رواية مزاوله حب الفصل الثالث عشر 13 بقلم دودو محمد

فى شاليه انس

كانت قاعده ندي وامها وانس ماسك الجريده وبيقراه فيها

ندي :- وهى بتبص لانس قالت شوفتى يارا يا ماما

ام ندي :- مالها يا بنتى

ندي :- مش جالها عريس وقالتها بصوت عالى وهى بتبص على انس

ام ندي :- بجد ربنا يسعدها يارب

ندي :- بس هى رافضه

ام ندي :- ليه كده

ندي :- بتقول مش هو فتاه أحلامها اصل هى بتحلم تتجوز ظابط فى الجيش واخده بالك انتى يا ماما ظابط فى الجيش

ام ندي :- يا بنتى الجواز قسمه ونصيب يعنى اللى ليها نصيب معاه هو ده هيكون جوزها ابو ولادها

ندي :- بصت على انس لاقته بيقراه فى الجريده ومش منتبه لكلامها خالص وقفت بغيظ وقالت انا رايحه عند البنات

ام ندي :- ماشي يا بنتى

ندي :- بصوت عالى اااااانس

انس :- ايه صوتك عالى كده ليه

ندي :- بقولك هروح اقعد مع البنات

انس :- روحى ومتتأخريش وبص تانى فى الجريده

ندي :- بصت بغيظ ونفخت وراحت عند شاليه تمارا ودخلت قعدت على السرير من غير ولا كلمه

يارا :- ها عملتى ايه

ندي :- لا حياة لمن تنادي خالص عملت زى ما قولتوا وهو فى الباى باى مش هنا

يارا :- بزعل طيب وبعدين

تمارا :- أجمدى يا بت انا وراه والزمن طويل هخليه يعرف يعنى يعرف

رحمه :- ها قولى يا ام العروف هنعمل ايه تانى

تمارا :- هقولكم

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند ارين

دخلت ارين الاوضه لاقت يوسف مش موجود اتنهدت وخرجت سألت سميحه عليه قالت

ارين :- طنط مشوفتيش يوسف

سميحه :- لاء يا بنتى تلاقيه عند مالك ولا حاجه

ارين :- اوك عن اذنك وخرجت تدور عليه لاقته قاعد قصاد البحر راحت عنده وقعدت جنبه وقالت بتعمل ايه يا حبيبى

يوسف :- ولا حاجه قاعد قصاد البحر

ارين :- حطت راسها على كتفه ومسكت فى دراعه وقالت طيب مش هتدخل ننام

يوسف :- مش عايز انام لو عايزه تنامى انتى ادخلى

ارين :- لاء هقعد معاك

وفى الوقت ده خرجت تمارا تتمشى على البحر وشافت ارين ويوسف قاعدين اتنهدت بوجع وراحت تتمشي

يوسف :- تمارا يا تمارا

تمارا :- وقفت وقالت نعم

يوسف :- راح عندها وقال رايحه فين

تمارا :- هتمشى شويه

يوسف :- استنى اجى معاكى علشان محدش يضيقك

تمارا :- تيجى معايا ؟ طيب ومراتك هتسيبها لوحدها مينفعش برضه ما يمكن حد يجى يضيقها هى كمان هى محتاجك تدافع عنها اكتر منى عن اذنك وسابته ومشيت

يوسف :- بص ليها وهى ماشيه وبص لارين لاقها بتبص ليه والدموع فى عينيها وقامت وقفت وطلعت تجرى على اوضتها بص اتجاه ما تمارا مشيت ورجع بص على الشاليه بتاعهم واتنهد وراح وراه ارين ودخل الاوضه وقعد جنبها على السرير وقال ممكن اعرف انتى بتعيطى ليه دلوقتى

ارين :- بدموع والله مش عارف انا بعيط ليه جوزى بيجرى وراه حبيبته قدامى وسابنى وراح وراها ولا كأنى قاعده جنبه وجاى تسألنى بعيط ليه

يوسف :- اتنهد وقال انا عارف ان قولتلك أن بحب تمارا بس فى الاخر اختارتك انتى ولما روحت ليها مش قصدى حاجه كل الحكايه أن هى لوحدها وهى مسؤوله منى زى رحمه بالظبط

