظفين طلعت تجرى على غرفة الاجتماعات وخبطت على الباب ودخلت بسرعه وهى نفسها سريع وقالت

تمارا :- اسفه يا فندم غصب عنى اتأخرت

المدير :- هو انتى كل يوم تأخير كده

تمارا :- طيب تصدق هتصدق أن شاءالله انا خرجت بدرى من البيت بس ربنا وعدنى بواحد رذل خبط عربيتى واخرنى اسفه جدآ

المدير :- اول واخر مره مفهوم

تمارا :- مفهوم وقالت بصوت واطى كتك نيله وانت عامل شبه سلطان فى غبى منه فيه

المدير :- هتفضلى واقفه كده كتير ما تتفضلى اقعدى يا انسه

تمارا :- ح.ح.حاضر يا فندم وقعدت على الكرسى وفضلت تبص على الساعه اللى فى ايديها وتمد ايديها تبص على الساعه من بعيد وترجعها تانى

المدير :- فيه حاجه

تمارا :- ها ل ل لا يا فندم

المدير :- طيب ممكن تركزى بقى علشان نبدء الاجتماع

تمارا :- اه طبعآ اتفضل حضرتك

المدير :- النهارده هيستلم وظيفه المدير التنفيذى لشركه الاستاذ يوسف اتفضل عرفهم بنفسك يا استاذ يوسف

يوسف :- كان بيبص لتمارا بغيظ

المدير :- بص على تمارا لاقها مركزه فى الفون بتاعها ومش مركزه معاهم خالص قال انسه ت

يوسف :- شاور للمدير أنه ميتكلمش وقام وقف وراح عندها ووقف جنبها وقال هو المكان ده لتسليه يا انسه

تمارا :- شبهت على الصوت ورفعت راسها ببطئ وقالت انت

يوسف :- يعنى كدابه وكمان مستهتره فى شغلك

تمارا :- وقفت وقالت بغيظ انت بتعمل ايه هنا وكمان جاي ورايا شغلى أما انت واحد بجح صحيح

يوسف :- انا بجح

تمارا :- اه بجح ومعندكش دم ورذل كمان وبصت للمدير وقالت البنى ادم ده بيعمل ايه هنا يا فندم

يوسف :-ما انتى لو مركزه كنتى عرفتى انا بعمل ايه هنا وبعدين مش ده المدير اللى كنتى بتقولى عليه مفترى

تمارا :- اتصدمت وبصت للمدير لاقته بيبص ليها بغيظ داست على أسنانها بغيظ وقالت منك لله يا بعيد

المدير :- بعصبيه مخصوم منك اسبوع من مرتبك يا انسه علشان استهتارك بالشغل

تمارا :- غمضت عينيها وقالت اشوف فيك يوم وبصت ليه لاقته بيبص ليها بشماته قالت عجبك كده انت بتعمل ايه هنا بس

يوسف :- انا حظك الاسود انا المدير التنفيذى لشركه

تمارا :- بصدمه ها المدير التنفيذى ووقفت وقالت بغيظ نورت الشركه يا خويا

يوسف :- ربع أيده على صدره وقال معتقدش انك بتقوليها من قلبك

المدير :- اتفضل اقعد وانتى اتفضلى اخرجى من الاجتماع

تمارا :- بزعل ح.ح.حاضر عن اذنكم وخرجت وهى بتبرطم وبتدعى على يوسف ووقفلت الباب وقالت منك لله يا هو صحيح اسمه ايه يلا يغور اكيد اسمه غلس زيه

يوسف :- قعد وقال انا عايز الانسه تساعدنى فى الشغل

المدير :- بس دى مستهتره جدآ وكل يوم بتتأخر على الشغل ودماغها رايحه منها

يوسف :- انا هظبطها متشغلش بالك هعلمها النظام والالتزام

المدير :- اللى يريحك يا ابنى ابوك غالى عليا جدآ هو عامل ايه

يوسف :- الحمدالله تمام كبر بقى ومبقاش زى الاول قلبه تعب والدكتور أمر أنه يقعد يستريح فى البيت

المدير :- الف سلامه عليه يعنى خلاص هتستقروا هنا فى مصر

يوسف :- اه إن شاءالله انا جيت علشان استلم الوظيفه وهما راجعين مصر بكره

المدير :- يجوا بالسلامه

يوسف :- الله يسلمك نبدء باقى الاجتماع

المدير :- نبدء

وبعد وقت انتهى الاجتماع وخرج يوسف من الاجتماع وراح يشوف تمارا فين لاقها واقفه وبتتكلم مع اصحابها وبتضحك وبتقول

تمارا :- بس قفشته من قفاه وجبت ليه الشرطه وهو خاف وصلح ليا العربيه على حسابه طلع جبان اوى

يارا :- لسه هتتكلم

يوسف :- شاور ليها تسكت

تمارا :- هو صحيح حلو وشكله مز اوى بس غلس وغتت ونفسى اديله قلمين على بوز اللى خلفوه ده بسببه اتخصم ليا اسبوع من مرتبى

