رواية مزاوله حب الفصل الحادي عشر 11 بقلم دودو محمد

كانت تمارا بتكلم امها فى التليفون بطمنها عليهم وقفلت السكه معاها وسمعت صوت دوشه بره خرجت تشوف فيه ايه لاقت الناس بتقول أن فيه حد بيغرق قلقت على كريم وطلعت تجرى تشوف مين لاقته فعلا هو قعدت تصوت وتنادى على حد ينقذه وطلعت تجرى على المايه وقبل ما تدخل لاقت ايد حد بتوقفها بصت ليه وقالت

تمارا :- انت ارجوك الحق اخويه ابوس ايدك

ياسين :- اطلعى انتى متقلقيش ودخل يجرى وبدء يسبح لحد ما وصل عند كريم وشاله ورجع بيه تانى على الشط

تمارا :- طلعت تجرى عليه بدموع وقالت كريم رد عليا ارجوك كريم علشان خاطرى رد عليا وطمنى عليك

ياسين :- لو سمحتى ابعدى شويه علشان أنقذه وبدء يعمله الاسعافات لحد ما كريم بدء يكح بص ليه وقال حمدالله على السلامه يا بطل مدام مش قد السباحه بتنزل ليه

كريم :- قعد يكح

ياسين :- خبط على كتفه وقال اجمد يا بطل وقام وقف ومشى

تمارا :- كريم انت كويس

كريم :- بتعب كويس بس خدينى الشاليه

تمارا :- طيب تعال وسندته قام من على الأرض ودخلتوا الشاليه وقعدته على الكنبه وقعدت قصاده على ركبتها ومسحت وشه وقالت حاسس بتعب ولا حاجه اخدك الدكتور

كريم :- لالالا انا كويس بس كنت حاسس ان انا خلاص مش هعيش تانى

تمارا :- بلهفه بعد الشر عليك يا حبيبى متنزلش البحر تانى بقى

كريم :- لاء ازاى بس وانا جاى هنا ليه

تمارا :- انا خايفه عليك يا كريم

كريم :- متخافيش يا تمارا بس بلاش تقولى لماما اللى حصل ده

تمارا :- لاء طبعآ مش هقولها دى يغمى عليها لو عرفت

كريم :- هقوم اخد شاور واريح شويه

تمارا :- ماشى يا حبيبى

كريم :-سابها ودخل الحمام

تمارا :- خرجت من الشاليه وراحت تتمشى شويه وشافت ياسين راحت عنده وقالت شكرآ

ياسين :- رفع راسه لفوق وقال طيب ونزل راسه لتحت

تمارا :- اتغاظت من طريقته وقالت تصدق انك واحد قليل الذوق

ياسين :- رفع راسه تانى وقال شكرآ

تمارا :- ومستفز

ياسين :- وقف وقال بت انتى عايزه ايه بالظبط

تمارا :- وانا هعوز من شكلك ايه فكرتك بنى أدم وقولت اجى اشكرك علشان أنقذت اخويه بس طلعت غلطانه ولاقيتك واحد حيوان ولسه هتمشى

ياسين :- مسكها من دراعها وقال انا لو عليا مكنتش ساعدك فى حاجه خالص بس انا اخلاقى متسمحش ليا أتأخر فى مساعدت حد حتى لو الحد ده زباله

تمارا :- زباله فى عينك لم لسانك احسنلك

ياسين :- مش هلم ورينى هتعملى ايه

تمارا :- سيب دراعى يا حيوان

ياسين :- داس عليه اكتر

تمارا :- غمضت عينيها بألم وقالت قولتلك سيب دراعى بس حست بأيد تانيه بتشد ايديها من ايد ياسين فتحت عينيها وقالت بصدمه يوسف