ارين :- ومسؤوله منك ليه بقى أن شاءالله كانت اختك ولا مراتك

يوسف :- ها بنت الجيران اللى عيشت طفولتى معاها وأهلها زى اهلى بالظبط

ارين:- بعدم اقتناع ماشى يا يوسف تصبح على خير

يوسف :- اتنهد وقال وانتى من أهله

ارين :- مش هتنام

يوسف :- ها ا.ا.اه هنام ونام جمبها واخدها فى حضنه وغمض عينه

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند تمارا

غمضت عينيها بوجع واتنهدت بحزن وقعدت فى الارض وضمت رجليها عند صدرها وحطت اسكتش الرسم عليها وقعدت ترسم وسمعت صوت ياسين بيقولها

ياسين :- بتعملى ايه

تمارا :- رفعت راسها وبصت ليه وقالت ياسين كنت فين طول النهار مشوفتكش

ياسين :- روحت شوفت امى ولسه واصل

تمارا :- انا فاكره انت قولت بتيجى تانى يوم

ياسين :- ايوه بس المرادى اطمنت عليها ورجعت علطول

تمارا :- غريبه واشمعنا المرادى يعنى

ياسين :- ها ع.ع.عادى جيت وقولت اكيد انك مش هتنامى الليل علشان مش هتشوفينى

تمارا :- ضحكت وقالت والله

ياسين :- بضحك ايوه كده اضحكى وقعد جمبها وقال ها عملتى ايه النهارده

تمارا :- ولا حاجه نزلت البحر مع البنات هبقى اعرفك عليهم وقعدنا شويه مع بعض وكل واحده راحت تنام

ياسين :- وانتى منمتيش ليه

تمارا :- مش عارفه مش عايزه انام بحب الهدوء

ياسين :- ايه ده انتى بترسمى

تمارا :- يعنى بحب الرسم وفى اوقات معينه

ياسين :- تعرفى أن انا كمان بحب الرسم

تمارا :- بجد

ياسين :- اه والله وعندى رسومات كتير كنت بشتغل فيهم وقت فراغى

تمارا :- يبقى بصره يا معلم انا كمان كده

ياسين :- امى بتسلم عليكى

تمارا :- بأستغراب عليا انا

ياسين :- ايوه كلمتها عليكى كتير وهى حبتك اوى وطلبت منى ابلغك السلام

تمارا :- ابتسمت وقالت الله يسلمك ويسلمها

ياسين :- ورينى بقى هترسمى ايه

تمارا :- شكل القمر وهو مكتمل فى سماء صافيه مع انعكاسه فى الميه شئ خرافى

ياسين :- فعلا منظر تحفه تحبى اساعدك

تمارا :- مفيش مشكله اتفضل

ياسين :- اخد الاسكتش وقعد يرسم وتمارا تتفرج عليه وتضيف ليه شويه ملاحظات وبعد وقت سمعوا صوت يوسف

يوسف :- تحبوا اجيب ليكم شجره واتنين ليمون

ياسين :- نعم ؟!

يوسف :- زى ما سمعت يا ظريف

تمارا :- وقفت وقالت عايز ايه يا يوسف جاى ورايا ليه

يوسف :- جيت علشان اشوف الهانم اللى قاعده مع واحد غريب فى وقت متأخر

تمارا :- وده يخصك فى ايه انا حره ملكش دعوه بيا واياك تفكر تعمل واصى عليا فاهم

يوسف :- مسكها من دراعها وقال امشى قدامى

ياسين :- مسك أيده وسحب دراع تمارا وقال حسك عينك تفكر تمد ايدك عليها وانا واقف

يوسف :- والله وهتعمل ايه وانت بتدخل ليه اصلا شئ ميخصكش

تمارا :- لاء يخصه هو وميخصكش انت يا يوسف ولاخر مره اقولها ليك ملكش دعوه بيا وابعد عن طريق فاهم وبصت لياسين وقالت تعال نقعد فى مكان تانى غير ده وبصت ليوسف من فوق لتحت بقرف ومشيت مع ياسين

يوسف :- بص عليهم وهما ماشين وداس على أسنانه بغيظ وقال ماشي يا تمارا ورجع تانى على الشاليه بتاعهم

ياسين وتمارا مشوا بعيد عن يوسف وقال ياسين

ياسين :- هو انا ممكن أسألك سؤال

تمارا :- اه طبعآ أسأل

ياسين :- هو فيه حاجه ما بينك وبين يوسف ده

تمارا :- بتوتر ها ل.ل.لاء بتسأل ليه

ياسين :- لأنها واضحه يا تمارا وغيرته عليكى واضحه اوى

تمارا :- لاء خالص انت عارف أنه لسه عريس جديد بس انت عارف صداقتنا من واحنا صغيرين علشان كده بيعتبرنى زى أخته بالظبط

