رواية مزاوله حب الفصل الثامن عشر 18 بقلم دودو محمد

رحمه :- الله النهارده اليوم العالمى للاخوات

تمارا :- تقصدى ايه

رحمه :- بدر اخوه يارا جاى هناك اهو

يارا :- بأستغراب بدر

بدر :- جه يجرى وقال تعالى معايه بسرعه يا يارا

يارا :- بقلق ليه خير

بدر :- امك تعبت واخدها المستشفى وطالبه تشوفك

يارا :- بدموع ماما يلا بينا بسرعه يا بدر

تمارا :- تعالوا اركبوا العربيه هنروح معاكم

والاربعه ركبوا العربيه وراحوا يجروا على المستشفى وبعد وقت وصلت تمارا ونزلت يارا تجرى من العربيه وهى دموعها على خدها ونزل بدر جرى وراها

بدر :- استنى يا يارا

يارا :- بدموع ماما فين يا بدر

بدر :- فى الاوضه اللى جايه دى

يارا :- طلعت تجرى وفتحت الباب لاقت الممرضه بتحط الملايه على وشها راحت زقت الممرضه وقالت اوعى كده انتى بتعملى ايه هتخنقيها وقالت ماما قومى انا وصلت اهو قومى يلا يا ماما ردى عليا

الممرضه :- البقاءلله

يارا :- بدموع لاء ماما ماما قومى متسبنيش بدر الحق ماما مش بترد عليا

بدر :- دموعه كانت نازله منه دخل اخد أخته فى حضنه وقعد يعيط

يارا :- صرخت وقالت ماما لااااااا متموتيش ماما ماما

تمارا ورحمه :- دخلوا يجروا عليها وهما بيعيطوا وشدوا يارا فى حضنهم

يارا :- بدموع ماما ماتت يا تمارا ماما ماتت وسبتنى فى الدنيا لوحدى

تمارا :- بدموع ربنا يرحمها حبيبتى عمرها وانتهى

يارا :- بدموع ياريتنى كنت انا اللى موت وانتى لاء يا ماما مش هقدر اعيش فى الدنيا دى من غيرك ومسكت فى تمارا اكتر وقعدت تعيط

بدر :- طلع يجرى بره الاوضه وقعد فى الارض وقعد يعيط

رحمه :- طلعت تجرى وراه وقعدت جمبه فى الارض وطبطبت على كتفه وقالت البقاءلله يا بدر انا عارفه أن موتها صعب عليك بس لازم تقوى علشان اختك محتاجك اوى جمبها الفتره دى

بدر :- بدموع امى ماتت يا رحمه امى ماتت علشان ملاقتش فلوس علاجها امى ماتت من الفقر قبل المرض يا رحمه امى ماتت علشان انا قصرت معاها ومقدرتش اعالجها انا السبب انا السبب

رحمه :- اهدا يا بدر متقولش كده حرام ده عمرها وانتهى ولو كان معاك ملايين الفلوس عمرها ما كانت هتقدم فى عمرها ثانيه واحده

بدر :- خبط راسه فى الحيطه وقال بدموع ااااااه يا اماااا ااااه اتحرمت خلاص من حضنك اتحرمت من دعوتك ليا اتحرمت من اكتر قلب حبينى ااااااه يا اما

رحمه :- بدموع خلاص بالله عليك ما تعمل كده خليك قوى وادعلها بالرحمه وقوم قول لأختك كلمتين تقويها شويه

بدر :- مش قادر خلاص اقف على رجلى يا رحمه موت امى كسرى ضهرى

رحمه :- وقفت ومدت ايديها لبدر وقالت علشان خاطرى اجمد اكتر من كده وقوم معايا

بدر :- بص لرحمه بدموع وانكسار ومد أيده مسك ايد رحمه وقام وقف دخل عند يارا لاقها لسه بتعيط شدها فى حضنه وباس راسها وطبطب عليها وقعد هو كمان يعيط وبعد وقت خلص اوراق الدفن واتغسلت امهم واندفنت واخدوا العزا فى المقابر وروحوا على البيت