يوسف :- داس على أسنانه وقال ازاى تتجرئ وتمد ايدك عليها

ياسين :- وانت مين كمان يا حيلتها

يوسف :- ضربه بالبوكس وقال شئ ميخصكش يا روح امك

ياسين :- ساب دراع تمارا ومسك وشه وقال انت بتمد ايدك عليا

يوسف :- انت شايف ايه

ياسين :- مسكه من هدومه وقال ده انا هدفنك بالحياه هنا

تمارا :- بخوف سيبه يا واطى

يوسف :- ارجعى وراه يا تمارا بقولك ارجعى وراه

تمارا :- رجعت لوراه ودموعها نزلت منها

يوسف :- وقع ياسين فى الارض وقعد يضرب فيه وقال بعد كده لو فكرت تلمسها همحيك من الدنيا خالص فاهم وقام وقف ولسه هيمشى

ياسين :- شده وقعه فى الارض وقعد يضرب فيه وقال متخلقش لسه اللى يفكر يمد أيده عليا يا حيلتها

يوسف :- وهو وشه كله بيجيب دم وقع ياسين على الأرض تانى وقعد يضرب فيه والناس مش قادره تبعدهم عن بعض

تمارا :- بدموع كفايه بقى كفايه

يوسف :- اول ما شاف دموع تمارا قام وقف وتف على ياسين ومسك ايد تمارا ومشى وراحوا على الشاليه بتاع تمارا

تمارا :- سحبت ايديها من ايد يوسف وقالت ممكن افهم انت جاي ورايا ليه

يوسف :- جاى اخدك يا تمارا

تمارا :- تخدنى فين

يوسف :- ترجعى معايا

تمارا :- انت عبيط يا ابنى ارجع معاك فين وبعدين سايب خطيبتك ليه وجاى ورايا ده انت هتبقى عريس بكره مبروك فرحانه علشانك اوى اوى

يوسف :- تمارا انا عارف ومتأكد إن هروبك ده علشان متحضريش فرحى

تمارا :- والله ومين قالك بقى أن شاءالله كل الحكايه أن انا جيت اريح اعصابى شويه من ضغط الشغل

يوسف :- كدابه

تمارا :- وانا هكدب ليه يا ابنى

يوسف :- علشان بتحبينى

تمارا :- انت ليه مش عايز تصدق أن انا خرجتك من قلبى من اللحظه اللى شوفتك خاطب فيها

يوسف :- بالسهوله دى

تمارا :- لفت واديته ضهرها وربعت ايديها على صدرها وقالت اه عادى

يوسف :- راح وقف قصادها وقال تمارا تتجوزينى

تمارا :- بصت ليه بصدمه وقالت نعم ؟!

يوسف :- تتجوزينى

تمارا:- وارين ؟!

يوسف :- هتجوزها برضه

تمارا :- بأستغراب ازاى يعنى ؟!

يوسف:- يعنى هنتجوز انا وانتى النهارده واهلى واهلك جاين النهارده وارين هتجوزها بكره اصلح الغلطه اللى عملتها وهبقى أطلقها قدام شويه

تمارا :- بجد !!!

يوسف :- يا تمارا انا بحبك عارف ان انا غلط فى حقك لما عملت علاقه مع ارين بس انا شاب وضعيف وهناك كل حاجه مباحه واكيد شيطانى هيوزنى وفعلا ده اللى حصل عمرى ما بطلت افكر فيكى كنت بحلم بيكى علطول كنت بتخيل شكلك لما كبرتى ذكرياتنا مع بعض عايشه لحد دلوقتى معايا يا تمارا

تمارا :- ضحكت وقالت يعنى انت عايز كل حاجه ومتخسرش اى حاجه عايزنى انا وفى نفس الوقت عايز ارين والمفروض اول ما تطلب منى الجواز هجرى على حضنك واقولك طبعآ موافقه صح

يوسف :- لاء مش صح انا قولتلك أن انا ندمان على اللى حصل مع ارين بس مقدرش اكون ندل واسيبها بعد اللى حصل بس هتجوزها فتره واطلقها وانتى اللى هتبقى مراتى وحبيبتى وام اولادى وهنعيش مع بعض احلى ايام عمرنا