ياسين :- بس غيرت يوسف عليكى مش غيرت اخ على أخته دى غيرت حبيب على حبيبته

تمارا :- اتنهدت بوجع وقالت تصبح على خير

ياسين :- مش هتردى على كلامى

تمارا :- يلا روح ريح تلاقيك تعبان من السكه

ياسين :- بس

تمارا :- قطعته وقالت يلا بقى الوقت أتأخر باى وسابته ومشيت

ياسين :- بص عليها وهى ماشيه وراح على الشاليه الخاص بتاعه

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

اشرقت شمس صباح يوم جديد بنورها الساطع فى سماء الاسكندريه لتبدء ندي بفتح عيونها على صوت يارا قامت قعدت بغيظ وقالت

ندي :- فيه ايه على الصبح يا يارا

يارا :- يلا يا ندوش علشان نعمل اللى اتفقنا عليه

ندي :- الله يحرقك انتى وهو فى ساعه واحده عايزه انام يا خلق

يارا :- بعد الشر عليه

ندي :- يا محننننننى

يارا :- يلا يا حبيبتى قومى ربنا يهديكى

ندي :- هوف حاضر وقامت وقفت وقالت اتزفتى قدامى

يارا :- مش هتغسلى وشك طيب

ندي :- لاء هو كده عجبك ولا اروح اكمل نوم

يارا :- لاء خلاص حلو كده امشى يلا وخرجوا الاتنين بره وكان قاعد انس مع أمه بيشرب القهوه وبيقراه فى الجريده

يارا :- بصت عليه بحب واتنهدت وقالت صباح الخير يا خالتى

ام ندي :- صباح النور يا بنتى تعالى افطرى

يارا :- شكرآ يا خالتى مش عايزه وبصت على ندي لاقتها نايمه وهى قاعده خبطتها بكوعها فى بطنها صحيت ندى من نوم وقالت بألم

ندي :- ااااه

ام ندي :- فيه ايه يا بنتى

ندي :- وهى بتبص بغيظ ليارا قالت مفيش

ام ندى :- خدى طيب أدى ليارا كوباية الشاى بلبن دى

ندى :- ما تقوم تخدها هى اتشلت

يارا :- شكرآ يا خالتى مش عايزه وبصت لندى وقالت بصوت واطى ده انا هنفخك بس لما نمشى من هنا

ندى :-احم ما تحاولى يا ماما تكلمى يارا توافق على العريس ده بدل ما هى منشفه دماغها ومش عايزاه

ام ندى :- ليه يا بنتى مش موافقه عليه

يارا :- مش هو اللى بحلم بيه يا خالتى انا ليا مواصفات خاصه لشريك حياتى

ندى :- ايه هى بقى

يارا :- يكون طول بعرض شخصيه كده وعنده هيبه فى نفسه ويكون تقيل واخده بالك يا ندى تقيل واهم حاجه يكون ظابط فى الجيش حلم عمرى اتجوز ظابط فى الجيش

ندى :- وطنيه وكده ما انتى عارفه يا ماما الناس كلها بقت وطنيه

يارا :- بصت على انس لاقته بيقراه فى الجريده بصت لندى بغيظ

ندي :- انس يا ااااانس

انس :- ايه عايزه ايه

ندى :- تشرب شاى بلبن

انس :- لاء شكرآ وطبق الجريده وقام وسابهم

يارا :- بصت لندى وقالت احيه

ندى :- لا حياة لمن تنادى

يارا :- مفيش فايده

ام ندى :- تشربوا شاى بلبن

ندى :- بصت ليارا وقالت ليمون ساقع ساقع يا ماما

يارا :- خرجت تجرى

ندى :- بت يا يارا استنى يا زفته

يارا :- بعصبيه اخوكى ده ايه جبله مش بيحس حمار مش بيفهم بجم مش بيتكلم ايه برود الأعصاب اللى هو فيها دى تقيل لاء ده مش تقيل ده حجره لاء مش حجره ده جبل مبيتهزش انتى ساكته ليه وبتبصى على ايه وبصت وراها مكان ما هى بتبص لاقت انس واقف وراهم بصت لندى وهزت راسها وقالت ايه ها الدنيا باظت صح

