رواية عشاق الصعيد الفصل الثامن عشر 18 بقلم اية الابشيهي

زهور: -هنام

حاتم: -وانا هديكِ قلم يفوقك

زهور: -لا يا عم خلاص... هو ماحدش يعرف يهزر معاك أبدا.... انت بس لو تسمع كلامي وتيجي معايا على مكان جميل جدا

حاتم: -لازم يعني!

زهور: -ايوا لازم

حاتم: -أمري الي الله... نروح

زهور: -حاتم

حاتم: -قلبه

زهور: -بص انا عارفة ان ماما مش موافقة على الجوازة... عشان كده معلش.....

حاتم: -بس بس.... بصي انتِ.... انا ماليش دعوة إذا كان حد موافق على جوازنا ولا لا..... انتِ حاليا بقيتي خطيبتي... وكام يوم ونكتب الكتاب... انا مش عاوزك تشغلي بالك بوالدتك... طبعا انا هحاول معاها بس ماظنش انها هتوافق برضه.... اهم حاجة انتِ يا زهور... مش عاوز حاجه تضايقك.... ينفع؟

زهور: -ينفع.... قولي صحيح هاشوفك بكرا ان شاءالله؟!

حاتم: -لا بعد بكرا ان شاءالله.... عم عزت عازمنا كلنا على الغداء

زهور: -هتوحشني

حاتم: -لا يبقي لازم اشوفك بكرا بقي

زهور: -هههههههه

حاتم: -بحبك يا زهور... بحبك جدا

زهور؛ -وانا كمان بحب....

تليفونها رن

زهور: -دي ماما؟!!

حاتم: -طب ردي

زهور: -السلام عليكم

هنية:-انتِ فين؟!

زهور: -مع حاتم

هنية: -ايوا فين يعني؟!

زهور: -في العربية

هنية: -طب تعالي دلوچتي.... والا انا هاچي امسك النحنوح اللي چارك من زمارة رقبته

زهور: -حاضر يا ماما حاضر.... سلام

هنية: -كلمي يحيى وشوفيه فين؟!

زهور: -ليه؟!.... هو صغير مش هيعرف يروح

هنية قفلت السكة في وشها وزهور بصت على حاتم وكان شكله غريب

زهور: -مالك؟!.... انت كويس!

حاتم: -وزمارة رقبتي ذنبها ايه!

زهور: -هههههههه انت سمعت

حاتم: -امك مفترية جدا يا زهور

زهور: -حاتم!

حاتم: -خلاص... يالا نروح عشان انا مش مستغني عن زمارة رقبتي

زهور: -معلش بس.... هيا ايه زمارة رقبتك دي؟؟

حاتم: -ماعرفش بس انا خايف من امك

زهور: -ههههههههه

حاتم: -لا كدا مابقتش خايف وممكن افضل معاكِ للصبح

زهور: -يالا بس نروح عشان رقبتك

حاتم: -اه صحيح فكرتيني

*_____________*

يحيي$رحيق

يحيي: -وبعدين؟!

رحيق: -سيبت البيت وجيت هنا وحكيت لفهد كل اللي كريم عمله

يحيي سكت وشكله كان متعصب

رحيق: -ماكنش في داعي إننا نتكلم عن الموضوع ده دلوقت

يحيي: -انا كنت هتجنن لما شوفتك واقفة معاه... وكنت عاوز اعرف كل حاجه

رحيق: -يعني انت حاليا مبسوط إن الخروجة باظت في كلامنا عن الموضوع ده؟؟

يحيي: -بحبك

رحيق(بابتسامة): -والله يا يحيي انت ما معقول

يحيي(بابتسامة واسعة): -يعني ايه اللي انتي بتقوليه ده!؟

رحيق: -يعني مش معقول

يحيي: -انا مش بقولك كرريها... ولا فاهميني

رحيق: -ايوا عاوز ايه يعني؟؟

يحيى: -رحيق

رحيق: -يحيي!!

يحيي: -رحيق

رحيق: -بحبك

يحيي: -ناس مش بتيجي غير بال

رحيق: -هااا

يحيي: -بالحب انا قولت حاجه

رحيق: -ههههههه جاب ورا

تليفونها رن ويحيي أخده

يحيي: -علاء!!؟؟؟

رحيق: -ابن خالو

يحيي: -ايوا فاكره... بيتصل بيكي في وقت زي ده ليه؟!