تمارا :- خدى اللقمه دى يا يارا

يارا :- بدموع مليش نفس

رحمه :- انتى لازم تاكلى انتى كده هتوقعى من طولك

يارا :- بدموع ياريت علشان اروح عند ماما مش عايزه اعيش فى الدنيا دى من غيرها

ندى :- وهى واخده يارا فى حضنها قالت بدموع حرام عليكى انتى كده بتعذبيها هى حاسه بكل حاجه

يارا :- ااااه يا امى البيت بقى وحش اوى من غيرك ياريتنى كنت موت قبل ما يجى يوم زى ده

تمارا :- بعد الشر عليكى يا حبيبتى

بدر :- قعد على الكنبه بتعب وحزن وقال أهدى يا يارا ابوس ايدك بلاش تزوديها عليا انا مش قادر اشوفك فى الحاله دى

يارا :- خلاص يا بدر مفيش ماما تانى مفيش الحضن الحنين اللى كان بيضمنا ماتت فرحة البيت يا بدر ومسكت اكتر فى ندى وقعدت تعيط وفى الوقت ده وصلت ام ندى ومعاها انس

ندي :- ماما،انس تعالوا

انس :- لبدر البقاء الله

بدر :- ونعم بالله

يارا :- قامت تجرى واترمت فى حضن ام ندى وقعدت تعيط وتقول ماما ماتت يا خالتى خلاص الحضن الحنين راحت وسابتنى

ام ندى :- طبطبت عليها وقالت أهدى يا حبيبتى ادعلها بالرحمه انا زى امك اى حاجه محتاجها قوليلى علطول متتكسفيش

يارا :- ااااااه يا ماما مكنتش متخيله أنها هتسيبنى بالسرعه دى وقعدت تعيط

انس :- اتنهد بوجع وبص ليارا وقام وقف وقال عن اذنكم

بدر :- لسه بدرى انت لسه جاى

انس :- لاء انا خارج اشم شوية مش همشى ولسه هيخرج لاقه يوسف ومالك داخلين بص لمالك بغيظ وقرف وسلم على يوسف وخرج بره

مالك ويوسف عزوا بدر ويارا وقعدوا معاهم شويه ويوسف عينه منزلتش من على تمارا وبعد وقت الكل مشى واتبقى البنات التلاته مع يارا

يارا :- بدموع كنتوا رواحتوا انتو انا كويسه الحمدالله

تمارا :- احنا مش هنسيبك يا يارا من امته واحنا بنسيب بعض فى وقت زى ده

يارا :- بدموع ربنا يخليكم ليا يارب

رحمه :- هو بدر راح فين

يارا :- بدموع راح ينام عند واحد صاحبه جمبنا علشان تبقوا براحتكم

ندى :- كلى لقمه بقى علشان خاطرنا

يارا :- بدموع مليش نفس والله

تمارا :- لقمه صغيره بالله عليكى

يارا :- اخدت لقمه صغيره وقالت بالله عليكم متغصبوش عليا

رحمه :- طيب تعالى ريحى جسمك ونامى شويه

يارا :- نامت على السرير وجمبها ندى ورحمه وتمارا نامت على الكنبه والكل بدء ينام افتكرت يارا امها ولحظاتها معاها حطت ايديها على وشها وقعدت تعيط

ندى :- قامت قعدت وقالت أهدى يا يارا ادعلها بالرحمه

يارا :- بدموع مش قادره اصدق ان خلاص مش هشوف ماما تانى

رحمه :- قامت قعدت وقالت خليكى قويه يا يارا عارفه أن الفراق صعب عليكى بس هى دى سنة الحياه كل واحد وليه عمر هينتهى اجلا ولا عاجلا