ندي :- هزت راسها بمعنى ايوه

انس :- ادخلى جوه يا ندى

ندى :- ها

انس :- ادخلى جوه

ندى :- ح.ح.حاضر ولسه هتدخل

يارا :- مسكت فيها وقالت ا.ا انا جايه معاكى

ندى :- م.م.ماشي يلا

انس :-قال بصوت عالى ليارا استنى انتى هنا وانتى ادخلى جوه زى ما قولتلك

يارا :- بخوف متدخليش

ندى :- بصت ليها بقلة حيله وسابتها ومشيت

يارا :- بصوت متقطع ن.ن.ندى يا ن.ن.ندى

انس :- قولى بقى كنتى بتقولى عليا ايه

يارا :- ها م.م.مقولتش حاجه

انس :- بزعيق متكذبيش

يارا :- انتفضت من مكانها ودموعها نزلت منها وقالت م.م.م

انس :- هتمأمأى كتير كده انطقى كنتى بتقولى ايه عليا

يارا :- بدموع انا عايزه امشى ولسه هتمشى

انس :- مسكها من دراعها

يارا :- اتصدمت وبصت ليه بتوتر

انس :- قرب من ودنها وقال متخلقتش على الأرض لسه اللى تفكر تغلط فيا فاهمه وداس على دراعها جامد

يارا :- بألم ودموع قالت ف.ف.فاهمه

انس :- ساب دراعها ودخل الشاليه

ندى :- خرجت تجرى واخدت يارا فى حضنها

يارا :- مسكت فى ندى وقعدت تعيط

ندي :- متزعليش يا يارا انس اخويه مش بيحب حد يغلط فيه وهو للاسف سمع كلامك من أوله وانتى بتشتمى فيه

يارا :- بدموع انا بكرهوا بكرهوا

ندى :- لا شيخه ولما انتى بتكرهيه قرفانه ليه بيه

يارا :- مسكت فيها اكتر وعيطت وقالت علشان بحبه اوى

ندى :- ضحكت عليها وقالت مجنونه يلا امسحى دموعك وتعالى لما اشوف اخرة صبرى فين

يارا :- مين

ندى :- هيييييح مالك

يارا :- طيب هو احنا كده خلاص فشلنا فى الخطط كلها مع اخوكى

ندى :- نهار اسوح عليا انتى محرمتيش امشى قدامى يا يارا امشى وهزت راسها يمين وشمال

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند شاليه تمارا

صحيت تمارا من نومها دخلت اخدت شاور وخرجت أدت فرضها وخرجت من اوضتها لاقت كلهم قاعدين قالت

تمارا :- صباح الخير

الكل :- صباح النور

سميه :- تعالى يا حبيبتى افطرى

تمارا :- معلش يا ماما مليش نفس وقعدت جمب ابوها وحطت راسها على كتفه

عماد :- باس راسها وقال عامله ايه دلوقتى يا حبيبتى

تمارا :- الحمدالله كويسه

وفى الوقت ده دخل يوسف وهو متعصب وقال

يوسف :- عم عماد كنت عايز اقولك على حاجه

عماد :- قول يا ابنى

يوسف :- ينفع كده بنتك تقعد مع واحد غريب لنص الليل

تمارا :- كانت لسه هترد ابوها بص ليها تسكت

عماد :- فيها ايه مدام بنتى بتعمل كل حاجه بعلمى يبقى مفيش مشكله

يوسف :- بعلمك

عماد :- ايوه بنتى مش بتعمل حاجه من ورايا وهى استأذنت منى وانا وافقت

يوسف :- بس يا عمى كده غلط ازاى تسمح لبنتك تقعد مع شاب بليل لوحدهم

عماد :- اولا هما كانوا قاعدين على البحر يعنى فى مكان مفتوح ثانيآ انا واثق فى بنتى جدآ وعارف انا مربيها ازاى ثالثآ بقى وده الاهم طول ما انا عايش محدش ليه حاجه عند بنتى تعمل اللى هى عايزاه