رحيق: -اكيد عرف ان خطوبتي انهاردة فبيتصل يبارك

يحيي: -يبارك الساعة 2 الا ربع الفجر؟؟

رحيق: -يحي.....

يحيي: -رحيق اسمعيني.... انا اينعم مش عصبي زي فهد وهادي...... بس انا في الآخر طبعي صعيدي.... وحبي ليكي صعيدي

رحيق: -دا يبختها اللي صعيدي يحبها

يحيي: -انا مش بهزر!

رحيق (بابتسامة): -ولا انا بهزر

يحيي: -طيب انا مش عاوزك تكلمي البني آدم ده تاني..... ومش هو وبس... دا اي شيء مذكر مش عاوز بس عينك تبصله او تلمحه

رحيق: -حاضر

يحيي: -انا بكلمك جد

رحيق: -وانا عارفه... وقولت حاضر يا مولانا

يحيي: -طيب يا ست البنات... يالا بينا عشان احنا كدا اتأخرنا

رحيق: -ولو قولتلك بحبك

يحيي: -انا بقول نفضل هنا عشان الجو برا متأخر

رحيق: -ههههههههه

*______________*

عدي يومين والكل اتجمع في بيت عزت القناوي قبل ما يسافروا لشهر العسل..... وبما إن الكل معزوم على الغدا فلازم زوجة الابن الكبير هيا اللي تكون محضرة الغدا.... وطبعا هنية فرحت جدا بموضوع العزومة عشان هتعرف تتريق على ليل كويس

بمنزل عزت القناوي

الكل اتجمع على السفرة بعد ما كل حاجه جهزت

عزت قاعد يترأس السفرة وفهد على يمينه وجانمبه ليل وعلى يساره عمر وجانمبه فرح..... وورد قاعدة جانمب ليل وأحمد جانمبها.... وخيري على رأس السفرة قصاد عزت وعلى يمينه هنية وجانمبها زهور

يحيي (بهمس لرحيق):- هتعرفي تطبخي وليمة زي دي لما نتجوز ولا هتكسفينا!؟

رحيق (بغرور مصطنع): -هه..... الجملة دي لو اتسألت تاني عارف هعمل ايه؟!

يحيي: -هتعملي ايه؟!

رحيق؛ -هعيط.... ههههههه

...............

زهور:-مالك يا حاتم؟!

حاتم: -امك ماسكة السكينة وعمالة تقطع بغيظ في اللحمة وهيا بصالي.... شكلها فعلا بتفكر تجيبني من زمارة رقبتي

زهور: -بعد الشر عليك يا حبيبي.... بص اسلم حل إنك ماتبصلهاش وكل.... تحب احطلك ايه في طبقك؟!

حاتم(بهمس): -ضحكتك

زهور: -ههههههه.... مالها

حاتم: -بتشبعني

زهور(وهو تشير لهنية بعينها): -انت شكلك مستعجل اوي على قدرك

حاتم: -بعد الشر عليا.... انا لسه عاوز ادخل دنيا

زهور: -طب كل

حاتم: -طب ضحكة حلوة كدا من اللي بيخطفوا قلبي

زهور: -هههههههه... افصل بقي

................

ورد: -خلاص بقي فك

أحمد: -انا مش عارف اعمل فيكِ ايه والله

ورد: -ههههههه هتعمل ايه يعني حظك... وبعدين انت مش بتحبني

أحمد(بغيظ): -بحبك ااه.... بس ده مش معناه إني مانمش بسبب حضرتك إلا ساعتين

ورد: -انت بتتعصب عليا؟!.... الحق عليا مش عاوزة صلاة الفجر تروح عليك وكمان عوزاك تفضل رياضي

أحمد (أخد إيدها وباسها): -ابوس ايدك انا هفضل رياضي والله.... ماجتش من يومين يعني اللي هيبوظولي جسمي.... يعني بذمتك في حد في الدنيا بيجي من صلاة الفجر يعمل تمارين لحد الساعة 7...وبعدها ينزل يفطر وبعدها ماينفعش انام الا لما حضرتك تحفظي الوِرد بتاعك وتسمعيهولي..... لا ومش كدا وبس لا.... دا ماينفعش انام واسيب حضرتك قاعدة..... انتِ بتبصيلي كدا ليه؟؟

ورد: -هو انا قولتلك بحبك انهاردة

أحمد (بتذكر): -ااا.... أول ما صحيت

ورد: -ياااه

أحمد: -ايه؟؟

ورد: -بحبك

أحمد (نسي خالص اللي كان بيقوله): -بجد

...................