تمارا:- واهلى واهلك موافقين على الكلام ده

يوسف :- محدش من أهلك ولا بابا يعرف حاجه

تمارا :-امال هما جايين ليه

يوسف :- امى قالت ليهم أننا هنعمل الفرح هنا وهما جايين علشان كده

تمارا :- رفعت حاجبها وقالت شاطر اوى فى الكدب يا يوسف اطلع بره

يوسف :- يا تمارا افهمينى انا بحبك

تمارا :- حاولت تسيطر على دموعها وغمضت عينيها وقالت اطلع بررررره

يوسف :- مسك ايديها وقال علشان خاطرى يا تمارا بلاش غضبك يسيطر على حبك ليا انتى لسه بتحبينى

تمارا :- رفعت ايديها وضربته بالقلم وقالت ده علشان يفوقك يا يوسف روح لخطييتك وانسانى انا عمرى ما هكون ليك عمرى واديته ضهرها

يوسف :- حط أيده على خده وقال انتى عمرك ما هتكون لحد غيرى يا تمارا

تمارا :- غمضت عينيها بوجع وقالت اطلع بره

يوسف :- بص ليها والدموع فى عينيه ومشي وقبل ما يخرج من الباب

تمارا :- استنى

يوسف :- وقف مكانه بأستغراب

تمارا :- دخلت جوه وخرجت وقالت اقعد اعملك الجروح اللى فى وشك دى مينفعش تحضر فرحك بالشكل ده يا عريس

يوسف :- بصلها بوجع وخرج يجرى من الشاليه

تمارا :- دموعها نزلت منها وقعدت على الكنبه وحطت ايديها على وشها وقالت ليه تعمل فيا كده يا يوسف ليه وقعدت تعيط

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى القاهره

فى الشركه

دخلت يارا المكتب بتاعها تخلص شغلها علشان تقدم على الاجازه وبعد وقت دخل مالك وهو قلقان وقال

مالك :- صباح الخير يا يارا

يارا :- صباح النور يا مالك

مالك :- بقلق امال فين ندي

يارا :- ندي مش هتيجى النهارده

مالك :- بلهفه ليه مالها فيها حاجه

يارا :- اطمن يا مالك ندي كويسه بس بتحضر نفسها علشان بكره رايحين اسكندريه

مالك :- بأرتياح الحمدالله انها كويسه يعنى اخوها وافق

يارا :- ايوه كلنا رايحين بكره أن شاءالله وانا هقدم على اجازه ليا وليها

مالك :- وانا كمان كده كده رايح النهارده

يارا :- بأستغراب النهارده طيب وفرح يوسف

مالك :- يوسف اه ما هو ناوى يعمل الفرح هناك

يارا :- نعم

مالك :- صمم انه يعمل الفرح فى اسكندريه

يارا :- يا حظك الاسود يا تمارا يعنى هى هربانه منه رايح وراها ربنا يقويها ويصبر قلبها

مالك :- تمارا شخصيه قويه وهتستحمل

يارا :- صعبه اوى عليها ربنا معاها

مالك :- يارب احم ه.ه.هو انا ممكن اطلب منك طلب

يارا :- اه طبعآ اطلب

مالك :- كنت عايز رقم ندي

يارا :- احم هو انا مقدرش اعمل كده بس ممكن اساعدك بطريقه تانيه

مالك :- بلهفه ايه هى

يارا :- اخليك تكلمها على تليفونى

مالك :- بفرحه بجد

يارا :- ابتسمت ليه وقالت ايوه ثوانى وخرجت تليفونها من الشنطه وطلبت رقم ندى وانتظرت ردها

ندي :- ايه يا مزتى عملتى ايه اخدى اجازه

يارا :- لاء لسه هخلص شغل وهروح اقدم عليها المهم حد جنبك

ندي :- لاء محدش جنبى طمنينى مالك عامل ايه عرف أن احنا رايحين اسكندريه

يارا :- اه عرف ،بقولك هو عايز

ندى :- قطعتها وقالت شكله ايه النهارده اكيد عسل زى كل يوم انا مش عارفه ازاي هيعدى عليا يوم بحاله من غير ما اشوفه ده واحشنى اوى اوى