تمارا :- احنا معاكى وجمبك ومش هتبقى لوحدك أبدآ يا يارا

يارا :- قعدت تعيط واترمت فى حضن ندى لحد ما عينيها راحت فى النوم

ندى :- حطتها على المخده وقالت الحمدالله نامت

رحمه :- ربنا يصبرها على فراق امها يارب

تمارا :- يارا اصلا متعلقه بأمها اوى سبحان من هيخليها تستحمل فراقها

ندى :- ناموا انتوا كمان ساعتين ولا حاجه قبل ما تصحه يارا

رحمه :- يلا تصبحوا على خير والاربعه ناموا لصبح

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

اشرقت شمس صباح يوم جديد بنورها الساطع فى سماء القاهره لتبدء يارا بفتح عيونها بصت حاوليها لاقت البنات نايمين معاها فى الاوضه افتكرت كل اللى حصل امبارح دموعها نزلت منها وقعدت تصرخ وتعيط

البنات التلاته قاموا يجروا

يارا :- ماما مش متخيله أن هقوم من نومى مش هشوفها تانى ياااااارب الصبر من عندك يارب

ندى :- لا حولا ولا قوة الا بالله ربنا يصبر قلبك يا حبيبتى

يارا :- صعبه والله العظيم صعب عليا اعيش من غيرها فى الدنيا ازاى هقدر اتقبل فكرت اقوم من نومى ملاقهاش تضحك ليا زى ما متعوده وتدعيلى من قلبها وانا نازله أنه يكفينى شر ولاد الحرام ولا لما يجى عريس وتفضل تتخانق معايا علشان اوافق وتقولى عايزه اطمن عليكى قبل ما اموت اااااه يا امى اديكى موتى اهو وسبتينى فى الدنيا لوحدى

التلاته كانوا دموعهم نازله منهم ومش قادرين يتكلموا

رحمه :- أهدى يا حبيبتى متعمليش فى نفسك كده

تمارا:- على فكره مش هينفع احنا التلاته نروح الشغل ونسيبها لوحدها وهى فى الحاله دى لازم واحده فينا تقعد معاها

رحمه :- روحوا انتوا انا هقعد معاها

ندى :- واحنا هنخلص شغل ونيجى على هنا علطول

تمارا :- يلا طيب علشان اتأخرنا وبصت ليارا وقالت مش محتاجه حاجه يا يارا

يارا :- هزت راسها يمين وشمال وقالت بدموع لاء

تمارا وندى دخلوا الحمام وحضروا نفسهم

ندي :- بستها فى خدها وقالت أجمدى يا يارا ها

ونزلوا الاتنين مع بعض

رحمه :- هقوم احضرك لقمه

يارا :- بدموع مش عايزه

رحمه :- مينفعش يا حبيبتى لازم تاكلى الحزن ملهوش دعوه بالاكل الحزن فى القلب يا يارا هقوم اعملك اى سندوتش صغير وخرجت وسابتها ودخلت المطبخ بصت حاوليها وراحت عند التلاجه وفتحتها ووقفت قصادها واتنهدت وهى مش عارفه تعمل ايه

بدر :- عايزه ايه يا رحمه

رحمه :- اتخضت وبصت لبدر

بدر :- انا اسف لو خضيتك

رحمه :- ح.ح.حصل خير اصل انا عارفه انك عند واحد صاحبك

بدر :- ايوه لسه جاى دلوقتى كنتى محتاجه ايه

رحمه :- قولت اعمل سندوتش ليارا

بدر :- روحى انتى وانا هعملها

رحمه :- لاء خليك انت قولى بس فين الجبنه

بدر :- اسمعى بس الكلام روحى انتى وانا هعمل كل حاجه

رحمه :- بصت ليه وقالت ماشى وخرجت من المطبخ وراحت عند يارا لاقتها لسه بتعيط قالت يا بنتى أهدى شويه انتى كده ممكن يحصلك حاجه

يارا:- بدموع ياريت على الأقل اكون مع ماما

بدر :- دخل وقال بعد الشر عليكى يا يارا كده عايزه تروحى انتى كمان وتسبينى لوحدى وقعد جمبها وشدها فى حضنه وباس راسها وقال اوعى تقولى كده تانى فاهمه