يوسف :- كده يا عمى براحتك عن اذنك وخرج وهو متعصب

تمارا :- حضنت ابوها وقالت ربنا يخليك ليا يا بابا

عماد :- طبطب عليها وقال ويخليكى ليا يا حبيبتى

تمارا :- وقفت وقالت هدخل اغير هدومى

عماد :- انا جاى معاكى عايزك

تمارا :- تعال يا بابا ودخلوا الاتنين مع بعض الأوضه

كريم :- تفتكرى بابا عايز تمارا فى ايه

سميه :- مش عارفه الله اعلم وبعدين بصت لكريم وقالت انت ليه بطلت تعمل فيديوهات على التيك توك

كريم :- ها م.م.مفيش بس مش فاضى

سميه :- ده انت كنت بتبقى عسل فى الفيديوهات

كريم :- اكتفى بأبتسامه لامه ومردش عليها

فى الأوضه

دخلت تمارا مع ابوها الاوضه وقفلت الباب وراها وقالت

تمارا :- خير يا بابا

عماد :- طبعآ انتى عارفه أن اللى انتى عملتيه ده غلط مش معنى ان دافعت عليكى قصاده يبقى انا موافق على الغلط ده انا واثق فيكى يا بنتى بس مش واثق فى الشاب ده وبعدين مينفعش بنت تقعد مع شاب متعرفهوش لنص الليل على البحر

تمارا :- اسفه يا بابا مش هتحصل تانى

عماد :- مشى أيده على شعرها وقال يا حبيبتى انا خايف عليكى مش عايز حد يجيب سيرتك بكلمه كده ولا كده

تمارا :- حاضر اوعدك مش هتتكرر تانى الغلطه دى يا بابا

عماد :- ربنا يكملك بعقلك يا حبيبتى مين بقى الشاب اللى كنتى قاعده معاه ده

تمارا :- ده ياسين كان معايا انا ورحمه فى المدرسه هو محترم جدآ وخلوق اول ما جيت هنا حصلت ما بينا كلام وبعد كده انقذ كريم اخويه من الغرق هو اصلا شغال فى فريق الانقاذ على الشط هنا وبس بعد كده عرفت أنه كان معايا فى المدرسه وقعدنا مع بعض كذا مره بيحكى ليا عن حياته ولما بكون مضايقه واتكلم معاه بنسى الزعل ده واضحك

عماد :- انا مش هقولك خلينى أقابله ؛وقت ما تحبى أقابله واتعرف عليه قوليلى ماشى

تمارا :- ابتسمت ليه وقالت ماشى

عماد :- باس راسها وقال هروح اشوف عمك حسام فين العب معاه دور شطرنج واغلبه زى كل مره وسابها وخرج

تمارا :- بصت على ابوها وهو ماشى وابتسمت وبعدين قالت ماشى يا يوسف أنا هعرفك تدخل فى حياتى ازاى وقامت غيرت هدومها وخرجت من الشاليه

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند رحمه

كانت حاسه بشوية مغص فى بطنها دخلت الحمام وخرجت وهى متعصبه وقالت

رحمه :- يوووووه بقى مش وقتك خالص هنزل البحر ازاى انا دلوقتى هوف اهى نص الاجازه كده راحت وغيرت هدومها وخرجت وقالت ماما انا هخرج اتمشى شويه على البحر

سميحه :- ماشى يا بنتى

رحمه :- خرجت وراحت عند الشط ومشيت على المايه وقابلت بدر هو كمان واقف على الشط قالت انت واقف كده ليه

بدر :- ها اصل زهقت من نزولى المايه قولت اقف على الشط شويه

رحمه :- بصت على هدومه وقالت بس انت هدومك مش مبلوله

بدر :- ها ا.ا.اه ما انا روحت غيرت هدومى وجيت وانتى بقى منزلتيش المايه ليه شكلك من البنات اللى بتخاف من البحر

رحمه :- لاء خالص انا بحب انزل البحر جدآ بس احم تعبانه شويه

بدر :-لاء الف سلامه عليكى

رحمه :- الله يسلمك عن اذنك ولسه هتمشى

بدر :- لاء استنى رايحه فين

رحمه :- هتمشى شويه

بدر :- تمام موافق اتمشى معاكى

رحمه :- نعم !