ندي :- ومتعرفيش اسمه ايه

تمارا :- هيكون اسمه ايه اكيد بارد شبه

يارا :- احم انا بقول كفايه كده

تمارا :- كفايه ايه انا نفسى امسكه من قفاه وافضل الطش فيه لحد من ارتاح متغاظه منه اوى انا عارفه اصتبحت بوش مين بس على الصبح علشان يحصل ليا كل ده

يارا:- شاورت بعينيها لتمارا على الباب

تمارا :- بصت مكان ما شاورت ليها يارا ووقفت بغيظ وقالت انت انت بتعمل ايه هنا

يوسف :- جه عندها وقرب منها وقال انا عندك اهو علقينى من قفايه زى ما قولتى

تمارا :- ا.ا انت هنا من امته

يوسف :- من ساعة ما كنت خايف من الشرطه وصلحت ليكى العربيه على حسابى بس علشان تبقى عارفه بس انا عملت كده مش خوف انا عملت كده علشان كنت مستعجل علشان متأخر على الشركه

تمارا :- والله

يوسف :- اه والله

تمارا :- انت جاى هنا ليه

يوسف :- علشان ابلغك انك هتبقى المساعده بتاعتى

تمارا :- نعممممم ده على جثتى

يوسف :- قعد على الكرسى وحط رجل على رجل وقال مش عجبك روحى قولى للمدير بس اعملى حسابك مش هيسمع كلامك لانه مش طيقك بعد ما عرف انك بتقولى عليه مفترى واحتمال يطردك المرادى خالص

تمارا :- عااااا ا.ا.اانت طلعت ليا منين بس ده انت بنى أدم رذل يا اخى

يوسف :- انتى اللى بدأتى يا حلوه استحملى بقى وقام وقف وقال انا رايح مكتبى ومتنسيش تروحى لمدير علشان يطردك وضحك ومشى وسابها

تمارا :- ده ايه اليوم ده ياربى

يارا :- وهى كاتمه ضحكتها قالت ده انتى شكلك داخله على ايام فحلوقى يا تيمو

تمارا :- هى فحلوقى بعقل

ندي :- بس الصراحه مز اخر حاجه

تمارا :- بغيظ مز اووووى بس غلس اوى اوى

يارا :- بضحك لالالا مش قادره ده انتى مشكله اقسم بالله

تمارا :- اضحكى اضحكى ربنا ما يوريكم اللى انا فيه وفى الوقت ده جه السكرتير وقال

السكرتير :- انسه تمارا

تمارا :- امممم

السكرتير :- المدير التنفيذى الجديد عايزك

تمارا :- اممم بدأنا الصبر من عندك يارب روح وانا جايه وراك وبصت للبنات وقالت تصدقوا هتصدقوا أن شاءالله البدايه مش مبشره خالص الوداع يا رفاق العمر وخرجت وسابتهم وهما بيضحكوا على كلامها وراحت عند مكتب يوسف وخبطت على الباب ودخلت

يوسف :- استنى عندك

تمارا :- خير

يوسف :- انا أذنت ليكى تدخلى

تمارا :- لاء

يوسف :- يبقى تطلعى وتخبطى تانى على الباب وتستنى لحد ما ارد عليكى واقولك تدخلى

تمارا :- والله

يوسف :- اه والله

تمارا :- هو وش ام السعد اشوفك والعه فى نار جهنم بعين امك دى وقالت بصوت تخين وهى ماشيه ايه الجمال ده بس كبرتى وبقيتى عروسه اللهى عرسه تاكل ودنك يا بعيده وخرجت وقفلت الباب وراها وخبطت على الباب

يوسف :- كان ميت على نفسه من الضحك على كلام تمارا وحركتها

تمارا :- انت يا عم ما ترد

يوسف :- كتم ضحكته وحاول يرسم على وشه الجديه وقال مين

تمارا :- الملامين

يوسف :- بصوت عالى مين

تمارا :- لا ده استعباط بقى وقالت انا

يوسف :- ادخلى

تمارا :- فتحت الباب وقالت ده على اساس كلمة أنا دى عرفتك مين وقالت بصوت واطى ربنا ما يحرمك من الهبل

يوسف :- بتقولى حاجه يا انسه

تمارا :- مش بتزفت ممكن بقى تقولى حضرتك عايز ايه

يوسف :- امممم مش فاكر خلاص روحى ولما افتكر ابقى ابعتلك

تمارا :- بص يا اخ انت انا خلقى ضيق ومعنديش اى مانع أن ارتكب جريمه فياريت نكون حلوين مع بعضينا وبلاش شغل الاستفزاز ده

يوسف :- اطلعى بره

تمارا :- نعم

يوسف :- اطلعى بره

تمارا :- والله شكلك ما طبيعى وخارج من مستشفى المجانين على هنا عمومآ شكلها كده هتكون ايام عسليه وسابته وخرجت

يوسف :- قعد يضحك على كلامها وبدأ يشوف شغله

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