يارا :- مسكت فيه وقعدت تعيط

بدر :- مسك وشها ما بين ايديه ومسح دموعها وقال أهدى يا يارا واستغفرى ربنا وادعلها بالرحمه ربنا رحمها من العذاب اللى هى كانت فيه ماما كانت تعبانه اوى يا يارا وكانت بتحاول تدارى عليكى تعبها ده علشان متزعليش هى كده ارتاحت من كل اللى كانت بتحس بيه

يارا :- بدموع يا حبيبتى يا ماما ربنا يرحمك يا حبيبتى

رحمه :- ايوه كده جدعه خدى بقى كلى السندوتش ده

يارا :- اخدته منها واخدت حته منه

بدر :- مد أيده بسندوتش وقال وانتى يا رحمه خدى كلى

رحمه :- لاء مش عايزه

بدر :- خدى يا رحمه مينفعش تقعدى من غير اكل

رحمه :- اخدته منه وقالت طيب وانت

بدر :- انا اهو يلا كل واحده تاكل السندوتش بتاعها وتشرب العصير

رحمه :- ماشى وانت كمان يلا كل

والتلاته قعدوا يأكلوا السندوتش بتاعهم وشربوا العصير

يارا :- بتعب انا عايزه انام شويه

رحمه :- نامى يا حبيبتى وغطتها وخرجت هى وبدر وقعدت هى على الكنبه وقعد بدر على الكرسى

بدر :- شكرآ يا رحمه

رحمه :- على ايه

بدر :- علشان واقفه جمب يارا ومسبتهاش لوحدها

رحمه :- يارا اختى واى حاجه توجعها توجعنى وعمرنا ما هنتخلى عنها انا والبنات

بدر :- ربنا يخليكم لبعض

رحمه :- يارب

بدر :- انا هنزل اشترى اكل واجى اعمله علشان تتغدوا

رحمه :- متكلفش نفسك

بدر :- ولا تكلفه ولا حاجه كده كده كنت هعمل اكل علشان يارا

رحمه :- خلاص هات اى لقمه بسيطه وانا هعملها

بدر :- لاء ليه يعنى انتى هتطبخى لينا كمان

رحمه :- وفيها ايه

بدر :- يعنى انتى عندكم بتروحى تلاقى الاكل جاهز مش هتقفى تعملى لينا الاكل وتتعبى نفسك هنا عندنا

رحمه :- ايه اللى انت بتقوله ده احنا لما كنا فى إيطاليا مكانش حد بيخدمنا كان كل واحد فينا بيخدم نفسه يعنى عادى على فكره

بدر :- انا مش عايز اتعبك معانا

رحمه :- مفيش تعب ولا حاجه اتفضل انت بس اشترى الاكل وانا هعمله

بدر :- ابتسم ليها وقال ماشى وسابها ونزل يشترى الاكل

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى الشركه

دخلت تمارا وندى الشركه وقعدت كل واحده على المكتب الخاص بيها وقالت تمارا

تمارا :- بزعل انا زعلانه اوى على يارا بجد صعبانه عليا ربنا ما يحرم واحده من امها يارب

ندى :- بزعل يارب انا قلبى وجعنى عليها ربنا يصبر قلبها على فراقها

تمارا :- احنا عايزين كل يوم واحده تقعد معاها لحد ما يعدى اليومين دول بس وتقدر تنزل الشغل

ندى :- من غير ما تقولى طبعآ هنعمل كده

وفى الوقت ده جه السكرتير وقال لتمارا أن يوسف عايزها

تمارا :- روح وانا جايه وراك وبصت لندى وقالت مش هخلص منه كل شويه يبعت ليا وقامت وقفت وقالت هروح اشوف عايز ايه وراحت عنده المكتب وخبطت على الباب ودخلت وقالت افندم حضرتك

يوسف :- تعالى يا تمارا

تمارا :- أمر حضرتك

يوسف :- ارجوكى بلاش الطريقه اللى بتتكلمى معايا بيها دى احنا من امته بنتكلم مع بعض رسمى اوى كده