بدر :- اقصد يعنى همشى معاكى علشان محدش يعاكسك لازم يكون معاكى رجل قوي زى

رحمه:- احلف بأمارة ما ايد اخويه يوسف لسه سايبه اثر على وشك

بدر :- هو انتى بتعتبرى اخوكى ده انسان عادى زينا كده

رحمه :- امال ايه

بدر :- لاء غلطانه اخوكى من الوحوش اللى بتطلع فى افلام الخيال ده ودانه بطلع نار كف أيده مرزبه

رحمه :- ضحكت على كلامه وقالت انت مشكله

بدر :- استنى كده

رحمه :- بأستغراب ايه فيه ايه

بدر :- الضحكه دى بجد

رحمه :- لاء كده وكده

بدر :-أصلها حلوه اوى

رحمه :- بصت ليه بأستغراب وقالت تعرف انك شخصيه غريبه تحس انك مجنون ودمك خفيف طيب اوى بس مش عارفه بقى خلطه كده مش راكبه على بعض الصراحه

بدر :- اوقات كتير الناس بتقول على اللى بيحب الضحك والهزار عبيط واهبل مع أن انا بشوف اوقات الضحك والهزار الكتير دول بيبقى وراهم دمعه مستخبيه ساعات بنحاول نهرب من واقع مر بالضحك والهزار يا رحمه

رحمه :- مين قال كده باللعكس عمر الضحك والهزار ما كانوا عيب يا بدر وعلى فكره انا اخد بالى أن رغم ضحكك وهزارك فيه حزن فى عينك لو حابب تتكلم انا ممكن اسمعك

بدر :- ابتسم ليها وقال مأخدش اشارك حد فى مشاكلى

رحمه :- ليه

بدر :- سيبك انتى من مشاكلى المهم مردتيش عليا هى ضحكتك دى بجد

رحمه :- بصت ليه بأعجاب وقعدت تضحك

بدر :- بضحك امووووت انا وكملوا مشى مع بعض

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند ندي

سابت يارا وراحت تشوف مالك فين بس ملاقتهوش اتنهدت ولسه بتلف سمعة صوت مالك بيتكلم مع حد فى التليفون بالانجلش مشيت براحه وراحت تسمع المكالمه لاقته بيقول (الترجمه علطول)

مالك:- واحشتينى اوى عامله ايه

المتصل :-............

مالك :- انا كويس يا زوزو بس نقصنى وجودك معايا

المتصل :- ...............

مالك :- دى كانت احلى واجمل ايام مع بعض

المتصل :-...............

مالك :- اكيد هاجى اشوفك واحشنى هزارك وضحكك معايا انتى كنتى اقرب واحده لقلبى بعد يوسف احلى ايامى قضيتها فى شقتك

ندى :- سمعت الكلام ده دموعها نزلت منها وطلعت تجرى تدور على البنات

مالك :- مش ناويه تيجى مصر علشان اعرفك على البنت اللى خطفت قلبى

المتصل :-...............

مالك :- هستناكى بوسى ليا اولادك جاك وجيسي باى وقفل السكه وراح يشوف فين ندى

ندى :- شافت تمارا لسه خارجه من الشاليه بتاعها راحت تجرى عليها واترمت فى حضنها وقعدت تعيط

تمارا :- بأستغراب مالك فيه ايه وفى الوقت ده جات يارا وقالت

يارا :- ايه ده مالها

تمارا :- معرفش لاقتها بتعيط ومقالتش حاجه

يارا:- مالك يا ندي

ندى :- بعصبيه متجبوش اسم الزفت ده قدامى

تمارا :- اسم مين

ندى :- مالك

تمارا :- ليه ايه اللى حصل

ندى :- بدموع طلع يعرف واحده وكان بيتكلم معاها وبيقولها واحشتينى

يارا :- طيب ما يمكن أمه ولا أخته وبيكلمهم عادى

ندى :- لاء بيقولها انتى اقرب حد لقلبى واجمل ايام قضتها فى شقتك فيه حد هيقول لأمه ولا لأخته كده

تمارا :- بصوت واطى كلهم و****

يارا :- طيب أهدى

ندى :- انا عمرى ما كنت أتوقع أن مالك يطلع كده

تمارا :- عمرك ايه انتى كمان هتنخعى ده انتى لسه عارفه قريب

يارا :- صح يا ندى عمرك ايه يا حبيبتى امال لو كنتى زينا انا وتمارا كنتى عملتى ايه ها احنا اللى نقول عمرنا علشان ضيعنا على وهم

ندي :- انا مصدومه فيه اوى يا بنات طلع بيحب واحده وقلبه مشغول بواحده تانيه

مالك :- انا قلبى مشغول بواحده لسه عارفها من قريب اوى دمها خفيف ومجنونه؛ عندها تلت اربع مخها ضارب بس خطفت قلبى؛ منين ما تروح اروح وراها ومقدرش استحمل دمعه واحده من اللى نازلين من عيونها دول