فرح: -ههههههه

عمر: -اخرسي

فرح: -ههههههه

عمر: -هديكي 30 قلم على خدودك والله

فرح: -طب خلاص عشان خاطري

عمر: -خلاص!!.... خلاص ايه!.... انتِ ازاي جالك قلب تقولي حاجة زي دي

فرح: -بهزر يا رمضان ايه مابتهزرش!

عمر(بغيظ وغيرة):- جاية تقوليلي ايه رأيك في المايوه ده انزل بيه البحر.... دا هزار ده؟؟

فرح: -يعني انت شوفتني لبسته بجد!

عمر: -يالهوووو.... هتخليني اصوت قدامهم وصوتي يعلي.... اسكتي خالص... انا كل اما افتكر شكل البتاع ده بحس ان هيجلي سكتة قلبية

فرح: -بعد الشر عليك.... هزعل والله لو قلت كدا تاني ومش ههزر معاك تاني

عمر: -طيب خلاص.... بس ماتهزريش بالطريقة دي تاني

فرح: -حاضر... ممكن تاكل

عمر: -لا

فرح: -عشان خاطري

عمر: -عشان خاطرك بس

.................

فهد: -تسلم ايدك يا مولاتي

ليل: -بجد الاكل عجبك!!

فهد: -جدا.... انا ماكنتش متخيل إنك هتعملي كل ده

ليل: -عملتلك كل حاجه بتحبها

فهد: -واخد بالي.... بس في حاجة ناقصة

ليل: -المكرونه بشاميل ههههههه

فهد: -انتِ قصداها بقي؟!

ليل: -لا والله.... بس انا عاوزه اعملهالك مخصوص فاهمني.... دا انا حتي كان نفسي فيها

فهد: -اشطا هتعمليهالي امتا؟!

ليل: -هعملها........

هنية قاطعة كلامهم وكانت فاكرة إن ليل مش هيا اللي عملت الأكل

هنية (بغيظ): -بس مش المفروض إنك انتِ يا ليل اللي تعملي الوكل انهاردة؟!

ليل: -اي.....

هنية: -بس انتِ ماتعرفيش عوايدنا..... ولسه تربية نبيلة باينة

ورد: -بتچولي ايه يا مرت عمي..... ليل هيا اللي عاملة الوكل ده كله..... حتي انا طلبت منها اجي بدري واساعدها وهيا رفضت

هنية (بغيظ اكبر): -مانا بچول برضه ده مش وكل سميحة..... وكل ماسخ زي اللي عملاه

ليل (قامت من علي السفرة): -الحمدلله شبعت.... بعد إذنك يا عمي اطلع اوضتي

ليل طلعت تجري على أوضتها والكل مستني رد فعل فهد..... فهد قام بهدوء ووقف جانمب هنية

فهد: -الوكل مش عاجبك يا مرت عمي.... مش إكديه؟!

هنية: -ايوا ماعجبنيش..... عندك مانع يا فهد

فهد (بهدوء): -لا ابدا

فهد أخد الطبق اللي قدام هنية ورماه بعيد عن السفرة.... و الكل مصدوم

فهد (بعصبية مكبوتة): -هو حد چالك لسمح الله إن مرتي إهنه عشان تخدمك؟!..... دي ست البيت وإن كانت عملت حاجة في المطبخ إنهاردة فده من زوقها وتربيتها اللي على راسي..... مش واجب عليها..... عن إذنك يا ابوي