مالك :- وانتى واحشتينى اوى

ندى :- ها م.م.مالك طيب ازاى ها ازاى هو فى الشغل والبيت ازاى

مالك :- ضحك وقال ما انتى اللى دايمآ متهوره

ندي :- ه.ه.هى فين الواطيه اللى سلمتنى ليك

مالك :- ضحك وقال انا اللى اخد من ايديها التليفون كنت هتجن واسمع صوتك

ندي :- ها

مالك :- احلى خبر سمعته انك هتروحى معانا اسكندريه وهشوفك علطول

ندي :- و.و.وانا كمان فرحانه

مالك :- انا ممكن اخد رقمك

ندي :- ها ل.ل.ليه

مالك :- علشان ببقى عايز اطمن عليك ومش عارف

ندي :- احم م.م.ماشي هخلى يارا تديهولك

مالك :- هتوحشينى لحد بكره باى

ندي :- بتوتر وكسوف ب.ب.باى

يارا :- ندوش قلبى اكيد عكيتى الدنيا كالعاده

ندي :- اللهى يجيبوا ويحطوا عليكى يا بعيده ازاى يا جزمه يا واطيه تديله التليفون وانا بكلمك ده سمعنى وانا بقولك أنه واحشنى

يارا :- بضحك ما انتى اللى متسرعه كنت لسه هقولك أنه عايز يكلمك وقطعتينى تستاهلى

ندي :- بس شوفتى الواد عسل ازاى وهو بيطلب الرقم منى ولا لما قال ان انا هوحشه يا لهوووى انا حاسه نفسى بحلم هو فيه جمال كده فى الدنيا

يارا :- المجانين فى نعيم

ندي :- اديلوا الرقم اصل الواد صعب عليا اوى

يارا :- يا حونينه عقبال ما اخوكى يصعب عليا هو كمان واديلوا الرقم بتاعى

ندي :- بضحك انس يصعب عليكى ميصعبش عليكى غالى يا حبيبتى

يارا :- انا اصلا مش مصدقه نفسى اخوكى كلمنى النهارده

ندي :- بصدمه لاء احلفى

يارا :- اه والله

ندي :- بفرحه قالك ايه

يارا :- كنت ببص على باب اوضه وخبط فيه لاقته بيسألنى ببص على باب اوضه ليه

ندي :- يا خبر ابيض على الكسفه السوده دى وعملتى ايه

يارا :- ولا حاجه حسيت أن قلبى هيوقف عليا زقته وطلعت اجرى

ندي :- يا لهوى عليكم

يارا :- امته الحجر ده هيلين ويحس بيا

ندي :- يارب يا حبيبتى متنسيش بقى الاجازه باى

يارا :- باى وقفلت السكه مع ندى وقعدت تشوف شغلها

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى اسكندريه

تمارا حست نفسها مخنوقه خرجت تشم شوية هوا شافت يوسف قاعد فى الشاليه بتاعهم اللى جنب الشاليه بتاعها بصت ليه بقرف ومشيت بصت مكان ما بيكون ياسين قاعد ملاقتهوش مشيت تبص عليه ملاقتهوش سألت الكافتيريا عنه قالوا إنه فى الشاليه الخاص بيه سألت عن مكانه وراحت عنده وخبطت على الباب وانتظرت أنه يفتح ليها وبعد وقت ياسين فتح الباب وبص لتمارا بقرف وقال

ياسين :- نعم عايزه ايه

تمارا :- انا جايه اطمن عليك واقولك انا اسفه

ياسين :- والله واسفك ده هعمل بيه ايه انتى مش شايفه شكلى عامل ازاى

تمارا :- ما هو برضه وشه شوارع بس انا مكنتش عايزه كل ده يحصل والله وبعدين انت اللى بدأت انا كنت جايه اشكرك علشان أنقذت اخويه بس انت استفزتنى لما اتكلمت معايا بأسلوب وحش

ياسين :- سكت شويه وقال عمومآ يا ستى حصل خير وفرصه سعيده ومد أيده وقال انا ياسين عبدالعزيز وانتى مين