ندى :- بصت لتمارا وقالت هو صح

تمارا :- ابتسمت وهزت راسها وقالت اه

ندى :- وبيكلمنى انا صح

يارا :- بأبتسامه اه

ندى :- مين هى دى بقى اللى بيقول عليها

تمارا :- الحدق يفهم بقى

ندى :- لفت ليه وقالت انت تقصد مين

مالك :- اقصد واحده علطول فاضحه الدنيا بحبها ليا واحلى كلام بسمعه منها عليا

ندي :- ايوه تقصد مين يعنى

مالك :- ابتسم وقال ومن أهم صفاتها أنها غبيه اوى

تمارا ويارا :- ضحكوا على كلمة مالك

ندى :- خلاص روح ليها خليها تنفعك

مالك :- بأستغراب هى مين دى

ندي :- اللى انت بتحبها وعمال تقول عليها جاى لينا احنا ليه

مالك :- حط أيده على وشه وقال غبيه غبيه يعنى

ندي :- لسه هتمشى

مالك :- بحبك انتى يا غبيه

ندى :- وقفت مكانها بأستغراب وبصت ليه وقالت بتحب تمارا صحبتى

تمارا بصت ليارا وقعدوا يضحكوا

يارا :- بضحك شكل الغباء عندهم بالوراثه

مالك :- بحبك انتى يا غبيه بحبك يا ندي

ندي :- احلف

مالك :- والله العظيم خطفتى قلبى من اول مره شوفتك فيها ؛فكرى علطول مشغول بيكى مبقتش شايف حد فى الدنيا غيرك انتى

ندي :- يا بنات

تمارا ويارا :- نعم

ندى :- اسندونى علشان هيغمى عليا

مالك :- ضحك عليها وقال والله العظيم مجنونه

ندي :- امشى

مالك :- نعم

ندي :- امشى بسرعه اخويه جاى

مالك :- طيب ما يجى

ندى :- لاء مش وقت استعباط خالص امشى بقولك

يارا :- تعال معايا واخدت مالك ومشيت

انس :- مين ده وواقف بيعمل ايه معاكم

ندي :- ها د.د.ده اللى متقدم ليارا صديقنا فى الشغل

انس :- بص عليهم وهما ماشين وقال ده اللى اللى رفضته ما هى موافقه عليه اهو وماشيه معاه عادى

ندى :- ها م.م.ما هو بيحاول يخليها توافق وسكتت وقالت ما انت كنت سامع الكلام اهو

انس :- محدش قالك أن انا اطرش وسابهم ومشى

ندى :- بصت لتمارا وقالت اخدى بالك من اللى انا اخد بالى منه

تمارا :- ابتسمت وقالت اخد بالى اوى وغمزت ليها وبعدين قالت صحيح ايه اللى انتى هببتيه ده ازاى تقولى أن مالك هيخطب يارا

ندي :- معرفش بقى من خوفى قولت كده بس اهى جات فى مصلحة يارا تعالى نروح عندهم

تمارا :- مجنونه ورايحه منك والله وراحوا عند يارا ومالك

يارا :- زعق ليكى ولا حاجه

ندي :- لاء خالص

تمارا :- بضحك مبروك يا عروسه

يارا :- مبروك على ايه

تمارا :- ندى قالت لاخوها أن مالك هيخطبك

يارا :- نااااااعم انتى ازاى تعملى كده

ندى :- معرفش بقى من خوفى قولت كده

مالك :- على البركه

ندي :- استنوا بس مش كان قاعد وعامل نفسه مش منتبه لينا واحنا بنتكلم

يارا :- ايوه

ندي :- اول ما قولت أن مالك متقدم ليكى رد بتلقائيه وقال مش ده اللى مش موافقه عليه يبقى معناه ايه

يارا :- معرفش

ندي :- وحياة امك هتستعبطى يا حيلتها

تمارا :- ايه يا معزا مالك لسه واقف بلاش تظهرى قدامه كده

مالك :- لاء خد راحتك يا برنس ده انا هشوف أيام عسل معاكى اخرتها مستشفى المجانين

التلاته قعدوا يضحكوا على كلام مالك

؛؛؛؛؛؛؛