تمارا :- ياريت لو فيه كلام يخص الشغل اتفضل حضرتك قوله مفيش يبقى هروح اشوف شغلى

يوسف :- وقف وقال طيب انسى اللى حصل ده كله وخلينا زى الاول اصدقاء خلينى سندك يا تمارا

تمارا :- هو واحد بس اللى سندى ربنا يخليه ليا يارب بابا غير كده مفيش

يوسف :- بلاش سندك خلينا أصدقاء زى الاول ارجوكى يا تمارا مش قادر استحمل طريقة معاملتك ليا دى

تمارا :- اتنهدت وقالت بص انا خلاص مبقاش عندى حيل لمناهده معاك ومع غيرك يا يوسف اللى انت عايزه اعمله

يوسف :- مسك ايديها وقال بجد يا تمارا يعنى هتسامحينى

تمارا :- شدت ايديها وقالت بحدود يا يوسف انت مش اكتر من صديق ومش مقرب كمان التعامل بحدود فاهم واى تجاوزات صدقنى يبقى انت اللى نهيت على كل حاجه حتى الصداقه

يوسف :- والله مش هعمل حاجه تضايقك أبدآ

تمارا :- اتنهدت وقالت لما نشوف عن اذنك

يوسف :- استنى

تمارا :- وقفت وقالت نعم

يوسف :- ها اه فيه شغل لازم نشتغله مع بعض دلوقتى

تمارا :- اوك يلا بينا

يوسف :- اقعدى على الكنبه ثوانى

تمارا :- قعدت على الكنبه وقالت شغل ايه ده

يوسف :- ها دول شوية شغل صغيرين وقعد جمبها على الكنبه وفتح الملفات وقال دول لازم نخلصهم النهارده

تمارا :- اوك مفيش مشكله بس مش عايزه أتأخر علشان هنروح ليارا

يوسف :- صح عامله ايه النهارده

تمارا :- ربنا يصبرها

يوسف :- يارب

تمارا :- يلا نبدء

يوسف :- يلا

تمارا :- بدأت تشوف شغلها وكانت مركزه فى الملفات

يوسف :- قعد يبص ليها وهى شغاله بحب

تمارا :- اخدت بالها بصت ليه وقالت فيه حاجه

يوسف :- لاء وبص فى الملفات وبدء يشتغل

تمارا :- كانت ريحة برفان يوسف موترها وغمضت عينيها واتنهدت وقامت وقفت وقالت ا.ا.انا هروح ا.ا اشتغل على المكتب

يوسف :- ليه

تمارا :- ها ضهرى وجعنى من قعدت الكنبه هروح اقعد على الكرسى وقامت تجرى

يوسف :- اتنهد وقال ماشى صح عامله ايه مع ياسين

تمارا :- الحمدالله كويسين مستنين ينزل اجازه علشان يجى يقابل بابا

يوسف :- انتى واثقه فى اللى اسمه ياسين ده

تمارا :- ايوه واثقه فيه جدآ هو طيب وجدع اوى

يوسف :- بغيظ خلى بالك بس المظاهر خداعه

تمارا :- لاء متقلقش انا مش صغيره وبعرف الفرق ما بين الوحش والكويس مفيش غير مره واحده بس اللى غلط فى اختيارى وادينى اهو بصلح الغلط ده

يوسف :- اتنهد وبص ليها وسكت

تمارا :- ومراتك عامله ايه فى الحمل

يوسف :- معرفش بقالى يومين مروحتش البيت

تمارا :- ليه بس كده ده اكتر وقت هى محتاجك فيه جمبها اليومين دول ولا انت اخد انك تهرب من المسؤوليه علطول

يوسف :- انا مش بهرب من المسؤوليه يا تمارا بس أوقات كتير بنختار غلط ومش بنحس بده غير بعد فوات الاوان

تمارا :- بس اللى يغلط يصلح غلطه يا يوسف وهى مش ذنبها أنها طلعت حامل ومن ابسط حقوقها انك تبقى جمبها وقت ما تحتاجك