تمارا :- مدت ايديها وسلمت عليه وقالت انا تمارا عماد من القاهره

ياسين :- انا كمان من القاهره شكلك مش غريب عليا معقوله انتى اللى فى بالى

تمارا :- بصت فى وشه وقالت وانت شكلك مش غريب حاسه ان شوفتك قبل كده

ياسين :- انتى تمارا عماد اللى كانت فى مدرسة ( ....) صح

تمارا :- صح وانت مين

ياسين :- انا ياسين كنت معاكى فى نفس الفصل وكان معاكى بنت صحبتك اسمها رحمه باين وأخوها كان علطول بيضربنى كل ما يلاقينى بكلمك

تمارا :- ايوه ايوه افتكرتك وضحكت وقالت وعلى فكره اللى ضربك دلوقتى هو هو اللى كان بيضربك زمان يوسف حسام

ياسين :- احلفى

تمارا :- اه والله بس انت هنا بتعمل ايه

ياسين :- شغال مع فريق الانقاذ البحري وانتى

تمارا :- انا جايه يومين اريحى اعصابى شويه من الشغل

ياسين :- واتجوزتى انتى ويوسف ده

تمارا :- بوجع ل.ل.لاء يوسف خاطب وفرحه بكره

ياسين :- غريبه مع أنكم وانتوا صغيرين كان بيحبك اوى وبيغير عليكى من واحد يكلمك

تمارا :- اتنهدت بوجع وابتسمت وقالت اهو انت قولتها واحنا صغيرين مفيش حاجه بتفضل على حالها يا استاذ ياسين

ياسين :- ايه استاذ دى ياسين بس اتفضلى

تمارا :- وده ينفع برضه انا ماشيه سلام

ياسين :- هشوفك تانى

تمارا :- انا لسه اول يوم ليا هنا قاعده اسبوع يعنى هتشوفنى كتير واه بلاش تنام النومه اللى كنت نيمها على الأرض دى وضحكت

ياسين :- ضحك وقال متفكرنيش ده انا طلوعى مش حاسس بيها من ساعة ما وقعتى عليها

تمارا :- متزعلش بقى باى وسابته ومشيت

ياسين :- بص عليها وهى ماشيه وابتسم ودخل وقفل الباب وراه

يوسف:- كان ماشى وراه تمارا ومتابع اللى بيحصل ومتغاظ من وقفت تمارا مع ياسين واول ما ياسين قفل الباب راح مسك تمارا من دراعها بغيظ

تمارا :- انت بتعمل ايه هنا

يوسف :- انتى اللى بتعملى ايه هنا مع البنى أدم ده

تمارا :- شئ ميخصكش وشدت دراعها منه ومشيت

يوسف :- داس على أسنانه بغيظ وقال ماشى يا تمارا ومشى وراها

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

جاء الليل واهل تمارا وأهل يوسف وصلوا اسكندريه وكانوا تعبانين وكلوا دخل على اوضه وناموا واشرقت شمس صباح يوم جديد بنورها الساطع فى سماء والاسكندريه لتبدء تمارا بفتح عيونها على صوت ابوها ابتسمت ليه وقالت

تمارا :- صباح الخير يا بابا

عماد :- صباح النور يا حبيبتى عامله ايه دلوقتى

تمارا :- كويسه يا بابا الحمدالله

عماد :- انا مش حابب اللى هيحصل ده بس انا مليش دعوه كل واحد حر

تمارا :- تقصد على فرح يوسف يعنى علشان هيعمله هنا عادى وايه يعنى خليه يعمله ويفرح ده لو قدر يفرح

عماد :- قصدك ايه

تمارا :- ولا حاجه متقلقش عليا يا حبيبى انا كويسه انا تربيتك يعنى عندى قوه اقدر استحمل ايه شئ فى الدنيا دى طول ما انت جنبى مفيش اى حاجه تقدر تكسرنى

عماد :- ابتسم ليها وطبطب عليها وباس راسها وقال ربنا يريح قلبك ويسعدك يا حبيبتى وقام خرج وسابها

تمارا :- بصت ليه وهو خارج من الاوضه واتنهدت وقامت دخلت الحمام

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

فى شاليه يوسف

دخلت سميحه اوضت يوسف لاقته قاعد على الكرسى قالت

سميحه :- صحيت يا ابنى

يوسف :- انا منمتش اصلا

سميحه :- انت قولتلها

يوسف :- ايوه

سميحه :- وقالتلك ايه

يوسف :- رفضت

سميحه :- انا قولتلك يا حبيبى أن تمارا صعب توافق على كلامك ده

يوسف :- وانا بحبها ومش هسكت غير لما اخليها توافق

سميحه :- ركز انت فى يومك النهارده ربنا يريح قلبك يا حبيبى وابتسمت ليه وخرجت وسابته