عزت(بابتسامة بسيطة): -إذنك معاك يا والدي

هنية قامت زي البركان اللي هينفجر ودخلت أوضتها..... وحاتم مبسوط باللي حصل

عزت(بص ل عفاف): -ايه يا عفاف.... اوعي يكون الوكل مش عاجبك انتِ كمان

عفاف: -ههههههههه..... تسلم إيدها

عزت: -سميحة.... سميحة

سميحة: -نعم يا حچ

عزت: -معلش يا بتي.... شيلي الطبق اللي على الأرض ده

سميحة: -امرك يا حچ

عزت: -كملوا أكل يا ولاد.... حصل خير... تعالي يا عفاف ورايا على المندرة وانت يا خيري روح شوف مرتك

خيري: -بلاش.... لحسن انا لو دخلت احتمال اجتلها عشان انا زهقت

عزت: -طول بالك يا اخوي

عزت راح على المندرة هو وعفاف وفضلوا يتكلموا شوية..... وبعد كدا سميحة دخلت

سميحة: -الشاي يا حچ

عزت: -حطيه يا سميحة

سميحة(بتردد): -فيه ضيوف عوزينك يا حچ

عزت: -ضيوف مين؟!

سميحة: -الحچ عبد الحكيم الصاوي

عزت بص على عفاف وبعدها قامت طلعت برا

*_______________

في غرفة فهد

فهد قرب من ليل وقعد جانمبها بهدوء

فهد: -ليل...... بصيلي

ليل: -........

فهد (رفع وشها): -انتِ بتعيطي؟!..... ليه كل ده.... كبري دماغك يا حبيبتي

ليل: -انا مش بعيط من اللي حصل يا فهد..... انا بس تعبانة شوية

فهد (بقلق): -مالك

؟؟

ليل: -انا بس تعبت..... تعبت وماحدش حاسس بيا.... انا مش عارفه إذا كنت بحب امي ولا لا..... بابا دايما على بالي.... وكل اما افتكر اللي هيا عملته فيه بكرها... كل ما افتكر لما كنت بدخله وهو تعبان واسمعه بيقول ليه عملتِ فيا كدا يا نبيلة!.... بكرهها اكتر.... هيا فعلا ليه عملت فيه كدا!!.... بس برضه في الاخر دي امي..... انا جوايا مشاعر متلغبطة.... بحبها وبكرهها في نفس الوقت.... مشفقة عليها وبرضه مش قادره انسي اللي عملته في بابا الله يرحمه..... عارف انت الشعور ده.... بتحب حد وفي نفس الوقت بتكرهه.... قولي اعمل ايه!؟..... انا عمري ما اتكلمت مع رحيق في الموضوع ده لإني عارفه إنها مش هتحس بيا.... ماشفتش ابوها وهو بيقاسي ولا هو تعبان وامها ولا هيا هنا كله اللي بتعمله إنها بتتجوز..... حاتم الوحيد اللي حس بيا.... بس الكره جواه قدر ينتصر على حبه لأمه.... انا ليه برغم اللي بيحصلي بسببها ده مش قادرة اكرهها.... قولي اعمل ايه يا فهد..... اعمل ايه؟!

فهد حضنها: -حبيني انا

ليل بعدت عنه وضحكت

فهد: -بتضحكي على ايه؟!

ليل: -عليك!

فهد: -انا بتكلم جد على فكرة..... حبيني انا.... انا الوحيد اللي عمر حبي ماهيئذيكي.... وانا الوحيد اللي كل ما تحبيني حياتك هتحلو وقلبك هيتملي سعادة

ليل(بهمس): -ليه؟!

فهد: -لأن ببساطة انا عمري ما هخلي في لحظة تندمي على حبك ده.... عمري ما هخليكِ في يوم تزعلي مني او تفكري تبعدي

ليل: -........

فهد: -تعرفي انتِ بالنسبالي ايه!؟...... انتِ بالنسبالي مش مراتي وبس او حبيبتي وبس..... عارفه انتِ الشخص اللي اللي بيعشق مراته وبعدها ربنا رزقه منها ببنوتة شبها بس حبيبته ماتت..... انتِ متخيلة هيحب بينته قد ايه؟!..... هيحبها لأنها حتة من حبيبته وهيحبها لأنها بنته ولأنها الشيء اللي فاضل من حبه وهيحبها عشان مش عاوز حاجه غيرها هيعشقها بمعني الكلمة

ليل: -ومش هيعوز حاجة من العالم او من اللي حواليه؟!

فهد: -يولع العالم مقابل إنك جانمبي

ليل: -.........

*__________________*