يوسف :- انا ليه حاسس انك عايزه توصلى ليا أن لازم اقبل بأرين فى حياتى

تمارا :- فعلا عايزه اوصلك كده لان من واجبى عليك كصديقه واخت انصحك لصح وانت حر تقبل النصيحه أو ترفضها وبصت فى الساعه وقالت انا لازم امشى علشان نروح عند يارا

يوسف :- بصلها بوجع وقال روحى يا تماره روحى

تمارا :- ابتسمت ليه وقالت اوك باى وخرجت وقفلت الباب وغمضت عينيها واتنهدت بوجع وراحت على المكتب بتاعها لاقت ندى مش موجوده قعدت على المكتب بتاعها بحزن ووجع وقالت يارب هفضل فى وجع القلب ده لحد امته تعبت وقعدت تنتظر رجوع ندى

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى مكتب مالك

كانت ندى قاعده مع مالك فى مكتبه وقالت

ندى :- ممكن افهم انت ايه معصبك دلوقتى

مالك :- انتى مشوفتيش اخوكى اتعامل معايا ازاى امبارح ده سلم على يوسف وبص ليا بقرف كأنى حشره قصاده ليه كل ده ها مدام هو حبيب اوى كده وبيغير عليها وعامل فيها رومانسى ما يروح يتنحرر شويه ويكلمها

ندي :- طيب ممكن تهدا شويه

مالك :- بعصبيه بلا اهدا بلا اتنيل انا من امبارح منمتش انا عمرى ما حد اتعامل معايا كده انا الكل بيعمل ليا الف حساب انا لو مكنتش خايف على زعلك انا كنت عرفته مقامه

ندى :- يا مالك ده اخويا برضه وكلامك ده هيزعلنى

مالك :- بعصبيه وانا ايه يا ندى مزعلتيش علشانى بعد اللى عمله امبارح

ندى :- زعلت يا مالك هو اخويا وانت وسكتت وقالت يعنى من الاخر انتوا الاتنين غاليين عليا ارجوك اهدا وبلاش عصبيه

مالك :- نفخ وقال بعصبيه متفضليش كل شويه تقوليلى اهدا اهدا انا مش مجنون وبشد فى شعرى ومن حقى اتعصب فاهمه

ندى :- فاهمه عن اذنك وراحت عند الباب وفتحته ولسه هتخرج

مالك :- راح وقفل الباب وقال متزعليش انا اسف

ندى :- لو سمحت سبنى سيب الباب

مالك :- خلاص يا ندى متزعليش غصب عنى والله انا من امبارح متعصب ومنمتش من ساعه اللى اخوكى عمله ده حسسنى أن انا حشره قصاده

ندى :- بدموع اعمل ايه يعنى هو اخويا طبعه كده اقتله علشان الكل يرتاح

مالك :- خلاص أهدى حقك عليا متزعليش

ندى :- بصت الجنب التانى ومردتش عليه

مالك :- خلاص بقى يا ندوش اتعصبت شويه مش قضيه يعنى وبعدين لو مضحكتيش هبوسك وانتى حره

ندى :- بطل قلة ادب

مالك :- هتضحكى ولا ها

ندى :- ابتسمت وقالت ماشى المرادى سماح بس بلاش تتعصب عليا تانى يا مالك

مالك :- حاضر يقطعنى علشان كنت سبب فى نزول دموعك دى ومسحها بأيديه وبص ليها بحب

ندى :- احم ا.ا.انا هروح بقى علشان متأخرش على يارا وزقته وطلعت تجرى

مالك :- ابتسم وقال لما نشوف ايه اخرتها مع سى زفت انس ده ورجع قعد على مكتبه

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى بيت يارا

كانت رحمه واقفه فى المطبخ بتحضر الاكل ودخل بدر عليها بصلها بأعجاب وقال

بدر :- تعرفى انك شكلك حلو اوى وانتى واقفه فى المطبخ

رحمه :- بكسوف بجد

بدر :- اه والله يعنى شكلك كيوت اوى وانتى واقفه وماسكه البصل بتقطعى فيه

رحمه :- ضحكت وقالت اول راجل يقول كده على فكره اكتر الرجاله مش بتحب تشوف واحده ماسكه بصل وبتقطع فيه والدموع نازله من عينيها والريحه ايه تاريخيه