يوسف :- اتنهد وقام دخل الحمام وبعد وقت خرج لاقه ارين قاعده قال خير يا ارين

ارين :- وقفت وقالت جيت هنا عندها قبل مننا قولت ماشى حدد أننا نعمل الفرح هنا قولت مفيش مشكله بس محتاجه افهم ايه اللى بيحصل يا يوسف

يوسف :- تفهمى ايه يا ارين

ارين :- ليه كل ده مدام انت بتحبها هى عايز تتجوزنى انا ليه

يوسف :- اتنهد وقال علشان متعودش اكون ندل لازم اتحمل غلطتى يا ارين

ارين :- غلطتك!! يعنى جوازك منى ده علشان تصلح غلطتك مش علشان بتحبنى ؟!

يوسف :- بص الاتجاه التانى ومردش عليها

ارين :- وقفت قصاده وسحبت وشه ليها وقالت رد عليا يا يوسف انت خلاص مبقتش تحبنى

يوسف :- ارين انا من الاول محبتكيش يمكن اتشديت ليكى شويه بس انا قلبى مع تمارا

ارين :- دموعها نزلت منها وقالت انا حسيت بده من ساعة ما رجعنا لمصر يا يوسف روح ليها يا يوسف مش هقدر اعيش مع واحد قلبه مع واحده غيرى

يوسف :- لاء يا ارين انا لازم أصلح غلطتى

ارين :- لاء متتعبش نفسك الحاجه دى عادى وانت عارف كده دى اخر حاجه افكر فيها يا يوسف أنا كنت عايزاك انت عايزه قلبك مش عايزه انك تتجوزنى لمجرد ما انت حاسس بالذنب

يوسف :- بس

ارين :- مسحت دموعها وقطعته وقالت متقولش حاجه تانى يا يوسف كل كلمه بتقولها بتقتلنى انا هاخد مامى وهنسافر وانت اتجوز اللى قلبك اختارها وبصت ليه مده وخرجت تجرى من الاوضه وخبطت فى رحمه

رحمه :- بأستغراب مالها دى وهزت كتفها وخبطت على باب اوضت يوسف وسمعت صوته بيقولها تدخل فتحت الباب وقالت مالها ارين خارجه من عندك بتجرى وعماله تعيط

يوسف :- ارين راجعه ايطاليا تانى

رحمه :-بصدمه نعم طيب والفرح اللى كل حاجه فيه جهزت دى

يوسف :- هيتعمل بس ليا انا وتمارا

رحمه :- نعم

يوسف :- انا قررت هروح اطلب ايد تمارا والفرح يكون ليا وليها

رحمه :- بفرحه احلى خبر سمعته وقعدت تزق فيه وتقول طيب يلا روح بسرعه مستنى ايه يلا امشى

يوسف :- ضحك وقال طيب اصبرى يا مجنونه هتوقعينى ونزلوا الاتنين راحوا الشاليه عند تمارا وكلهم كانوا قاعدين بيفطروا

سميحه :- تعال يا حبيبى افطر

يوسف :- مش عايز يا ماما انا جاى لعم عماد

عماد :- ليا انا خير يا ابنى

يوسف :- عمى انا جاى اطلب ايد تمارا

الكل بص لبعض بأستغراب الا تمارا كانت قاعده بتاكل وموقفتش اكل

عماد :- بأستغراب ايه اللى انت بتقولوا ده يا ابنى انت فرحك النهارده

يوسف :- لاء ارين هترجع ايطاليا خلاص وانا بتمنى انك توافق ويبقى فرحنا النهارده

سميه :- بفرحه ياريت يا عماد وافق

عماد :-بزعيق اسكتى يا سميه وبص ليوسف وقال يا ابنى هو سليق بيض اهدا كده هو ايه اللى نعمل فرحنا النهارده ما تتكلم يا حسام قول حاجه