بدر :- ابتسم وقال على فكره انا حبيت البصل اوى لو اعرف انه هيبقى شكله حلو اوى كده فى ايدك كنت خلصت البصل اللى موجود فى الدنيا دى بحالها

رحمه :- ضحكت وقالت انت مشكله حتى فى دى مختلف واستثنائى والاتنين وقفوا يجهزوا الاكل مع بعض

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند يارا

صحيت من النوم ملاقتش حد جمبها اتنهدت بدموع وقامت من على السرير وخرجت من اوضتها بصت على باب اوضت امها راحت فتحت الباب ودخلت بصت فيها بوجع ودموع واترمت على السرير وقعدت تعيط وفى الوقت ده سمعت صوت الباب بيخبط قامت من على السرير وهى دموعها نازله منها وراحت فتحت الباب لاقته انس مسحت دموعها وقالت

يارا :- اتفضل حضرتك

انس :- مفيش حد موجود فى البيت غيرك ولا ايه

يارا :- لاء رحمه وبدر هنا بس مش عارفه هما فين اتفضل

انس :- دخل وقال عامله ايه دلوقتى

يارا :- بدموع ووجع قالت بحاول اعيش

انس :- اتنهد وقال وحدى الله يا يارا ده قضاء ربنا

يارا :- بدموع ونعم بالله بس لسه اول يوم عليها وواحشتنى اوى ومش قادره اعيش من غيرها مش عارفه هقدر اعيش اللى جاى ازاى

انس :- مسك ايديها وقال خليكى قويه الدنيا عمرها ما بتقف على موت اى عزيز ولا غالى ربنا أكرم علينا بنعمة النسيان بننسى ونقدر نعيش وناكل ونشرب ونضحك ونشتغل ونخرج بس بيفضلوا عايشين فى قلبنا؛ كل ذكرى حلوه عشناها معاهم بتفضل عايشه ومحفوره جوانا بنفضل نفتكر ونضحك ونقول الله يرحمهم هما ماتوا واندفنوا فى التراب بس بيفضلوا عايشين فى قلوبنا يا يارا

يارا :- بصت ليه ودموعها نازله منها وقالت حاسه ان انا بقيت وحيده اوى من غيرها

انس :- انا معاكى وجمبك يا يارا

يارا :- سحبت ايديها من أيده وقالت شكرآ جدآ ليك على شعورك النبيل ده يا استاذ انس

انس :- على فكره كلامى ده مش عزومه ولا مجامله انا بتكلم بجد

يارا :- بصت بدموع وقالت عارفه ما انا زى اختك برضه

انس :- لسه هيرد عليها خرج بدر وقال

بدر :- انس انت هنا من امته

انس :- لسه جاى

رحمه :- يارا انتى صحيتى امته

يارا :- لسه صاحيه عن اذنكم وسابتهم ودخلت اوضتها

انس :- بص على يارا وهى ماشيه وقال طيب انا جيت اشوفكم محتاجين حاجه

بدر :- ربنا يكرمك اتفضل طيب اتغدا معانا

انس :- لا مش هينفع علشان عندى شغل يلا السلام عليكم وسابهم ومشى

رحمه :- جه امته مسمعناش الباب لما خبط

بدر :- مش عارف والله ممكن يارا سمعته من اول مره علشان اوضتها جمب الباب المهم يلا نحضر الاكل على الترابيزه زمان البنات جايه من الشغل

رحمه :- اوك يلا وحضروا الاتنين الاكل وبعد وقت وصلوا تمارا وندى وقعدوا البنات وبدر علشان ياكلوا

؛؛؛؛؛؛؛؛؛؛؛؛