حسام :- انا لو عليا اكيد مش هلاقى لابنى عروسه زى بنتكم وفرحت أن ارين هترجع لبلادها بس طبعآ الرأى الاول والأخير لتمارا

سميحه :- ها يا بنتى ايه رأيك

تمارا :- وقفت اكل وقامت وقفت ونفضت ايديها وقالت شبعت الحمدالله ولسه هتمشى

سميه :- رد على سميحه يا بنتى

تمارا :- على ايه مش فاهمه

يوسف :- تمارا بلاش اسلوبك ده انتى فاهمه كل حاجه

تمارا :- ضحكت وقالت لاء مش فاهمه حاجه لاء بجد انت فاهم نفسك اصلا

يوسف :- تمارا انا قولتلك أن غلط وكنت بحاول اصلح غلطى وهى جت منها وقالت هتسافر يبقى ليه العند

تمارا :- ليه العند اممم بص يا ابن الناس طلعنى من دماغك علشان انا عمرى ما هكون ليك

يوسف :- يعنى ايه

تمارا :- يعنى انا مش موافقه عن اذنكم وسابته ومشيت

يوسف :- وانت رأيك ايه يا عم عماد

عماد :- صحبت الشأن رفضت وانا مقدرش اقول حاجه بعد رأيها دى حياته وهى حره فيها

يوسف :- بص ليهم وسابهم ومشي

سميه :- عجبك اللى بنتك عملته ده

عماد :- هى حره تعمل اللى عايزه تعمله وبص لحسام وقال متزعلش منى يا حسام

حسام :- لاء طبعآ مزعلش منك على حاجه زى كده الجواز قسمه ونصيب يا عماد

عماد :- ربنا يديم الاخوه ما بينا المهم تعال عايزك فى موضوع

حسام :- وقف وقال تعال يلا ومشوا الاتنين مع بعض

سميه :- شوفت اللى البت عملته

سميحه :- انا زعلت من تمارا اوى مكنتش اتوقع تعمل كده أبدآ

سميه :- سبيها عليا انا هخليها توافق

سميحه :- لاء غلط طبعآ مينفعش تغصبيها على حاجه

سميه :- واخده دماغ ابوها ناشفه وعناديه

سميحه :- ربنا يصلح الحال تعالى نتمشى شويه على البحر

سميه :- اتنهدت وقالت يلا ومشوا الاتنين مع بعض

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند يوسف

راح وهو متعصب عند مالك ودخل قعد من غير ولا كلمه

مالك :- بص ليه بأستغراب وقال صباح التكشيره

يوسف :-بوجع تمارا رفضت

مالك :- طيب ما انا قولتلك كده انها مش هتوافق

يوسف :- بس الكلام ده لو كنت هتجوز ارين

مالك :- نعم امال انت هتعمل ايه

يوسف :- ارين هترجع ايطاليا تانى

مالك :- ايه ده امته وازاى

يوسف :- مش وقته يا مالك المهم انها هتسافر خلاص المهم دلوقتى تمارا

مالك :- اصبر عليها شويه ما هى مش هتنسى اللى انت عملته معاها بسهوله

يوسف :- تصدق انا غلطان أن جيت اتكلم معاك انا ماشي

مالك :- يا ابنى انت استنى

يوسف :- شوح ليه بأيده وسابه ومشى

مالك :- حرك راسه يمين وشمال وقال مجنون وبص على تليفونه وقال اكلمها ومسك تليفونه ولسه هيطلب الرقم قال احسن ما يكون اخوها معاها هى كلها كام ساعه وجايه وساب تليفونه تانى ودخل الحمام

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

عند تمارا

كانت قاعده عند صخره بعيده عن الناس ودموعها نازله منها وبتفكر فى الكلام اللى قاله يوسف وفى الوقت ده حست بحركه جنبها بصت ليه ورجعت بصت تانى على البحر وقالت

تمارا :- جاى ورايا ليه

.......:-؟؟؟؟؟؟؟؟؟

؛؛؛؛؛؛؛؛؛؛؛